ជ័យជំនះដ៏ធំធេងរបស់គណបក្សប្រជាជនកម្ពុជា សំរាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ ដែលបានប្រព្រឹត្តទៅកាលពីថ្ងៃទី២៩ ខែ មករា ឆ្នាំ
២០១២កន្លងមកនេះ បានបង្ហាញឱ្យឃើញយ៉ាងច្បាស់អំពីភាពដាច់ខាត
និងការស្មោះត្រង់របស់សមាជិកគណបក្សប្រជាជនកម្ពុជាចំពោះបក្ស និងការ
ចូលរួមបោះឆ្នោតគាំទ្រពីមន្ត្រីជាច្រើនរបស់គណបក្សប្រឆាំង ដែលមន្ត្រីទាំងនោះបានទទួលស្គាល់អំពីសច្ចៈភាពនៃកិច្ចខិតខំប្រឹងប្រែងរបស់រាជរដ្ឋាភិបាលក្នុងការអភិវឌ្ឍប្រទេស។
ជាលទ្ធផល គឺគណបក្សប្រជាជនកម្ពុជាឈ្នះដាច់១០០ភាគរយគ្រប់ខេត្ត
ក្រុង និងមានការកើនសំឡេងគាំទ្របន្ថែមទៀតបានរហូតដល់៧៩៧សំឡេង
ដោយឡែកគណបក្ស សម រង្ស៊ី បាត់អស់១៧៩សំឡេង នេះបើយោងតាមលទ្ធផលនៃការរាប់សន្លឹកឆ្នោតបណ្តោះអាសន្នក្រៅផ្លូវការរបស់គណៈកម្មាធិការជាតិរៀបចំការបោះឆ្នោត។
ក្រុមអ្នកតាមដានស្ថានការណ៍នយោបាយនៅកម្ពុជាបានចោទជាសំនួរថា មូលហេតុអ្វីបានជាមន្ត្រីជាច្រើនរបស់គណបក្សសម រង្ស៊ី បាននាំគ្នាងាកមកបោះឆ្នោតគាំទ្រគណបក្សប្រជាជនកម្ពុជា?
ហើយការបរាជ័យរបស់គណបក្សសម រង្ស៊ី
ដែលនាំឱ្យមានការបាត់សំឡេងយ៉ាងគំហុករហូតដល់១៧៩នាក់នោះ តើបណ្តាលមកពីបញ្ហាអ្វីខ្លះកើតមាននៅក្នុងគណបក្សប្រឆាំងមួយនេះ?
ជាចំលើយដែលឆ្លុះបញ្ចាំងអំពីតត្តៈភាពពិតក្រោយការបោះឆ្នោតនោះ គឺចាត់ទុកថា
ជាការបរាជ័យថ្មីមួយទៀតរបស់គណបក្ស សម រង្ស៊ី ឬអាចជាសញ្ញាប្រកាសអាសន្នក្នុងកំរិតកំពូល
បង្ហាញពីការបែកបាក់ រង្គោះរង្គើទ្រង់ទ្រាយធំ បន្ទាប់ពីមានការលាលែងរបស់មន្ត្រីក្រុមប្រឹក្សាឃុំ សង្កាត់ ជាច្រើនរបស់គណបក្សសម រង្ស៊ី នៅទូទាំងប្រទេស មកចូលរួមនយោបាយជាមួយគណបក្សប្រជាជនកម្ពុជា
ជាពិសេស គឺការបោះឆ្នោតថ្មីៗនេះបានបង្ហាញថា គណបក្សប្រឆាំងសម រង្ស៊ី បាត់បង់សំឡេងអស់ចំនួនជិត២០០នាក់។
ការបាត់សំឡេងរបស់សមាជិកក្រុមប្រឹក្សាឃុំ
សង្កាត់ នៃគណបក្សសម រង្ស៊ី ប្រមាណ១៧៩សំឡេងនេះ ជាលទ្ធផលបានបង្ហាញនូវការបាត់សំឡេងនៃអង្គបោះឆ្នោតដ៏សំខាន់
ដោយសារមន្ត្រីគណបក្សប្រឆាំងជាច្រើននោះបាត់បង់ជំនឿទុកចិត្ត ឬអាចនិយាយបានថា
ផ្ទៃក្នុងបក្សធ្លាក់ចូលក្នុងស្ថានភាពវឹកវ ច្របូកច្របល់
ទើបបណ្តាលឱ្យមន្ត្រីរបស់ខ្លួនឈប់បោះឆ្នោតគាំទ្រលើបក្សសម រង្ស៊ី តទៅទៀត
