ក្នុង
ពិធីប្រកាសជាផ្លូវការ
ចលនាប្រឡងប្រណាំងទីក្រុងស្អាតដែលធ្វើឡើងនៅវិមានសន្ដិភាព
នាព្រឹកថ្ងៃទី ២៧ ខែ កុម្ភៈ ឆ្នាំ ២០១២ សម្ដេចអគ្គមហាសេនាបតីតេជោ ហ៊ុន សែន
បានជំរុញឱ្យភាគីពាក់ព័ន្ធ
ពិនិត្យមើលការអភិវឌ្ឍន៍នៅទីក្រុងដែលទើបបង្កើតឡើងថ្មីៗ
ដូចជាទីក្រុងបាវិត ទីក្រុងសួង ទីក្រុងប៉ោយប៉ែត
និងខណ្ឌពោធិ៍សែនជ័យជាដើម ។
សម្រាប់ការងារបរិស្ថាននៅរាជធានីភ្នំពេញ សម្ដេចតេជោនាយករដ្ឋមន្ដ្រី
បានអំពាវនាវឱ្យអាជ្ញាធរ ត្រូវធ្វើយ៉ាងណា មិនឱ្យមានថង់បា្លស្ទិក
និងក្រដាស នៅតាមទីសាធារណៈ ដែលធ្វើឱ្យប៉ះពាល់ដល់អ្នក ធ្វើដំណើរទូទៅ
ដោយសម្ដេចបញ្ជាក់ថា
“ត្រូវចាត់វិធានការណ៍ធ្វើឲ្យទីក្រុងគ្មានសម្រាមថង់បា្លស្ទិក
និងក្រដាស” ។ សម្ដេចតេជោនាយករដ្ឋមន្ដ្រី បានឱ្យដឹងថា គ្រាន់តែរយៈពេលមួយថ្ងៃក្នុងរាជធានីភ្នំពេញ មានសម្រាមរហូតទៅដល់ ១៦០០តោន ។
ដោយយោងតាមការបិណ្ឌបាតរបស់ព្រះសង្ឃ និង សេចក្តីជូនដំណឹង (ស.ជ.ណ) របស់រាជរដ្ឋាភិបាល សម្តេចតេជោ
បានអំពាវនាវឲ្យបញ្ឈប់ការធ្វើអាជីវកម្មដុតគោដាក់លក់
តាមដងផ្លូវសាធារណៈ ឬនៅមុខហាងនីមួយៗ ព្រោះការដុតច្រង៉ាងៗបែបនេះ
វាបង្ហាញពីឃោរឃៅ។ សម្តេចតេជោបានអំពាវនាវឲ្យ
អាជ្ញាធរតាមមូលដ្ឋាន ធ្វើការណែនាំដល់ម្ចាស់ភោជនីយដ្ឋាននានា
ហើយបើម្ចាស់ភោជនីយដ្ឋានណាមិនស្តាប់ទេ នឹងចាត់វិធានការរដ្ឋបាល
បិទជីវកម្មចោលតែម្តង។
ទាក់ទិននឹងភ្ញៀវទេសចរ សម្ដេចតេជោនាយករដ្ឋមន្ដ្រី
បានជំរុញឱ្យភាគី ទាំងអស់ ត្រូវយកចិត្ដទុកដាក់ភ្ញៀវទេសចរជាតិផងដែរ
ដោយសារតែភ្ញៀវទេសចរជាតិខ្លះ
ពួកគេមិនខ្លាចការស្នាក់នៅសណ្ឋាគារល្អប្រណីតៗ ថ្នាក់ផ្កាយ៥ ផ្កាយ ៤
និង ផ្ទះសំណាក់នោះឡើយ ហើយគោលដៅនៃ ការទស្សនារបស់ភ្ញៀវជាតិ
ពិតជាបានរួមចំណែកជំរុញបង្កើនជីវភាពរបស់ប្រជាពល
រដ្ឋតាមមូលដ្ឋាន។
ឯកឧត្តម ថោង ខុន
រដ្ឋមន្ដ្រីក្រសួងទេសចរ
និងជាប្រធានគណៈកម្មាធិការជាតិវាយតម្លៃទីក្រុងស្អាត បាន
មានប្រសាសន៍ថា ក្នុងឆ្នាំ២០១១ កម្ពុជាទទួលបានទេសចរអន្ដរជាតិចំនួន
២.៨៨១. ៨៦២ នាក់ ក្នុងកំណើន ១៥ភាគរយ បើប្រៀបធៀបឆ្នាំ២០១០
ជាមួយនឹងកំណើន ទេសចរក្នុងស្រុក ប្រមាណ ៧លាននាក់ ដែលមានកំណើន
៣ភាគរយ ។ ចំនួនភ្ញៀវទេសចរទាំងនេះ បាននាំចំណូលចូលជាតិ ចំនួន ១.៩១២
លានដុល្លារ ស្មើនឹង ១២ ភាគរយ
នៃផលិតផលក្នុងស្រុករួមទាំងការបង្កើតការងារដោយផ្ទាល់ប្រមាណ
៣៥ម៉ឺននាក់ ។
ឯកឧត្តម ថោង ខុន
បានបញ្ជាក់ថា តាមការព្យាករណ៍ទុករបស់ក្រសួងទេសចរណ៍ថា
“សម្រាប់ឆ្នាំ២០១២ កម្ពុជានឹងអាចទទួលបានទេសចរណ៍អន្ដរជាតិប្រមាណ ៣.២
