សុន្ទរកថា
ឯកឧត្តម សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីប្រគល់សញ្ញាបត្រ
ដល់គរុនិស្សិត
កម្រិតឧត្តម “ បរិញ្ញា+១ ” ជំនាន់ទី១៦ និងគរុសិស្សកម្រិតមូលដ្ឋាន
ឯកទេសភាសាបារាំង-ខ្មែរ “ ១២+២ ” នៃវិទ្យាស្ថានជាតិអប់រំ
រាជធានីភ្នំពេញ ថ្ងៃទី០៦ ខែមីនា ឆ្នាំ២០១២
- ឯកឧត្តម លោកឧកញ៉ា លោកជំទាវ អស់លោក លោកស្រី ជាទីមេត្រី!
- គណៈគ្រប់គ្រង សាស្រ្តាចារ្យ មន្ត្រីរាជការ ក្មួយៗគរុនិស្សិត និងគរុសិស្សទាំងអស់ជាទីស្រឡាញ់រាប់អាន!
ថ្ងៃនេះ
ខ្ញុំមានសេចក្តីសោមនស្សរីករាយ
ចូលរួមក្នុងពិធីប្រគល់សញ្ញាបត្រជូនដល់ក្មួយៗ គរុនិស្សិត និងគរុសិស្ស
ចំនួន ១.០៣២នាក់ ដែលបានបញ្ចប់ការសិក្សាប្រកបដោយជោគជ័យ។ ក្នុងឱកាសនេះ
ខ្ញុំសូមសម្តែងនូវមនោសញ្ចេតនាអបអរសាទរ និងការកោតសរសើរដល់គណៈគ្រប់គ្រង
សាស្ត្រាចារ្យ និងមន្ត្រីរាជការទាំងអស់ នៃវិទ្យាស្ថានជាតិអប់រំ
ដែលបានខិតខំយកអស់កម្លាំងកាយចិត្ត ក្នុងការអប់រំ បណ្តុះបណ្តាល
បង្ហាត់បង្ហាញ និងផ្ទេរចំណេះដឹងដ៏មានតម្លៃដល់ក្មួយៗគរុនិស្សិត
និងគរុសិស្សទាំងអស់ដោយការយកចិត្តទុកដាក់ខ្ពស់
សំដៅរួមចំណែកអភិវឌ្ឍធនធានមនុស្សនៅកម្ពុជា។
លទ្ធផលគួរជាទីមោទនៈដែលវិទ្យាស្ថានជាតិអប់រំ ក៏ដូចជាក្រសួងអប់រំ យុវជន
និងកីឡា សម្រេចបាននាពេលកន្លងមកនេះ គឺជាការឆ្លើយតបយ៉ាងសមស្រប
និងទាន់ពេលវេលាទៅនឹងគោលនយោបាយរបស់រាជរដ្ឋាភិបាល
និងសេចក្តីត្រូវការរបស់ប្រទេសជាតិ
ក្នុងការអភិវឌ្ឍធនធានមនុស្សប្រកបដោយគុណវុឌ្ឍិខ្ពស់
ដើម្បីក្លាយជាកម្លាំងប្រកបដោយសក្តានុពល
ក្នុងការជួយជម្រុញដល់កំណើនសេដ្ឋកិច្ច និងការកាត់បន្ថយភាពក្រីក្រ។
ឯកឧត្តម លោកជំទាវ អស់លោក លោកស្រី និងក្មួយៗគរុនិស្សិត និងគរុសិស្សទាំងអស់
រាជរដ្ឋាភិបាល
ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា
បានយកចិត្តទុកដាក់យ៉ាងខ្លាំងលើវិស័យអប់រំ
ពិសេសការអប់រំបណ្តុះបណ្តាលគ្រូបង្រៀន
ការបណ្តុះបណ្តាលធនធានមនុស្សប្រកបដោយជំនាញវិជ្ជាជីវៈខ្ពស់
ដើម្បីឆ្លើយតបទៅនឹងតម្រូវការទីផ្សារការងារ។ បច្ចុប្បន្ននេះ
គ្រឹះស្ថានសិក្សាទាំងរដ្ឋ និងឯកជន
បាននិងកំពុងខិតខំប្រឹងប្រែងពង្រីកលទ្ធភាព ក៏ដូចជាពង្រឹងសមត្ថភាពរបស់ខ្លួន
ដើម្បីបំពេញនូវតម្រូវការក្នុងការបណ្តុះបណ្តាលធនធានមនុស្ស
