ថ្លែងចេញពីវិមានសន្តិភាពនៅក្នុងពិធីសម្ពោធក្រុមប្រឹក្សាជាតិអភិវឌ្ឍន៍បៃតង (ក.ជ.អ.ប) និងអគ្គលេខាធិការដ្ឋាន (ក.ជ.អ.ប) ជាផ្លូវការ នាព្រឹកថ្ងៃទី១៩ ខែមីនា ឆ្នាំ២០១៣ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍អំពាវនាវថា “បើស្រឡាញ់ ហ៊ុន សែន បើអាណិត ហ៊ុន សែន បើជឿជាក់ ហ៊ុន សែន សូមបោះឆ្នោតឲ្យគណបក្សប្រជាជន”។
ទាក់ទងនឹងសេចក្តីអំពាវនាវឲ្យប្រជាជនបោះឆ្នោតជូនគណបក្សប្រជាជនកម្ពុជា សម្តេចតេជោនាយករដ្ឋមន្ត្រី ដែលត្រូវបានសមាជវិសាមញ្ញតំណាងគណបក្សប្រជាជន កាលពីថ្ងៃទី១៦ -១៧ ខែមីនា ឆ្នាំ២០១៣ អនុម័តជាឯកច្ឆ័ន្ទគាំទ្រសម្តេចតេជោ ជាបេក្ខជននាយករដ្ឋមន្ត្រីរបស់គណបក្សបានមានប្រសាសន៍ពន្យល់ថា វាជាសិទ្ធិនយោបាយរបស់សម្តេច សម្រាប់ការអំពាវនាវឲ្យប្រជាជន បោះឆ្នោតជូនគណបក្សប្រជាជនកម្ពុជា (CPP) នៅក្នុងការបោះឆ្នោតសកលនីតិកាលទី៥ នៃរដ្ឋសភានៅថ្ងៃទី២៨ ខែកក្កដា ឆ្នាំ២០១៣ ខាងមុខនេះ។
សម្តេចតេជោបានមានប្រសាសន៍ឲ្យដឹងថា ខ្ញុំនិយាយត្រង់ ហើយខ្ញុំនឹងនិយាយភាសាហ្នឹងនៅគ្រប់ទីកន្លែង «បើស្រឡាញ់ ហ៊ុន សែន បើអាណិត ហ៊ុន សែន បើជឿជាក់ ហ៊ុន សែន សូមបោះឆ្នោតឲ្យ CPP។ សម្តេចតេជោបញ្ជាក់ថា ខ្ញុំអត់ខ្លាចនិយាយទេ ព្រោះជាសិទ្ធិនយោបាយរបស់ខ្ញុំផ្ញើសារឲ្យប្រជាពលរដ្ឋ ខ្ញុំនឹងនិយាយភាសាហ្នឹង អ្នកឯងមានសិទ្ធិឃោសនា ខ្ញុំក៏មានសិទ្ធិនិយាយដែរ»។
ទាក់ទងជាមួយបញ្ហាកាត់ទោសអតីតមេដឹកនាំខ្មែរក្រហម ដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា កាលពីពេលមុននេះ សម្ដេចបានជួបដាច់ដោយឡែកពីគ្នា ជាមួយទូតសហភាព អឺរ៉ុប និងឯកអគ្គរាជទូតចក្រភពអង់គ្លេស ដោយបានបង្ហាញនូវកង្វល់រួមគ្នា ចំពោះដំណើរការកាត់ទោសអតីតមេដឹកនាំខ្មែរក្រហមថា ទី១ បញ្ហាកង្វះថវិកា និងទី២ មនុស្សចាស់។ សម្តេចតេជោមានប្រសាសន៍ថា យើងកង្វល់រឿងពីរហ្នឹង គឺត្រឹមត្រូវហើយ។ ឥឡូវអៀង សារី បានស្លាប់ទៅមួយ ហើយបើនៅពន្យារការកាត់ទៀត គឺរឿងនេះ...បែរជា អាម្សៀណាមួយនោះ បែរជាថាលោក ហ៊ុន សែន អ្នករារាំងដំណើរការកាត់ហ្នឹងទៅទៀត"។