ហើយនេះក៏ជាការសបញ្ជាក់ឱ្យឃើញថា នយោបាយប្រឆាំងរបស់លោក សម រង្ស៊ី
ដែលបានបង្ខំឱ្យសមាជិករបស់ខ្លួនស្បថ និងដកហូតទូរស័ព្ទដៃ
គឺទទួលផលកម្មបែបនេះ។
ផ្ទុយទៅវិញគេបានកត់សម្គាល់ឃើញថា
ឆន្ទៈដ៏មោះមុតរបស់សមាជិកក្រុមប្រឹក្សាឃុំ សង្កាត់ ទាំង១៧៩រូបនៃគណបក្សសម
រង្ស៊ី ដែលបានបោះឆ្នោតជូនគណបក្សប្រជាជនកម្ពុជា
និងការកើនសំឡេងបន្ថែម ក្នុងចំណោមនោះក៏ត្រូវបានគេប៉ាន់ស្មានថា អាចនឹងមានសមាជិកសភាគណបក្សប្រឆាំងមួយចំនួន
បានបោះឆ្នោតជាសម្ងាត់ជូនគណបក្សប្រជាជនកម្ពុជាផងដែរ។
ជ័យជំនះថ្មីបន្ថែមទៀតរបស់គណបក្សប្រជាជនកម្ពុជា គឺបានបង្ហាញឱ្យឃើញនូវការមានទំនុកចិត្តខ្ពស់បំផុតរបស់អង្គបោះឆ្នោតដ៏ច្រើនលើសលុប
ក្នុងនោះមានទាំងសមាជិកគណបក្សប្រជាជនកម្ពុជា និងទាំងសមាជិកមកពីគណបក្សផ្សេងៗដែលបានគាំទ្រ
គឺគ្រប់គ្នាពេញចិត្តចំពោះការដឹកនាំដ៏ត្រឹមត្រូវរបស់សម្តេចតេជោហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេស
ការដាក់ចេញនូវគោលនយោបាយច្បាស់លាស់
ក្នុងការការពារនូវផលប្រយោជន៍ជូនប្រជាពលរដ្ឋ ការធានាបាននូវស្ថិរភាពនយោបាយ ការផ្សះផ្សាបង្រួបបង្រួមជាតិ សន្តិសុខ
សណ្តាប់ធ្នាប់សង្គម ជាពិសេស គឺមន្ត្រីទាំងនោះពួកគាត់បានស្គាល់ច្បាស់អំពីតម្លៃនៃជីវិតដែលបានមកពីគុណបំណាច់ថ្ងៃរំដោះ៧មករា
ឆ្នាំ ១៩៧៩ រួចផុតពីការកាប់សម្លាប់ដោយរបបប៉ុល ពត ទើបនាំឱ្យកម្ពុជា មានការបោះឆ្នោត
និងអភិវឌ្ឍប្រទេសបានរីកចំរើនមកដល់សព្វថ្ងៃ ។
ម៉្យាងវិញទៀត
ការបរាជ័យរបស់គណបក្ស សម រង្ស៊ី ក៏ជាការទូងស្គរដាស់ស្មារតីដល់សមាជិក
សមាជិកាក្រុមប្រឹក្សាឃុំ សង្កាត់ និងសកម្មជនដ៏ទៃទៀតថា
ការសំរេចចិត្តផ្លាស់ប្តូរនយោបាយពីប្រឆាំងមកគាំទ្ររាជរដ្ឋាភិបាល
គឺសន្ទុះនៃការចាប់ផ្តើមដើរចេញពីបក្សប្រឆាំងមានចំនួនកើនឡើង
បន្ទាប់ពីសមាជិកបក្សប្រឆាំងមួយនេះទទួលរងនូវការដកហូតសិទ្ធិសេរីភាពគ្រប់បែបយ៉ាង
ការគាបសង្កត់ និងការដឹកនាំផ្តាច់ការក្នុងបក្សដូចរបបប៉ុល ពត។
គេបានពិនិត្យឃើញថា
លទ្ធផលបណ្តោះអាសន្ននៃការបោះឆ្នោតព្រឹទ្ធសភានីតិកាលទី៣នេះ នៅតាមមណ្ឌល
ភូមិភាគ ឬខេត្តក្រុងទូទាំងប្រទេស
គណបក្សប្រជាជនមិនមានបាត់សំឡេងសមាជិករបស់ខ្លួនម្នាក់ទេ គឺបានសំឡេងឆ្នោតគាំទ្រពីសមាជិករបស់ខ្លួន១០០ភាគរយ
ហើយនៅតាមបណ្តាខេត្តមួយចំនួនមានការកើនសំឡេងរហូតដល់ជាង១០០នាក់ក៏មានដែរ
