ក្នុងពិធីប្រគល់សញ្ញាបត្រនៅវិទ្យាស្ថានជាតិអប់រំ ជូននិស្សិតសាកលវិទ្យាល័យអាស៊ីអឺរ៉ុប
នាព្រឹកថ្ងៃទី ២៩ តុលា ឆ្នាំ២០១២ សម្តេចអគ្គមហាសេនាបតីតេជោហ៊ុន សែន
បានបង្ហាញជូនប្រជាពលរដ្ឋនូវកម្មវិធីទស្សនកិច្ចការងាររបស់សម្តេចនៅក្រៅប្រទេស នៅពេលខាងមុខនេះ ដែលមិនអាចខកខានបាននោះឡើយ។
សម្តេចតេជោនាយករដ្ឋមន្រ្តីមានប្រសាសន៍ថា តាមពិតខ្ញុំមិនចង់ទៅក្រៅប្រទេសទេ ប៉ុន្តែសភាពកាណ៍បានចាប់បង្ខំ ដែលនៅថ្ងៃ អាទិត្យ ខាងមុខនេះ ខ្ញុំសូមអភ័យទោសពីសំណាក់ប្រជាពលរដ្ឋដោយសារ តែត្រូវចេញទៅចូលរួមកិច្ចប្រជុំកំពូលអាស៊ី-អឺរ៉ុបនៅទីក្រុង
វៀងច័ន្ទ ប្រទេស ឡាវ ដែលជាជំនូបថ្នាក់ប្រមុខរដ្ឋ ប្រមុខរដ្ឋាភិបាលដ៏ធំមកពីអឺរ៉ុប និងអាស៊ី ដែលខ្ញុំនឹងក្លាយទៅ
ជាអ្នកនាំមុខនៃការពិភាក្សាស្តីពីការអភិវឌ្ឍក្នុងតំបន់អាស៊ីនេះ។
សម្តេចតេជោថ្លែងថាបន្តថា នៅក្នុងខែធ្នូ ខ្ញុំនឹងចាលចេញពីកម្ពុជាម្តងទៀតទៅកាន់ប្រទេស ឥណ្ឌា ដើម្បីចូលរួមប្រារព្ធខួបកិច្ចសហប្រតិបត្តិការរវាងអាស៊ាន-ឥណ្ឌា
ដែលត្រូវធ្វើនៅលើទឹកដី ឥណ្ឌា ដែលក្នុងថានៈជាប្រ ធានអាស៊ានយើងមិនអាចអវត្តមានបានទេ។សម្តេចតេជោ បញ្ជាក់ថា សម្តេចបានស្នើសុំសម្តេចព្រះ មាតា ក៏ដូចជាព្រះករុណាព្រះមហាក្សត្ររួចហើយ ដើម្បីអវត្តមានពីប្រទេស។
ទន្ទឹមនិងការប្រកាសឱ្យដឹងអំពីកម្មវិធីការងារនៅក្រៅប្រទេសប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន មានប្រសាសន៍ជំរាបប្រជាពលរដ្ឋឱ្យដឹងថា កំណើនសេដ្ឋកិច្ច របស់ កម្ពុជាឆ្នាំនេះមិនអាក្រក់ទេ គឺស្ថិតក្នុងរង្វង់ ៧ភាគរយ ហើយអតិផរណានៅក្រោម ការព្យាករណ៍២,៩ភាគរយតែ ប៉ុណ្ណោះ។
សម្តេចតេជោនាយករដ្ឋមន្ត្រីបានថ្លែងថា កម្ពុជាមិនខ្វះស្បៀងទេ បញ្ហាធំរបស់យើងគឺការកែច្នៃ សម្រាប់ការនាំចេញកុំឱ្យស្រូវ របស់យើងនាំចេញ ដោយមិនធ្វើការកែច្នៃ។ការនាំចេញទំនិញវាយន ភណ្ឌ ទៅកាន់
ទីផ្សារខាងក្រៅ ទោះបីមានភាព មិនប្រាកដប្រជានៃសេដ្ឋ កិច្ចនៅអឺរ៉ុប និងអាមេរិក ក៏ដោយចុះក៏ប៉ុន្តែយើងក៏នៅមានការនាំចេញជាហូរហែ។ ឯបញ្ហាអចលនទ្រព្យក៏បានទើបឡើងវិញ ដីធ្លីក៏មានការឡើងថ្លៃ។ ដូច្នេះគ្រប់វិស័យទាំងអស់មានសញ្ញាវិជ្ជមាន ទាំង កសិកម្ម
ឧស្សាហកម្ម ទេសចរណ៍ សេវាកម្ម។ល។