ឲ្យស្របតាមនិន្នាការសេដ្ឋកិច្ចនិងនយោបាយ
ក្នុងបរិបទនៃចរន្តសកលភាវូបនីយកម្ម។ ជាក់ស្តែង
តួលេខនិស្សិតដែលបានបញ្ចប់ការសិក្សាមានការកើនឡើងគួរឲ្យ
កត់សម្គាល់ជារៀងរាល់ឆ្នាំ។ ដោយឡែក នៅចំពោះមុខយើងនេះ គរុនិស្សិត
និងគរុសិស្ស ចំនួន ១.០៣២នាក់
បានខិតខំពុះពារឆ្លងកាត់ការបណ្តុះបណ្តាលវិជ្ជាជីវៈជាគ្រូ
បង្រៀនអស់រយៈពេលពេញមួយឆ្នាំនៅវិទ្យាស្ថានជាតិអប់រំនេះ
រហូតទទួលបានលទ្ធផលគួរជាទីមោទនៈ
ដែលក្មួយៗទាំងអស់នឹងទទួលបានសញ្ញាបត្រនៅពេលបន្តិចទៀតនេះ។
តាមរបាយការណ៍របស់ឯកឧត្តម
អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា
បានបង្ហាញពីការរួមចំណែកយ៉ាងធំធេងរបស់វិទ្យាស្ថានជាតិអប់រំក្នុងការ
បណ្តុះបណ្តាលគ្រូកម្រិតឧត្តម និងកម្រិតមូលដ្ឋាន។ ឆ្លៀតក្នុងឱកាសនេះ
ក្នុងនាមសម្តេចអគ្គមហាសេនាបតីតេជោ ហ៊ុន សែន និងក្នុងនាមខ្ញុំផ្ទាល់
ខ្ញុំសូមចូលរួមអបអរសាទរចំពោះលទ្ធផលដ៏ធំធេងនេះ
និងសូមកោតសរសើរដោយស្មោះចំពោះក្រសួងអប់រំ យុវជន និងកីឡា គណៈគ្រប់គ្រង
សាស្ត្រាចារ្យ និងបុគ្គលិកទាំងអស់នៃវិទ្យាស្ថានជាតិអប់រំ
ដែលបានយកចិត្តទុកដាក់ខ្ពស់ក្នុងការលើកកម្ពស់គុណភាពអប់រំ
និងបណ្តុះបណ្តាលធនធានមនុស្ស ដោយបានខិតខំខ្នះខ្នែងគាំទ្រទាំងកម្លាំងកាយ
កម្លាំងចិត្ត និងប្រាជ្ញាស្មារតី
ធ្វើឲ្យវិទ្យាស្ថាននេះអាចដំណើរការរហូតដល់សព្វថ្ងៃ
ហើយថែមទាំងមានលទ្ធភាពបណ្តុះបណ្តាលគ្រូឲ្យមានសមត្ថភាពពេញលេញ
និងមានជំនាញប្រកបដោយមនសិការវិជ្ជាជីវៈខ្ពស់។
ក្នុងបរិបទនៃការវិវត្តឥតឈប់ឈរក្នុងពិភពលោក
ជាពិសេសការរីកលូតលាស់នៃបច្ចេកវិទ្យាព័ត៌មានវិទ្យានិងគមនាគមន៍ (ICT)
ទាមទារឲ្យយើងអភិវឌ្ឍទាំងបច្ចេកទេសគរុកោសល្យ និងឯកសារសិក្សាស្រាវជ្រាវ
ព្រមទាំងត្រូវយកចិត្តទុកដាក់ជាចម្បងលើការលើកកម្ពស់គុណភាពអប់រំ
ក្នុងវិស័យអប់រំ និងបណ្តុះបណ្តាលវិជ្ជាជីវៈ។
បើការអប់រំមិនអាចធានាបាននូវគុណវុឌ្ឍិទេ
នោះការអប់រំនិងការបណ្តុះបណ្តាលនឹងគ្មានន័យ ហើយរាល់ការចំណាយទាំងថវិកា
និងស្មារតី នឹងត្រូវខ្ជះខ្ជាយឥតប្រយោជន៍ ពីព្រោះថាការអប់រំដែលគ្មានគុណភាព
មិនត្រឹមតែបំផ្លាញអនាគតរបស់សិស្ស-និស្សិតប៉ុណ្ណោះទេ
ប៉ុន្តែថែមទាំងបង្កក្តីអន្តរាយដល់ធនធានរបស់ប្រទេសជាតិទាំងមូល
ដែលនេះនឹងធ្វើឲ្យប្រទេសជាតិបាត់បង់នូវសមត្ថភាពក្នុងការប្រកួត
