ក្នុងឱកាសជួបពិភាក្សាជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៦ ខែមីនា ឆ្នាំ២០១២ នៅវិមានសន្តិភាព ឯកឧត្តម បុប ខារ ( Bob Carr ) រដ្ឋមន្ត្រីក្រសួងការបរទេសអូស្ត្រាលី បានសម្តែងអំណរសាទរចំពោះ សម្តេចតេជោនាយករដ្ឋមន្ត្រី
ក៏ដូចជារាជរដ្ឋាភិបាលកម្ពុជាផងដែរ
នូវរាល់ស្នាដៃដែលកម្ពុជាទទួលបានទាំងអស់ ដូចជាសន្តិភាព
កំណើនសេដ្ឋកិច្ចនិងការធ្វើឲ្យបានល្អប្រសើរ នូវសុខមាលភាព
របស់ប្រជាពលរដ្ឋ។
ឯកឧត្តមរដ្ឋមន្ត្រីការបរទេសអូស្ត្រាលី ក៏បានសម្តែងការអបអរសាទរជូនចំពោះ សម្តេចតេជោ ហ៊ុន សែន និងប្រទេសកម្ពុជា ដែលធ្វើជាប្រធានអាស៊ាន ហើយប្រទេសអូស្ត្រាលី មានមោទនភាព ខ្លាំងណាស់ដែលធ្វើជាដៃគូសន្ទនា របស់អាស៊ាន។
យោងតាមឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យ
ដឹងថា នៅក្នុងជំនួបសំដែងការគួរសមនោះ ឯកឧត្តម BOB CARR
រដ្ឋមន្ត្រីក្រសួងការបរទេសអូស្ត្រាលី ក៏បានសាកសួរសុខទុក្ខ
និងជូនពរសព្វសារធុការពរជូនចំពោះអ្នកឧញ៉ាមហាភក្តីសិប្បុរសភោ
គាធិបតី ហ៊ុន នាង ដែលជាបិតារបស់សម្តេចតេជោនាយករដ្ឋមន្ត្រីសូមឲ្យមានសុខភាពល្អ និងជាសះស្បើយពីជំងឺ ។
ឯកឧត្តមជំនួយការឲ្យដឹងថា សម្តេចតេជោនាយករដ្ឋមន្ត្រីបាន
ថ្លែងអំណរគុណផងដែរជូនចំពោះ BOB CARR
ដែលបានអបអរសាទរចំពោះជោគជ័យរបស់កម្ពុជា ដោយមានប្រសាសន៍ថា
កម្ពុជាមានមោទន ភាពណាស់ ព្រោះការទទួលបានសន្តិភាពពេញលេញនៅកម្ពុជា
គឺមិនអាចកាត់ផ្តាច់បានអំពីតួនាទី របស់អូស្ត្រាលីទេ ជាពិសេស លោក
ហ្គារ៉េតអេវ៉ាន អតីតរដ្ឋមន្រ្តីក្រសួងការបរទេសអូស្ត្រាលី និងលោក
សាន់ដឺសុន
(អតីតប្រមុខកងទ័ពរក្សាសន្តិភាពរបស់អាជ្ញាធរបណ្តោះអាសន្ននៃ
អង្គការសហប្រជាជាតិ ប្រចាំនៅកម្ពុជា អ៊ុនតាក់ )ផងដែរ។ សម្តេចតេជោមានប្រសាសន៍ថា អូស្ត្រាលីបានដើរតួនាទីយ៉ាងសំខាន់នៅក្នុងការស្វែងរកសន្តិភាពសម្រាប់កម្ពុជា។
សម្តេចតេជោបានថ្លែងអំណរគុណជូនចំពោះ
ប្រទេសអូស្ត្រាលីដែលបានផ្តល់ជំនួយសម្រាប់ការកាត់
ទោសមេដឹកនាំខ្មែរក្រហម ដោយមានប្រសាសន៍ថា ឯកឧត្តម ហ្គារ៉េតអេវ៉ាន
គឺជាសាក្សីមួយរូបនៅក្នុង
ដំណើរការចរចាស្វែងរកសន្តិភាពសម្រាប់កម្ពុជា ហើយក្នុងការចរចានោះ សម្តេចតេជោនាយករដ្ឋមន្ត្រី
ផ្ទាល់ បានទាមទាឲ្យដាក់នៅក្នុងកិច្ចព្រមព្រៀងថា
«ទប់ស្កាត់ការវិលត្រឡប់នៃរបបប្រល័យពូជសាសន៍»
ដែលពេលនោះហើយដែលកម្ពុជាទាមទាកាត់ទោសខ្មែរក្រហម ។
ឯកឧត្តមជំនួយការថ្លែងថា សម្តេចតេជោនាយករដ្ឋមន្ត្រី
ក៏បានថ្លែងអំណរគុណចំពោះអូស្ត្រាលីដែល
បានផ្តល់ជំនួយដល់ជនរងគ្រោះដោយទឹកជំនន់កាលពីឆ្នាំ ២០១១
ក៏ដូចជាការជួយកម្ពុជាលើវិស័យ កសិកម្ម
រួមទាំងវិស័យអភិវឌ្ឍធនធានមនុស្សផងដែរ។ សម្តេចតេជោ
បានស្នើឲ្យអូស្ត្រាលីបន្តផ្តល់ ជំនួយដល់កម្ពុជា ជាពិសេស
ពិនិត្យមើលលទ្ធភាពជួយកម្ពុជាលើការបោះឆ្នោតក្រុមប្រឹក្សាឃុំ-សង្កាត់
ឬការបោះឆ្នោតថ្នាក់ជាតិនៅអាណត្តិក្រោយផងដែរ៕