សម្តេចតេជោមានប្រសាសន៍ថា រឿងសាលាក្តីសិទ្ធិអំណាចនៅលើសាលាក្តី។ ដំណើរការយឺតឬដំណើរការឆាប់ស្ថិតនៅលើសាលាក្តី វាអត់ស្ថិតនៅលើខ្ញុំទេ គេបានទម្លាក់រឿងមកលើខ្ញុំទៅរួច បើអញ្ចឹងអស់លោកអាចជឿ ប្រេត អាដាំ នឹងបានទេ។ កាលពីមុនយើងវាយ ប៉ុល ពត គេថាយើងខុស មូលហេតុដែលគេថាយើងខុសទើបគេ យក ប៉ុល ពត ទៅអង្គុយនៅអង្គការសហប្រជាជាតិ។ ឥឡូវប្រែមកថា បើគេយក ប៉ុល ពត ទៅកាត់ទោសប្រែមកថា យើងវាយ ប៉ុល ពត ត្រឹមត្រូវ ហើយ។ បើមិនថាត្រឹមត្រូវម្តេចបាន បើមិនថា ត្រឹមត្រូវៗតែទុក ប៉ុល ពត តទៅទៀត?។ សម្តេចតេជោបានមានប្រសាសន៍បញ្ជាក់ថា គោលការណ៍នៃកិច្ចព្រមព្រៀងទីក្រុងប៉ារីស បើអនុវត្តឲ្យបានត្រឹមត្រូវ ប៉ុល ពត អត់ត្រូវយកទៅកាត់ទោសទេ។ បើធ្វើឲ្យត្រឹមត្រូវតាមស្មារតីកិច្ចព្រមព្រៀងទីក្រុង ប៉ារីស ប៉ុល ពត ជាបក្សនយោបាយមួយ ដែលត្រូវចូលបោះឆ្នោតជាមួយគេឯង ហើយអ្នកដែលនិយាយពីកិច្ចព្រមព្រៀងទីក្រុងប៉ារីស និយាយឲ្យមើលមុខមើលក្រោយផង បើមិនដឹងទេកុំនិយាយទៅវាល្អជាង។ បើសិទ្ធិបញ្ចេញមតិចេញមកខុសឲ្យគេពេបជ្រាយទេ មិនគួរតាំងខ្លួនជាអ្នកចេះទេ។
ទាក់ទងនឹងការរួមគ្នារវាងមេដឹកនាំនៃក្រុមអ្នកនយោបាយនៃគណបក្សប្រឆាំង សម្តេចតេជោបានប្រៀបប្រដូចទៅនឹងជាស្រាចាស់ច្រកដបថ្មីប៉ុណ្ណោះ។ សម្តេចតេជោបានមានប្រសាសន៍បញ្ជាក់ថា ខ្ញុំគិតថា មិត្តភក្តិបរទេសក៏ស្គាល់ដែររឿងនឹងស្រាហិនណេស៊ី លាយចន្នីវើគឃើរ ហើយដាក់ដបថ្មីមនុស្សមុខដដែល។ គេមានសិទ្ធិនិយាយ ខ្ញុំក៏មានសិទ្ធិនិយាយដែរ ហើយអ្នកខ្លះថាខ្ញុំកំសាក ខ្ញុំនិយាយតាមមួយបែប «ខ្ញុំធ្លាប់ទាត់ដួល ៣ ដងហើយ បើនិយាយរឿងត្រឹមត្រូវតាមច្បាប់វិញ»។ ខ្ញុំចូលចិត្តណាស់ប្រកួតជាមួយអ្នកដែលធ្លាប់ប្រកួតចាញ់ ព្រោះខ្ញុំបានស្គាល់ស្នៀតអស់ទៅហើយ។ ពីមុនអាចថា ៣ ជើងបានដួល លើកនេះតែមួយជើងខ្ញុំវាយដួលហើយ ព្រោះដោយសារធ្លាប់វាយគ្នា ៣ ដង រឿងអ្វីដែលខ្ញុំត្រូវកំសាកក្នុងការប្រកួត ប៉ុន្តែបញ្ហានៅទីនេះ គឺបញ្ហាច្បាប់ មិនមែនបញ្ហាខ្ញុំហ៊ាន ឬមិនហ៊ាននោះទេ ហើយខ្ញុំកាន់តែអរទៅទៀត បើសិនអ្នកហ្នឹងដោះស្រាយចំណងច្បាប់រួចហើយៗចូលមកប្រកួត ព្រោះខ្ញុំស្គាល់ស្នៀតដែលគេធ្លាប់វាយហើយ ដូច្នេះតែមួយជើងទេសន្លប់ហើយ។ ព្រោះគេមិនមែនជាអាទិទេព ដែលមានដៃ៧ ដៃ៨ ឯណា?។
