នៅ
ក្រោមប្រធានបទដែលត្រូវពិភាក្សា
“យើងប្រជាជនអាស៊ានរួមដៃគ្នាសម្រាប់សហគមន៍អាស៊ាន” សន្និសីទ
សង្គមស៊ីវិលអាស៊ាន/វេទិកាប្រជាជនអាស៊ានបានប្រារព្ធ
ធ្វើឡើងនៅសាលសន្និសីទចតុមុខរាជធានីភ្នំពេញ នាព្រឹកថ្ងៃទី ២៨
ខែមីនា ឆ្នាំ ២០១២ ក្រោមអធិបតីភាពដ៏ខ្ពង់ខ្ពស់ឯកឧត្តម បណ្ឌិត សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ។
លោក អៀង អូននី
នាយកអង្គការសហព័ន្ធនិស្សិតបញ្ញាវ័នប្រជាធិបតេយ្យ(CDSIF)
ដែលជាអង្គការមួយក្នុងចំណោមអង្គការ៤
ដែលត្រូវបានជ្រើសរើសឲ្យរៀបចំអង្គសន្និសីទនេះ បានឲ្យដឹងថា
សន្និសីទសង្គមស៊ីវិលអាស៊ាន/វេទិកាប្រជាជនអាស៊ានត្រូវបានរៀបចំ
ឡើងក្នុងគោលបំណង ឲ្យមានការជួបជុំគ្នា កសាងទំនាក់ទំនង ចំណេះដឹង
រៀនសូត្រពីគ្នាទៅវិញទៅមក លើកឡើងពីការលំបាក
និងបញ្ហាប្រឈមទាំងឡាយមកពិភាក្សារកដំណោះស្រាយ
និងយកបញ្ហាទាំងនេះទៅជូនថ្នាក់ដឹកនាំដែលចូលរួមសន្និសីទកំពូល
អាស៊ានជួយដោះស្រាយ។
ដោយចាត់ទុកការប្រមូលផ្តុំរបស់
តំណាងអង្គការសង្គមស៊ីវិល និងប្រជាពលរដ្ឋអាស៊ាន
បង្ហាញនូវការប្តេជ្ញាចិត្តយ៉ាងមុតមាំរួមដៃគ្នាក្នុងការដោះស្រាយ
បញ្ហាប្រឈមរួម ដែលប្រជាជនអាស៊ានកំពុងជួបប្រទះ ឯកឧត្តមបណ្ឌិត សុខ អាន បាន
មានប្រសាសន៍ក្នុងពិធីបើកសន្និសីទថា ខ្ញុំមានជំនឿទុកចិត្តថា
សម្លេងរបស់អ្នកទាំងអស់គ្នានឹងត្រូវបានជួ្រតជ្រាបកាន់តែ
ខ្លាំងឡើងៗ ក្នុងបុព្វហេតុនៃការបង្កើតតំបន់អាស៊ីអាគ្នេយ៍មួយ
និងតំបន់ដ៏ទៃទៀត ប្រកបដោយសុខដុមរមនា និងរុងរឿង។
ឯកឧត្តមបណ្ឌិត សុខ អាន បញ្ជាក់
ថា
ភាពជាដៃគូដ៏ពិតប្រាកដនៃកិច្ចសហប្រតិបត្តិការទៅវិញទៅមកក្នុងចំណោម
រដ្ឋាភិបាល អង្គការសង្គមស៊ីវិល
និងសហគមន៍នៃអ្នកសិក្សាស្រាវជ្រាវគឺពុំមែនត្រឹមតែជាទស្សនាទាន
ប៉ុណ្ណោះទេ ប៉ុន្តែជាការអនុវត្តជាក់ស្តែងនិងប្រកបដោយផ្លែផ្កា
ក្នុងតំបន់របស់យើង។ នេះជានិន្នាការជាបន្តបន្ទាប់និង
វិជ្ជមាន ព្រោះខ្ញុំជឿជាក់ថា
យើងទាំងអស់គ្នាមានតួនាទីថែរក្សានិងពង្រឹងសន្តិភាព និងសន្តិសុខ
ស្ថេរភាព និងការអភិវឌ្ឍ។
ឯកឧត្តមបណ្ឌិត សុខ អាន បាន
ឲ្យដឹងថា នៅក្នុងតំបន់អាស៊ាន ជួបប្រទះការប្រឈមថ្មីៗជាច្រើន
ដែលកើតចេញពីទាំងកត្តាមនុស្ស និងធម្មជាតិ។ ភាពក្រីក្រ
និងគម្លាតនៃការអភិវឌ្ឍយ៉ាងធំ និកម្មភាព ការប្រែប្រួលអាកាសធាតុ
គ្រោះធម្មជាតិ
នៅតែជាបញ្ហាប្រឈមជាចំបងយ៉ាងសំខាន់ដែលត្រូវដោះស្រាយ
ដើម្បីសម្រេចបាននូវសង្គមមួយដែលមានសន្តិសុខស្បៀង សន្តិសុខថាមពល
និងសន្តិសុខធនធានទឹក ក៏ដូចជាសិទ្ធិមនុស្ស
