ឯកឧត្តម ផៃ ស៊ីផាន រដ្ឋលេខាធិការ
និងជាអ្នកនាំពាក្យនៃទីស្តីការគណៈរដ្ឋមន្ត្រីបានមានប្រសាសន៍ឲ្យ
ដឹងថា បញ្ហាព្រំដែនជាបញ្ហាអធិបតេយ្យភាព និងសន្តិសុខជាតិ
មិនត្រូវលើកយកមកបញ្ចេញមតិយោបល់
ដែលធ្វើឲ្យប៉ះពាល់ដល់សន្តិសុខជាតិនោះទេ។ ឯកឧត្តម ផៃ ស៊ីផាន
បានមានប្រសាសន៍បែបនេះ នៅក្នុងសន្និសីទសារព័ត៌មាន
ស្តីពីព្រំដែនជាបញ្ហាអធិបតេយ្យភាព និងសន្តិសុខជាតិ នាថ្ងៃទី២៨
ខែមីនា ឆ្នាំ២០១៣ នៅវិមានមិត្តភាព ទីស្តីការគណៈរដ្ឋមន្ត្រី។
ឯកឧត្តម ផៃ ស៊ីផាន
បានមានប្រសាសន៍ឲ្យដឹងថា
បញ្ហាព្រំដែនមិនមែនជាបញ្ហាសិទ្ធិសេរីភាពក្នុងការបញ្ចេញមតិយោបល់
ឬសិទ្ធិសារព័ត៌មាននោះទេ
ដោយសារយើងឈរទៅលើចំណុចចំនួនពីរសំខាន់ៗ។
ទី១,ឈរទៅលើអនុភាពការប្រឹងប្រែងរបស់អាជ្ញាធរជាតិទទួលបន្ទុក
កិច្ចការព្រំដែន។ ទី២,ឈរទៅលើកងការពារជាតិនៃកងខេមរភូមិន្ទ
កងនគរបាលព្រំដែន ដែលកំពុងបំពេញភារកិច្ចយ៉ាងសស្រោកសស្រាំ
ហ៊ានបូជាជីវិតការពារអធិបតេយ្យភាពជូនព្រះរាជាណាចក្រកម្ពុជា។
ឯកឧត្តម ផៃ ស៊ីផាន បានគូសបញ្ជាក់ថា
រឿងព្រំដែនកម្ពុជា-ថៃ
ជាព្រំដែនមួយស្របតាមស្មារតីនៃអនុស្សារណៈនៃការយោគយល់គ្នាឆ្នាំ
២០០០ គឺយើងឈរទៅលើសន្ធិសញ្ញា អនុសញ្ញាឆ្នាំ១៩០៤ ឆ្នាំ១៩០៧
និងការផលិតផែនទីឆ្នាំ១៩០៨។ “ព្រំដែនរបស់កម្ពុជានិងថៃ
ជាព្រំដែនមានស្រាប់ ស្ថិរភាព ជាព្រំដែនស្ថាពរ”។
ទាក់ទងទៅនឹងវិទ្យុបរទេសមួយដែលផ្សាយ
ជាខេមរភាសាបាននិយាយថា ព្រំដែនស្រុកសំឡូត ខេត្តបាត់ដំបង
ត្រូវបានថៃរំកិលយកជាង១០គីឡូម៉ែត្រនោះ លោកជំទាវបណ្ឌិត កុយ ពិសី
អនុប្រធាននៃលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ច
ការព្រំដែននៃទីស្តីការគណៈរដ្ឋមន្ត្រី
បានបញ្ចេញប្រតិកម្មឆ្លើយតបថា ប្រសិនបើរាជរដ្ឋាភិបាលកម្ពុជា
ធ្វើការដូចដែលលោកអ្នកសារព័ត៌មានឯករាជ្យមួយចំនួន
គិតស្រមើលសម្រៃនោះ យើងប្រាកដជាជួបនូវគ្រោះមហន្តរាយជាមិនខាន។
លោកជំទាវ កុយ ពិសី
បានមានប្រសាសន៍បញ្ជាក់ថា រាជរដ្ឋាភិបាល
ក្រោមការណែនាំរបស់សម្តេចតេជោនាយករដ្ឋមន្ត្រី ហ៊ុន សែន បានធ្វើ
