កម្ពុជា ដែលជាប្រធានគណៈកម្មាធិការបេតិកភណ្ឌពិភពលោកសម្រាប់អាណត្តិឆ្នាំ
២០១២-២០១៣ នឹងធ្វើជាម្ចាស់រៀបចំសម័យប្រជុំពេញអង្គលើកទី
៣៧ នៅទីក្រុងភ្នំពេញ និងនៅទីក្រុងសៀមរាបពីថ្ងៃទី ១៦ ដល់ថ្ងៃទី ២៧ ខែ មិថុនា
ឆ្នាំ ២០១៣ ។
ក្នុងទិសដៅនេះ រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ
ហ៊ុន
សែន ជាប្រមុខ បានបង្កើតគណៈកម្មការរៀបចំសម័យប្រជុំពេញអង្គលើកទី
៣៧ ដោយចាត់តាំងឯកឧត្តមបណ្ឌិតសភាចារ្យ សុខ
អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ជាប្រធាន
។ ឯកឧត្តមបណ្ឌិតសភាចារ្យ សុខ អាន ក៏បានបង្កើតលេខាធិការដ្ឋាន
និងអនុគណៈកម្មការរៀបចំសម័យប្រជុំពេញអង្គលើកទី ៣៧ នេះផងដែរ ដើម្បីធ្វើយ៉ាងណាឲ្យសម័យប្រជុំពេញអង្គនេះនឹងទទួលបានជោគជ័យ
។
នេះជាកិត្តិយសដ៏ខ្ពង់ខ្ពស់ថ្មីមួយទៀតដែលព្រះរាជាណាចក្រកម្ពុជាទទួលបាន
ក្នុងនាមជាម្ចាស់ផ្ទះរៀបចំសម័យប្រជុំពេញអង្គលើកទី
៣៧ ដែលនឹងស្វាគមន៍ប្រទេសចំនួន ១៩០ និងប្រទេសសង្កេតការណ៍ចំនួន ០២ ។
ក្នុងក្របខ័ណ្ឌការត្រៀមរៀបចំព្រឹត្តិការណ៍ជាប្រវត្តិសាស្រ្តនេះ
ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្រ្តី
និងជាប្រធានអនុគណៈកម្មការព័ត៌មាន និងសារគមនាគមន៍បានដឹកនាំប្រជុំកាលពីព្រឹកថ្ងៃទី
១៩ ខែ កុម្ភៈ ឆ្នាំ ២០១៣ នៅទីស្តីការគណៈរដ្ឋមន្រ្តី ។ ឯកឧត្តម លោកជំទាវ ដែលជាសមាជិកអនុគណៈកម្មការ
និងសមាជិកពាក់ព័ន្ធ ព្រមទាំងតំណាងស្ថាប័នផ្សព្វផ្សាយឯកជន
បានចូលរួមប្រជុំពិភាក្សាយ៉ាងផុសផុលដើម្បីបែងចែកភារកិច្ច និងគ្រប់គ្រងព័ត៌មានឲ្យបានល្អជុំវិញការប្រព្រឹត្តិទៅនៃសម័យប្រជុំដែលមានរយៈពេលវែងរហូតដល់
១២ ថ្ងៃ ។ លើសពីនេះទៀត ឯកឧត្តម ស្វាយ ស៊ីថា
ក្នុងនាមជាប្រធានអនុគណៈកម្មការព័ត៌មាន និងសារគមនាគមន៍ ស្នើសុំឲ្យមានការបែងចែកតួនាទី
ភារកិច្ច និងការទទួលខុសត្រូវឲ្យបានច្បាស់លាស់របស់អនុគណៈកម្មការនេះ ។ ឯកឧត្តម
ក៏បានស្នើសុំឲ្យមានការបើកវគ្គបណ្តុះបណ្តាលរយៈពេលខ្លីដល់ពិធីករ ពិធីការិនីផងដែរ
ដើម្បីយល់ដឹងពីសម័យប្រជុំពេញអង្គ ដែលត្រូវបានរៀបចំធ្វើរួចហើយ ជាពិសេសសម័យប្រជុំពេញអង្គលើកទី
៣៦ នៃគណៈកម្មាធិការបេតិកភណ្ឌពិភពលោក ដែលបានប្រព្រឹត្តិទៅនៅទីក្រុង St.
