សុន្ទរកថា
ឯកឧត្តម បណ្ឌិតសភាចារ្យ សុខ អាន
ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី
ក្នុងឱកាសនៃសន្និសីទសង្គមស៊ីវិលអាស៊ាន/ វេទិកាប្រជាជនអាស៊ាន (ACSC/APF)
“យើងជាប្រជាជនអាស៊ានរួមដៃគ្នាសម្រាប់សហគមន៍អាស៊ាន”
រាជធានីភ្នំពេញ ថ្ងៃទី២៨ ខែមីនា ឆ្នាំ២០១២
- ឯកឧត្តម លោកជំទាវ ឯកអគ្គរដ្ឋទូតរនៃអាស៊ានប្រចាំនៅព្រះរាជាណាចក្រកម្ពុជា
- ឯកឧត្តម លោកជំទាវ ជាសមាជិក សមាជិការាជរដ្ឋាភិបាលកម្ពុជា
- ឯកឧត្តម លោកជំទាវ អស់លោក លោកស្រីគណៈប្រតិភូ
- តំណាងរបស់អង្គការសង្គមស៊ីវិល
- ក្រុមគ្រួសារអាស៊ានជាទីមេត្រី
ខ្ញុំសូមសម្តែង
នូវអំណរគុណចំពោះគណៈកម្មាធិការរៀបចំ
ជាពិសេសវិទ្យាស្ថានខ្មែរសម្រាប់កិច្ចសហប្រតិបត្តិការ និងសន្តិភាព
ដែលបានអញ្ជើញខ្ញុំ មកចូលរួមក្នុងវេទិកានេះ។
ខ្ញុំក៏សូមសម្តែងនូវការកោតសរសើផងដែរចំពោះកិច្ចខិតខំប្រឹងប្រែង
របស់គណៈកម្មាធិការរៀបចំ សន្និសីទសង្គមស៊ីវិលអាស៊ាន /វេទិកាប្រជាជនអាស៊ានប្រចាំឆ្នាំ២០១២ ក្នុង
ការរៀបចំវេទិកានេះឡើង
ដើម្បីធ្វើជាវេទិកាមួយសម្រាប់ប្រាស្រ័យទៅវិញទៅមករវាងប្រជាជន
និងថ្នាក់ដឹកនាំរដ្ឋាភិបាលរបស់ខ្លួន។
ក្នុង
នាមសម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា
ខ្ញុំមានសេចក្តីសោមនស្សរីករាយសូមឆ្លៀតយកក្នុងឱកាសនេះ
សូមសម្តែងនូវអំណរសាទរចំពោះគណៈប្រតិភូតំណាងអង្គការសង្គមស៊ីវិល
មកពីរដ្ឋជាសមាជិកអាស៊ាន
និងសូមសម្តែងនូវការស្វាគមន៍យ៉ាងកក់ក្តៅក្នុងការអញ្ជើញមក
ប្រទេសកម្ពុជា។ ការប្រមូលផ្តុំរបស់អ្នកទាំងអស់គ្នានៅថ្ងៃនេះ
បង្ហាញនូវការប្តេជ្ញាចិត្តយ៉ាងមុតមាំរួមដៃគ្នាក្នុងការដោះស្រាយ
បញ្ហាប្រឈមរួមដែលប្រជាជនអាស៊ានកំពុងជួបប្រទះ។
ខ្ញុំមានជំនឿទុកចិត្តថា
សម្លេងរបស់អ្នកទាំងអស់គ្នានឹងត្រូវបានជួ្រតជ្រាបកាន់តែ
ខ្លាំងឡើងៗ ក្នុងបុព្វហេតុនៃការបង្កើតតំបន់អាស៊ីអាគ្នេយ៍មួយ
