នៅពេលថ្មីៗនេះ លោកសមរង្ស៊ី
បានផ្ញើលិខិតមួយច្បាប់ជូនទៅកាន់បណ្តាមេដឹកនាំពិភពលោក ចំនួន២១ប្រទេស ដោយបានលើកឡើងនូវចំណុចជាច្រើនក្នុងនោះក៏បានលើកឡើងផងដែរថា
ខណៈពេល ដែលពិភពលោកកំពុងតែចាប់អារម្មណ៍នឹងការដោះលែងមេបក្សប្រឆាំងភូមា
គឺលោកស្រី អ៊ុងសាន ស៊ូជី ហើយបក្សប្រឆាំងរូបនេះ ត្រូវបានអនុញ្ញាតឱ្យចូលរួមការបោះឆ្នោតនៅពេលខាងមុខនេះនៅខណៈពេល
ដែលត្រូវក្រឡេកមើលប្រទេសកម្ពុជារយៈពេលប៉ុន្នានឆ្នាំថ្មីៗនេះ បានធ្វើដំណើរលើមាគ៌ាផ្ទុយនឹងលទ្ធិ
ប្រជាធិបតេយ្យនៅកម្ពុជា។
ក្នុងស្ថានភាពពីរផ្ទុយគ្នាស្រឡះសុទ្ធសាធ
សមរង្ស៊ីមិនអាចយកខ្លួនគាត់ ឬ ស្ថានភាពនៅក្នុង ប្រទេសកម្ពុជាទៅប្រៀបធៀបនឹងលោកស្រី
អ៊ុងុសាន ស៊ូជី ឬ ក៏ប្រទេសភូមាបានឡើយ។ ដោយឈរលើមូលដ្ឋាននៃភាពសមហេតុផលក្នុងកត្តានយោបាយដឹកនាំ
និងទិដ្ឋាភាពផ្លូវច្បាប់ សមរង្ស៊ី គឺជាទណ្ឌិតដែលត្រូវបានតុលាការដំបូងរាជធានីភ្នំពេញបានកាត់ទោសឱ្យជាប់គុកពីបទដកបង្គោលតំរុយព្រំ
ដែនដែលប្រើប្រាស់ដើម្បីកំណត់ខ្សែព្រំដែនក្នុងខេត្តស្វាយរៀង ដែលជាទង្វើផ្ទុយពីច្បាប់ជាតិ
និង នីតិវិធីសភាជាតិ ដែលក្នុងនាមលោកកាលណោះជាសមាជិកសភាម្នាក់ដែរ។ ក្នុងឋានៈជាទណ្ឌិត
សមរង្ស៊ី ត្រូវបានដកហូតអភ័យឯកសិទ្ធិ ហើយចូលបំរើទោសគុកតាមច្បាប់ជាតិ មុននឹងនិយាយអំពីការបោះឆ្នោត
ឬ ការសុំការលើកលែងទោស។ នេះហើយជានីតិរដ្ឋ ដែលសមរង្ស៊ីចង់បាន ហើយលោកត្រូវធ្វើជាគំរូ
ដើម្បីអនុវត្តនីតិរដ្ឋ។ ក្នុងស្ថានភាពនេះ លោកស្រី អ៊ុងុសាន ស៊ូជី មិនមែនសមរង្ស៊ី
ហើយសមរង្ស៊ី មិនមែន លោកស្រី អ៊ុងសាន ស៊ូជីដែរ។ ព្រោះ លោកស្រី អ៊ុងុសាន ស៊ូជី
មិនបានប្រព្រឹត្តបទឧក្រិដ្ឋ ក្នុងប្រទេសឡើយ។
ក្នុងទិដ្ឋភាពនយោបាយ សមរង្ស៊ី
ក្នុងឋានៈជាទណ្ឌិតបានព្យាយាម និងប៉ុនប៉ងទំលាក់រដ្ឋាភិបាល ដោយបានធ្វើការញ្ញុះញង់ឱ្យប្រជាជនធ្វើបដិវត្តប្រឆាំង
ដូចនៅក្នុងប្រទេសទុយណេស៊ី អេហ្ស៊ីប៘ ដែលប្រាស់ចាកពីគោលការណ៍នីតិរដ្ឋ និងលទ្ធិប្រជាធិបតេយ្យដ៏ពិតប្រាកដនោះ។ក្នុងស្ថានភាពដែល
ប្រទេសកំពុងបោះជំហ៊ានឆ្ពោះទៅមុខលើផ្លូវកំណែទម្រង់លើគ្រប់វិស័យដែលគ្មានប្រទេសណាដូចកម្ពុជានោះ
សមរង្ស៊ីបានឆ្លៀតឱកាសនិយាយមួលបង្កាច់អំពីស្ថានភាពមិនពិតប្រាកដក្នុងប្រទេសប្រាប់សហគមន៍អន្តរជាតិ
ហើយស្នើឱ្យបណ្តាប្រទេសទាំងនោះផ្តាច់ជំនួយមកកម្ពុជា ខណៈពេលដែលកម្ពុជាកំពុងត្រូវការទាក់ទាញ
ឱ្យមានការវិនិយោគទុននានាដើម្បីកសាងសេដ្ឋកិច្ចឱ្យបានចំរើនលូតលាស់ ហើយជីវភាពប្រជាជនបាន
ល្អប្រសើរពីមួយថ្ងៃទៅមួយថ្ងៃ។ តើសមរង្ស៊ីបានធ្វើអ្វីខ្លះ ដើម្បីការរីកចំរើនដល់ជាតិមាតុភូមិ
