អាគារសិក្សាថ្មីមួយខ្នងមានប្រាំមួយបន្ទប់នៃអនុវិទ្យាល័យ សុខ អាន
ព្រែកផ្ទោល ស្ថិតនៅក្នុង ឃុំ ព្រែកផ្ទោល ស្រុកអង្គរបូរី ខេត្តតាកែវ
ដែល សាងសង់ឡើងដោយ លោក ហង់រី ង៉ៃ (HENRY K.S.NGAI)
សប្បុរសជនខ្មែរមកពីប្រទេសអូស្រ្តាលី តាមរយៈ
ឯកឧត្តមបណ្ឌិតសភាចារ្យ សុខ អាន
ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
ត្រូវបានសម្ពោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី ២៧
ខែកុម្ភៈ ឆ្នាំ ២០១២ ។
ឯកឧត្តមបណ្ឌិតឧបនាយករដ្ឋមន្រ្តី សុខ អាន
ដែលបានអញ្ជើញចូលរួមជាអធិបតីក្នុងពិធីសម្ពោធ
បានវាយតម្លៃខ្ពស់ចំពោះការខិតខំប្រឹងប្រែងរបស់ក្រុមការងារថ្នាក់
កណ្តាល ប្រចាំស្រុកទាំងអស់ដ៍ដូចជា សប្បុរសជន ក្នុងនិងក្រៅប្រទេស
ដែលបានរួមចំណែកយ៉ាងសកម្មក្នុងការជួយឧបត្ថម្ភលើការងារអប់រំដើម្បី
ជាការឆ្លើយតបទៅនិងអនុសាសន៍របស់សម្តេចអគ្គមហាសេនាបតីតេជោ ហ៊ុន សែន
ក្នុងការបង្កើតអនុវិទ្យាល័យនៅតាមបណ្តាឃុំដែលជាការបង្ខិតវិស័យ
អប់រំឲ្យនៅជិតមូលដ្ឋាន
ដើម្បីបង្កភាពងាយស្រួលដល់ក្មួយៗសិស្សានុសិស្សមកសិក្សាររៀនសូត្រ។
ឯកឧត្តមបណ្ឌិត សុខ អាន
បានមានប្រសាសន៍ថា ប្រជាពលរដ្ឋយើងគួរមានមោទនភាព
ចំពោះការរីកចំរើនរបស់ប្រទេសជាតិយើងលើគ្រប់វិស័យក្រោមការដឹកនាំ
ដ៍ឈ្លាសវ័យ និងប្រកបដោយគតិបណ្ឌិតរបស់សម្តេចតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា
ដែលធ្វើឲ្យប្រទេសជាតិទទួលបាននូវសុខ សន្តិភាព ស្ថិរភាពនយោបាយ
លទ្ធិប្រជាធិបតេយ្យ ចាកផុតពីការលំបាក រួចផុតពីការកាប់សម្លាប់
របស់របបប្រល័យពូជសាសន៍ ការពារបាននូវបូរណៈភាពទឹកដី
ប្រជាពរដ្ឋរស់នៅនិងប្រកបរបបរចិញ្ចឹមជីវិតដោយសុខសាន្ត
គ្មានការភ័យខ្លាចពីការរត់គេចពីសង្រ្គមទៀតឡើយ។
បច្ចុប្បន្ននេះយើងមានផ្លូវ មន្ទីរពេទ្យ សាលារៀន
ហេដ្ឋារចនាសម្ព័ន្ធគ្រប់ទីកន្លែងទូទាំងប្រទេសរាជរដ្ឋាភិបាលកំពុង
ខិតខំកសាងឲ្យមានអាគារសម្ភពជាប់និងមណ្ឌលសុខភាពដើម្បីបង្កលក្ខណៈ
ងាយស្រួលដល់ប្រជាពលរដ្ឋពេលឆ្លងទន្លេ
ដើម្បីកាត់បន្ថយអត្រាមរណៈមាតា និងទារកនៅកម្ពុជា។
ឯកឧត្តមឧបនាយករដ្ឋមន្រ្តីបានលើកឡើងថា
