ឯកឧត្តម Jean Francois Cautain ឯកអគ្គរដ្ឋទូតសហភាពអឺរ៉ុប បានមានប្រសាសន៍ជម្រាបជូនសម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព ក្នុងរាជធានីភ្នំពេញ
នាថ្ងៃទី១៨ ខែកុម្ភៈ ឆ្នាំ២០១៣ ថា ប្រទេសសហភាពអឺរ៉ុបទាំង២៧ មានការគាំទ្រកម្ពុជានៅក្នុងការបោះឆ្នោតសាកលលើកទី៥
ដែលនឹងប្រព្រិត្តទៅក្នុងខែកក្កដា ឆ្នាំ២០១៣ ខាងមុខនេះ និងសូមចូលរួមអបអរសាទរចំពោះកំណែទម្រង់ប្រព័ន្ធយុត្តិធម៌
ជាពិសេសដំណើរការល្អនៃសកម្មភាពកាត់បន្ថយក្រីក្រនៅកម្ពុជាផងដែរ។
ឯកឧត្តម
អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា
នៅក្នុងជំនួបសម្តែងការគួរសមជាមួយសម្តេចតេជោនាយករដ្ឋមន្ត្រី ឯកឧត្តម Jean Francois Cautain បានមានប្រសាសន៍ថា សហភាពអឺរ៉ុបគាំទ្រ និងជម្រុញការសហការជាមួយរាជរដ្ឋាភិបាលកម្ពុជា ដើម្បីឲ្យការបោះឆ្នោតសាកលប្រព្រឹត្តទៅដោយត្រឹមត្រូវ
និងយុត្តិធម៌។ សហភាពអឺរ៉ុបសូមអបអរសាទរចំពោះកំណែទម្រង់ប្រព័ន្ធតុលាការរបស់កម្ពុជា ដែលរាជរដ្ឋាភិបាលបានអនុម័តក្រមរដ្ឋប្បវេណី
ក្រមព្រហ្មទណ្ឌ ក៏ដូចជាច្បាប់ប្រឆាំងអំពើពុករលួយ។ ទន្ទឹមនេះ ឯកឧត្តម Jean Francois Cautain ក៏បានស្នើឲ្យរាជរដ្ឋាភិបាលកម្ពុជា ធ្វើយ៉ាងណាជម្រុញឲ្យបាននូវច្បាប់ចៅក្រម ច្បាប់មេធាវី
និងច្បាប់ឧត្តមក្រុមប្រឹក្សាចៅក្រម។
ទាក់ទងទៅនឹងការកាត់បន្ថយភាពក្រីក្រ
ឯកឧត្តម អ៊ាង សុផល្លែត បានមានប្រសាសន៍ថា ឯកឧត្តម Jean Francois Cautain បានអបអរសាទរចំពោះរាជរដ្ឋាភិបាលកម្ពុជា ដែលក្នុងរយៈពេល៣ឆ្នាំកន្លងមកនេះ
បានកាត់បន្ថយភាពក្រីក្ររហូតដល់៥% ដោយបានធ្វើឲ្យភាពក្រីក្រនៅកម្ពុជានៅសល់តែ២០% ប៉ុណ្ណោះ ក្នុងពេលបច្ចុប្បន្ន។ លោកក៏បានអបអរសាទរចំពោះសេចក្តីថ្លែងការណ៍របស់អាស៊ាន ពាក់ព័ន្ធជាមួយបញ្ហាសិទ្ធិមនុស្សផងដែរ។
សម្តេចតេជោនាយករដ្ឋមន្ត្រីបានថ្លែងអំណរគុណចំពោះការលើកទឹកចិត្ត និងការវាយតម្លៃខ្ពស់របស់សហភាពអឺរ៉ុប ចំពោះការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រ។ សម្តេចតេជោនាយករដ្ឋមន្ត្រីក៏បានថ្លែងអំណរគុណចំពោះសហភាពអឺរ៉ុប ដែលក្នុងរយៈពេលប្រមាណ ១០ឆ្នាំ កន្លងមកនេះ បានផ្តល់ហិរញ្ញប្បទានលើវិស័យអប់រំដល់កម្ពុជា។
សម្តេចតេជោនាយករដ្ឋមន្ត្រីមានប្រសាសន៍ថា ការបោះឆ្នោតជាទៀងទាត់របស់កម្ពុជា គឺជាការចាំបាច់ណាស់ ដើម្បីជម្រុញកម្ពុជាឆ្ពោះទៅកាន់ការអភិវឌ្ឍ
និងប្រកបដោយលទ្ធិប្រជាធិបតេយ្យ។ សម្តេចតេជោនាយករដ្ឋមន្ត្រីក៏បានសំដែងនូវការរីករាយផងដែរ
ចំពោះច្បាប់ទាំង៣ដែលបានអនុម័ត ដូចជា ក្រមព្រហ្មទណ្ឌ ក្រមរដ្ឋប្បវេណី
និងច្បាប់ប្រឆាំងអំពើពុករលួយ។ សម្តេចតេជោនាយករដ្ឋមន្ត្រី ក៏បានសំដែងនូវភាពមិនសប្បាយចិត្តចំពោះការយឺតយ៉ាវពាក់ព័ន្ធទៅនឹងច្បាប់ចំនួន៣
ផ្សេងទៀត ដែលមិនទាន់បានអនុម័ត ដោយសម្តេចតេជោមានប្រសាសន៍ថា ច្បាប់ទាំងនោះគួរគប្បីជំរុញអនុម័តឲ្យបានកាន់តែលឿនឡើងៗ
ទើបជាការប្រសើរ។
ឯកឧត្តម
អ៊ាង សុផល្លែត បានមានប្រសាសន៍ឲ្យដឹងថា ទាក់ទងទៅនឹងការលើកឡើងរបស់ឯកឧត្តម
Jean Francois
Cautain អំពីបញ្ហាដីធ្លី សម្តេចតេជោនាយករដ្ឋមន្ត្រីបានជំរាបជូនឯកឧត្តម Jean Francois Cautain យ៉ាងលម្អិតអំពីកំណែទម្រង់ដីធ្លីរបស់រាជរដ្ឋាភិបាល
ជាពិសេសការអនុវត្តន៍សកម្មភាពថ្មី ក្នុងនយោបាយចាស់លើបញ្ហាដីធ្លី ដែលមានយុវជនស្ម័គ្រចិត្ត រួមជាមួយស្ថាប័នមានសមត្ថកិច្ច ដើម្បីធ្វើការវាស់វែងដីធ្លីចែកជូនប្រជាជនកម្ពុជា៕