ទាក់និងបញ្ហាកំណើនសេដ្ឋកិច្ចនេះសម្តេចតេជោបានមានប្រសាសន៍ឱ្យដឹងថា រាជរដ្ឋាភិបាលនៅតែបន្តការប្រយ័ត្នប្រយែងក្នុង បញ្ហារាល់ការ កែទម្រង់ទាំងឡាយដែលត្រូវបន្តធ្វើក្នុងនោះ មានកំណែទម្រង់គ្រប់គ្រងហិរញ្ញវត្ថុសាធារណៈ។
សម្តេចតេជោមានប្រសាសន៍ថា ឥឡូវនេះបើនិយាយពីបញ្ហាចំណោយចរន្តទៅលើបុគ្គលិក
គេអនុញ្ញាតឱ្យចាយ តែ ៤០ភាគរយ នៃចំណាយចរន្ត ឬ ស្មើនឹង ៤ភាគរយ នៃផលិតផលសរុប ក្នុងស្រុកតែប៉ុណ្ណោះ នេះជា គោលការណ៍។ប៉ុន្តែឥឡូវនេះយើងបានចំណាយដល់ទៅ ៤២ភាគរយ នៃចំណាយចរន្ត បានសេចក្តីថា លើស ២ភាគរយ រួចបាត់ទៅ ហើយៗ ស្មើនឹង ៤,៧ភាគរយ នៃផលិតផលសរុបក្នុងស្រុកបើមិនមានការប្រុងប្រយ័ត្នទេ ទេស្ថិរភាពម៉ាក្រូសេដ្ឋកិច្ចនឹងត្រូវបំផ្លាញភ្លាម។ ដូច្នេះបញ្ហានេះ ត្រូវមានការប្រុងប្រយ័ត្ន។
សម្តេចតេជោបានមានប្រសាសន៍ឱ្យដឹងថារាជរដ្ឋាភិបាល គឺបាន ប្រកាសដំឡើងប្រាក់បៀវត្សន៍នៅក្នុងក្របខ័ណ្ឌន យោបាយ របស់ខ្លួន
គឺថា ២០ភាគរយ ជាបន្តនៅឆ្នាំ២០១៣ ហើយយើង កំពុងគិតគូរអំពីបញ្ហានេះតទៅទៀត។
ទាក់ទងផលិតកម្មស្រូវសម្តេចតេជោនាយករដ្ឋមន្ត្រីក៏បានធ្វើការអំពាវនាវឱ្យប្រជាពលរដ្ឋថែរក្សាទឹកទុកឱ្យបានល្អ សម្រាប់ការលូត លាស់របស់ ដំណាំស្រូវ ដោយសម្តេចមានប្រសាសន៍ឱ្យដឹងថាឆ្នាំនេះការងារបង្កបង្កើនផលដំណាំស្រូវសម្រេចបានជាង ២,៥លានហិកតា បើប្រៀបធៀបនឹងផែន ការជាង ២,៣លានហិកតា ដូច្នេះលើសផែនការគ្រោងទុកជាង ១៥ ម៉ឺនហិកតា។
ទាក់ទងនិងពាក្យចចាមអារាមស្តីពីការបង្កើតរោងចក្រអគ្គីសនីដើរដោយថាមពលនុយក្លេអ៊ែរសម្តេចតេជោបានបដិសេធថាសម្តេច ពុំបានអនុញ្ញាតឲ្យមានការបង្កើតរោងចក្រអគ្គិសនីដើរដោយថាមពនុយក្លេអ៊ែរនៅខេត្តកោះកុង តាមការលើកឡើងរបស់ប្រទេសមួយចំនួននោះទេ។
សម្តេចតេជោនាយករដ្ឋមន្រ្តីមានប្រសាសន៍មានប្រសាសន៍ឱ្យដឹងថា ប្រទេសជិតខាងមួយចំនួនមានការភ័ន្តច្រឡំថា នាយករដ្ឋមន្រ្តីកម្ពុជាអនុញ្ញាត ឲ្យធ្វើរោងចក្រអគ្គិសនីដើរដោយថាមពលនុយក្លេអ៊ែរនៅខេត្តកោះកុង។ ខ្ញុំមិនបានអនុញ្ញាតទេ តែមានគេសុំសិក្សាអំពីបញ្ហាធ្វើថាមពលអគ្គិសនីដើរដោយនុយក្លេអ៊ែរនៅខេត្តកោះកុង ក៏ពិតមែន ប៉ុន្តែខ្ញុំមិនអនុញ្ញាតទេ។ ប្រទេសជិតខាងមានសិទ្ធិនឹងសំដែងការព្រួយបារម្ភ មានសិទ្ធិ នឹងបង្ហាញនូវកង្វល់អំពីការបញ្ហាការធ្វើបែបនេះ ព្រោះបើវាផ្ទុះវាមិនមែនមានតែប្រទេសកម្ពុជាជា អ្នករងគ្រោះទេ គឺវាប៉ះពាល់ទាំងអស់ក្នុងតំបន់តែម្តង។