និងប្រជាជន ទាំងមូល? ផ្ទុយទៅវិញសមរង្ស៊ីបានយកបញ្ហាផ្ទាល់ខ្លួន
និងអារម្មណ៍យល់ឃើញផ្ទាល់ខ្លួនជាមាគ៌ានយោ បាយដើម្បីធ្វើការសងសឹកក្នុងឥរិយាបថប្រែប្រួលគ្មានហេតុផលសំរាប់ឱ្យប្រជាជនទទួលយកបានឡើយ។
អ្វីដែលប្រជាជនកម្ពុជា ដែលជាអ្នកបោះឆ្នោតបានយល់ដឹងយ៉ាងច្បាស់ថា សមរង្ស៊ីខ្លួនឯងផ្ទាល់បាន
ផ្ញើលិខិតសុំទោសជូនសម្តេច ហ៊ុន សែន កាលពីឆ្នាំ២០០៦ ថា គាត់បានសោកស្តាយខ្លាំងណាស់ចំពោះ
ការចោទប្រកាន់ទាំងអស់របស់គាត់មកលើសម្តេចថាជារឿងមិនពិតនោះទេ។
នេះជាការសារភាពមួយដ៏ច្បាស់លាស់របស់សមរង្ស៊ី
ដែលឆ្លុះបញ្ចាំងឱ្យឃើញនូវកំហុសខុសឆ្គងខាង នយោបាយមកលើរដ្ឋាភិបាល ក៏ដូចលើអ្នកដឹកនាំរដ្ឋាភិបាលកម្ពុជា។បើយ៉ាងដូច្នេះ
តើសហគមន៍ អន្តរជាតិ និងប្រជាជនកម្ពុជាអាចបន្តជឿលើសមរង្ស៊ីបាន ឬទេ? ត្រង់ចំណុចនេះ សមរង្ស៊ីបានបាត់បង់នូវតក្កវិជ្ជា ខាងនយោបាយ
ក៏ដូចការដឹកនាំនយោបាយសំរាប់ខ្លួនគាត់ផ្ទាល់ និងសំរាប់ជាតិមាតុភូមិផងដែរ។
ដូច្នេះ ត្រង់ចំណុចខាងការដឹកនាំនយោបាយវិញ
សមរង្ស៊ី មិនមែនលោកស្រី អ៊ុងសាន ស៊ូជីទេ ព្រោះ លោកស្រី អ៊ុងុសាន ស៊ូជី មិនបានអំពាវសុំឱ្យសហគមន៍អន្តរជាតិផ្តាច់ជំនួយមកភូមា
ហើយលោកស្រី ក៏មិនបានប្រើប្រាស់គំនុំផ្ទាល់ខ្លួន ដើម្បីដុតបញ្ឆោះកំហឹងប្រជាជនឱ្យធ្វើបដិវត្ត
ឬ ដើម្បីវាយ ប្រហារមកលើថ្នាក់ដឹកនាំរដ្ឋាភិបាលភូមាឡើយដែរ។ ក្នុងជីវភាពនយោបាយបច្ចុប្បន្ន
លោកស្រី អ៊ុងសាន ស៊ូជីបានគាំទ្រនយោបាយកែទម្រង់របស់រដ្ឋាភិបាល ហើយបានចូលរួមក្នុងការបង្រួបបង្រួម
និងស្ថាបនាជាតិ ភូមា។
រួមសេចក្តីមក ការសារភាពកំហុសរបស់សមរង្ស៊ី
ដែលបានវាយប្រហាររដ្ឋាភិបាល និងថ្នាក់ដឹកនាំ ពិសេសមកលើសម្តេច ហ៊ុន សែន តាមរយៈលិខិតមួយច្បាប់របស់គាត់កាលពីឆ្នាំ២០០៦បានធ្វើឱ្យ
សមរង្ស៊ីខ្លួនឯងបានបាត់បង់នូវតក្កវិជ្ជាខាងនយោបាយ ដែលប្រជាជនកម្ពុជាភាគច្រើនដ៏លើសលុប
និង សហគមន៍អន្តរជាតិលែងមានជំនឿលើការប្រឆាំងរបស់សមរង្ស៊ីមកលើរដ្ឋាភិបាលកម្ពុជាទៀតឡើយ។
ការពិត និងជាក់ស្តែង ប្រជាជនកម្ពុជាដ៏លើសលុបបានបន្តគាំទ្រដល់ការដឹកនាំរដ្ឋាភិបាលដោយ
គណបក្សប្រជាជនកម្ពុជា អាស្រ័យដោយរដ្ឋាភិបាលកម្ពុជាបាននិងកំពុងដើរលើផ្លូវដ៏ត្រឹមត្រូវការកសាង
និងអភិវិឌ្ឈជាតិមាតុភូមិ ដែលបានប្រែក្លាយសង្គមកម្ពុជាមួយដែលហិនហោចដោយសង្គ្រាមស៊ីវិលមកជា
ប្រទេសមានការឯកភាពទឹកដី សន្តិភាព ស្ថិរភាពនយោបាយ និងសន្តិសុខសណ្តាប់ធ្នាប់នៅទូទាំងប្រទេស
ពិសេស គឺការអភិវឌ្ឍ និងការរីកចំរើនមួយដែលប្រជាជនកម្ពុជាបាន និងកំពុងទទួលបាន។
ដូច្នេះហើយប្រជាជនកម្ពុជាទាំងមូលត្រូវតែថែរក្សាឱ្យបានគត់ហ្មត់នូវសមិទ្ធផលទាំងនោះជារៀងរហូតទៅ។
ដោយ
ឡុង សុគុណ