ភ្នំពេញ: ពីទីក្រុងប៉ារីសប្រទេសបារាំងលោកប្រធានាធិបតីបារាំងហ្វ្រង់ស័រ ហូឡង់បានសំដែងនូវភាពក្រៀមក្រំនិងចូលរួមរំលែកទុក្ខជាមួយរាជរដ្ឋាភិបាលកម្ពុជាប្រជាជនកម្ពុជាចំពោះការសោយទីវង្គត់់នៃមហាវរក្សត្រកម្ពុជាព្រះបាទសម្តេចព្រះនរោត្តម សីហនុ។
ស្ថានទូតបារាំងប្រចាំព្រះរាជាណាចក្រកម្ពុជាបានផ្សព្វផ្សាយនាថ្ងៃទី១៦ខែតុលា២០១២ សេចក្ដីប្រកាសរបស់ លោក ប្រធានាធិបតីបារាំង ហ្វ្រង់ស័រ ហូឡង់ ជុំវិញការសោយព្រះទិវង្គតរបស់ព្រះមហាវីរក្សត្រ ព្រះវររាជបិតា នរោត្ដម សីហនុ
( ធ្វើនៅប៉ារីស៍ ថ្ងៃទី១៥ ខែតុលា ឆ្នាំ២០១២)។សេចក្តីប្រកាសបានបញ្ជាក់ថា ខ្ញុំមានទុក្ខក្រៀមក្រំបំផុតដោយបានទទួលដំណឹង ពីការយាងចូលព្រះទិវង្គតរបស់ព្រះករុណាព្រះបាទសម្ដេចព្រះ នរោត្ដម សីហនុ នៅថ្ងៃច័ន្ទ ទី១៥ ខែតុលា នេះ។
ខ្ញុំសូមសម្ដែងនូវគារវកិច្ចចំពោះដួងព្រះវិញ្ញាណក្ខន្ធរបស់បុគ្គលឆ្នើមមួយអង្គ ដែលតំណាងឱ្យជោគវាសនានៃប្រទេសជាតិ និងប្រជារាស្ដ្ររបស់ទ្រង់ក្នុងកាលៈទេសៈដ៏លំបាកបំផុតនៃសតវត្សទី២០ និងតំណាងឱ្យការកសាងសន្ដិភាពដោយមាន ប្រទេសបារាំងនៅក្បែរទ្រង់ជានិច្ច ។
ខ្ញុំដឹងអំពីទំនាក់ទំនងដ៏ខ្លាំងក្លា និងជាប្រវត្ដិសាស្ដ្ររវាងព្រះមហាវីរក្សត្រ និងប្រទេសបារាំង ហើយដែលតាមរយៈ ព្រះអង្គ ទំនាក់ទំនងទាំងនេះបានរួមចំណែកធ្វើឱ្យប្រទេសជាតិ និងប្រជាជនយើងទាំងពីរកាន់តែខិតជិតគ្នា។ ជាស្ថាបនិក នៃឯករាជ្យជាតិកម្ពុជា ជាអ្នកការពារប្រទេសរបស់ទ្រង់ដោយមិនចេះនឿយហត់លើឆាកអន្ដរជាតិ សម្រាប់មនុស្ស ភាគច្រើន ព្រះអង្គគឺជានិមិត្ដរូបនៃនយោបាយអាស៊ីមួយដែលលើកតម្កើងនូវសមភាព និងការការពារអធិបតេយ្យភាព នៃប្រជាជាតិនានា ។
នៅមួយថ្ងៃបន្ទាប់ពីកិច្ចប្រជុំកំពូលលើកទី១៤របស់អង្គការអន្ដរជាតិនៃបណា្ដប្រទេសប្រើប្រាស់ភាសាបារាំងនេះ ខ្ញុំមិន ភ្លេចទេថា ព្រះអង្គមានព្រះរាជគុណធំធេងណាស់ចំពោះអង្គការមួយនេះ ។ ទ្រង់គឺជាអ្នកការពារដ៏ក្លៀវក្លានូវវប្បធម៌ ហ្វ្រង់កូហ្វូនី ភាសា និងសិល្បៈនៃប្រទេសប្រើប្រាស់ភាសាបារាំង ព្រមទាំងទស្សនៈពហុសាសន៍នៃទំនាក់ទំនងអន្ដរជាតិ ។
ក្នុងទិវាកាន់ទុក្ខសម្រាប់ព្រះរាជាណាចក្រកម្ពុជានេះ តាងនាមប្រជាជនបារាំង និងតាងនាមខ្លួនខ្ញុំផ្ទាល់ ខ្ញុំសូមចូលរួម រំលែកទុក្ខយ៉ាងក្រៀមក្រំជាមួយព្រះរាជវង្សានុវង្ស និងប្រជារាស្ដ្រខ្មែរទាំងអស់ ។
សូមបញ្ជាក់ថា កាលពីថ្ងៃទី១៥តុលា លោកប្រធានាធិបតីបារាំងបានផ្ញើសាររំកែទុក្ខថ្វាយព្រះករុណាព្រះបាទសម្ដេចព្រះ បរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងព្រះមហាក្សត្រី មុនិនាថ សីហនុ ។
