វាគួរឱ្យអាម៉ាស់ជាទីបំផុតចំពោះការចេញមុខមកបកស្រាយបំភ័ន្តសាធារណមតិជាតិ
និងអន្តរជាតិ ដោយលោក យឹម សុវណ្ណ អ្នកនាំពាក្យគណបក្ស សម រង្ស៊ី
ដែលបានឆ្លើយជាមួយអ្នកសារព័ត៌មានកាលពីពេលថ្មីៗនេះថា អ្នកដែលចាកចេញពីបក្សប្រឆាំងទៅចូលរួមជាមួយគណបក្សប្រជាជនកម្ពុជា
គឺជាស្លឹកឈើជ្រុះ តែគាត់ភ្លេចគិតថា
ដើមឈើនោះជិតដល់ពេលរលំដួលទៅហើយ។
ការពិតស្លឹកឈើជ្រុះ គឺដោយសារតែដើមឈើនោះ ងាប់ ឬស្អុយរលួយឬសកែវ ទើបមិនអាចផ្តល់លំនឹងដើម្បីទ្រស្លឹក
ឬមែកបានតទៅទៀត ដូច្នេះ ស្លឹក ឬមែកឈើនោះ មិនអាចនៅជាប់ដើមរបស់វាបានតទៅទៀត គឺត្រូវតែជ្រុះ ដោយគ្មានអ្វីមកឃាត់ឃាំងបានឡើយ នេះ គឺជាក្រិតក្រមរបស់ធម្មជាតិ
ហើយមិនយូរមិនឆាប់ដើមឈើស្អុយនោះ ប្រាកដជាដួលរលំ។
ដូចគ្នានេះដែរ ការចាកចេញរបស់មន្ត្រីជាន់ខ្ពស់ជាច្រើនក្នុងគណបក្សសម
រង្ស៊ី
ដែលបានសំរេចចិត្តនាំគ្នាមកចូលរួមក្នុងជីវភាពនយោបាយជាមួយគណបក្សប្រជាជនកម្ពុជា
នាពេលចុងក្រោយនេះ គឺពិតជាដោយសារការអស់ជំនឿទាំងស្រុងលើបក្សប្រឆាំងសម រង្ស៊ី នោះ។
មន្ត្រីជាន់ខ្ពស់របស់គណបក្សសម រង្ស៊ី ដែលបានចាកចេញពីបក្ស
គឺជាសមាជិកក្រុមប្រឹក្សាខេត្ត ប្រធាន និងសមាជិកក្រុមប្រឹក្សាស្រុក ខណ្ឌ សង្កាត់ នៅទូទាំងប្រទេស ដែលសកម្មភាពនៃការដើរចេញពីបក្ស គឺមានទ្រង់ទ្រាយធំណាស់
ហើយថែមទាំងមានកម្លាំងដូចមហាព្យុះកំបុតត្បូង
ដែលមិនអាចព្យាករណ៍ទុកបានជាមុន។
មន្ត្រីដែលបានចាកចេញ បានឱ្យដឹងថា ការដែលពួកគេសំរេចចិត្តមកចូលរួមជាមួយគណបក្សប្រជាជនកម្ពុជា
គឺដោយសារតែគណបក្សសម រង្ស៊ី គ្មានគោលនយោបាយច្បាស់លាស់ ថ្នាក់ដឹកនាំរបស់គណបក្សប្រកាន់គំនិត
«បើប្រឆាំង គឺប្រឆាំងផ្កាប់មុខ » គ្មានស្គាល់តម្លៃនៃសន្តិភាព
មានតែគំនិតបំផ្លាញភាពសុខសាន្តរបស់ប្រជាពលរដ្ឋ
មិនបានចូលរួមអភិវឌ្ឍប្រទេសជាតិ ហើយថែមទាំងធ្វើសកម្មភាពប្រឆាំង ដើម្បីបន្ទុចបង្អាក់ផែនការកសាង និងអភិវឌ្ឍប្រទេស
តាមរយៈការអំពាវនាវឱ្យប្រទេសម្ចាស់ជំនួយ ផ្តាច់ជំនួយជាដើម។ ល។
មន្ត្រី ដែលចាកចេញបានបន្ថែមទៀតថា របៀបនៃការដឹកនាំក្នុងបក្សសម
រង្ស៊ី សព្វថ្ងៃហាក់ដូចជា «ក្រុមហ៊ុនសម រង្ស៊ីផ្តាច់មុខ » ពីព្រោះថា ការដឹកនាំបក្សនយោបាយទាំងមូល
បែរជាត្រូវបានគ្រប់គ្រងដោយគ្រួសារនិយម ពីរ ឬបីគ្រួសារធំៗ ដែលក្នុងចំណោមនោះ
មានទាំងប្តី ទាំងប្រពន្ធ និងបង ប្អូនថ្លៃ ដណ្តើមតួនាទីគ្នាត្រួតត្រាក្នុងបក្ស។