។ ដោយឡែកគណបក្សសម រង្ស៊ី បាត់សំឡេងស្ទើរតែគ្រប់ខេត្ត ក្រុង។
ដើម្បីបិទបាំងភាពបរាជ័យរបស់ខ្លួនគេបានសង្កេតឃើញថា
ថ្នាក់ដឹកនាំមួយចំនួនរបស់គណបក្សសម រង្ស៊ី រួមទាំងមេបក្សដែលកំពុងនីរទេសខ្លួន
បានខិតខំបំភ្លៃសភាពការណ៍តាមរយៈសេចក្តីថ្លែងការណ៍របស់ខ្លួនដែលបង្ហាញនូវការបោកប្រាស់ប្រជាពលរដ្ឋដោយសង្រ្គាមចិត្តសាស្ត្រក្រោមហេតុផលថា
គណបក្សរបស់ខ្លួនបានទទួល១១អាសនៈថាជាជ័យជំនះ ។ ប៉ុន្តែ តាមការពិតចំនួនអាសនៈព្រឹទ្ធសភា
គឺឆ្លុះបញ្ចាំងចេញពីលទ្ធផលនៃការបោះឆ្នោតក្រុមប្រឹក្សាឃុំ
សង្កាត់កាលពីឆ្នាំ២០០៧ រួមផ្សំគ្នាតែប៉ុណ្ណោះ និងនៅឆ្នាំ២០១២នេះ
គណបក្សហ៊្វុនស៊ីនប៉ិច មិនបានចូលរួមប្រកួតការបោះឆ្នោត
ទើបចំនួនអសនៈទាំង១០ដែលនៅទំនេរនោះ បានធ្លាក់ទៅលើគណបក្សទាំងពីរដែលប្រកួតប្រជែង
។
ដូច្នេះ លទ្ធផលនៃការបោះឆ្នោតព្រឹទ្ធសភា
គឺគេធ្វើឡើងតាមរូបមន្តគណិតវិទ្យា
ដែលជ័យជំនះពិតប្រាកដបានទៅលើគណបក្សប្រជាជនកម្ពុជាដែលទទួលបាន៤៦អាសនៈ ។
ចំណែកគណបក្សសម រង្ស៊ី បានទទួល១១ អាសនៈ
គឺជាការបរាជ័យដ៏ធំ ពីព្រោះសំឡេងគាំទ្រសំរាប់គណបក្សខ្លួនជ្រុះបាត់អស់ជិត២០០សំឡេង
ដែលនាំឱ្យមានការព្រួយបារម្ភយ៉ាងខ្លាំងនូវជោគវាសនាសំរាប់ការបោះឆ្នោតក្រុមប្រឹក្សាឃុំ
សង្កាត់ និងការបោះឆ្នោតសកលឆ្នាំ២០១៣ខាងមុខ ដោយហេតុផលថា មន្ត្រីជាច្រើនដែលបានបោះឆ្នោតជូនគណបក្សប្រជាជនកម្ពុជា
នៅតែជាមនុស្សសំងាត់បង្កប់ក្នុងបក្សសម រង្ស៊ី ដែលពិបាកនឹងស្គាល់អំពីអត្តៈសញ្ញាណ។
ដូច្នេះ ជាលទ្ធផលជាក់ស្តែង
ដែលនឹងប្រកាសឱ្យដឹងនៅពេលខាងមុខ គេបានដឹងថាគណបក្សប្រជាជនកម្ពុជាកើនសំឡេងដ៏លើសលប់បានរហូតដល់ទៅ៧៩៧សំឡេងបន្ថែមទៀត
ដែលកំណើននៃអ្នកគាំទ្រមកលើគណបក្សប្រជាជននកម្ពុជានេះ បានធ្វើឱ្យគណបក្សសម
រង្ស៊ី ចុះថយឥទ្ធិពលយ៉ាងខ្លាំង
និងបាត់ទំនុកចិត្តស្ទើរតែទាំងស្រុងពីអង្គបោះឆ្នោត ពីព្រោះមន្ត្រីបង្គោលរបស់គណបក្សប្រឆាំងមួយនេះ
មានទាំងក្រុមប្រឹក្សាឃុំ សង្កាត់ ទាំងសមាជិកសភាសរុប រហូតដល់ទៅ១៧៩នាក់
បានបោះឆ្នោតឱ្យគណបក្សប្រជាជនកម្ពុជា ។
ប្រភពព័ត៌មានក្រៅផ្លូវការពីផ្ទៃក្នុងគណបក្សសម
រង្ស៊ី ក៏បានបង្ហើបឱ្យដឹងផងដែរថា
បន្ទាប់ពីមានការបាត់សំឡេងដ៏ច្រើនយ៉ាងនេះ លោក សម រង្ស៊ី
