នៅក្នុងពិធីសំណេះសំណាលក្នុងពេលរាត្រីថ្ងៃទី
១៣ ខែកក្កដា ឆ្នាំ ២០១២ ជាមួយយុវជនស័្មគ្រចិត្តចុះបំពេញបេសកកម្មវាស់វែងដីធ្លីផ្តល់កម្មសិទ្ធិជូនប្រជាជនរដ្ឋ
នៅឯខេត្តសៀមរាប សម្តេចអគ្គមហាសេនាបតីតេជោ ហ៊ុន សែន បានជំរុញឲ្យក្រុមការងារទាំងអស់
យកចិត្តទុកដាក់ឲ្យបានហ្មត់ចត់ទៅលើការងារវាស់វែងដីធ្លី ជាពិសេសយកចិត្តទុកដាក់ប្រយ័ត្នចំពោះបញ្ហាព្រំដី
និងការឃុបឃិតណាមួយដោយចាត់ទុកថាជាបេសកម្មជាប្រវត្តិសាស្រ្ត។
សម្ដេតេជោនាយករដ្ឋមន្រ្តីមានប្រសាសន៍ណែនាំថា
សូមក្មួយៗដែលធ្វើការងារនេះកុំឲ្យបន្សល់ទុកបញ្ហាឲ្យប្រជាជនមានទំនាស់ព្រំដីនៅថ្ងៃក្រោយ
ហើយសូមជួយតាមដានមើលបញ្ហាដែលអាចកើតមានករណីឃុបឃិតរវាងមន្ត្រីអាជ្ញាធរដែនដី
ឬក៏ក្រុមហ៊ុនដែលទទួលដីសម្បទានដែលអាចកើតឡើងនៅក្នុងពេលផ្ដល់ កម្មសិទ្ទិដីធ្លីនេះ
ព្រោះកិច្ចការនេះយើងធ្វើដើម្បីប្រយោជន៍របស់ប្រជាជន។
ទន្ទឹមនឹងការលើកសរសើរចំពោះក្រុមយុវជនស្ម័គ្រចិត្ត
ដែលបានចូលរួមចំណែកជាមួយ រាជរដ្ឋាភិបាលក្នុងកិច្ចការជាប្រវត្តិសាស្ត្រ
ដែលជាការអនុវត្តនយោបាយចាស់ សកម្មភាពថ្មី នៅក្នុងការវាស់វែង ផ្ដល់ប័ណ្ណកម្មសិទ្ធិដីធ្លីជូនប្រជាពលរដ្ឋ
សម្ដេចតេជោនាយករដ្ឋមន្ត្រីមានប្រសាសន៍ថា ក្មួយៗទាំងអស់ដែលទទួលយកបេសកកម្ម នេះប្រហែលជាមិនមែន
ជារឿងដាច់ដោយឡែកចំពោះកម្ពុជាទេ ប៉ុន្តែបេសកកម្មនេះ យ៉ាងហោចក៏មានចរិតពិសេស
បើមិនកម្រិតពិភពលោកទេក៏ប្រហែលជាក្នុងក្របខណ្ឌតំបន់អាស៊ីដែរ។ សម្ដេចតេជោបានលើកឡើងថា
កាលពីសម័យមុនសម្តេចធ្លាប់ទទួលព័ត៌មានពីប្រទេសខ្លះ ដែលគេធ្វើបដិរូបដីធ្លី
ឬដំណើរការជាតូបនីយកម្ម គេក៏ប្រើយុវជនដែរ ដើម្បីទៅរឹបយកទ្រព្យសម្បត្តិរបស់ប្រជាពលរដ្ឋ
គឺក្នុងអំឡុងទសវត្សរ៍ ៥០ និង៦០ ក្នុងការធ្វើបដិវត្តន៍ដីស្រែដោយប្រមូលយកដីស្រែពីឯកជនមកធ្វើ
ជារបស់រួម។ ដោយឡែកនៅកម្ពុជាក្នុងទសវត្សរ៍ ៧០ ពួកប៉ុលពតក៏ប្រើយុវជនដែរ។
សម្តេចតេជោ បានមានប្រសាសន៍ឲ្យដឹងថា ទាហានសម័យនោះមិនដែលមានអាយុ ៧០ ឆ្នាំទេ
ភាគច្រើនអា យុក្រោម ៣៥ ឆ្នាំ គឺពីចន្លោះអាយុ ១៨ ឆ្នាំ ទៅ ៣៥ ឆ្នាំគេ ក៏បានយុវជនទាំងអស់នោះឲ្យដេញប្រជាជនចេញពីទីក្រុង