រំលឹកដល់ការធ្វើរដ្ឋប្រហារទម្លាក់ព្រះ នរោត្តម សីហនុ ពីប្រមុខរដ្ឋកាលពីឆ្នាំ១៩៧០ សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ម្សិលមិញ ថ្ងៃទី១៨ ខែមីនា ជាខួប ៤៣ឆ្នាំ នៃខួបរដ្ឋប្រហារទម្លាក់សម្តេច ព្រះ នរោត្តម សីហនុ។ ទាក់ទងបញ្ហានេះ សម្តេចតេជោបានលើកជាសំណួរថា អ្នកណាជាអ្នកទម្លាក់ពេលនោះ តើគេបានគិតពីបរិស្ថាននៅកម្ពុជា ក្នុងពេលដែលគ្រាប់បែករាប់លានតោនបានទម្លាក់លើក្បាលប្រជាជនកម្ពុជា គេមានបានគិតពីសិទ្ធិមនុស្សទេ?។ ការស្លាប់ជីវិតមនុស្សដោយគ្រាប់បែកដ៏ច្រើនបែបនេះ តើគេមានបានគិតទេ។ គេទម្លាក់រហូតដល់គីមីដើម្បីឲ្យជ្រុះស្លឹកឈើ ដើម្បីរកមើលពួកទ័ពព្រៃ តើគេមានបានគិតពីបរិស្ថាននៅកម្ពុជាទេ?។ ប៉ុល ពត សម្លាប់ប្រជាជនរាប់លាននាក់ បែរជា ប៉ុល ពត ត្រូវបានទទួលយកទៅអង្គុយនៅអង្គការសហប្រជាជាតិ រហូតដល់ឆ្នាំ១៩៩១ បាន SNC ទៅទទួលអាសនៈ តើគេមានបានគិតទេ?។ យើងប្រឹងងើបឈរឡើងដើម្បីរស់ ដោយយកជីវិតធ្វើជាដើមទុនពីបាតដៃទទេ រើបំរាស់បានប៉ុណ្ណឹង ហេតុអ្វីថ្ងៃនេះ យើងអនុវត្តន៍បែរជាត្រូវបានទទួលនូវការប្រមាថ?។
ដោយប្រៀងធៀបប្រទេសកម្ពុជា ជាមួយនឹងប្រទេសថៃក្នុងការអនុវត្តសិទ្ធិនយោបាយ សម្តេចតេជោបានមានប្រសាសន៍ឲ្យដឹងថា ប្រទេសទាំងពីរនេះខុសគ្នា ព្រោះប្រទេសថៃរំលាយបក្ស ហើយកាត់សិទ្ធិនយោបាយ ៥ឆ្នាំ តើមានអ្នកណាហ៊ានទៅនិយាយជាមួយប្រទេសថៃ។ លោក ថាក់ស៊ីន ត្រូវគេធ្វើរដ្ឋប្រហារទម្លាក់ដោយខុសច្បាប់ ធ្វើរដ្ឋប្រហារទម្លាក់ហើយ បក្សថៃរ៉ាក់ថៃរបស់ ថាក់ស៊ីន រំលាយហើយ កាត់សិទ្ធិនយោបាយអស់ ១១១នាក់ ក្រោយមកក្រុម ថាក់ ស៊ីន បង្កើតបក្សកម្លាំងប្រជាជន រកវិធីរំលាយបក្សកម្លាំងប្រជាជនទៀត។ ថាក់ស៊ីន អត់មានទោសអីទេ តែ ថាក់ស៊ីន អត់បានចូលស្រុករហូតដល់ថ្ងៃនេះ រាប់ទាំងពេលក្រោយនេះបក្សភឿថៃបោះឆ្នោតឈ្នះ ដែលជាបក្សមាននិន្នាការទៅរក ថាក់ស៊ីន ហើយនាយករដ្ឋមន្ត្រីជាប្អូនស្រីពៅរបស់ ថាក់ ស៊ីន ដែលគេធ្វើរដ្ឋប្រហារទម្លាក់ ហេតុអ្វីបានជាអ្នកដទៃមិនទៅទាមទារឲ្យ ថាក់ស៊ីន ចូលស្រុកផងទៅ? ម៉េចក៏មកនិយាយអីតែជាមួយកម្ពុជា