បានប្រញ៉ាប់ប្រញាល់កោះប្រជុំក្រុមប្រឹក្សារបស់ខ្លួនជាបន្ទាន់ដើម្បីឱ្យមានការស្រាវជ្រាវរកសមាជិកបក្សដែលបានបោះឆ្នោតជូនគណបក្សប្រជាជនកម្ពុជា។
ប៉ុន្តែ ក្រុមអ្នកវិភាគ គេបានវាយតម្លៃថា បើលោក សម រង្ស៊ី
ចង់អនុវត្តតាមវិធានការបែបនេះ គឺវានឹងអាចប៉ះពាល់យ៉ាងខ្លាំងដល់ការបោះឆ្នោតក្រុមប្រឹក្សាឃុំ
សង្កាត់នៅពេលខាងមុខជាក់ជាពុំខាន ។ ការសើរើណាមួយ គឺប្រាកដជាអាចនឹងនាំឱ្យគណបក្សសម
រង្ស៊ី រលំរលាយទាំងស្រុងពីព្រោះ ការដើរចោទប្រកាន់
លាភពណ៌ដាក់គ្នាទៅវិញទៅមក និងទម្លាក់កំហុសដោយគ្មានភស្តុតាង ច្បាស់ជានឹងនាំឱ្យមានភាពចលាចល
ជ្រួលច្របល់ផ្ទៃក្នុងបក្សកាន់តែខ្លាំង ។
បើទោះបីជាបក្សសម រង្ស៊ី ខិតខំបំភាន់សាធារណមតិថា បក្សខ្លួនកំពុងកើនអាសនៈយ៉ាងណាក៏ដោយ
ប៉ុន្តែ ការពិតវាជាការចុះឥទ្ធិពលបណ្តាលមកពីការបាត់សំឡេងជិត២០០នាក់នោះ
ហើយម៉្យាងទៀត គេក៏បានដឹងដែរថា ថ្នាក់ដឹកនាំគណបក្សសម រង្ស៊ី
គឺពិតជាបានបោកប្រាស់ប្រជារាស្ត្រយ៉ាងចំហរដើម្បីការឆ្លៀតធ្វើអាជីវកម្មនយោបាយភូតកុហក
នៅពីក្រោយភាពបរាជ័យរបស់ខ្លួន ចាត់ទុកថាជាជ័យជំនះទៅវិញ។
គេនៅចាំបាន លោកសម រង្ស៊ី ធ្លាប់បានប្រកាសថា «
លទ្ធផលនៃការបោះឆ្នោតព្រឹទ្ធសភានីតិកាលទី៣នេះ គឺមិនអាចទទួលយកបានឡើយ
ប្រសិនបើគ្មានវត្តមានរបស់គាត់(សម រង្ស៊ី) ចូលរួម
និងបានអំពាវនាវឱ្យសហគមន៍អន្តរជាតិកុំឱ្យទទួលស្គាល់លទ្ធផលនោះ» ប៉ុន្តែ ពេលនេះ ទាំងអ្នកនាំពាក្យ
ទាំងសមាជិកសភាមួយចំនួន ជាពិសេស បុគ្គលសម រង្ស៊ី ផ្ទាល់ បែរជានិយាយឡប់ឡែ
ដោយងាកមកទទួលស្គាល់ការបោះឆ្នោតនេះទៅវិញ ។ នេះ ជាការលេបហើយស្តោះដាក់លើខ្លួនឯងដ៏គម្រក់
ដើម្បីតែបំរើផលប្រយោជន៍នយោបាយប្រឆាំងដ៏ងប់ងុល។
សកម្មភាពនេះ គឺត្រូវបានបង្ហាញអំពីឥរិយាបថមិនច្បាស់លាស់របស់អ្នកនយោបាយប្រឆាំង
ដែលគិតតែពីការស្រេកឃ្លានចង់បានអំណាច សម្លឹងឃើញការកើនអាសនៈបន្តិចបន្តួច
តាមរយៈរូបមន្តគណិតវិទ្យា នៅពីក្រោយការបរាជ័យ និងបាត់សំឡេងដ៏ច្រើនថា ជាជ័យជំនះ ។ ប៉ុន្តែ តាមការពិតលោកសម រង្ស៊ី
និងថ្នាក់ដឹកនាំមួយចំនួនក្នុងគណបក្សប្រឆាំងមួយនេះ កំពុងតែជួបប្រទះនូវបញ្ហាប្រឈម
អត់មានទំនុករវាងគ្នានឹងគ្នា បាត់អស់នូវភាពម្ចាស់ការ ។ «គ្រោះអាសន្នដ៏ធំនេះ បាន និងកំពុងសង្កត់កជាប់ មិនអាចរកវិធីដោះស្រាយបានឡើយ»៕
ដោយៈ ពូន សំរេច