លាន នាក់ ឆ្នាំ២០១៥ ប្រមាណ ៤.៥ លាននាក់ និងនៅឆ្នាំ២០២០ កម្ពុជានឹងអាច
ទទួលបានទេសចរណ៍អន្ដរជាតិប្រមាណ ៧លាននាក់
ជាមួយនឹងចំណូលសរុបប្រមាណ ៥ពាន់លានដុល្លារ
និងបង្កើតការងារដោយផ្ទាល់ប្រមាណ ៨០ម៉ឺននាក់ ”។
ឯកឧត្តម ថោង ខុន
បាន ចាត់ទុកថា ទេសចរណ៍ទីក្រុងជាគោលដៅ ទេសចរណ៍ទាក់ទាញដ៏ល្អ
និងចម្បងមួយ ដែលត្រូវយកចិត្ដទុកដាក់ធ្វើការគ្រប់គ្រង
និងអភិវឌ្ឍន៍ប្រកបដោយ និរន្ដរភាព និង ការទទួលខុសត្រូវ។
តំបន់ទីក្រុងទាំងឡាយនៅកម្ពុជា ពិតជាមានសារសំខាន់ណាស់
សម្រាប់ទទួលស្វាគមន៍ និងទាក់ទាញភ្ញៀវទេសចរ
ដោយហេតុថាតំបន់ទេសចរណ៍ភាគច្រើនរបស់កម្ពុជា
រាប់ទាំងគោលដៅទេសចរណ៍ចម្បងៗ របស់ប្រទេសជាតិភាគច្រើន
ស្ថិតនៅក្នុង ឬនៅជិតតំបន់ទីក្រុង
ដែលជាមូលដ្ឋានផ្ដល់ឱ្យភ្ញៀវទេសចរ នូវការស្នាក់នៅហូបចុក
និងសេវាផ្គត់ផ្គង់ដទៃទៀត ដែលចាំបាច់ត្រូវតែធានានូវ
ការផ្គត់ផ្គង់មួយប្រកបដោយសុវត្ថិភាពគុណភាព និងអនាម័យល្អប្រសើរ ។
ក្រោយ
ឆ្នាំ១៩៧៩ រាជធានីភ្នំពេញ បានទទួលរងនូវការបំផ្លាញយ៉ាងធ្ងន់ធ្ងរ
ពីសំណាក់របប ប៉ុល ពត ។ ជំនាន់នោះ
រាជធានីភ្នំពេញមានតែផ្លូវតែមិនសូវមានមនុស្សដើរ។
បច្ចុប្បន្ននេះរាជធានីភ្នំពេញនោះ បានប្រែក្លាយ
មុខមាត់ដ៏មិនគួរឱ្យជឿពីសំណាក់ប្រជាពលរដ្ឋទូទៅ តាមរយៈការអភិវឌ្ឍន៍
ដោយប្រមូលផ្ដុំពីអគារធំៗ ប្រព័ន្ធចរាចរណ៍ខ្វាត់ខ្វែង
និងប្រព័ន្ធផ្លូវធំទូលាយរួមទាំងជាបណ្ដុំ នៃចលនាសេដ្ឋកិច្ចកម្ពុជា
។
រាជរដ្ឋាភិបាល
កម្ពុជាបានសម្រេចបង្កើតគណៈកម្មាធិការជាតិវាយតម្លៃទីក្រុងស្អាត
នៅថ្ងៃទី ២៥ ខែមិថុនា ឆ្នាំ ២០១១។ គណៈកម្មាធិការជាតិមួយនេះ
មានតួនាទីភារកិច្ចជាអ្នកតាមដានការអនុវត្តន៍ ផ្តល់មតិយោបល់
និងការណែនាំផ្សេងៗ ដល់បណ្តាក្រុង-ខណ្ឌទាំងឡាយ
ក្នុងគោលបំណងលើកកម្ពស់ និង រក្សាឲ្យបាននូវសោភ័ណភាព អនាម័យ
បរិស្ថានល្អនៅតាមបណ្តាទីក្រុង-ខណ្ឌ ពិសេសចូលរួមក្នុងសកម្មភាព
និងយុទ្ធសាសអភិវឌ្ឍនានារបស់រាជរដ្ឋាភិបាល ដើម្បីរក្សា
និងប្រែក្លាយបណ្តាទីប្រជុំជនឲ្យក្លាយជាទីកន្លែង
ដែលមានភាពកក់ក្តៅ ក្នុងការរស់នៅ
ជាទីកន្លែងដែលមានការអភិវឌ្ឍសេដ្ឋកិច្ច សង្គម
និងជាគោលដៅទេសចរណ៍ដ៏ទាក់ទាញប្រកបដោយទំនុកចិត្ត និងភាពជឿជាក់។
ការប្រកាស
ផ្សព្វផ្សាយ «ចលនាប្រលងប្រណាំងទីក្រុងស្អាត»
គឺដើម្បីចូលរួមចំណែកដល់ការពន្លឿនការ
អភិវឌ្ឍន៍យុទ្ធសាស្រ្តស្នូលរបស់រាជរដ្ឋាភិបាលកម្ពុជា
ដូចដែលមានចែងក្នុងផែនការយុទ្ធសាស្ត្រអភិឌ្ឍន៍ជាតិ ២០០៩-២០១៣
ពោលគឺជំរុញ និងលើកកម្ពស់ការអភិវឌ្ឍន៍សេដ្ឋកិច្ច
សង្គមកម្ពុជាថែមមួយកម្រិតទៀត។