ប្រជែងលើគ្រប់វិស័យ និងរារាំងដល់កិច្ចខិតខំលើកកម្ពស់កម្រិត ជីវភាពប្រជាជន
និងការអភិវឌ្ឍសេដ្ឋកិច្ចជាតិយើងថែមទៀតផង។
រាជរដ្ឋាភិបាល
បានចាត់ទុកការអភិវឌ្ឍធនធានមនុស្សប្រកបដោយគុណភាព
និងការប្រើប្រាស់មូលធនបញ្ញារបស់ជាតិប្រកបដោយប្រសិទ្ធភាព
ជាចក្ខុវិស័យរយៈពេលវែងសម្រាប់អភិវឌ្ឍប្រទេសជាតិ។
បទពិសោធន៍ប្រវត្តិសាស្រ្តបង្ហាញថាប្រទេសដែលទទួលបានជោគជ័យក្នុង
ការអភិវឌ្ឍ
គឺចាប់ផ្តើមពីការយកចិត្តទុកដាក់ខ្ពស់លើការវិនិយោគក្នុង
វិស័យអប់រំ
ពីព្រោះធនធានមនុស្សជាប្រភពមិនចេះរីងស្ងួតសម្រាប់ធានានូវ
កំណើនសេដ្ឋកិច្ច និងការអភិវឌ្ឍសង្គមប្រកបដោយចីរភាព
ព្រមទាំងជាកម្លាំងបន្តវេនក្នុងការការពារ
និងកសាងមាតុភូមិជាទីស្នេហារបស់យើង។
ក្នុង
ន័យនេះ
រាជរដ្ឋាភិបាលបានដាក់ចេញនូវគោលនយោបាយពង្រឹងវិស័យអប់រំនិងការបណ្តុះ
បណ្តាលវិជ្ជាជីវៈ
ដែលជារបៀបវារៈដ៏សំខាន់បំផុតសម្រាប់ឆ្លើយតបទៅនឹងបញ្ហាប្រឈមនានា
ហើយបានផ្តល់អាទិភាពខ្ពស់បំផុតក្នុងការកែទម្រង់
និងការអភិវឌ្ឍវិស័យអប់រំ តាមរយៈការពង្រឹងគុណភាព និងមូលដ្ឋានអប់រំ។
ដើម្បីសម្រេចបានទស្សនទាននេះ យើងត្រូវបន្តបង្កើនបរិមាណ
និងលើកកម្ពស់គុណភាពអប់រំ បណ្តុះបណ្តាលបច្ចេកទេស
និងវិជ្ជាជីវៈឲ្យច្រើនថែមទៀត ដែលការលើកកម្ពស់គុណភាពធនធានមនុស្សនេះ
គឺជាកត្តាស្នូលដែលក្រសួងអប់រំ យុវជន និងកីឡា
និងក្រសួង-ស្ថាប័នពាក់ព័ន្ធចាំបាច់ត្រូវបន្តយកចិត្តទុកដាក់តម្រង់
ទិសនៃការងារអប់រំឲ្យកាន់តែមានគុណភាព
និងត្រូវកសាងបទដ្ឋានផ្សេងៗធានាលើកស្ទួយវិស័យអប់រំ។
ឯកឧត្តម លោកជំទាវ អស់លោក លោកស្រី និងក្មួយៗគរុនិស្សិត និងគរុសិស្សទាំងអស់
ក្មួយៗជ័យលាភីទាំងអស់ដែលនឹង
ទទួលបានសញ្ញាបត្រនាពេលបន្តិចទៀតនេះ ត្រូវយកសមត្ថភាព
និងចំណេះដឹងដែលក្មួយៗមាន
ទៅប្រើប្រាស់ឲ្យអស់លទ្ធភាពក្នុងការផ្ទេរចំណេះដឹងបន្តដល់សិស្ស-និស្សិត
នៅតាមគ្រឹះស្ថានសិក្សា ដែលក្មួយៗត្រូវទៅបំពេញភារកិច្ច។ ក្មួយៗនេះហើយ
គឺជាអ្នកទទួលមរតកសង្គម និងជាអ្នកបន្តវេន ហើយវាសនាប្រទេសជាតិ
គឺពឹងផ្អែកលើក្មួយៗទាំងអស់គ្នា។ ដូច្នេះ
សូមក្មួយៗទាំងអស់ខិតខំបំពេញភារកិច្ចឲ្យបានល្អប្រសើរ
ហើយត្រូវខិតខំប្រឹងប្រែងកសាងបុគ្គលិកលក្ខណៈផ្ទាល់ខ្លួន
និងយកចំណេះដឹងដែលទទួលបានពីការសិក្សានៅវិទ្យាស្ថានជាតិអប់រំ
