មជ្ឈមណ្ឌលហ្វឹកហាត់តេក្វាន់ដូប៊ូយ៉ុងខ្មែរ ដែលមានទំហំ៤០ម៉ែត្រ គុណ៤០ម៉ែត្រនិង មានសាលស្នាក់នៅសម្រាប់កីឡាតៃក្វាន់ដូចំនួន ២ មួយសម្រាប់កីឡាករ និង មួយសម្រាប់កីឡាការិនី ដែល កសាងឡើងតាំងពីឆ្នាំ២០០៧ក្រោមជំនួយឧបត្តមពី ក្រុមហ៊ុនប៊ូយ៉ុង មកពីប្រទេសកូរ៉េ ត្រូវបានសម្ភោធបើកឲ្យប្រើប្រាស់ជា ផ្លូវការនាល្ងាចថ្ងៃទី២៦តុលា ក្រោមការអធិបតីភាពរបស់ ឯកឧត្ត បណ្ឌិតសភាចារ្យ សុខ អាន ឧបនាយករដ្ឋមន្ត្រីរដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ។
ក្រៅពីនេះមជ្ឈមណ្ឌលហ្វឹកហាត់តៃក្វាន់ដូប៊ូយ៉ុងខ្មែរ មាន ការិយាល័យចំនួន ៥ សាលប្រជុំមួយមាន ទំហំ ១០ម៉ែត្រ គុណ ១៧ម៉ែត្រ មានបន្ទាប់ទឹក និង សាលសម្រាប់ហ្វឹកហាត់ និង ប្រកួតដែលមានទំហំ២២ ម៉ែត្រ គុណ ៤០ម៉ែត្រ។ សរុបបន្ទប់ទាំងអស់មានចំនួន ២៣បន្ទប់ និងកំពស់ ២ ជាន់ ចំណាយថវិកាសាងសង់អស់៤៥ម៉ឺនដុល្លារ។
ចូលរួមក្នុងពិធីសម្ភោធនេះដែរ មានឯកឧត្តម គីម ហាន សូ (Kim Han Soo )ឯកអគ្គរដ្ឋទូតកូរេខាងត្បូងប្រចាំនៅកម្ពុជា លោក លី ឌៀ សូន (Lee Dai Soon) អនុប្រធានសហព័ន្ធតេក្វាន់ដូពិភពលោក និង ជាប្រធានសហព័ន្ធតេក្វាន់ដូអាស៊ី លោក Lee Joung Keun ប្រធានក្រុមហ៊ុនប៊ូយ៉ុង។
ក្នុងឱកាសនោះ ឯកឧត្តម បណ្ឌិត សុខ អាន បានមានប្រសាសន៍ថ្លែងអំណរគុណដល់ក្រុមហ៊ុនប៊ូយ៉ុង ដែលបានជូយឧត្ថម្ភថវិការសាងសង់ មជ្ឈមណ្ឌលហ្វឹកហាត់តេក្វាន់ដូប៊ូយ៉ុងខ្មែរដែលអាចផ្តល់នូវភាពងាយស្រួលដល់ការហ្វឹកហាត់របស់កីឡាករ កីឡាការិនីតៃក្វានដូកម្ពុជា។
ឯកឧត្តម បណ្ឌិត សុខ អាន បានមាប្រសាសន៍បញ្ជាក់ថាការជួបជុំគ្នាថ្ងៃនេះឆ្លុះបញ្ចាំងឱ្យឃើញពីការយកចិត្តទុកដាក់ខ្ពស់របស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រ កម្ពុជាក្នុងការលើកម្ពស់វិស័យកីឡានៅកម្ពុជា ជាពិសេសកីឡាតៃក្វាន់ដូ ឱ្យមានភាពរឹងមាំ និង មានទំនុកចិត្តចូលរួមប្រកួតលើឆាកអន្តរជាតិ។ឯកឧត្តមបានបន្ថែមថាកីឡា កីឡាមានតួនាទីយ៉ាងសំខាន់នៅក្នុងជីវភាពប្រចាំថ្ងៃនាសម័យទំនើប។ កីឡាមិនត្រឹមតែជួយឱ្យមនុស្សមានសុខភាពល្អទាំងផ្លូវកាយ ផ្លូវចិត្ត និង បញ្ញាប៉ុណ្ណោះទេ ប៉ុន្តែថែមទាំងជូយពង្រឹង សីលធម៌ វិន័យ និង ចំណេះដឹងដែលជាមូលដ្ឋានគ្រឹះសម្រាប់រួមចំណែកដល់ការអភិវឌ្ឍន៍សេដ្ឋកិច្ចសង្គម។
ដោយមើលឃើញពីភាពចាំបាច់និងសារៈប្រយោជន៍របស់វិស័យកីឡារាជរដ្ឋាភិបាលបានយកចិត្តទុកដាក់រៀបចំឱ្យមានសមាគមន៍គីឡា ក្លឹបគីឡា ទីលានកីឡា គ្រូអប់រំកាយ និង កីឡា ការប្រកួតកីឡា សម្រាប់កីឡា យុវជន និង មហាជន ក្នុងគោលបំណងលើកម្ពស់សុខភាព និង សមត្ថភាពប្រកួតប្រជែង។ទាក់ទងនិងបញ្ហានេះឯកឧត្តម បណ្ឌិត សុខ អានបានមានប្រសាសន៍ឱ្យដឹងថារាជរដ្ឋាភិបាលបានអនុញ្ញាតឱ្យក្រសួងទេសចរណ៍និងសាលារាជធានីភ្នំពេញរៀបចំកសាងពហុកីឡាដ្ឋានថ្មីមួយមានលក្ខណៈទំនើបតាមស្តង់ការបច្ចេកទេសកីឡាអន្តរជាតិដែលត្រូវបានប្រសិទ្ធនាមថា”ពហុកីឡាដ្ឋានជាតិមរតកសម្តេចតេជោ”។ ខ្ញុំមានជំនឿយ៉ាងមុតមាំថាពហុកីឡាដ្ឋានដែលនឹងសាងសង់ក្នុងពេលដ៏ខ្លីខាងមុខនេះ នឹង បង្កើនការអភិវឌ្ឍន៍វិស័យកីឡាឱ្យកាន់តែមានសន្ទុះខ្លាំងឡើងក៏ដូចជារួមចំណែកយ៉ាងសំខាន់ដល់ការរីកចំរើនក្នុងវិស័យទេសចរ។
ក្នុងពិធីសម្ភោធមជ្ឈមណ្ឌលហ្វឹកហាត់តេក្វាន់ដូប៊ូយ៉ុងខ្មែរ ក្រៅពីការបំពាក់មេដាយដល់ភាគីកូរេនោះឯកឧត្តម ថោង ខុនដែលជាប្រធានអូឡាំពិកកម្ពុជា និង ជាប្រធានខេមរសហព័ន្ធតេក្វាន់ដូបានទទួលកាបំពាក់ខ្សែក្រវាត់កិត្តិយសកម្រិត ៧ ដាន់ពីលោក Lee Dai Soon ទៀតផង៕
អង្គភាព ព័ត៌មាន និង ប្រតិកម្មរហ័ស