ភ្នំពេញ ៖ ស្ថានទូតបារាំងប្រចាំព្រះរាជាណាចក្រកម្ពុជា បានថ្លែងសារលិខិតរបស់លោកប្រធានាធិបតីបារាំង ដើម្បីចូលរួមរំលែកព្រះរាជមរណទុក្ខរបស់ព្រះមហាវីរក្សត្រ សម្ដេចព្រះនរោត្តម សីហនុ។
បើតាមការបកប្រែក្រៅផ្លូវការបានឲ្យដឹងថា លោកប្រធានាធិបតីបារាំង ហ្វ្រង់ស័រ ហូឡង់ (François HOLLANDE) មានការក្រៀមក្រំបំផុតចំពោះការសោយព្រះទិវង្គតរបស់ព្រះមហាវីរក្សត្រ ព្រះវររាជបិតា នរោត្តម សីហនុ។ សារលិខិតរបស់លោកប្រធានាធិបតីបារាំង តាមរយៈស្ថានទូតបារាំងប្រចាំព្រះរាជាណាចក្រកម្ពុជាបានឲ្យដឹងទៀតថា«ខ្ញុំមានទុក្ខក្រៀមក្រំបំផុត ដោយបានទទួលដំណឹងពីការយាងចូលព្រះទិវង្គតរបស់ព្រះករុណាព្រះបាទសម្តេចព្រះ នរោត្តម សីហនុ នៅថ្ងៃច័ន្ទ ទី១៥ ខែតុលា នេះ។
ខ្ញុំសូមសម្តែងនូវគារវកិច្ចចំពោះដួងព្រះវិញ្ញាណក្ខន្ធរបស់បុគ្គលឆ្នើមមួយអង្គ ដែលតំណាងឱ្យជោគវាសនានៃប្រទេសជាតិ និងប្រជារាស្ត្ររបស់ទ្រង់ក្នុងកាលៈទេសៈដ៏លំបាកបំផុតនៃសតវត្សទី២០ និងតំណាងឱ្យការកសាងសន្តិភាពដោយមានប្រទេសបារាំងនៅក្បែរទ្រង់ជានិច្ច ។
ខ្ញុំដឹងអំពីទំនាក់ទំនងដ៏ខ្លាំងក្លា និងជាប្រវត្តិសាស្ត្ររវាងព្រះមហាវីរក្សត្រ និងប្រទេសបារាំង ហើយដែលតាមរយៈ ព្រះអង្គ ទំនាក់ទំនងទាំងនេះបានរួមចំណែកធ្វើឱ្យប្រទេសជាតិ និងប្រជាជនយើងទាំងពីរកាន់តែខិតជិតគ្នា។ ជាស្ថាបនិក នៃឯករាជ្យជាតិកម្ពុជា ជាអ្នកការពារប្រទេសរបស់ទ្រង់ដោយមិនចេះនឿយហត់លើឆាកអន្តរជាតិ សម្រាប់មនុស្ស ភាគច្រើន ព្រះអង្គគឺជានិមិត្តរូបនៃនយោបាយអាស៊ីមួយដែលលើកតម្កើងនូវសមភាព និងការការពារអធិបតេយ្យភាព នៃប្រជាជាតិនានា ។
នៅមួយថ្ងៃបន្ទាប់ពីកិច្ចប្រជុំកំពូលលើកទី១៤របស់អង្គការអន្តរជាតិនៃបណ្តាប្រទេសប្រើប្រាស់ភាសាបារាំងនេះ ខ្ញុំមិនភ្លេចទេថា ព្រះអង្គមានព្រះរាជគុណធំធេងណាស់ចំពោះអង្គការមួយនេះ ។ ទ្រង់គឺជាអ្នកការពារដ៏ក្លៀវក្លានូវវប្បធម៌ ហ្វ្រង់កូហ្វូនី ភាសា និងសិល្បៈនៃប្រទេសប្រើប្រាស់ភាសាបារាំង ព្រមទាំងទស្សនៈពហុសាសន៍នៃទំនាក់ទំនងអន្តរជាតិ ។
ក្នុងទិវាកាន់ទុក្ខសម្រាប់ព្រះរាជាណាចក្រកម្ពុជានេះ តាងនាមប្រជាជនបារាំង និងតាងនាមខ្លួនខ្ញុំផ្ទាល់ ខ្ញុំសូមចូលរួម រំលែកទុក្ខយ៉ាងក្រៀមក្រំជាមួយព្រះរាជវង្សានុវង្ស និងប្រជារាស្ត្រខ្មែរទាំងអស់។ »
សូមបញ្ជាក់ថា កាលពីថ្ងៃទី១៥តុលា លោកប្រធានាធិបតីបារាំងបានផ្ញើសាររំលែកទុក្ខថ្វាយព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងព្រះមហាក្សត្រី មុនិនាថ សីហនុ៕