ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន បានប្រគល់ប័ណ្ណកម្មសិទ្ធិដីធ្លី ដែលជាសមិទ្ធផលសម្រេចឡើងដោយវីរៈយុវជនស្ម័គ្រចិត្តសម្តេចតេជោនាយក រដ្ឋមន្ត្រី ក្រោមគោលនយោបាយចាស់សកម្មភាពថ្មី ជូនប្រជាពលរដ្ឋនៅឃុំសំរោង និងឃុំត្រពាំងធំខាងត្បូង ស្រុកត្រាំកក់ ខេត្តតាកែវ ចំនួន ៧៦៨គ្រួសារ ដោយផ្ទាល់ដៃ នាព្រឹកថ្ងៃទី១៩ ខែមីនា ឆ្នាំ២០១៣។ នេះជាលើកទី៣ ដែលឯកឧត្តមបណ្ឌិតសភាចារ្យ សុខ អាន បានអញ្ជើញជាអធិបតីក្នុងពិធីប្រគល់ប័ណ្ណកម្មសិទ្ធិដីធ្លី ជូនប្រជាពលរដ្ឋក្នុងខេត្តតាកែវ។
ក្នុងពិធីប្រគល់ប័ណ្ឌកម្មសិទ្ធិដីធ្លី
ដែលធ្វើឡើងនៅភូមិក្របីព្រៃ ស្ថិតនៅឃុំសំរោង ស្រុកត្រាំកក់
ជាមួយនឹងការផ្តាំផ្ញើ
និងការសួរសុខទុក្ខពីសម្តេចតេជោនាយករដ្ឋមន្ត្រី និងលោកជំទាវ
ជូនប្រជាពលរដ្ឋ ឯកឧត្តមបណ្ឌិតសភាចារ្យ សុខ អាន
បានមានប្រសាសន៍កត់សម្គាល់ថា ការចែកប័ណ្ណកម្មសិទ្ធិ
ជូនប្រជាពលរដ្ឋនៅពេលនេះ
ឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់របស់រាជរដ្ឋាភិបាល
ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា
ក្នុងការធានាកម្មសិទ្ធិដីធ្លីស្របច្បាប់របស់ប្រជាពលរដ្ឋ
សំដៅលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ
ព្រមទាំងរួមចំណែកដល់ការពង្រឹងយុត្តិធម៌និងស្ថិរភាពសង្គម។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា
រាជរដ្ឋាភិបាលបាននិងកំពុងអនុវត្តគោលនយោបាយ
និងយុទ្ធសាស្រ្តដ៏សមស្របនានា ដើម្បីអភិវឌ្ឍសមត្ថភាពរបស់ប្រជាកសិករ
និងអភិវឌ្ឍវិស័យកសិកម្ម
ដោយផ្តោតការយកចិត្តទុកដាក់ខ្ពស់ចំពោះការកសាងប្រព័ន្ធធារាសាស្រ្ត
និងការផ្តល់សេវាគាំទ្រនានា ព្រមទាំងគោលនយោបាយអភិវឌ្ឍជនបទ
សំដៅបង្កើតឱកាសឱ្យកាន់តែប្រសើរជូនប្រជាពលរដ្ឋក្នុងការបង្កើនចំណូល
ប្រចាំគ្រួសារ។ ដូច្នេះ ការផ្តល់កម្មសិទ្ធិដីធ្លីនេះ
គឺពិតជាបានរួមចំណែកជំរុញនិងលើកទឹកចិត្តឱ្យបងប្អូន
ប្រជាពលរដ្ឋខិតខំបង្កើនផលិតភាព
ក៏ដូចជាការវិនិយោគក្នុងវិស័យកសិកម្មឱ្យកាន់តែខ្លាំងឡើងថែមទៀត។
ឯកឧត្តមបណ្ឌិតសភាចារ្យ សុខ អាន បានអំពាវនាវឲ្យប្រជាពលរដ្ឋ
ខិតខំបង្កបង្កើនផលឲ្យស្របទៅតាមតម្រូវការនៃទីផ្សារ