ចេញពីលំនៅដ្ឋានប្រមូលទាំងចានឆ្នាំងរបស់ប្រជាជនយកមកដាក់រួមហើយទិដ្ឋភាពដែលយើងបានឃើញ
គេបានប្រើកម្លាំងយុវជនដើម្បីធ្វើជាតូបនីយកម្ម និងធ្វើបដិរូបដីស្រែជាដើម
ឬរឹបអូសទ្រព្យសម្បត្តិប្រជាពលរដ្ឋ។
សម្តេចតេជោនាយករដ្ឋមន្រ្តីមានប្រសាសន៍បញ្ជាក់ថា
ឥឡូវនេះកិច្ចការដែលក្មួយៗកំពុងធ្វើគឺជាបេសកកម្មពិសេសមួយ គឺទៅវាស់ដីជូនប្រជាជនធ្វើកម្មសិទ្ធិ
ដែលនេះជាបេសកកម្មដែលក្មួយគប្បីមានមោទនភាព។ បេសកកម្មនេះ
ជាបេសកកម្មប្រវត្តិសាស្ត្រ ដែលមិនធ្លាប់មាន ក្នុងប្រទេសកម្ពុជា ហើយក៏ជាបេសកកម្មដែលមិនសូវមានក្នុងក្របខ័ណ្ឌពិភពលោក
។
សម្ដេចតេជោអរគុណចំពោះមាតាបិតា
អាណាព្យាបាលក្រុមយុវជនស្ម័គ្រចិត្តទាំងអស់ ដែលបានអនុញ្ញាតឲ្យកូនក្មួយរបស់ខ្លួន
មករួមចំណែកជួយដល់ការងាររបស់រាជរដ្ឋាភិបាល ហើយសម្ដេចបានលើកទឹកចិត្តដល់ក្រុមយុវជនខិតខំធ្វើកិច្ចការនេះ
ឲ្យបានល្អ ដែលជាចុងក្រោយសម្ដេចនឹងផ្ដល់ប័ណ្ណទទួលស្គាល់ចំពោះយុវជនស្ម័គ្រចិត្តទាំងអស់គ្នា
ដែលបានរួមចំណែកជាមួយរាជរដ្ឋាភិបាលក្នុងការអនុវត្តនយោបាយចាស់សកម្មភាពថ្មីនេះ។
សម្ដេចតេជោក៏បានបង្ហាញនូវសុទិដ្ឋិនិយម
និងជំនឿយ៉ាងមាំថារយៈពេល ៥ ឆ្នាំ ក្រោយបន្ទាប់ពីប្រជាពលរដ្ឋទទួលបានកម្មសិទ្ធិដីធ្លីកាន់កាប់ស្របច្បាប់នោះ
យ៉ាងហោចណាស់ប្រជា ពលរដ្ឋ ១ភាគ៣ នៃគ្រួសារទាំងនេះនឹងទទួលបានការអភិវឌ្ឍខាងផ្នែកជីវភាព
ក្នុងក្រុមគ្រួសាររបស់ខ្លួនដោយសារតែដីធ្លីដែលរដ្ឋបានផ្ដល់ប័ណ្ណកម្មសិទ្ធិជូនគាត់យ៉ាងពេញលេញនេះ។
សូមបញ្ជាក់ថា យុវជនស្ម័គ្រចិត្តចំនួនសរុប
៣៦ នាក់ បានចូលរួមក្នុងពិធីសំណេះសំណាលជាមួយសម្តេចតេជោមុនពេល ដែលត្រូវចុះទៅបំពេញបេសកកម្មវាស់វែងដីធ្លីផ្តល់កម្មសិទ្ធិដីធ្លី
ជូនប្រជាពលរដ្ឋនៅស្រុកស្វាយលើ និងស្រុកវ៉ារិន ខេត្តសៀមរាបនោះ។ មានប្រជាពលរដ្ឋប្រហែលជាង៣០
ម៉ឺនគ្រួសារ ដែលស្មើនឹងមនុស្សប្រហែលជាង១ លាននាក់ នឹងបានទទួលផលប្រយោជន៍ពីក្មួយៗជាយុវជនស្ម័គ្រចិត្តប្រមាណ១.៥០០នាក់
ដែលបានបញ្ជូនចេញពីគ្រប់មហាវិទ្យាល័យ ដើម្បីទៅបំពេញបេសកម្មជួយវាស់វែងដីធ្លីធ្វើ
ប័ណ្ណកម្មសិទ្ធិជូនប្រជាពលរដ្ឋ ដែលជាការអនុវត្តនយោបាយចាស់ សកម្មភាពថ្មី របស់រាជរដ្ឋាភិបាល។