និងតំបន់ដ៏ទៃទៀត ប្រកបដោយសុខដុមរមនា និងរុងរឿង។
ខ្ញុំសូម
បញ្ជាក់ថា
ភាពជាដៃគូដ៏ពិតប្រាកដនៃកិច្ចសហប្រតិបត្តិការទៅវិញទៅមកក្នុងចំណោម
រដ្ឋាភិបាល អង្គការសង្គមស៊ីវិល
និងសហគមន៍នៃអ្នកសិក្សាស្រាវជ្រាវគឺពុំមែនត្រឹមតែជាទស្សនាទាន
ប៉ុណ្ណោះទេ ប៉ុន្តែជាការអនុវត្តជាក់ស្តែងនិងប្រកបដោយផ្លែផ្កា
ក្នុងតំបន់របស់យើង។ នេះជានិន្នាការជាបន្តបន្ទាប់និងវិជ្ជមាន
ព្រោះខ្ញុំជឿជាក់ថា
យើងទាំងអស់គ្នាមានតួនាទីថែរក្សានិងពង្រឹងសន្តិភាព និងសន្តិសុខ
ស្ថេរភាព និងការអភិវឌ្ឍ។
គណៈប្រតិភូ និងអ្នកចូលរួមទាំងអស់
ដោយ
សារបច្ចុប្បន្ននេះ ខណៈពេលដែលយើងកំពុងរស់នៅក្នុងពិភពលោកមួយ
ដែលមាននៃសកលភាវូបនីយកម្ម យើងជួបប្រទះនូវបញ្ហាស្មុគស្មាញ
និងភាពមិនប្រាកដប្រជាកាន់តែច្រើនឡើងៗដែលតម្រូវឲ្យទាំងតួអង្គរដ្ឋ
និងតួអង្គមិនមែនរដ្ឋធ្វើការរួមដៃគ្នា។
កិច្ចសហប្រតិបត្តិការក្នុងតំបន់ និងក្នុងពិភពលោកផ្តល់នូវ
មូលដ្ឋានដ៏សំខាន់មួយ ក្នុងការដោះស្រាយបញ្ហាទាំងនោះ។
នៅក្នុង
តំបន់របស់យើង យើងជួបប្រទះការប្រឈមថ្មីៗជាច្រើន
ដែលកើតចេញពីទាំងកត្តាមនុស្ស និងធម្មជាតិ។ ភាពក្រីក្រ
និងគម្លាតនៃការអភិវឌ្ឍយ៉ាងធំ និកម្មភាព ការប្រែប្រួលអាកាសធាតុ
គ្រោះធម្មជាតិ
នៅតែជាបញ្ហាប្រឈមជាចំបងយ៉ាងសំខាន់ដែលត្រូវដោះស្រាយ
ដើម្បីសម្រេចបាននូវសង្គមមួយដែលមានសន្តិសុខស្បៀង សន្តិសុខថាមពល
និងសន្តិសុខធនធានទឹក ក៏ដូចជាសិទ្ធិមនុស្ស
(ជាពិសេសសិទ្ធិសម្រាប់ស្រ្តី និងកម្មករទេសន្តរប្រវេសន៍)
ការងារសមរម្យ យុត្តិធម៌សង្គម ការការពារបរិស្ថាន និងអភិបាលកិច្ចល្អ។
ខ្ញុំសូមលើកឡើង
ផងដែរថា យើង ជាប្រជាជនអាស៊ាន មានសំណាងដោយបានឃើញការអភិវឌ្ឍ
ជាវិជ្ជមានដ៏ខ្លាំងក្លានៃស្ថាប័នតំបន់របស់យើង
ដែលកំពុងដើរតួនាទីយ៉ាងសំខាន់ក្នុងការពង្រឹងកិច្ចសហប្រតិបត្តិ
ការក្នុងតំបន់ និងស្ថាប័នូបនីយកម្ម ក្នុងតំបន់អាស៊ីបូព៌ាទាំងមូល។
យើងសង្ឃឹមថា តួនាទីបែប នេះសម្រាប់អាស៊ាន