ទើបធ្វើឲ្យកសិផលដែលផលិតបានមានតម្លៃ
ព្រោះប្រទេសកម្ពុជាយើងប្រកាន់របបសេដ្ឋកិច្ចទីផ្សារសេរី មានន័យថា
ពេលទីផ្សារត្រូវការទើបទំនិញយើងមានតម្លៃ។
ពាក់ព័ន្ធនឹងការឃោសនារបស់អ្នកនយោបាយ
នៃគណបក្សប្រឆាំង ដែលបំភ្លៃថា រដ្ឋាភិបាលចែកប័ណ្ណដីធ្លី
ដើម្បីងាយស្រួលក្នុងការយកពន្ធដី ឯកឧត្តមបណ្ឌិតសភាចារ្យ សុខ អាន
បានមានប្រសាសន៍ថា ខ្ញុំសូមបញ្ជាក់ជាថ្មីម្តងទៀត
ជូនបងប្អូនប្រជាពលរដ្ឋនៅទីនេះ ក៏ដូចជានៅទូទាំងប្រទេសថា
ការវាស់វែងដីធ្លី និងចែកប័ណ្ណកម្មសិទ្ធិជូនប្រជាពលរដ្ឋ
គឺដើម្បីឱ្យប្រជាពលរដ្ឋយកទៅបង្កបង្កើនផលសម្រាប់ទ្រទ្រង់
ជីវភាពគ្រួសារ និងប្រើប្រាស់តាមសេចក្តីត្រូវការរបស់បងប្អូន
ប៉ុន្តែមិនមែនដើម្បីយកពន្ធ
ដូចដែលក្រុមមួយចំនួនតូចបានលើកឡើងនោះទេ។ ដរាបណា
រាជរដ្ឋាភិបាលនៅតែដឹកនាំដោយសម្តេចតេជោនាយករដ្ឋមន្រ្តី
ដីធ្លីទាំងអស់របស់ប្រជាកសិករដែលប្រើប្រាស់ជាលក្ខណៈគ្រួសារ
នឹងមិនត្រូវបានយកពន្ធនោះឡើយ។
ឯកឧត្តមបណ្ឌិតសភាចារ្យ សុខ អាន
ក៏បានបញ្ជាក់ថា
ក្រុមអ្នកនយោបាយប្រឆាំងពួកគេបានអនុវត្តយុទ្ធសាស្ត្រកុហកពីរ
ក្នុងពេលតែមួយ គឺនៅពេលដែលជួបកសិករគេបានលើកឡើងថា
តម្លៃស្រូវថោកណាស់បងប្អូនកសិករនឹងលំបាក។
ពេលជួបអ្នកទីក្រុងគេលើកឡើងថា
បើស្រូវឡើងថ្លៃយ៉ាងនេះធ្វើឲ្យអ្នកទីក្រុងជួបការលំបាក។
ឯកឧត្តមបណ្ឌិតសភាចារ្យ សុខ អាន
ក៏បានធ្វើការអំពាវនាវដល់ប្រជាពលរដ្ឋមិនត្រូវចាញ់បោកជនមួយក្តាប់
តូច
ដែលតែងតែមានចេតនាឃោសនាអូសទាញឱ្យបងប្អូនទៅចាប់យកដីរបស់រដ្ឋ
និងបង្កភាពចលាចលក្នុងសង្គមជាតិនោះឡើយ។
ព្រោះរាល់ការចូលទន្រ្ទានចាប់យកដីរដ្ឋ និងការបោះបង្គោលលើដីរដ្ឋ
គឺជាសកម្មភាពខុសច្បាប់ និងត្រូវហាមឃាត់ជាដាច់ខាត
ហើយរាល់ជនល្មើសនឹងត្រូវផ្តន្ទាទោសតាមច្បាប់ជាធរមាន។
ទាក់ទងនឹងសកម្មភាពរបស់យុវជនស្ម័គ្រ
ចិត្តសម្តេចតេជោនាយករដ្ឋមន្ត្រី
ដែលបានចូលរួមអនុវត្តគោលនយោបាយចាស់សកម្មភាពថ្មី ឯកឧត្តម ស្រី បេន
អភិបាលនៃគណៈអភិបាលខេត្តតាកែវ បានមានប្រសាសន៍ឲ្យដឹងថា
មកដល់ពេលនេះ
ខេត្តតាកែវបានទទួលយុវជនស្ម័គ្រចិត្តសម្តេចតេជោចំនួន ២វគ្គ
គឺវគ្គទី១ នៅថ្ងៃទី១៣ ខែកក្កដា ឆ្នាំ២០១២ មានចំនួន ៣ក្រុម