ក្រៅពីនេះ ការសំរេចអ្វីមួយ គឺគណបក្សប្រឆាំងមួយនេះ មិនដែលទទួលយកមតិភាគច្រើនមុននឹងធ្វើការអនុម័តនោះទេ គឺសំរេចតាមតែថ្នាក់លើ ម្នាក់ពីរ និងពុំបានបង្ហាញអំពីតម្លាភាពបន្តិចសោះឡើយ
ដែលបណ្តាលឱ្យកើតមាននូវការខ្វែងគំនិត ជជែកទាស់ទែងគ្នារាល់លើកនៅពេលដែលមានការរៀបចំបែងចែកភារកិច្ចសម្រាប់ថ្នាក់ដឹកនាំបក្សម្តងៗ
តាំងពីថ្នាក់លើ ដល់ក្រោម។
ដោយមិនចង់អត្ថាធិប្បាយលំអិតអំពីទំនាស់ផ្ទៃក្នុងបក្សដ៏ធ្ងន់ធ្ងរនោះ
យើងគ្រាន់តែរៀបរាប់ត្រួសៗជុំវិញបញ្ហាខ្លះៗដែលជាការបញ្ជាក់របស់មន្ត្រីជាន់ខ្ពស់មួយចំនួន
បន្ទាប់ពីពួកគាត់ ចាកចេញនាពេលថ្មីៗនេះ បានឱ្យដឹងទៀតថា
នៅក្នុងគណបក្សប្រឆាំងសម រង្ស៊ី គឺមហាសែនពុករលួយ បក្ខពួក និងគ្រួសារនិយម
អត្តនោម័តនិយម និងផ្តាច់ការនិយម
ជាពិសេសក្រុមអ្នកដែលឃុបឃិតគ្នាអែបអបលោកប្រធានបក្សដ៏មហិមា ( លោក សម រង្ស៊ី )ដើម្បីការពារតំណែងរបស់ខ្លួន ។
ពីព្រោះថា ការរៀបចំតំណែងសំខាន់ៗនៅតាមខេត្ត ក្រុង និងមូលដ្ឋាន
គឺសិទ្ធិផ្តាច់មុខនៃការសំរេច គឺមានតែលោកសម រង្ស៊ី
ម្នាក់គត់ដែលមានឥទ្ធិពលជាងគេ។
លោកសម រង្ស៊ី បានប្រើប្រាស់អំណាចជាអ្នកទេសចរណ៍ផ្លូវវែង
នៅឯបរទេសក្នុងការដឹកនាំ
និងកាច់ចង្កូតបក្សនយោបាយមួយដែលកំពុងថមថយកម្លាំង
ឈានទៅរកស្ថានភាពខ្សោះខ្យល់ រលំដួលដោយមិនចាំបាច់មានអ្នករុញ។ ក្រុមអ្នកចាកចេញពីបក្សសម
រង្ស៊ី បានរៀបរាប់ក្នុងកំរិតមួយដែលគួរពិចារណាថា ការដែលពួកគាត់មិនអាចរស់នៅជាមួយគណបក្សសម
រង្ស៊ី តទៅទៀតបាននោះ គឺដោយសម្លឹងមើលឃើញថា គណបក្សសម
រង្ស៊ីសព្វថ្ងៃប្រៀបដូចសំពៅដែលគ្មានក្តោង ដូចជាទូកអត់ច្រវ៉ា ឬកាណូតគ្មានម៉ាស៊ីន ដែលវិលវល់មិនអាចទៅមុខរួច។
មន្ត្រីគណបក្សសម រង្ស៊ី ដែលបានមកចូលរួមនយោបាយជាមួយគណបក្សប្រជាជនកម្ពុជា
គឺពួកគាត់មាននូវការជឿជាក់ខ្ពស់មកលើគោលនយោបាយដឹកនាំត្រឹមត្រូវ
និងច្បាស់លាស់ ជាពិសេស
គណបក្សប្រជាជនកម្ពុជាពិតជាបានជួយសង្គ្រោះខ្មែរទាំងមូលឱ្យរួចផុតពីរបបប្រល័យពូជសាសន៍ប៉ុល
ពត ដ៏សាហាវយង់ឃ្នង ដែលផ្ទុយស្រឡះពីថ្នាក់ដឹកនាំរបស់គណបក្សសម រង្ស៊ី
បែជានាំគ្នាប្រឆាំងទៅនឹងថ្ងៃរួចពីសេចក្តីស្លាប់
នេះគឺជាការប្រឆាំងផ្កាប់មុខ និងគ្មានហេតុផល ។ ក្រៅពីនេះ
ជាបន្តបន្ទាប់មកទៀត លោកសម រង្ស៊ី បានបង្ខំឱ្យអ្នកតំណាងរាស្ត្ររបស់ខ្លួនធ្វើពហិកាមិនចូលប្រជុំដើម្បីការអនុម័តថវិកាសម្រាប់អភិវឌ្ឍប្រទេស