នឹងនៅតែបន្តជាមួយគំនិតផ្តួចផ្តើមថ្មីៗ គំនិតថ្មីៗ
ព្រមទាំងភាពវៃឆ្លាតផ្នែកការទូត។
របៀបទំនាក់ទំនងក្នុងស្ថានភាពដែលពាក់ព័ន្ធនឹងប្រទេសជាច្រើន
ដើម្បីបង្កើតនូវសមតាប្រកបដោយថាមពល
មិនមែនជាការងាយស្រួលនោះឡើយទេ។
អាស៊ានចាំបាច់ត្រូវមានសម្លេងតែមួយដើម្បីបង្ហាញឲ្យឃើញនូវអត្ថ
ប្រយោជន៍រួមរបស់យើង។
អាស៊ាន
សម្រេចបានសមិទ្ធផលគួរឲ្យកត់សម្គាល់យ៉ាងហោចណាស់ចំនួនបី រួមមាន
សន្តិភាព និងស្ថេរភាព ទំនាក់ទំនងសេដ្ឋកិច្ចឆ្ពោះទៅកាន់សមាហរណកម្ម
និងការបង្កើតនូវសហគមន៍ការទូតដ៏សកម្មមួយ។ ប៉ុន្តែ
សមិទ្ធផលទាំងនេះអាចត្រូវរារាំងដោយជម្លោះទំនាស់អធិបតេយ្យភាព
ភាពជាតិនិយមហួសហេតុ គម្លាតនៃការអភិវឌ្ឍរវាងសមាជិកថ្មី
និងចាស់របស់អាស៊ាន
និងភាពមានកម្រិតផ្នែកការទូតដើម្បីបញ្ចៀសបញ្ហានិងការដោះស្រាយ
ជម្លោះ។
ទន្ទឹមនឹងមោទ
នភាពដែលយើងមានចំពោះនៃសមិទ្ធផលដែលយើងសម្រេចបាន
យើងត្រូវតែខិតខំឲ្យកាន់តែខ្លាំងថែមទៀត
ដើម្បីដោះស្រាយបញ្ហាប្រឈមដែលនៅសល់ និងបញ្ហានាអនាគតខាងមុខ។
ខ្ញុំជឿជាក់ថា ប្រជាជនអាស៊ាន
រួមទាំងរដ្ឋាភិបាលនិងអង្គការសង្គមស៊ីវិល
អាចចូលរួមផ្តល់នូវគំនិតដ៏មានសារៈប្រយោជន៍ជាក់ស្តែងក្នុងការ
ដោះស្រាយបញ្ហាប្រឈមទាំងនោះ។ យើងត្រូវកែលំអ
និងថែរក្សាវប្បធម៌នៃភាពជាដៃគូ
និងទំនាក់ទំនងរវាងអង្គការសង្គមស៊ីវិល និងរដ្ឋាភិបាល និងយុវជន
ខណៈពេលដែលយើងធ្វើដំណើរឆ្ពោះទៅកាន់អាស៊ានមួយដែលមានប្រជាជន
ជាស្នូលយ៉ាងពិតប្រាកដ
និងយើងរួមគ្នាកសាងសហគមន៍របស់យើងប្រកបដោយជោគជ័យ។
យើង
ក៏ត្រូវខិតខំធ្វើការឲ្យកាន់តែខ្លាំងថែមទៀតដើម្បីជម្រុញទឹកចិត្ត
ប្រជាជនអាស៊ាន បង្កើនការយល់ដឹងពីបេតិកភណ្ឌរួមដែលពួកគេមានចំណែក
និងវាសនារួម
ព្រមទាំងដើម្បីលើកទឹកចិត្តឲ្យមានការចូលរួមរបស់ពួកគេក្នុងដំណើរការ
ប្រកបដោយក្តីសោមនស្សរីករាយ នៃកិច្ចសហប្រតិបត្តិការតំបន់។
គណៈប្រតិភូ និងអ្នកចូលរួមទាំងអស់