ទៅប្រើប្រាស់ឲ្យសមស្របនិងចំទិសដៅ។
ចូរក្មួយៗរក្សាឲ្យបាននូវសមត្ថភាពប្រជែងឈ្នះរបស់ជាតិ
និងរបស់បុគ្គលខ្លួនឯងផ្ទាល់។ សូមក្មួយៗកុំបោះបង់ចោលការសិក្សា
និងត្រូវបន្តការសិក្សាស្រាវជ្រាវ ហើយត្រូវចាត់ទុកថាការរៀនសូត្រ
គឺជាដំណើរការមួយដែលមិនចេះចប់ ដើម្បីដុសខាត់ចំណេះដឹង
និងចំណេះធ្វើរបស់ខ្លួនម្នាក់ៗឲ្យកាន់តែប្រសើរថែមទៀត។
ក្មួយៗត្រូវចងចាំថា ដើម្បីក្លាយជាគ្រូបង្រៀនដ៏ឆ្នើម
ត្រូវបំពេញឲ្យបាននូវលក្ខណសម្បត្តិបីយ៉ាងគឺ សមត្ថភាពអប់រំសិស្ស
សមត្ថភាពស្រាវជ្រាវ និងសីលធម៌វិជ្ជាជីវៈ។ ខ្ញុំមានជំនឿយ៉ាងមុតមាំថា
ក្មួយៗដែលជាជ័យលាភីនាថ្ងៃនេះ
គឺជាធនធានមនុស្សប្រកបដោយលក្ខណសម្បត្តិទាំងបីយ៉ាងនេះ
ហើយស្នាដៃដែលក្មួយៗនឹងបញ្ចេញនាពេលដ៏ខ្លីខាងមុខនេះ
នឹងរួមចំណែកបង្កើនសមត្ថភាពធនធានមនុស្សយើងបានថែមមួយកម្រិតទៀតជាក់ជាមិន
ខាន។
ទន្ទឹមនឹងនេះ
ខ្ញុំសូមលើកទឹកចិត្តនិងជម្រុញឲ្យគណៈគ្រប់គ្រងគ្រប់លំដាប់ថ្នាក់
និងសាស្ត្រាចារ្យនៃវិទ្យាស្ថានជាតិអប់រំ
បន្តយកចិត្តទុកដាក់ក្នុងការអភិវឌ្ឍធនធានមនុស្ស និងស្ថាប័នរបស់ខ្លួន
ដើម្បីឲ្យស័ក្តិសមជាវិទ្យាស្ថានគំរូក្នុងការបណ្តុះបណ្តាលគ្រូកម្រិតឧត្តម
និងកម្រិតមូលដ្ឋាន ប្រកបដោយចំណេះដឹង សមត្ថភាព សីលធម៌
និងមនសិការវិជ្ជាជីវៈខ្ពស់។
ជាថ្មីម្តងទៀត ក្នុងនាមរាជរដ្ឋាភិបាលនិងក្នុងនាមខ្ញុំផ្ទាល់
ខ្ញុំសូមសំដែងនូវការកោតសរសើរ និងថ្លែងអំណរគុណចំពោះក្រសួងអប់រំ យុវជន
និងកីឡា
និងស្ថាប័នពាក់ព័ន្ធទាំងអស់ដែលបានជួយឧបត្ថម្ភគាំទ្រជាស្មារតី
សម្ភារៈ ថវិកា
និងបច្ចេកទេសដល់ដំណើរការបណ្តុះបណ្តាលរបស់វិទ្យាស្ថានជាតិអប់រំ។
ខ្ញុំសូមកោតសរសើរផងដែរចំពោះការខិតខំប្រឹងប្រែងរបស់គណៈគ្រប់គ្រង
សាស្រ្តាចារ្យ និងបុគ្គលិកទាំងអស់នៃវិទ្យាស្ថានជាតិអប់រំ
ដែលបានរួមគ្នាបំពេញបេសកកម្មក្នុងការបណ្តុះបណ្តាលគរុនិស្សិត និងគរុសិស្ស
ទទួលបានលទ្ធផលគួរជាទីមោទនៈ។
ជាទីបញ្ចប់
ខ្ញុំសូមអបអរសាទរ និងចូលរួមយ៉ាងសប្បាយរីករាយជាមួយក្មួយៗនៅថ្ងៃនេះ
និងសូមជូនពរដល់ឯកឧត្តម លោកជំទាវ លោកឧកញ៉ា អស់លោក លោកស្រី
ព្រមទាំងក្មួយៗគរុនិស្សិត និងគរុសិស្សទាំងអស់ មានសុខភាពល្អ
ជោគជ័យគ្រប់ភារកិច្ច និងមានសុភមង្គលនៅក្នុងក្រុមគ្រួសារ។
សូមអរគុណ !