ឯកឧត្តមបណ្ឌិតសភាចារ្យ សុខ អាន
ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី
នាព្រឹកថ្ងៃទី២៨ ខែមីនា ឆ្នាំ២០១៣ បានអំពាវនាវឲ្យក្រសួងអប់រំយុវជន
និងកីឡា និងក្រសួងការងារ និងបណ្តុះបណ្តាលវិជ្ជាជីវៈ
ត្រូវសហការជាមួយគ្នា ធ្វើឲ្យមានសុខុដុមនីយកម្ម
ក្នុងការកសាងមូលធនមនុស្ស
ដើម្បីឆ្លើយតបទៅនឹងតម្រូវការនៃទីផ្សារពលកម្ម។
ក្នុងឱកាសអញ្ជើញជាអធិបតី
ក្នុងសិក្ខាសាលាផ្សព្វផ្សាយរបាយការណ៍ឆ្នាំ២០១២
ស្តីពីការពិនិត្យតាមដានជាសកល លើការអប់រំសម្រាប់ទាំងអស់គ្នា
នៅក្រោមប្រធានបទ យុវជន និងជំនាញៈ ប្រែក្លាយការអប់រំ ឲ្យទៅជាការងារ
នៅសណ្ឋាគារឡឺរ៉ូយ៉ាល់ ឯកឧត្តមបណ្ឌិតសភាចារ្យ សុខ អាន
ដែលជាប្រធានគណៈកម្មាធិការជាតិបណ្តុះបណ្តាល (NTB)
ផងដែរបានមានប្រសាសន៍ថា
ការបណ្តុះបណ្តាលត្រូវយកចិត្តទុកដាក់ទាំងផ្នែកទន់
(សមត្ថភាពដោះស្រាយការងារពេលមានឧបសគ្គ វិន័យ ចរិយាសម្បត្តិ)
និងផ្នែករឹង ដើម្បីបម្រើសេចក្តីត្រូវការទីផ្សារការងារ។
បញ្ហាសំខាន់
គឺត្រូវចៀសឲ្យផុតពីភាពមិនស៊ីសង្វាក់គ្នារវាងកម្លាំងពលកម្ម
និងទីផ្សារការងារ។
ត្រូវកាត់បន្ថយការបោះបង់ការសិក្សាក្នុងសាលាបឋមសិក្សា
ក៏ដូចជាវិទ្យាល័យ។
ដោយរលឹកអំពីការប្រមូលគ្រូបង្រៀន
ដែលបន្សល់ពីរបបប្រល័យពូជសាសន៍ ប៉ុល ពល និងការចល័តគ្រូ
ដើម្បីបណ្តុះបណ្តាល កសាងធនធានមនុស្សក្រោយថ្ងៃរំដោះ ៧មករា
ឆ្នាំ១៩៧៩ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា
បច្ចុប្បន្ននេះ យើងមានស្ថាប័នអប់រំជាន់ខ្ពស់ជាង១០០
ដែលផ្តល់នូវឱកាសអប់រំកម្រិតខ្ពស់ជូនយុវជនកម្ពុជា។
ស្ថាប័នបណ្តុះបណ្តាលបច្ចេកទេស
ក៏បានដើរតួនាទីយ៉ាងសំខាន់ក្នុងការផ្តល់ការហ្វឹកហ្វឺនជំនាញ
ទៅនឹងកម្លាំងពលកម្មកម្ពុជា ដែលបានរួមវិភាគទានដ៏មានប្រសិទ្ធភាព
ក្នុងការទាក់ទាញវិនិយោគិនបរទេស និងក្នុងស្រុក
ដើម្បីធ្វើការអភិវឌ្ឍន៍ប្រទេសជាតិ។
ឯកឧត្តមបណ្ឌិតសភាចារ្យ សុខ អាន
បានមានប្រសាសន៍បញ្ជាក់ថា ក្នុងន័យនេះ
យើងប្តេជ្ញាចិត្តក្នុងការកែលម្អគុណភាពនៃការអប់រំ
និងហ្វឹកហ្វឺនបណ្តុះបណ្តាល
ដើម្បីសម្រេចឲ្យបាននូវការអប់រំសម្រាប់ទាំងអស់គ្នា
និងឈានទៅដល់គោលដៅអភិវឌ្ឍន៍សហសវត្សរ៍លើវិស័យអប់រំ
នៅក្នុងអំឡុង២ឆ្នាំខាងមុខនេះ។ រាជរដ្ឋាភិបាលកម្ពុជា
បន្តការងារដ៏មានសារៈសំខាន់នៃយុទ្ធសាស្ត្រចតុកោណ
