កិច្ចប្រជុំកំពូលអាស៊ីបូព៌ាបានប្រព្រឹត្ដទៅនៅវិមានសន្ដិភាព រាជធានីភ្នំពេញ ព្រះរាជាណាចក្រកម្ពុជា នៅ ថ្ងៃទី២០ ខែវិច្ឆិកា ឆ្នាំ២០១២។ កិច្ចប្រជុំកំពូលនេះ មានសម្ដេចអគ្គមហាសេនាបតីតេជោ ហ៊ុន សែន នាយករដ្ឋ មន្ដ្រីនៃព្រះរាជាណាចក្រកម្ពុជា ជាប្រធានដោយមានការចូលរួមពីសំណាក់ប្រមុខដឹកនាំនៃប្រទេសជាសមាជិក អាស៊ាន លោកជំទាវ ជូលៀ អេលីនហ្គីឡាដ នាយករដ្ឋមន្ដ្រីនៃប្រទេសអូស្ដ្រាលី ឯកឧត្ដម វែន ជាប៉ាវ នាយក រដ្ឋមន្ដ្រី នៃសាធារណរដ្ឋប្រជាមានិតចិន ឯកឧត្ដម ម៉ាន់ម៉ូហាន់ ស៊ិង នាយករដ្ឋមន្ដ្រីឥណ្ឌា ឯកឧត្ដម យ៉ូស៊ីហ៊ីកូ ណូដា នាយករដ្ឋមន្ដ្រីជប៉ុន ឯកឧត្ដម ចន ឃី នាយករដ្ឋមន្ដ្រីនូវវែលហ្សេឡង់ ឯកឧត្ដម លី ម្យ៉ុងបាក់ ប្រធានាធិបតី សាធារណរដ្ឋកូរ៉េ ឯកឧត្ដម សឺជី ឡាវរ៉ូវ តំណាងរបស់លោកប្រធានាធិបតីរុស្ស៊ី វ្លា ដឺមៀពូទីន និងឯកឧត្ដម បារ៉ាក់ អូបាម៉ា ប្រធានាធិបតីសហរដ្ឋអាមេរិក។ អគ្គលេខាធិការអាស៊ាន ក៏បានចូលរួមកិច្ចប្រជុំនេះផងដែរ។
ប្រមុខដឹកនាំ នៃបណ្ដាប្រទេសចូលរួមកិច្ចប្រជុំកំពូលអាស៊ីបូព៌ា បានធ្វើការពិភាក្សាលើបញ្ហាជាច្រើន រួមទាំងការពិនិត្យឡើងវិញ និងទិសដៅអនាគត នៃកិច្ចប្រជុំកំពូលអាស៊ីបូព៌ា ស្ថិតក្រោមវិស័យអាទិភាពទាំង៦គឺ បរិស្ថាន និងថាមពល អប់រំ ហិរញ្ញវត្ថុ បញ្ហាសុខភាពពិភពលោក និងជំងឺឆ្លង ការគ្រប់គ្រងគ្រោះធម្មជាតិ និងការតភ្ជាប់ អាស៊ាន។ ថ្នាក់ដឹកនាំ ក៏បានធ្វើការផ្លាស់ប្ដូរទស្សនៈស្ដីអំពីបញ្ហាតំបន់ និងអន្ដរជាតិ។
សេចក្ដីប្រកាសរបស់ប្រធានកិច្ចប្រជុំកំពូលអាស៊ីបូព៌ាលើកទី៧ ត្រូវបានចេញផ្សាយនៅថ្ងៃទី២០ ខែវិច្ឆិកា ឆ្នាំ ២០១២ ជាឯកសារលទ្ធផលនៃកិច្ចប្រជុំ។ ក្នុងកំឡុងកិច្ចប្រជុំនេះ ថ្នាក់ដឹកនាំទាំងអស់បានអនុម័តលើសចក្ដីថ្លែងការណ៍ នៃកិច្ចប្រជុំកំពូលអាស៊ីបូព៌ាលើកទី៧ ស្ដីពីការឆ្លើយតបតំបន់ចំពោះការគ្រប់គ្រងជម្ងឺគ្រុនចាញ់ និងការដោះស្រាយ ភាពស៊ាំឱសថប្រឆាំងនឹងជំងឺគ្រុនចាញ់ និងសេចក្ដីថ្លែងការណ៍ ទីក្រុងភ្នំពេញស្ដីពីគំនិតផ្ដួចផ្ដើមរបស់កិច្ចប្រជុំកំពូល អាស៊ីបូព៌ាសម្រាប់ការអភិវឌ្ឍន៍ ។