ចុះវាស់វែងដីធ្លី
ជូនប្រជាពលរដ្ឋតែក្នុងភូមិសាស្ត្រស្រុកត្រាំកក់ និងស្រុកគិរីវង់
ហើយបានបញ្ចប់សកម្មភាពរបស់ខ្លួននៅថ្ងៃទី៣១ ខែធ្នូ ឆ្នាំ២០១២។
វគ្គទី២ បានមកដល់នៅថ្ងៃទី១៥ ខែមករា ឆ្នាំ២០១៣
ដោយចុះវាស់វែងនៅស្រុកត្រាំកក់តែមួយប៉ុណ្ណោះ។
ជាលទ្ធផលបើគិតមកត្រឹមថ្ងៃនេះ យើងបានបំពេញសាលាកបត្រព័ត៌មានចំនួន
១១ ៨៩២ ក្បាលដី និងបានបញ្ចូលសម្រង់បញ្ជីឈ្មោះម្ចាស់ដីបានចំនួន ៩
២៤៥ គ្រួសារ។
ឯកឧត្តម ស្រី បេន
បានមានប្រសាសន៍ឲ្យដឹងថា
កន្លងមកខេត្តតាកែវបានចែកប័ណ្ណកម្មសិទ្ធិដីធ្លីចំនួន ២ ៨៩៦ ក្បាលដី
ជូនប្រជាពលរដ្ឋចំនួន ១ ៧៣៩ គ្រួសារ។
ក្នុងនោះសម្តេចតេជោនាយករដ្ឋមន្ត្រី
បានអញ្ជើញមកប្រគល់ប័ណ្ណកម្មសិទ្ធិដីធ្លី
ជូនប្រជាពលរដ្ឋដោយផ្ទាល់កាលពីថ្ងៃទី៣០ ខែធ្នូ ឆ្នាំ២០១២។ ដោយឡែក
នេះជាលើកទី៣ហើយ ដែលឯកឧត្តមបណ្ឌិតសភាចារ្យ សុខ អាន
បានអញ្ជើញមកចែកប័ណ្ណកម្មសិទ្ធិដីធ្លីជូនប្រជាពលរដ្ឋ។
សម្រាប់ការងារបង្កបង្កើនផល
ឯកឧត្តមអភិបាលខេត្តតាកែវ បានឲ្យដឹងថា
ខេត្តតាកែវអាចសល់ស្រូវប្រមាណ ៨០ម៉ឺនតោន
សម្រាប់ការបង្កបង្កើនផលក្នុងឆ្នាំ២០១២-២០១៣។
សូមបញ្ជាក់ថា
ចាប់តាំងពីពាក់កណ្តាលឆ្នាំ២០១២មក
រាជរដ្ឋាភិបាលបានបើកយុទ្ធនាការចុះវាស់វែងដីធ្លីប្រមាណ
១លាន៨សែនហិកតា បើគិតជាក្បាលដីគឺប្រមាណ ៧០ម៉ឺនក្បាលដី
សម្រាប់ចែកជូនប្រជាពលរដ្ឋប្រមាណ ៤៧ម៉ឺនគ្រួសារ
ដោយមានការចូលរួមពីមន្រ្តីជំនាញបច្ចេកទេសវាស់វែង
និងក្រុមក្មួយៗវីរៈយុវជនស្ម័គ្រចិត្តសរុបជាង ៣ពាន់នាក់។
បើផ្អែកតាមរបាយការណ៍របស់ក្រសួង
រៀបចំដែនដី នគរូបនីយកម្ម និងសំណង់ លទ្ធផលនៃការអនុវត្តបទបញ្ជាលេខ០១
នៅទូទាំងប្រទេស គិតមកដល់ថ្ងៃទី០៧ ខែមីនា ឆ្នាំ២០១៣ គឺ៖
បានបំពេញសលាកបត្រក្បាលដីបានចំនួន ៥១៨ ៦៧៨ ក្បាលដី
កត់ក្នុងសម្រង់បញ្ជីឈ្មោះម្ចាស់ដីបានចំនួន ៣៨៤ ៨៤៩ គ្រួសារ
ចំនួនគ្រួសារបានផ្ទៀងផ្ទាត់ចំនួន ៣១០ ៨៥៤ គ្រួសារ
វាស់ក្បាលដីបានចំនួន ៤៨៦ ១៧៥ ក្បាលដី គូរក្បាលដីបានចំនួន ៤១១
១៣១ ក្បាលដី បំពេញទម្រង់បែបបទក្បាលដីបានចំនួន ៤២៥ ០៥៩ ក្បាលដី
បិទផ្សាយជាសាធារណៈបានចំនួន ២៣៦ ៤៨៩ ក្បាលដី
និងបានចែកប័ណ្ណដល់ដៃប្រជាជនចំនួន ១៥១ ៦៧០ ប័ណ្ណ៕