ក្នុងគោលបំណងពង្រឹងបន្ថែមសសរស្តម្ភទាំង៤
នៃការអភិវឌ្ឍន៍សេដ្ឋកិច្ចសង្គមដែលរួមមាន វិស័យកសិកម្ម
ហេដ្ឋារចនាសម្ព័ន្ធ វិស័យឯកជន និងវិស័យការងារ ព្រមទាំងធនធានមនុស្ស។
ឯកឧត្តមបណ្ឌិតសភាចារ្យ សុខ អាន
បានមានប្រសាសន៍បញ្ជាក់ថា តម្រូវការនៃសសរស្តម្ភនីមួយៗ គឺចំណេះដឹង
ភាពប្រកួតប្រជែង និងកម្លាំងពលកម្មជំនាញ
ដែលជាកត្តាសំខាន់ក្នុងការលើកកម្ពស់គុណភាព
និងពង្រីកបរិមាណនៃការអប់រំ ហ្វឹកហ្វឺន បច្ចេកទេស និងវិជ្ជាជីវៈ (TVET)
។ មានសមត្ថភាពជំនាញល្អ ទើបមានបៀវត្សរ៍ល្អផងដែរ
ព្រោះការផ្តល់ប្រាក់បៀវត្សរ៍គឺផ្អែកលើផលិតភាពការងារល្អ។
នៅក្នុងសិក្ខាសាលាដែលប្រព្រឹត្តទៅ
ក្រោមប្រធានបទយុវជន និងជំនាញៈ ប្រែក្លាយការអប់រំ ឲ្យទៅជាការងារ
ឯកឧត្តមបណ្ឌិតសភាចារ្យ សុខ អាន បានដាក់ចេញនូវអនុសាសន៍ចំនួន ៥ចំណុច
ដែលរួមមាន តម្រូវឲ្យមានការយកចិត្តទុកដាក់អភិវឌ្ឍន៍យុវជន
និងការងារ ដែលប៉ាន់ស្មានថាមានប្រមាណជាង ៣០ម៉ឺននាក់
ត្រូវចូលទៅក្នុងទីផ្សារពលកម្មក្នុងមួយឆ្នាំៗ។
លើកកម្ពស់ប្រសិទ្ធភាពនៃការអប់រំ កាត់បន្ថយសិស្សបោះបង់ចោលសាលា។
បង្កើនការខិតខំទ្វេរដើម្បីលុបបំបាត់អក្ខរភាព។
លើកកម្ពស់គុណភាពអប់រំនៅបឋមសិក្សា និងវិទ្យាល័យ
ដើម្បីឲ្យយុវជនត្រៀមលក្ខណៈសម្រាប់ឱកាសការងារ
នៅក្នុងទីផ្សារពលកម្មមួយដែលមានការប្រកួតប្រជែង។ បណ្តាញការអប់រំ
ហ្វឹកហ្វឺន បច្ចេកទេស និងវិជ្ជាជីវៈ (TVET)
ត្រូវដើរតួនាទីជាផ្នែកមួយដ៏មានសារៈសំខាន់
ក្នុងការជួយកសាងសមត្ថភាពជំនាញដល់យុវជន។
សិក្ខាសាលាផ្សព្វផ្សាយរបាយការណ៍ឆ្នាំ
២០១២ ស្តីពីការពិនិត្យតាមដានជាសកល លើការអប់រំសម្រាប់ទាំងអស់គ្នា
ដែលប្រព្រឹត្តទៅនៅក្រោមប្រធានបទ យុវជន និងជំនាញៈ
ប្រែក្លាយការអប់រំ ឲ្យទៅជាការងារ
ត្រូវបានរៀបចំឡើងដោយគណៈកម្មាធិការជាតិបណ្តុះបណ្តាល (NTB)
សហការជាមួយអង្គការយូណេស្កូ រួមជាមួយអង្គការ Dvv និង Nep។
វត្តមានចូលរួមក្នុងឱកាសនោះដែរ រួមមាន ឯកឧត្តម អ៊ឹម សិទ្ធី
រដ្ឋមន្ត្រីក្រសួងអប់រំយុវជន និងកីឡា ឯកឧត្តម ពេជ្រ សោភ័ណ
រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោកជំទាវ អាន
ឡឺម៉េស (Ann Lemaistre) តំណាងអង្គការយូណេស្កូប្រចាំកម្ពុជា
ព្រមទាំងមន្ត្រីជំនាញមកពីក្រសួង ស្ថាប័នពាក់ព័ន្ធ
និងមន្ត្រីអង្គការយូណេស្កូជាច្រើនទៀត៕