ក្នុងឱកាស
នេះ ខ្ញុំសូមរំលឹកឡើងវិញនូវគោលបំណងមួយចំនួននៃធម្មនុញ្ញរបស់អាស៊ាន
ដែលអាចទាក់ទងនឹងអ្វីដែលអ្នកទាំងអស់គ្នានឹងពិភាក្សាក្នុងរយៈពេល
បីថ្ងៃនេះ។ គោលបំណងទាំងនោះរួមមាន៖
- ធានាថា ប្រជាជនអាស៊ានរស់នៅប្រកបដោយសន្តិភាពជាមួយពិភពលោកទាំងមូលក្នុងបរិយាកាសយុត្តិធម៌ ប្រជាធិបតេយ្យ និងសុខដុមរមនា។
- ពង្រឹងលទ្ធិប្រជាធិបតេយ្យ លើកកម្ពស់អភិបាលកិច្ចល្អនិងនីតិរដ្ឋ ការពារនិងលើកកម្ពស់សិទ្ធិមនុស្ស និងសេរីភាពជាមូលដ្ឋាន។
- លើកស្ទួយការអភិវឌ្ឍ ប្រកបដោយនិរន្តរភាព ដើម្បីធានាការការពារបរិស្ថានតំបន់ និរន្តរភាពនៃធនធានធម្មជាតិ និងការអភិរក្សមរតកវប្បធម៌ និងគុណភាពនៃជីវភាពរស់នៅខ្ពស់របស់ប្រជាជន។
- អភិវឌ្ឍធនធានមនុស្ស តាមរយៈកិច្ចសហប្រតិបត្តិការជិតស្និទ្ធក្នុងការអប់រំ និងការសិក្សាក្នុងមួយជីវិត និងកិច្ចសហប្រតិបត្តិលើផ្នែកវិទ្យាសាស្រ្តនិងបច្ចេកវិទ្យា ដើម្បីផ្តល់សិទ្ធិជូនប្រជាជនអាស៊ាន និងដើម្បីការពង្រឹងសហគមន៍អាស៊ាន។
- ពង្រឹង កិច្ចសហប្រតិបត្តិការក្នុងការកសាងបរិស្ថានមួយប្រកបដោយសុវត្ថិភាព សន្តិសុខ និងភាពគ្មានគ្រឿងញៀនសម្រាប់ប្រជាជនអាស៊ាន។
- ជម្រុញឲ្យមាន អាស៊ាន ដែលផ្តោតការយកចិត្តទុកដាក់ដល់ប្រជាជនអាស៊ាន ដែលក្នុងនោះគ្រប់ផ្នែកទាំងអស់នៃសង្គមត្រូវបានលើកទឹកចិត្តឲ្យចូលរួម និងទទួលផលប្រយោជន៍ពីដំណើរការសមាហរណកម្ម និងការកសាងសហគមន៍អាស៊ាន។
- លើក កំពស់ជម្រុញអត្តសញ្ញាណអាស៊ាន តាមរយៈការជម្រុញឲ្យមានចម្រើនឡើងនូវការយល់ដឹងថែមទៀតអំពីវប្បធម៌ និងមរតកចម្រុះក្នុងតំបន់។
ខ្ញុំដឹងថា
អ្នកទាំងអស់ដែលបានជួបជុំគ្នាក្នុងវេទិកានាថ្ងៃនេះ
តំណាងឲ្យក្រុមនៃអង្គការសង្គមស៊ីវិលជាច្រើនដែលមកពីខាង
ក្នុងប្រទេសកម្ពុជា និងមកពីរដ្ឋសមាជិកផ្សេងទៀតរបស់អាស៊ាន។
គណៈកម្មាធិការរៀបចំរបស់កម្ពុជាបានទទួលអាណត្តិក្នុងការរៀបចំវេទិកា
ឆ្នាំនេះ ពីម្ចាស់ផ្ទះរៀបចំកាលពីឆ្នាំមុនគឺប្រទេសឥណ្ឌូណេស៊ី