ម៉េចក៏មានដាប់ប៊ិលស្តង់ដារនៅកន្លែងនេះ។ សម្តេចតេជោបានមានប្រសាសន៍ឲ្យដឹងទៀតថា ខ្ញុំជួយ ថាក់ ស៊ីន ខ្ញុំទទួល ថាក់ស៊ីន មនុស្សមួយចំនួនគេស្តីបន្ទោសឲ្យខ្ញុំ តែឥឡូវគេទទួលស្គាល់ថា ខ្ញុំត្រូវហើយ ព្រោះឥឡូវនរណាក៏គេទទួល ថាក់ស៊ីន ដែរ។ មានតែ ហ៊ុន សែន និង (ព្រះចៅ) ស៊ុលតង់ ព្រុយណេទេ ដែលហ៊ានទទួល ថាក់ស៊ីន។
សម្តេចតេជោក៏បានមានប្រសាសន៍រំលឹកផងដែរទៅដល់សម្តីរបស់លោក លី ម្យុងបាក់ អតីតប្រធានាធិបតីកូរ៉េខាងត្បូង ដែលពេលនេះបានក្លាយជាទីប្រឹក្សារបស់សម្តេចវិញ បន្ទាប់ពីបានផុតអាណត្តិជាប្រធានាធិបតីកូរ៉េ ដែលបាននិយាយថា “កាលពីពេលមុននៅពេលដែលខ្ញុំបានឮឯកឧត្តមនិយាយពី ថាក់ស៊ីន ខ្ញុំព្រួយចិត្តណាស់ ប៉ុន្តែខ្ញុំក៏គោរពឯកឧត្តមអំពីចក្ខុវិស័យវែងឆ្ងាយរបស់ឯកឧត្តមដែរ”។ ទាក់ទងបញ្ហានេះ សម្តេចតេជោបានមានប្រសាសន៍បន្ថែមថា មិនមែនត្រឹមតែបញ្ហាហ្នឹងទេ គេធ្វើរដ្ឋប្រហារទម្លាក់ ថាក់ស៊ីន ហើយបក្ស ថាក់ស៊ីន ឡើងមកគេរំលាយអស់។ នៅប្រទេសថៃនៅពេលរំលាយបក្សហើយកាត់សិទ្ធិធ្វើនយោបាយ តើមានអ្នកណាដែលទៅផ្តល់ការទូន្មានឲ្យប្រទេសថៃ។ ឯនៅកម្ពុជាអត់ទាន់មានរំលាយបក្សនយោបាយណាមួយទេ។ រឿងរំលាយបក្សនយោបាយមិនអាចកើតមាននៅកម្ពុជាទេ បើបុគ្គលធ្វើខុសជារឿងរបស់បុគ្គល មិនអាចយកបក្សនយោបាយមកឡូកឡំបានទេ កាត់សិទ្ធិនយោបាយរបស់អ្នកនយោបាយដែលគេគ្មានកំហុស ឬរំលាយបក្សនយោបាយដូចនៅប្រទេសថៃទេ។ ខ្ញុំគួរតែត្រូវបានជម្រះបញ្ជីរឿងនេះម្តង។ ឥឡូវយើងប្រៀបធៀបគ្នាមើលវាខុសគ្នាដាច់ស្រឡះហេតុអ្វីបានជាគេអត់ហ៊ានទៅនិយាយនៅទីនោះ ដោយសារថៃគាត់មានសេដ្ឋកិច្ចរឹងមាំ ហើយអ្នកខ្លះត្រូវការថៃខ្លាំង ហើយមូលដ្ឋានយោធារបស់គេនៅប្រទេសថៃ ទោះបីថៃធ្វើអីក៏ដោយក៏មិនហ៊ាននិយាយដែរ ហើយមិនហ៊ានធ្វើឲ្យថៃអន់ចិត្តទេ។ គេហ៊ានតែជាមួយអ្នកក្រ តែមិនសូវហ៊ានជាមួយអ្នកមានទេ។