(ជាពិសេសសិទ្ធិសម្រាប់ស្រ្តី និងកម្មករទេសន្តរប្រវេសន៍)
ការងារសមរម្យ យុត្តិធម៌សង្គម ការការពារបរិស្ថាន និងអភិបាលកិច្ចល្អ។
ទោះបីយ៉ាងណា ឯកឧត្តមបណ្ឌិត សុខ អាន បាន
មានប្រសាសន៍បញ្ជាក់ថា
អាស៊ានសម្រេចបានសមិទ្ធផលគួរឲ្យកត់សម្គាល់យ៉ាងហោចណាស់ចំនួនបី
រួមមាន សន្តិភាព និងស្ថេរភាព
ទំនាក់ទំនងសេដ្ឋកិច្ចឆ្ពោះទៅកាន់សមាហរណកម្ម
និងការបង្កើតនូវសហគមន៍ការទូតដ៏សកម្មមួយ។ ប៉ុន្តែ
សមិទ្ធផលទាំងនេះអាចត្រូវរារាំងដោយជម្លោះទំនាស់អធិបតេយ្យភាព
ភាពជាតិនិយមហួសហេតុ គម្លាតនៃការអភិវឌ្ឍរវាងសមាជិកថ្មី
និងចាស់របស់អាស៊ាន
និងភាពមានកម្រិតផ្នែកការទូតដើម្បីបញ្ចៀសបញ្ហានិងការដោះស្រាយ
ជម្លោះ។
នៅក្នុងការស្វែងរកដំណោះស្រាយ ឯកឧត្តមបណ្ឌិត សុខ អាន បាន
ផ្តល់ជាអនុសាសន៍ថា ខ្ញុំសូមលើកឡើងផងដែរថា យើង
ជាប្រជាជនអាស៊ាន មានសំណាងដោយបានឃើញការអភិវឌ្ឍ
ជាវិជ្ជមានដ៏ខ្លាំងក្លានៃស្ថាប័នតំបន់របស់យើង
ដែលកំពុងដើរតួនាទីយ៉ាងសំខាន់ក្នុងការពង្រឹងកិច្ចសហប្រតិបត្តិ
ការក្នុងតំបន់ និងស្ថាប័នូបនីយកម្ម ក្នុងតំបន់អាស៊ីបូព៌ាទាំងមូល។
យើងសង្ឃឹមថា តួនាទីបែប នេះសម្រាប់អាស៊ាន
នឹងនៅតែបន្តជាមួយគំនិតផ្តួចផ្តើមថ្មីៗ គំនិតថ្មីៗ
ព្រមទាំងភាពវៃឆ្លាតផ្នែកការទូត។
របៀបទំនាក់ទំនងក្នុងស្ថានភាពដែលពាក់ព័ន្ធនឹងប្រទេសជាច្រើន
ដើម្បីបង្កើតនូវសមតាប្រកបដោយថាមពល
មិនមែនជាការងាយស្រួលនោះឡើយទេ។
អាស៊ានចាំបាច់ត្រូវមានសម្លេងតែមួយដើម្បីបង្ហាញឲ្យឃើញនូវអត្ថប្រយោជន៍រួមរបស់យើង។
សន្និសីទសង្គមស៊ីវិលអាស៊ាន/វេទិកា
ប្រជាជនអាស៊ានលើកទី៨ ដែលប្រារព្ធធ្វើនៅរាជធានីភ្នំពេញរយៈពេល ៣
ថ្ងៃ (២៨-៣០ ខែមីនា ឆ្នាំ ២០១២) មានសមាជិកចូលរួមចំនួន ១០៩៣ នាក់
ក្នុងនោះមានប្រតិភូបរទេសចំនួន ២១២ នាក់
តំណាងអង្គការសង្គមស៊ីវិលចំនួន ៩៦ និងប្រជាជនអាស៊ាន មកពី ៩
ប្រទេសផ្សេងទៀត រួមមានប្រទេស ប៊្រុយណេ ឥណ្ឌូនេស៊ី ឡាវ មីយ៉ាន់ម៉ា
ម៉ាឡេស៊ី ហ្វីលីពីន សឹង្ហបុរី ថៃ និងវៀតណាម។
អង្គការសង្គមស៊ីវិលចំនួន ៤
ដែលទទួលបានការជ្រើសរើសកាលពីថ្ងៃទី ១៥ មីនា ឆ្នាំ ២០១២
ដើម្បីជាតំណាងរបស់អង្គការសង្គមស៊ីវិលនៅក្នុងព្រះរាជាណាចក្រកម្ពុជា
ដើម្បីធ្វើការរៀបចំ
សន្និសីទសង្គមស៊ីវិលអាស៊ាន/វេទិកាប្រជាជនអាស៊ានលើកទី៨ រួមមាន
អង្គការសហព័ន្ធនិស្សិតបញ្ញាវ័នប្រជាធិបតេយ្យ(CDSIF)
វិទ្យាស្ថានខ្មែរសម្រាប់កិច្ចសហប្រតិបត្តិការ និងសន្តិភាព(CICP)
អង្គការបម្លាស់ប្តូរវិជ្ជមានដើម្បីកម្ពុជា(PCC)
និងមជ្ឈមណ្ឌលអភិវឌ្ឍន៍សិទ្ធិមនុស្សកម្ពុជា-អាស៊ាន (CACHRD) ៕