ដើម្បីធានាដំណើរការប្រកបដោយតម្លាភាព និងប្រជាធិបតេយ្យ
ជាពិសេសគឺការប្រព្រឹត្តិទៅដោយរលូន
និងជោគជ័យនៃការរៀបចំវេទិកាប្រជាជនអាស៊ានប្រចាំឆ្នាំ២០១២នេះ។
តំណាងរបស់កម្ពុជា
ត្រូវបានជ្រើសរើសដោយការបោះឆ្នោតនៅឯកិច្ចប្រជុំរៀបចំដែល
ប្រព្រឹត្តទៅ នៅសកលវិទ្យាល័យកម្ពុជានៅ រាជធានីភ្នំពេញ
កាលពីថ្ងៃទី១៥ ខែមីនា ឆ្នាំ២០១២ ដោយមានអ្នកចូលរួមចំនួន២,៧៧៩នាក់
មកពីអង្គការមិនមែនរដ្ឋាភិបាល អង្គការសង្គមស៊ីវិល និងអង្គការយុវជន។
គោលបំណងចំបងនៃកិច្ចប្រជុំរៀបចំនេះគឺដើម្បីបង្កើតនូវភាព
ស្របច្បាប់
និងភាពជាតំណាងនៃដំណើរការក្នុងការបោះឆ្នោតជ្រើសរើសយុវជនតំណាង
មួយរូប និងតំណាងសង្គមស៊ីវិលមួយ
ដើម្បីទំនាក់ទំនងជាមួយថ្នាក់ដឹកនាំអាស៊ាន
ព្រមទាំងបោះឆ្នោតជ្រើសរើសគណៈកម្មការចំនួន៤ដើម្បីរៀបចំវេទិកា
ប្រជាជនអាស៊ាននេះ។
អនុញ្ញាត
ឲ្យខ្ញុំអបប់អរសាទរចំពោះអ្នកទាំងអស់គ្នាដោយបានជាប់លើការបោះឆ្នោត
ហើយក៏សូមសម្តែងនូវអំណរសាទររបស់ខ្ញុំទៅកាន់ដល់តំណាងទាំងអស់មកពី
រដ្ឋជាសមាជិកអាស៊ានដទៃទៀត។
ជាទីបញ្ចប់
ខ្ញុំសូមជូនពរដល់ឯកឧត្តម អស់លោក
លោកស្រីដែលបានជួបជុំគ្នាក្នុងថ្ងៃនេះក្នុង នាមប្រជាជនអាស៊ាន
ឲ្យជួបប្រទះតែនឹងភាពជោគជ័យក្នុងការផ្លាស់ប្តូរគំនិតក្នុងវេទិកានេះ។
ខ្ញុំមានជំនឿ ចិត្តថា ការចូលរួមដ៏សកម្ម
និងប្រកបដោយការស្ថាបនារបស់អ្នកទាំងអស់គ្នានឹងជួយអាស៊ានវិវត្តន៍
កាន់ តែខ្លាំងក្លាថែមទៀតនាពេលប៉ុន្មានឆ្នាំខាងមុខនេះ
ដោយហេតុថាយើងរំកិលទៅរកផ្លាស់ប្តូរទៅកាន់ “សហគមន៍មួយ វាសនាតែមួយ”។
ខណៈពេលដែល
ខ្ញុំទុកឲ្យអ្នកទាំងអស់គ្នាដំណើរការនូវធ្វើកិច្ចការពិភាក្សាដ៏សំខាន់
នេះ ខ្ញុំសូមជូនពរឯកឧត្តម លោកជំទាវ អស់លោក លោកស្រី
និងអ្នកចូលរួមទាំងអស់ សូមជួបប្រទះតែនឹងសេចក្តីសុខ
ជ័យជំនះគ្រប់ភារកិច្ច និងសុភមង្គលក្នុងក្រុមគ្រួសារ។
ឥឡូវ ខ្ញុំសូមប្រកាសបើកវេទិកានេះ។
សូមអរគុណ!