Peterburg សហព័ន្ធរុស្ស៊ី កាលពីខែ មិថុនា
ឆ្នាំ ២០១២ កន្លងទៅនេះ ។
ក្រសួងព័ត៌មាន តាមរយៈឯកឧត្តម
ម៉ៅ អាយុទ្ធ រដ្ឋលេខាធិការ និងឯកឧត្តម
កឹម គុណវឌ្ឍន៍ អគ្គនាយកទូរទស្សន៍ជាតិកម្ពុជា
បានឯកភាពទទួលយកការផ្សាយផ្ទាល់ពីសម័យប្រជុំជាផ្លូវការ
។
នាឱកាសនៃកិច្ចប្រជុំនេះ អនុគណៈកម្មការព័ត៌មាន និងសារគមនាគមន៍
បានស្នើសុំដល់ទូរទស្សន៍ និងវិទ្យុក្នុងស្រុកទាំងអស់ ឲ្យធ្វើការផ្សព្វផ្សាយឲ្យបានទូលំទូលាយចាប់ពីពេលនេះតទៅ
ព្រមទាំងស្នើសុំសហការពីសាលារាជធានីភ្នំពេញ ដើម្បីបិទប្រកាសនៅតាមទីសាធារណៈ
ក្នុងគោលបំណងជំរាបជូនព័ត៌មានដល់សាធារណជន ការអបអរសាទរកាលដែលកម្ពុជាជាម្ចាស់ផ្ទះ
និងជាពិសេសស្វាគមន៍ភ្ញៀវបរទេសដែលមកកាន់កម្ពុជាសរុបចំនួនប្រហែល ១០០០ នាក់ ។
ទន្ទឹមនឹងនេះ អនុគណៈកម្មការព័ត៌មាន និងសារគមនាគមន៍ បាននិងកំពុងផលិតស្ពុតសំរាប់វិទ្យុ
និងទូរទស្សន៍ ព្រមទាំងវេទិកាតុមូលចំនួនពីរ ដោយផ្តោតសំខាន់ទៅលើប្រធានបទចំនួនពីរ
៖
ប្រធានបទទី ១ គឺ ការតស៊ូដ៏ស្វិតស្វាញរបស់កម្ពុជាតាំងពីការស្នើសុំចុះបញ្ជីប្រាសាទព្រះវិហារដោយសម្តេចអគ្គមហាសេនាបតីតេជោ
ហ៊ុន សែន នាឆ្នាំទី ២០០១ រហូតដល់ទីបំផុតប្រាសាទព្រះវិហារត្រូវបានចុះបញ្ជីជាបេតិកភណ្ឌពិភពលោកនាថ្ងៃទី
០៧ ខែ កក្កដា ឆ្នាំ ២០០៨ នៅទីក្រុងកេប៉ិច ប្រទេសកាណាដា ។ ឯកឧត្តមបណ្ឌិតសភាចារ្យ
សុខ អាន ដែលជាប្រធានគណៈប្រតិភូកម្ពុជា
បានធ្វើការចរចា និងចែចូវដ៏ស្វិតស្វាញរហូតទទួលបានជោគជ័យ និងក្លាយខ្លួនជាម្ចាស់ផ្ទះរៀបចំកិច្ចប្រជុំនាឆ្នាំ
២០១៣ នេះ ។
ប្រធានបទទី
២ គឺ ផ្តោតសំខាន់លើការត្រៀមរៀបចំព្រឹត្តិការណ៍ជាសកល ដែលជាលើកទី ០១ ហើយដែលរាជរដ្ឋាភិបាលកម្ពុជាបានកៀងគរព្រឹត្តិការណ៍វប្បធម៌នៅលើទឹកដីនៃអតីតអាណាចក្រអង្គរបន្ទាប់ពីចក្ខុវិស័យដ៏ត្រឹមត្រូវ
និងឈ្លៀសវៃជាទីបំផុតរបស់សម្តេចតេជោ ហ៊ុន សែន ក្នុងការដែលកម្ពុជាបើកចំហរជើងមេឃ
និងសមាហរណកម្មនៅក្នុងតំបន់ និងពិភពលោក ។ ក្រៅពីនេះនាខែ ឧសភា ឆ្នាំ ២០១៣ អនុគណៈកម្មការព័ត៌មាន
និងសារគមនាគមន៍ នឹងបញ្ជូនក្រុមការងារជំនាញទៅទីក្រុងប៉ារីស ដើម្បីជួបសម្ភាសន៍ជាមួយលោកជំទាវ
Irina Bokova អគ្គនាយិកាអង្គការUNESCO និងឯកឧត្តម KISHORE RAO នាយកមជ្ឈមណ្ឌលបេតិកភណ្ឌពិភពលោក ដើម្បីបញ្ចូលក្នុងវេទិកាតុមូលនេះ
និងដើម្បីផ្សព្វផ្សាយឲ្យបានទូលំទូលាយ ។
