ចេញផ្សាយថ្ងៃ: ( ១៩ - វិច្ឆិកា - ២០១២ )
ឯកឧត្តម វេន ជាប៉ាវ ( Wen Jiabao ) នាយករដ្ឋមន្ត្រីនៃសាធារណរដ្ឋប្រមានិតចិន បានប្រកាសកាលពីថ្ងៃទី១៨ ខែវិច្ឆិកា ឆ្នាំ២០១២ ពីការសម្រេចចិត្តរបស់រដ្ឋាភិបាលនៃសាធារណរដ្ឋប្រមានិតចិន ក្នុងការផ្តល់ជំនួយបន្ថែមដល់ព្រះរាជាណាចក្រកម្ពុជាចំនួន៣២៩ លានយន់ ស្មើប្រមាណជិត៥៣ លានដុល្លារអាមេរិក។
ឯកឧត្តម អៀង សុផល្លែត ជំនួយការផ្ទាល់សម្តេចតេជោនាយករដ្ឋមន្ត្រី បានឲ្យដឹងអំពីកិច្ចប្រជុំរវាងសម្តេចអគ្គមហាសេនាបតីតេជោ ហ៊ុន សែន និងឯកឧត្តមនាយករដ្ឋមន្ត្រីចិន កាលពីព្រលប់ថ្ងៃទី១៨វិច្ឆិកា ឆ្នាំ២០១២ ថា ចិនបានសម្រេចផ្តល់ជំនួយឥតសំណងចំនួន៣២៩ លានយន់ ដល់ប្រទេសកម្ពុជា សម្រាប់ការអភិវឌ្ឍធនធានទឹកក្នុងប្រទេសកម្ពុជា។ ប្រមុខរដ្ឋាភិបាលប្រទេសទាំងពីរ (កម្ពុជា-ចិន) ក៏បានយល់ព្រមក្នុងការជំរុញទំហំពាណិជ្ជកម្មរវាងប្រទេសទាំងពីរឲ្យឈានដល់៥ ពាន់លានដុល្លារអាមេរិក នៅឆ្នាំ២០១៧។
បន្ទាប់ពីកិច្ចប្រជុំទ្វេភាគីដោយបិទទ្វារ ប្រមុខរដ្ឋាភិបាលនៃប្រទេសទាំងពីរ (កម្ពុជា-ចិន) បានធ្វើជាអធិបតីក្នុងពិធីចុះហត្ថលេខាលើឯកសារ ស្តីពីកិច្ចសហប្រតិបត្តិការរវាងរាជរដ្ឋាភិបាលនៃព្រះរាជាណាចក្រកម្ពុជា ជាមួយនឹងរដ្ឋាភិបាលនៃសាធារណរដ្ឋប្រជាមានិតចិន ដែលត្រូវបានចុះហត្ថលេខាដោយឯកឧត្តម គាត ឈន់ ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយនឹងឯកឧត្តម ចិន ដេមិង (Chen Deming) រដ្ឋមន្ត្រីក្រសួងពាណិជ្ជកម្មចិន លើកិច្ចព្រមព្រៀងចំនួន ២ និងលិខិតប្តូរសារចំនួន។ កិច្ចព្រមព្រៀងទាំងនោះរួមមាន៖
-ទី១-កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេស។
-ទី២-កិច្ចព្រមព្រៀងស្តីពីការផ្តល់ឥណទានសម្បទាន សំរាប់អនុវត្តគំរោងធនធានទឹកស្ទឹងស្ទោង ជំហានទី១។
-ទី៣-លិខិតប្តូរសារ ស្តីពីការផ្តល់ម៉ាស៊ីនស្កែនកុងតឺន័រ៤ គ្រឿង ប្រើប្រាស់ក្នុងទឹកប្រាក់ជំនួយឥតសំណង ដែលបានចុះហត្ថលេខា កាលពីថ្ងៃទី៣០ មីនា ឆ្នាំ២០១២។