សម្តេចតេជោនាយករដ្ឋមន្រ្តីមានប្រសាសន៍ថា ខ្ញុំមិនដែលមានការអនុញ្ញាតទេ ប៉ុន្តែពិតជាមានការស្នើ សុំពិតមែន។ខ្ញុំបានប្រាប់ត្រឡប់ទៅវិញថា កុំអាលអី ព្រោះសមត្ថភាពរបស់កម្ពុជាទៅមិនទាន់ដល់ទេ សូម្បីតែនៅឥណ្ឌូណេស៊ី និងប្រទេសមួយចំនួនទៀតក៏មិនទាន់ឈានទៅដល់ដែរ។ ពាក់ព័ន្ធបញ្ហានុយក្លេអ៊ែរនេះសម្តេចតេជោបានមានប្រសាសន៍ឱ្យដឹងថានៅឯសាកល វិទ្យាល័យបាត់ដំបងយើងក៏កំពុងតែសិក្សាអំពីផ្នែកវិស្វកម្មនុយក្លេរអ៊ែរនេះផងដែរ ។
សូមបញ្ជាក់ថា នៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យអាស៊ីអឺរ៉ុប
ថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ចំនួន ១៦៨២ នាក់ នៅវិទ្យាស្ថានជាតិអប់រំ សម្តេចអគ្គមហាសេនាបតីតេជោ
ហ៊ុន សែន បានកោតសរសើរចំពោះសាកលវិទ្យាល័យអាស៊ីអឺរ៉ុប ដែលប្រែក្លាយមកជាវិទ្យាស្ថាន
អាស៊ីអឺរ៉ុបនោះថា បានរួមចំណែកកសាងឡើងនូវមូលដ្ឋានសំភារៈបច្ចេកទេស ហើយក្នុងនោះក៏បានប្រឹងប្រែងរួមចំណែកដើម្បីកសាងធនធានមនុស្សសម្រាប់ការអភិវឌ្ឍរបស់រាជរដ្ឋាភិបាលផងដែរ។
សម្តេចនាយករដ្ឋមន្រ្តីមានប្រសាសន៍ថា
ខ្ញុំសូមថ្លែងជូននូវការកោតសរសើរចំពោះការខិតខំទាំងអស់ នៃសកលវិទ្យាល័យអាស៊ីអ៉ុប ដែលបានប្រឹងប្រែងជំនះ នូវ ការលំបាកដើម្បីកសាងឲ្យមានឡើងនូវស្ថានភាពក្នុងពេលសព្វថ្ងៃនេះ។ សំណង់គ្រឹះស្ថានសិក្សាជាច្រើនកន្លែងដែលបានកសាង ឡើងដោយគ្រឹះស្ថានឧត្តមសិក្សាឯកជននេះ ពិតជាបានរួមចំណែកយ៉ាងធំធេងក្នុងការអភិវឌ្ឍសង្គម
ហើយការបណ្តុះបណ្តាលធនធានមនុស្សជាច្រើនឆ្នាំកន្លងមកនេះ ក៏បានរួមចំណែកក្នុងការអភិវឌ្ឍធន ធានមនុស្សផងដែរ។ សម្តេចតេជោថ្លែងថា ការកសាងធនធានមនុស្សនេះគឺជាកត្តាសំខាន់ណាស់ គ្មានការជឿនលឿនណាមួយដែលចាប់ផ្តើមពីភាពអវិជ្ជានោះទេ ប៉ុន្តែការជឿនលឿនត្រូវចាប់ផ្តើមពី
ពុទ្ធិរបស់មនុស្ស ដោយយើងមិនងាយនឹងឃើញបញ្ញាវន្តអត់បាយនោះទេ ព្រោះគេមានការឆ្នៃប្រឌិត
ក្នុងការរៀបចំនូវអនាគតរបស់ខ្លួន។
សម្តេចតេជោនាយករដ្ឋមន្រ្តីមានប្រសាសន៍ថា ការបណ្តុះបណ្តាលធនធានមនុស្សត្រូវតែបន្តធ្វើ បើយើងចង់ទាក់ទាញយកការវិនិយោគដោយផ្ទាល់ពីបរទេស យើងត្រូវតែពង្រឹងការតម្រង់ទិស ការបណ្តុះបណ្តាលធនធានមនុស្សរបស់យើងឲ្យមានសមត្ថភាពខ្ពស់ នៅគ្រប់កម្រិតទាំងថ្នាក់ឧត្តម ទាំងថ្នាក់បណ្តុះបណ្តាល និងទាំងថ្នាក់វិជ្ជាជីវៈ ដើម្បីតម្រូវទៅតាមទីផ្សារជាតិ និងអន្តរជាតិ៕