និងអ្វីដែលឯកឧត្តមបណ្ឌិសភាចារ្យ សុខ អាន ឧបនាយករដ្ឋមន្ត្រី
ដែលជាអនុប្រធានអចិន្ត្រៃយ៍នៃអាជ្ញាធរជាតិទទួលកិច្ចការព្រំដែន
លោកបានធ្វើគឺ មានការខិតខំប្រឹងប្រែង
និងយកចិត្តទុកដាក់ខ្ពស់បំផុតក្នុងការកសាងព្រំដែនកម្ពុជា
ជាមួយនឹងប្រទេសជិតខាងទាំង៣
មិនមែនធ្វើព្រំដែនតែជាមួយប្រទេសថៃនោះទេ
គឺយើងធ្វើទាំងជាមួយប្រទេសឡាវ និងប្រទេសវៀតណាមផងដែរ។
នេះគឺជាការខិតខំប្រឹងប្រែងយ៉ាងពេញទំហឹងរបស់រាជរដ្ឋាភិបាល
នៅក្នុងការកសាងព្រំដែនកម្ពុជាឲ្យទៅជាព្រំដែនសន្តិភាព
មិត្តភាព សហប្រតិបត្តិការ និងការអភិវឌ្ឍន៍។
លោកជំទាវ កុយ ពិសី
មានប្រសាសន៍ឲ្យដឹងថា ការកំណត់ទីតាំងបង្គោលព្រំដែនកម្ពុជា-ថៃ
គឺយើងធ្វើទៅតាមឯកសារ ដែលបន្សល់ទុកដោយអាណានិគមបារាំង
តាមអនុសញ្ញាឆ្នាំ១៩០៤ សន្ធិសញ្ញា១៩០៧ និង MOU ឆ្នាំ២០០០។
យើងក៏មានបែបបទបច្ចេកទេសឆ្នាំ២០០៣
ដែលធ្វើឲ្យក្រុមបច្ចេកទេសយើងយកឯកសារទាំងនេះ
ទៅអនុវត្តនៅលើដីជាក់ស្តែង។ លោកជំទាវបន្តថា
តួនាទីភារកិច្ចរបស់គណៈកម្មាធិការចម្រុះកិច្ចការព្រំដែននាពេល
បច្ចុប្បន្ននេះ គឺធ្វើការជាមួយខាងថៃ
ដោយមិនបានកំណត់ព្រំដែនសារជាថ្មីនោះទេ។
យើងមានព្រំដែនអន្តរជាតិស្របច្បាប់រួចទៅហើយ
ដែលទទួលស្គាល់ដោយប្រទេសទាំងពីរ និងឯកសារទាំងនេះ
បានបន្សល់ទុកតាំងពីសម័យអាណានិគមនិយមបារាំងមកម្ល៉េះ។
ដូច្នេះអ្នកដែលនិយាយថា
កម្ពុជាបាត់បង់ដីដោយសារតែការរុករកបង្គោលព្រំដែនបន្ថែមទៀត
គឺជាការលើកឡើងដែលមិនសមស្របទាល់តែសោះ។
លោកជំទាវ កុយ ពិសី បានរំលឹកថា ថ្មីៗនេះ
(ថ្ងៃ២៧ មីនា) វិទ្យអាស៊ីសេរី ដែលផ្សាយថា បង្គោលព្រំដែនលេខ៦៩
លេខ៧០ ត្រូវបានថៃទន្ទ្រានចូលនៅក្នុងតំបន់នេះ។
តាមការពិតទៅទីតាំងនេះ(៦៩-៧០)
ត្រូវបានគណកម្មាធិការចម្រុះក្រុមបច្ចេកទេសនៃភាគីទាំងពីរឯកភាពលើ
ទីតាំងនេះរួចទៅហើយ
គឺទីតាំងនេះជាទីតាំងដែលឯកសារបានបង្ហាញជូននៅក្នុងអនុសញ្ញា
១៩០៤ និងឆ្នាំ១៩០៧។
លោកជំទាវបន្តថា
ទាក់ទងនឹងបង្គោលព្រំដែនលេខ៦៩ និង៧០នេះ
យើងបានធ្វើកិច្ចការនេះតាំងពីឆ្នាំ២០០៨