ដែលទង្វើរនេះ គឺជាការប្រឆាំងនឹងឆន្ទៈរបស់ប្រជាពលរដ្ឋម្ចាស់ឆ្នោត។
មិនត្រឹមតែប៉ុណ្ណោះ លោក សម រង្ស៊ី
ប្រើល្បិចកលដើម្បីឱ្យអ្នកតំណាងរាស្ត្ររបស់ខ្លួនមួយចំនួនលាលែងពីតំណែង
ប៉ុន្តែ បែជាឱ្យពួកគេទៅឈរឈ្មោះជាសមាជិកព្រឹទ្ធសភា។ នេះ
គឺជាការប្រើឧបាយកលបោកប្រាស់សាធារណមតិ ដើម្បីការកេងចំណេញនយោបាយ
ដោយពុំឈរលើភាពថ្លៃថ្នូរ និងកិត្តិយសសោះឡើយ។
គណបក្សនយោបាយមួយ ដែលមានតែការបំភិតបំភ័យ បង្ខំឱ្យសមាជិករបស់ខ្លួនស្បថ
និងការបង្ខំឱ្យសមាជិករបស់ខ្លួនធ្វើសច្ចាប្រណិធាន ដោយពាក្យសម្បថធ្ងន់ៗ
ដូចជាបើមិនស្មោះត្រង់ជាមួយបក្ស សូមឱ្យស្លាប់តៃហោងទាំងពូជ។ នេះ
គឺជាការរំលោភលើច្បាប់បោះឆ្នោតផង
និងថែមទាំងរំលោភលើសិទ្ធិមនុស្សជាសកលផង។ តើទង្វើបំពានច្បាប់នេះ
ឱ្យសមាជិកដែលធ្លាប់រស់នៅជាមួយបន្តការភ័យខ្លាចដល់ថ្ងៃណាទៀត? ដូច្នេះ មន្ត្រីទាំងអស់នោះដែលមាននូវមនសិកាជាតិ ស្រឡាញ់សន្តិភាព
និងភាពសុខសាន្តក្នុងសង្គមគ្រួសារ គឺពួកគាត់ត្រូវតែសំរេចចិត្តចាកចេញ ដែលវា គឺជាជម្រើសល្អបំផុតសម្រាប់ជីវិតនយោបាយរបស់ពួកគាត់។
ហើយការចាកចេញពីបក្សប្រឆាំង មកកសាងជីវភាពនយោបាយថ្មី
គឺដោយសារដឹងច្បាស់ថា គណបក្សប្រជាជន គឺជាគណបក្សដែលខ្លាំង
និងរឹងមាំជារៀងរហូត។ គណបក្សប្រជាជន
គឺមានការគាំទ្រដ៏ច្រើនលើសលប់ពីប្រជាពលរដ្ឋ ដោយសារការអនុវត្តជាក់ស្តែង តាមរយៈការធានាបាននូវស្ថេរភាពនយោបាយ
សន្តិសុខ និងការអភិវឌ្ឍ
គឺក្នុងន័យថា និយាយយ៉ាងណាធ្វើយ៉ាងនោះ
ដែលជាឱកាសសម្រាប់ពួកគាត់បានចូលរួមដោយផ្ទាល់ ។
ដូច្នេះ ការចាកចេញរបស់សមាជិកគណបក្សសម រង្ស៊ី ក្នុងតំណាក់កាលនេះ គឺជាការបង្ហាញឱ្យឃើញនូវការពិតថា
មន្ត្រីជាច្រើនទៀតក្នុងគណបក្សប្រឆាំងមួយនោះ កំពុងតែរងា
និងរងទុក្ខវេទនាយ៉ាងខ្លាំង ដោយសារគ្មានមេកោយច្បាស់លាស់
ហើយមេបក្សពិតប្រាកដ គឺមានទោសជាប់ខ្លួន បាត់បង់សិទ្ធិឈរឈ្មោះបោះឆ្នោត ផ្ទៃក្នុងបក្សកំពុងរង្គោះរង្គើខ្លាំង
ចលនានៃការចាកចេញកំពុងមានសកម្មភាពខ្លាំងក្លានៅទូទាំងប្រទេសដូចទឹកបាក់ទំនប់
។ នេះហើយដែលគេអាចនិយាយបានថា ស្លឹកឈើជ្រុះ ព្រោះតែដើមឈើងាប់
និងរលួយឬសកែវ គឺមិនមែនបានន័យថា
អ្នកចាកចេញពីបក្សសម រង្ស៊ី គឺជាមន្ត្រីគ្មានតម្លៃនោះទេ ។ ផ្ទុយទៅវិញ
ពួកគាត់ គឺសុទ្ធតែជាមន្ត្រីប្រកបដោយសុភវិនិច្ឆ័យខ្ពស់ និងស្អប់ខ្ពើមនូវការជិះជាន់ គាបសង្កត់ ជាពិសេស ការប្រើអំណាចផ្តាច់ការក្នុងបក្សតែប៉ុណ្ណោះ ៕
ដោយៈ ពូន សំរេច