កិច្ចប្រជុំរបស់អនុគណៈកម្មការព័ត៌មាន
និងសារគមនាគមន៍ ក៏បានស្តាប់ផងដែរនូវរបាយការណ៍ដែលគណៈកម្មការបេតិកភណ្ឌពិភពលោក
បានរៀបចំសម័យប្រជុំពេញអង្គចំនួន ៣៦ លើករួចហើយ ក្នុងនោះ ៖
រហូតមកដល់ពេលនេះ បេតិកភណ្ឌចំនួនប្រហែល
១០០០ ត្រូវបានចុះបញ្ជីជាបេតិកភណ្ឌពិភពលោក
ក្នុងនោះកម្ពុជាមានរមណីយដ្ឋានពីរគឺ ប្រាសាទអង្គរវត្ត និងប្រាសាទព្រះវិហារ
ហើយ សម័យប្រជុំពេញអង្គនីមួយៗ មានគោលបំណងបីគឺ ៖
១-ធ្វើអត្តសញ្ញាណសម្បត្តិវប្បធម៌
និងធម្មជាតិ ដែលមានតម្លៃជាសាកល និងមិនអាចកាត់ថ្លៃបាន ដោយផ្អែកលើសំណើរបស់រដ្ឋភាគី
ដើម្បីទទួលបានការការពារអនុលោមតាមអនុសញ្ញាឆ្នាំ ១៩៧២ និងដើម្បីចុះក្នុងបញ្ជីបេតិកភណ្ឌពិភពលោក
។
២-ត្រួតពិនិត្យស្ថានភាពអភិរក្សនៃសម្បត្តិវប្បធម៌
ដែលបានចុះបញ្ជីជាបេតិកភណ្ឌពិភពលោក ដោយសហការជាមួយរដ្ឋភាគី និងសម្រេចថា តើមានសម្បត្តិវប្បធម៌ណាដែលត្រូវចុះក្នុងបញ្ជីបេតិកភណ្ឌពិភពលោកក្នុងស្ថានភាពគ្រោះថ្នាក់
ឬ ដកចេញពីបញ្ជីនេះ ព្រមទាំងសម្រេចថាតើសម្បត្តិវប្បធម៌ណាមួយដែលត្រូវលុបចេញពីបញ្ជីបេតិកភណ្ឌពិភពលោក
។
៣-ពិនិត្យមើលសំណើសុំជំនួយអន្តរជាតិដែលគាំទ្រថវិកាដោយមូលនិធិបេតិកភណ្ឌពិភពលោក
។
ក្រៅពីព្រឹត្តិការណ៍ស្នូលនេះ
នៅមុនសម័យប្រជុំពេញអង្គលើកទី ៣៧ មានវេទិកាយុវជនមួយដែលនឹងត្រូវរៀបចំពីថ្ងៃទី
៩ ដល់ថ្ងៃទី ១៦ ខែ មិថុនា ឆ្នាំ ២០១៣ នៅទីក្រុងសៀមរាបក្រោមប្រធានបទ TEP
(Temple Environment People) ដែលមានន័យថា
ភាពពាក់ព័ន្ធគ្នារវាងប្រាសាទ បរិដ្ឋាន និងប្រជាពលរដ្ឋ ។ យុវជនចំនួន ១៨ ប្រទេស
ជាពិសេសពីអាស៊ានទាំង ១០ នឹងមកចូលរួមនៅក្នុងវេទិកាយុវជននេះ ។ យុវជនទាំងអស់នឹងពិភាក្សារួមគ្នាដើម្បីត្រៀមសេចក្តីថ្លែងការណ៍មួយនាឱកាសបើកសម័យប្រជុំពេញអង្គលើកទី
៣៧ នៅទីក្រុងភ្នំពេញ ដោយផ្តោតសំខាន់លើអ្វីដែលបានរៀនសូត្រពីមនុស្សចាស់ជំនាន់មុន
។ កត្តាសំខាន់ថា តើយុវជនបានត្រៀម និងស្វែងយល់យ៉ាងដូចម្តេខ្លះជុំវិញវប្បធម៌
ជាពិសេសបេតិកភណ្ឌពិភពលោក ដើម្បីបន្តវេន ។
ឯកឧត្តម ស្វាយ ស៊ីថា
រដ្ឋលេខាធិការទីស្តីការគណៈរដ្ឋមន្រ្តី និងជាប្រធានអនុគណៈកម្មការព័ត៌មាន
និងសារគមនាគមន៍ បានបិទបញ្ចប់កិច្ចប្រជុំត្រៀមរៀបចំសម័យប្រជុំពេញអង្គលើកទី
៣៧ នាម៉ោង ០១ រសៀល និងប្រកាសថា កិច្ចប្រជុំរៀបចំលើកក្រោយនឹងប្រព្រឹត្តិទៅនាថ្ងៃទី
០១ ខែ មីនា ឆ្នាំ ២០១៣ បន្តទៀត ។