-ទី៤-លិខិតប្តូរសារ ស្តីពីគំរោងមជ្ឈមណ្ឌលបណ្តុះបណ្តាលជំនាញវិជ្ជាជីវៈព្រះសីហនុ ដែលត្រូវបានចុះហត្ថលេខាដោយឯកឧត្តម វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងឯកឧត្ត ចិន ដេមិង (Chen Deming) រដ្ឋមន្ត្រីក្រសួងពាណិជ្ជកម្មចិន និងទី៥-ពិធីចុះហត្ថលេខាលើកិច្ចសន្យាខ្ចីប្រាក់ ស្តីពីគំរោងរោងចក្រស៊ីម៉ង់ចក្រីទីង រវាងរោងចក្រស៊ីម៉ង់ត៍ចក្រីទីងកម្ពុជា ជាមួយនឹងធនាគារជាតិចិន ដែលចុះហត្ថលេខាដោយលោកឧកញ៉ា លឹម រស់ ប្រធានក្រុមប្រឹក្សាភិបាលរោងចក្រស៊ីម៉ង់ត៍ចក្រីទីងកម្ពុជា ជាមួយនឹងលោក Chen Chang Jiang នាយកធនាគារជាតិចិន សាខាប្រចាំរាជធានីភ្នំពេញ។
ឯកឧត្តម អៀង សុផល្លែត ក៏បានឲ្យដឹងបន្ថែមថា ឯកឧត្តម វេន ជាប៉ាវ បានសន្យាថា ចិននឹងពិនិត្យចំពោះសំណើរបស់កម្ពុជា ដែលស្នើសុំឲ្យមានជំនួយបន្ថែមទៀត។ ចិននឹងបន្តគាំទ្រកម្ពុជាពេញទំហឹង សម្រាប់ការអភិវឌ្ឍសង្គម និងសេដ្ឋកិច្ច ហើយសហការជាមួយកម្ពុជា មិនថាទ្វេភាគី ឬពហុភាគីសម្រាប់ការអភិវឌ្ឍកម្ពុជា។
ឯកឧត្តមនាយករដ្ឋមន្ត្រីចិន វេន ជាប៉ាវ ក៏នឹងត្រូវចូលរួមក្នុងកិច្ចប្រជុំកំពូលអាស៊ានបូក ៣( ចិន ជប៉ុន និងកូរ៉េ ) ព្រមទាំងកិច្ចប្រជុំកំពូលអាស៊ាន-ចិន នៅថ្ងៃទី១៩ ខែវិច្ឆិកា ឆ្នាំ២០១២ នៅវិមានសន្តិភាព។
ដោយឡែកនៅថ្ងៃទី២០ ខែវិច្ឆិកា ឆ្នាំ២០១២ ឯកឧត្តមនាយករដ្ឋមន្ត្រីចិន វេន ជាប៉ាវ នឹងចូលរួមក្នុងកិច្ចសន្ទនាអាស៊ានជាសកល ព្រមទាំងកិច្ចប្រជុំកំពូលអាស៊ីបូព៌ាលើកទី៧ នៅវិមានសន្តិភាព ដែលជាកិច្ចប្រជុំរវាងមេដឹកនាំកំពូលអាស៊ាន១០ ប្រទេស និងប្រទេសមហាអំណាចជាដៃគូអាស៊ាន៨ ប្រទេស រួមមានទាំងលោកប្រធានាធិបតីអាមេរិក បារាក់ អូបាម៉ា ផងដែរ។
នៅក្នុងជំនួបទ្វេភាគីនោះដែរ នាយករដ្ឋមន្ត្រីនៃប្រទេសទាំងពីរ បានសម្រេចយកឆ្នាំ២០១៣ ជាឆ្នាំខួបលើកទី៥៥ នៃចំណងមិត្តភាពកម្ពុជា-ចិន។ នៅក្នុងខួបឆ្នាំទី៥៥ នេះ ប្រទេសកម្ពុជានឹងបញ្ជូនយុវជន១០០នាក់ ដើម្បីធ្វើទស្សនកិច្ចស្វែងយល់នៅក្នុងប្រទេសចិន៕
អត្ថបទ អង្គភាពព័ត៌មាន និងប្រតិកម្មរហ័ស