សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី១៨ ខែកុម្ភៈ
ឆ្នាំ២០១៣ បានមានប្រសាសន៍បញ្ជាក់ថា ស្ពានអ្នកលឿងមានតម្លៃធំធេងណាស់
ព្រោះស្ពាននេះ មិនត្រឹមតែតភ្ជាប់សម្រាប់អាស៊ានប៉ុណ្ណោះទេ
ប៉ុន្តែគឺបានតភ្ជាប់មហាអនុតំបន់មេគង្គផងដែរ។
សម្តេចតេជោនាយករដ្ឋមន្ត្រីបានមានប្រសាសន៍បែបនេះ ក្នុងឱកាសអនុញ្ញាតឲ្យឯកឧត្តម ម៉ាសាហ្វូមី ខូរ៉ូគី (Masafumi
KUROKI) ឯកអគ្គរាជទូតជប៉ុនប្រចាំនៅព្រះរាជាណាចក្រកម្ពុជា
ដែលចប់អាណត្តិបេសកកម្មការទូត ចូលជួបសម្តែងការគួរសម និងជម្រាបលា
នៅវិមានសន្តិភាព ក្នុងរាជធានីភ្នំពេញ។
ឯកឧត្តម
អ៊ាង សុផល្លែត ជំនួយការសម្តេចតេជោនាយករដ្ឋមន្រ្តី បានមានប្រសាសន៍ឲ្យដឹងថា
ឯកឧត្តម ម៉ាសាហ្វូមី ខូរ៉ូគី (Masafumi KUROKI) ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា ដែលបញ្ចប់អាណត្តិការទូតរយៈពេលជាង
៣ឆ្នាំ នៅកម្ពុជា បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា និងមន្រ្តីរាជការកម្ពុជា
ដែលបានចូលរួមសហការ និងជួយគាំទ្រឲ្យបេសកកម្មការទូតរបស់លោកទទួលបានជោគជ័យ។
ឯកឧត្តម
អ៊ាង សុផល្លែត បានមានប្រសាសន៍ឲ្យដឹងថា ឯកឧត្តម ម៉ាសាហ្វូមី ខូរ៉ូគី (Masafumi
KUROKI) បានមានប្រសាសន៍ថា នៅក្នុងបេសកកម្មការទូតរយៈពេល៣ឆ្នាំកន្លះ
លោកបានរៀបចំឲ្យមានទស្សកិច្ចទៅវិញទៅមករបស់ឥស្សរជនជាន់ខ្ពស់នៃប្រទេសទាំងពីរកម្ពុជា-ជប៉ុន
ដូចជាការអញ្ជើញទៅបំពេញទស្សនច្ចចំនួន ២ដងរបស់សម្តេចតេជោនាយករដ្ឋមន្រ្តីជាដើម។ ឯកឧត្តម ម៉ាសាហ្វូមី
ខូរ៉ូគី បានមានប្រសាសន៍ថា ការកសាងស្ពានអ្នកលឿង និងការថែរក្សា នឹងធ្វើឲ្យមានកំណើនក្នុងការផ្តល់ជំនួយជួយដល់កម្ពុជា
ជាពិសេសការជំរុញឲ្យអ្នកវិនិយោគជប៉ុនមកកម្ពុជា កាន់តែច្រើនឡើងថែមទៀត។
លទ្ធផលទាំងអស់នេះហើយ គឺបានមកពីការជួយគាំទ្ររបស់មន្រ្តីរាជការកម្ពុជា។
សម្តចតេជោនាយករដ្ឋមន្រ្តីបានថ្លែងអំណរគុណយ៉ាងជ្រាលជ្រៅ
ចំពោះការខិតប្រឹងប្រែង អស់ពីកម្លាំងកាយចិត្តរបស់ឯកឧត្តម ម៉ាសាហ្វូមី
ខូរ៉ូគី នៅក្នុងអាណត្តិបេសកកម្មការទូតនៅកម្ពុជា ដោយសម្តេចតេជោមានប្រសាសន៍ថា
ឯកឧត្តម ម៉ាសាហ្វូមី ខូរ៉ូគី ពិតជាបានរួមចំណែកយ៉ាងខ្លាំងទៅលើទំនាក់ទំនងរវាងប្រទេសទាំងពីរ តាមរយៈការរៀបចំឲ្យមានទស្សនកិច្ចរបស់ឥស្សរជនជាន់ខ្ពស់ទៅវិញទៅមក
ក៏ដូចជាការចូលរួមថ្វាយព្រះភ្លើង ព្រះបរមសព ព្រះបរមរតនកោដ្ឋ ជាដើម។