ហើយភាគីទាំងពីរបានរកឃើញទីតាំងពិតប្រាកដត្រូវទៅនឹងផែនទីដែលរៀប
ចំឡើងដោយគណៈកម្មាធិការចម្រុះព្រំដែនបារាំង-សៀម នាឆ្នាំ១៩០៨ ១៩០៩
១៩០១៩ និង១៩២០។
ដូច្នេះពុំមានការខិតព្រំដែនចូលមកក្នុងទឹកដីកម្ពុជាប្រហែលជា១០
គីឡូម៉ែត្រ ដូចការអះអាងរបស់អ្នកសារព័ត៌មាន
និងអ្នកស្រាវជ្រាវឯករាជ្យមួយចំនួន ដែលបានលើកឡើងនោះទេ
នេះគឺជាការបំផ្លើសគ្មានការពិត។
លោកជំទាវ កុយ ពិសី បញ្ជាក់ថា
ព្រំដែនកម្ពុជា-ថៃសព្វថ្ងៃនេះ
គឺអត់មានធ្វើការកំណត់សារជាថ្មីនោះទេ
គឺយើងធ្វើទៅតាមឯកសារទាំងឡាយដែលជាមរតកអាណានិគមនិយមបារាំងបន្សល់
ទុកឲ្យ។
តួនាទីភារកិច្ចបច្ចុប្បន្នរបស់គណកម្មាធិការចម្រុះកិច្ចការព្រំដែន
គឺយើងទៅរុករកបង្គោលព្រំដែនចាស់
ដែលអាណានិគមបារាំងជាអាណាព្យាបាលរបស់កម្ពុជាពេលនោះ ជាមួយនឹងថៃ
គឺយើងធ្វើបាន៧៣បង្គោល។ ដូច្នេះតួនាទីរបស់យើងពេលនេះ
គឺទៅរកបង្គោលព្រំដែនទាំង៧៣បង្គោលនោះឡើងវិញ។ លោកជំទាវ កុយ ពិសី
បញ្ជាក់ថា បង្គោលទាំង៧៣ បានបោះតាំងពី១០០ឆ្នាំមុន
ដោយសារតែកត្តាមួយចំនួន ដូចជា
សង្គ្រាមប៉ុន្មានទស្សវត្សរ៍កន្លងមក បង្គោលខ្លះបោះនៅលើដើមឈើ
បង្គោលខ្លះទៀតបោះនៅលើតំបន់មួយដែលមិនមានសុវត្ថិភាព
និងការបម្រែបម្រួលនៃធម្មជាតិជាដើម
ដែលធ្វើឲ្យបង្គោលមួយចំនួនត្រូវបានបាត់បង់ ឬខូចខាត។
ក្នុងឆ្នាំ២០០៧
យើងបានផ្អាកដំណើរការដោយសារតែមានសង្គ្រាមនៅតំបន់ប្រាសាទព្រះវិហារ
តែយើងក៏បានចាប់ផ្តើមដំណើរការឡើងវិញនៅឆ្នាំ២០១២
គឺរុករកបង្គោលដែលនៅសល់ចំនួន២៥ទៀត
គឺយើងចាប់ផ្តើមពីបង្គោលលេខ២២
ហើយបច្ចុប្បន្ននេះយើងនៅបង្គោលលេខ១៩។ យើងសង្ឃឹមថា
កិច្ចការនេះនឹងបានបញ្ចប់ដោយរលូននៅពេលដ៏ខ្លីខាងមុខ។
ឯកឧត្តម ឧត្តមសេនីយ៍ឯក ឈុំ សុជាត
រដ្ឋលេខាធិការ និងជាអ្នកនាំពាក្យនៃក្រសួងការពារជាតិ
បានមានប្រសាសន៍ឲ្យដឹងផងដែរថា ក្រសួងការពារជាតិ
សូមធ្វើការបដិសេធទាំងស្រុងនូវអ្វីដែលអ្នកសារព័ត៌មានមួយចំនួនលើក
ឡើង ដែលមានចេតនាមិនល្អមកលើរាជរដ្ឋាភិបាលកម្ពុជា
ដោយគេងយកផលប្រយោជន៍អ្វីមួយ លោកបញ្ជាក់ថា មកទល់ម៉ោងនេះ
ព្រំដែនកម្ពុជា-ថៃ
