ឯកឧត្តម Pak Ui Chun រដ្ឋមន្រ្តីក្រសួងការបរទេសនៃសាធារណរដ្ឋប្រជាមានិតប្រជាធិប
តេយ្យកូរ៉េ (កូរ៉េ ខាងជើង) បានមានប្រសាសន៍ នៅថ្ងៃទី ១៤ ខែ កក្កដា ឆ្នាំ ២០១២
ថា សាធារណរដ្ឋប្រជាមានិតប្រជាធិបតេយ្យកូរ៉េ មានបំណងចង់រិតចំណងទំនាក់ទំនងមិត្តភាពជាមួយកម្ពុជាឲ្យបានកាន់តែរឹងមាំឡើង
មិនត្រឹមតែលើវិស័យនយោបាយទេ ប៉ុន្តែរួមទាំងវិស័យសេដ្ឋកិច្ចផងដែរព្រោះកម្ពុជា
ដែលជាសមាជិកនៃចលនាមិនចូលបក្សសម័្ពន្ធ ហើយក៏ជាប្រធានអាស៊ានផងនោះមានតួរនាទីសំខាន់ណាស់។
ក្រោយពីជំនួបសម្តែងការគួរសមជាមួយសម្តេចអគ្គមហាសេនាបតីតេជោ
ហ៊ុន សែន នៅវិមានសន្តិភាពរាជធានីភ្នំពេញ ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីឲ្យដឹងថា
ជាមួយនឹងការពាំនាំនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម
គីម ជុងអ៊ុន ប្រធានាធិបតីនៃសាធារណរដ្ឋប្រជាមានិតប្រជាធិបតេយ្យកូរ៉េ ជូនចំពោះសម្តេចអគ្គមហាសេនាបតីតេជោ
ហ៊ុន សែន ឯកឧត្តម Pak Ui Chun បានមានប្រសាសន៍ថា ប្រជាជន និងរដ្ឋាភិបាលសាធារណរដ្ឋប្រជាមានិតប្រជាធិបតេយ្យកូរ៉េ
សូមគោរព និងវាយតម្លៃខ្ពស់ចំពោះនយោបាយដ៏ត្រឹមត្រូវរបស់សម្តេចតេជោនាយករដ្ឋមន្រ្តី
ដែលបាននាំកម្ពុជាឆ្ពោះទៅកាន់ការអភិវឌ្ឍ និងទទួលបានកិច្ចសហប្រតិបត្តិការ
នៅក្នុងឆាកអន្តរជាតិ។
ឯកឧត្តម Pak Ui Chun បានជម្រាបជូនសម្តេចតេជោនាយករដ្ឋមន្រ្តីថា
លោកបានជួបជា មួយឯកឧត្តមឧបនាយករដ្ឋមន្រ្តី ហោ ណាំហុង និងបានពិភាក្សាគ្នាលើបញ្ហាពាណិជ្ជកម្ម
សេដ្ឋកិច្ច ដោយសាធារណរដ្ឋប្រជាមានិតប្រជាធិបតេយ្យកូរ៉េមានបំណងចង់សហការជាមួយកម្ពុជាក្នុងការសាងសង់រោងចក្រម៉ាស៊ីនកិនស្រូវ
និងជួលដីដើម្បីដាំកៅស៊ូ ហើយក្នុងករណីដែលភាគីកម្ពុជាយល់ព្រមសាធារណរដ្ឋប្រជាមានិតប្រជាធិបតេយ្យកូរ៉េ
សូមជូនអ្នកឯកទេសលើវិស័យនេះមកធ្វើការសិក្សា។
សម្តេចតេជោនាយករដ្ឋមន្ត្រីបានថ្លែងអំណរគុណចំពោះការផ្តាំផ្ញើសាកសួរសុខទុក្ខពីសំ
ណាក់ឯកឧត្តម គីម ជុងអ៊ុន និងបានវាយតម្លៃខ្ពស់ចំពោះការពិភាក្សារវាងរដ្ឋមន្រ្តីការបរទេសទាំងពីរ
ដោយសម្តេចតេជោមានប្រសាសន៍ថា ជាការពិតណាស់ដែលប្រទេសទាំងពីរ គប្បីជំរុញនូវទំនាក់ទំនង
និងកិច្ចសហប្រតិបត្តិការឲ្យបានកាន់តែខ្លាំងក្លាថែមទៀត ពិសេសទៅលើវិស័យអ្វី
ដែលយើងអាចធ្វើទៅបានដូចជាវិស័យសេដ្ឋកិច្ច
ពាណិជ្ជកម្មក៏ដូចជាវិស័យទេសចរណ៍ផងដែរ។
ពាក់ព័ន្ធជាការចង់បង្កើតរោងចក្រម៉ាស៊ីនកិនស្រូវវិញ
សម្តេចតេជោនាយករដ្ឋមន្រ្តីមានប្រសាសន៍ថា វាជាបំណងល្អ ហើយត្រឹមត្រូវសមស្របទៅតាមគោលនយោបាយរបស់រាជរដ្ឋាភិបាលកម្ពុជាក្នុងទិសដៅនាំអង្ករចេញ។
ដោយបានលើកឡើងថា កម្ពុជាមាននៅសល់ ស្រូវប្រមាណ ៤ លានតោន កាលពីឆ្នាំទៅម៉ិញដែលអាចកិនហើយនាំជាអង្ករចេញបាន
សម្តេចតេជោនាយករដ្ឋមន្រ្តីបានស្នើឲ្យសាធារណរដ្ឋប្រជាមានិតប្រជាធិបតេយ្យកូរ៉េ
បញ្ជូនអ្នកបច្ចេកទេសខាងវិស័យកសិកម្មមកធ្វើការសិក្សា ដើម្បីជ្រើសរើសយកទីតាំងសម្រាប់តម្លើងរោងម៉ាស៊ីនកិនស្រូវនៅកន្លែងណាដែលមានសក្កានុពល
និងអាចប្រមូលទិញពីប្រជាជនបាន។
លើបញ្ហាផ្ទៃដីដាំកៅស៊ូ
សម្តេចតេជោមានប្រសាសន៍ថា រាជរដ្ឋាភិបាលកម្ពុជាទើប តែចេញបទបញ្ជាមិនផ្តល់នូវដីសម្បទានថ្មីទៀតទេ
ដូច្នេះសូមពិចារណាចូលរួមទុនជាមួយក្រុមហ៊ុន ដែលមានដីសម្បទានស្រាប់ ព្រោះក្រុមហ៊ុនមួយចំនួនមានដីសម្បទានសេដ្ឋកិច្ចហើយ
ប៉ុន្តែពុំទាន់មានទុនគ្រប់គ្រាន់ធ្វើការអភិវឌ្ឍនោះទេ។ សម្តេចតេជោនាយករដ្ឋមន្រ្តីក៏បានមានប្រសាសន៍បន្តថា
ក្នុងវិស័យកសិកម្មនេះគប្បីពិនិត្យមើលការបង្កើតរោងចក្រកែច្នៃ
ដើម្បីនាំផលិតផលកសិកម្មចេញផងដែរ ព្រោះសព្វថ្ងៃនេះកម្ពុជាមានដំឡូង ពោត
សណ្តែក ដែលកំពុងតែនាំចេញ ដោយពុំទាន់កែច្នៃ ហើយដែលគប្បីពិនិត្យលើវិស័យនេះ
ដែលកំពុងតែមានសកម្មភាព៕