ប្រជាពលរដ្ឋមានចំណូលកើនឡើងជាងមុន ដោយសារមានប្រព័ន្ធធារាសាស្រ្ត
ដោយមានទឹកគ្រប់គ្រាន់សំរាប់បង្កបង្កើនផល។
ប្រទេសយើងមានស្រូវសល់ប្រមាណពី២ ទៅ៣លានតោន
ហើយតាមគោលនយោបាយរបស់រាជរដ្ឋាភិបាលនឹងនាំចេញអង្ករឲ្យបាន១លានតោន
នៅឆ្នាំ ២០១៥ ដែលនឹងធ្វើឲ្យតម្លៃស្រូវរបស់ប្រជាកសិករកើនខ្ពស់ និងរួមចំណែកកាត់បន្ថយបានភាពក្រីក្រជូនប្រជាពលរដ្ឋ។
ឯកឧត្តមបណ្ឌិត សុខ អាន បាន
ប្រកាសក្នុងឱកាសនោះអំពីការបន្តសាងសង់អាគារសិក្សាថ្មីមួយ
ខ្នងទៀត ការិយាល័យមួយខ្នង របង និងក្លោងទ្វាអនុវិទ្យាល័យ
ដែលធានារ៉ាប់រងដោយលោក ហង់រី ង៉ៃ (HENRY K.S.NGAI)
សម្បុរសជនមកពីប្រទេសអូស្រ្តាលី និងលោកឧកញ៉ា កុក អាន ឧកញ៉ា ហេង ឡុង ព្រមទាំងក្រុមការងារគណបក្សប្រជាជនកម្ពុជាស្រុកអង្គរបុរី។ ដោយឡែកឯកឧត្តមបណ្ឌិត សុខ អាន បានប្រកាសសាងសង់មណ្ឌលសម្ភពមួយនៅក្នុងស្រុកអង្គរបុរីនេះផងដែរ។
ឯកឧត្តម
ឧបនាយករដ្ឋមន្រ្តីក៏បានបំពាក់មេដាយជូនដល់សប្បុរសជន
ដែលបានរួមចំណែកកសាងសមិទ្ធផល នានាក្នុងស្រុក អង្គរបូរី
និងចែកអំណោយជូនដល់ប្រជាពលរដ្ឋ តាជី យាយជី សិស្សានុសិស្ស
ក្រុមកាយរឹទ្ធ ក្រុមយុវជនកាកបាទក្រហម
និងអញ្ជើញកាត់ខ្សែបូរសម្ពោធដាក់ឲ្យប្រើប្រាស់អនុវិទ្យល័យសុខ
អានព្រែកផ្ទោល ជាផ្លូវការចាប់ពីពេលនេះតទៅ។
លោក ឈាវ ហ៊ អភិបាលស្រុកអង្គរបូរីបានឲ្យដឹងថា គិតមកទល់ពេលនេះស្រុកអង្គរបុរីទទួលបានសមិទ្ធផលអាគារសិក្សារួមមាន៖ សម្តេចអគ្គមហាសេនាបតីតេជោ ហ៊ុន សែន បានផ្តល់អាគារសិក្សា ១៤ខ្នង ស្មើ៦៨បន្ទប់ ឯកឧត្តមឧបនាយករដ្ឋមន្រ្តីស ខេង បានផ្តល់អាគារសិក្សា ១ ខ្នង ស្មើ ៣បន្ទប់ ឯកឧត្តមបណ្ឌិតសភាចារ្យ សុខ អាន
បានផ្តល់អាគារសិក្សា ៧ខ្នង ៣៨ បន្ទប់ក្នុងនោះមានសាលាបឋមសិក្សា សុខ
អាន ទួលសំបូរ មាន ២ខ្នង ១១បន្ទប់ សាលាបឋមសិក្សាបាក់ដៃ មាន១ខ្នង
៦បន្ទប់។ ដោយឡែកអាគារសិក្សាថ្មីនៃអនុវិទ្យាល័យ សុខ អាន
ព្រែកផ្ទោលបានដំណើការសាងសង់ចាប់ពីថ្ងៃទី២៦ ខែកក្កដា
សាងសង់រួចជាស្ថាពរនៅថ្ងៃទី ២៦ ខែតុលា ឆ្នាំ ២០១០
ស្ថិតនៅលើទីតាំងដីទំនាបជាប់មាត់ស្ទឹងអង្គរបូរីទំហំ ៥.៤២៧ ម២ បានបើកបវេសនកាលឆ្នាំ ២០១១ ឲ្យសិស្សចូលរៀនរួចហើយ ។