ក៏ដូចជាព្រំដែននៅទូទាំងប្រទេសមិនមានការបាត់បង់សូម្បីតែមួយ
មីល្លីម៉ែត្រ។ កងខេមរភូមិន្ទជានិច្ចកាល គឺនៅតែឈរជើងយ៉ាងរឹងមាំ
តាមខ្សែបន្ទាប់ព្រំដែនការពារបូរណភាពទឹកដី និងអធិបតេយ្យភាពជាតិ។
ឯកឧត្តម ឈុំ សុជាត
បានមានប្រសាសន៍ឲ្យដឹងថា
ក្រោមការដឹកនាំដ៏ត្រឹមត្រូវរបស់សម្តេចតេជោនាយករដ្ឋមន្ត្រី
ដែលលោកជាប្រមុខដឹកនាំ គឺមានការតាមដានគ្រប់ពេលវេលា។
នៅតាមអង្គភាពរបស់យើងមួយៗ មានបញ្ជាការសមរភូមិមុខ មានយោធភូមិភាគ
មានបញ្ជាការវរសេនាតូចរបស់យើងនៅតាមតំបន់ព្រំដែននីមួយៗ
រហូតដល់មានកងការពារព្រំដែន ឈរជើងតាមព្រំដែនយ៉ាងរឹងប៉ឹង។
តួនាទីរបស់កងយោធពលខេមរភូមិន្តនៅតែប្រកាន់ភ្ជាប់ដាច់ខាត
ហ៊ានពលីជីវិតការពារបូរណភាពទឹកដី
មិនអនុញ្ញាតឲ្យបរទេសណាឈ្លានពានសូម្បីតែមួយមីល្លីម៉ែត្រ។
ឯកឧត្តម ឧត្តមសេនីយ៍ឯក ហ៊ូ សាគុណ
ប្រធាននាយកដ្ឋានកណ្តាលនគរបាលព្រំដែននៃអគ្គស្នងការនគរបាលជាតិ
បានមានប្រសាសន៍យល់ស្របថា
បញ្ហាព្រំដែនរាជរដ្ឋាភិបាលកម្ពុជាបាននិងកំពុងខិតខំយកចិត្តទុក
ដាក់ដោះស្រាយជាមួយនឹងប្រទេសជិតខាង។ ឯកឧត្តមបញ្ជាក់ថា
មកដល់ពេលនេះកងនគរបាលជាតិ
ក្នុងនោះគឺមានកងនគរបាលព្រំដែនបានយកចិត្តទុកដាក់នៅក្នុងការងារ
របស់ខ្លួន ក្នុងការការពារបូរណភាពទឹកដី
ដោយសហការជាមួយនឹងកងយោធពលខេមរភូមិន្ទបានល្អប្រសើរ។
ទឹកដីរបស់យើងត្រូវបានរក្សាយ៉ាងម៉ឺងម៉ាត់មិន
មានបាត់បង់ណាមួយឡើយ។
សន្និសីទសារព័ត៌មាននេះ
ត្រូវបានរៀបចំធ្វើឡើងប្រតិកម្មឆ្លើយតបទៅនឹងការផ្សព្វផ្សាយព័ត៌មាន
អំពីបញ្ហាព្រំដែនជាមួយប្រទេសជិតខាង ដែលមិនមានការពិត
ជាហេតុធ្វើឲ្យប៉ះពាល់ដល់សន្តិសុខជាតិ បន្ទាប់ពីវិទ្យុអាស៊ីសេរី
និងប្រព័ន្ធផ្សព្វផ្សាយមួយចំនួននាពេលថ្មីៗនេះ
បានធ្វើការផ្សព្វផ្សាយអំពីបញ្ហាព្រំដែនរវាងកម្ពុជា និងថៃ
ដោយបានផ្សាយថា កម្ពុជាបានបាត់បង់ដី ១០ គីឡូម៉ែត្រ ទៅប្រទេសថៃ
នៅច្រកបួនរយ ស្ថិតនៅក្នុងសំឡូត ខេត្តបាត់ដំបង ជាប់ខេត្តត្រាត
ប្រទេសថៃ ជាពិសេស ដើម្បីឲ្យសារព័ត៌មាន ពង្រឹងវិជ្ជាជីវៈ
និងក្រមសីលធម៌សារព័ត៌មាន ចៀសវាងការប្រឈមផ្លូវច្បាប់៕