នៅក្នុងពិធីសម្ពោធក្រុមប្រឹក្សាជាតិអភិវឌ្ឍន៍បៃតង (ក.ជ.អ.ប) និងអគ្គលេខាធិការដ្ឋាន (ក.ជ.អ.ប) ជាផ្លូវការ នាព្រឹកថ្ងៃទី១៩ ខែមីនា ឆ្នាំ២០១៣ នោះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសឲ្យដឹងពីផែនការរបស់សម្តេចក្នុងការដោះស្រាយផ្ទះសម្បែង ដីធ្លី ជូនប្រជាជន ៤៩គ្រួសារ នៅភូមិកែវផុស ដែលត្រូវបានបណ្តេញចេញដោយអំណាចតុលាការខេត្តព្រះសីហនុ។ ករណីនេះសម្តេចតេជោបានមានប្រសាសន៍ឲ្យដឹងថា សម្តេចនឹងតាមដានមិនឲ្យរបូតឡើយ ដោយសារតែមានភាពមិនប្រក្រតីមួយចំនួន ដូចជាការអនុវត្តសាលក្រម ខណៈពេលដែលរឿងក្តីនោះកំពុងស្ថិតនៅក្នុងដៃតុលាការនៅឡើយ។
សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា សម្តេចអនុវត្តនយោបាយគាំទ្រអ្នកក្រ ហើយអ្នកខូច សម្តេចមិនគាំទ្រទេ។ សម្តេចបញ្ជាក់ថា ”យប់ម្សិល (ថ្ងៃ១៨ ខែមីនា) នៅម៉ោង ១០យប់ជាង ខ្ញុំបាននិរាករណ៍ចោលនូវសេចក្តីជូនដំណឹងរបស់ទីស្តីការគណៈរដ្ឋមន្ត្រី មួយ ដែលពាក់ព័ន្ធជាមួយនឹងការបណ្តេញចេញនូវប្រជាជន ៤៩គ្រួសារ។ អំពើនេះមិនអាចអត់អោនឲ្យបានទេ។ ស្អីឧកញ៉ា ជៀប ផែន ថៅកែស្រាបៀរលីអូ និរាករណ៍ចោលភ្លាម ហើយឲ្យឯកឧត្តម ប៊ិន ឈិន (ឧបនាយករដ្ឋមន្ត្រី ប្រធានអាជ្ញាធរជាតិដោះស្រាយទំនាស់ដីធ្លី) ចុះដោះស្រាយនៅនឹងកន្លែងៗ”។
សម្តេចតេជោបានបញ្ជាក់ថា ក្រោយមកបានទាក់ទងទៅលោកឧកញ៉ា ម៉ុង ប្ញទ្ធី ឲ្យយកប្រជាពលរដ្ឋដែលគេឈូសផ្ទះនេះ យកទៅទុកនៅក្រុមហ៊ុនរបស់គាត់ ហើយបានបញ្ជាឲ្យមេអង្គរក្សដាក់ផ្ទះចល័តចំនួន ៣០ខ្នង ប៉ុន្តែលោកឧកញ៉ា ម៉ុង ប្ញទ្ធី បានប្រាប់វិញថា ផ្ទះរបស់លោកមានច្រើនណាស់មិនអីទេ ប្រជាពលរដ្ឋអាចរស់នៅបាន។
សម្តេចតេជោនាយករដ្ឋមន្ត្រីបានមានប្រសាសន៍ថា “លឺថារឿងនេះស្ថិតនៅដៃតុលាការនៅឡើយ ប៉ុន្តែហេតុអីបានមានសិទ្ធិទៅធ្វើបែបនេះ ខ្ញុំមិនអាចទទួលយកបានទេអាហ្នឹង មិនត្រឹមតែមិនអាចទទួលយកបាននោះទេ ប៉ុន្តែមិនអាចអត់អោនឲ្យបានទេចំពោះអ្នកប្រព្រឹត្ត ប៉ុន្តែសុំមិត្តភក្ដិបរទេសទាំងឡាយ ធ្វើការបែងចែកឲ្យបានច្បាស់លាស់រវាងអ្នករងគ្រោះពិត ប្រាកដ និងអ្នកដែលទៅបំពានគេ។ កុំភ្លេចថា ក្នុងចំណោមអ្នកល្អ ក៏មានអ្នកអាក្រក់ ក្នុងចំណោមអ្នកអាក្រក់ ក៏មានល្អ នៅក្នុងហ្នឹងដែរ ត្រូវគិតយ៉ា់ងដូច្នេះ។ ខ្ញុំអត់ខ្លាចធ្វើទេៗ សំណុំរឿងក្តីហ្នឹង ក្តីអយុត្តិធម៌បំផុតហ្មង។ សូម្បីតែជើងសិប្បនិមិត្តរបស់ជនពិការ ក៏គេឈូសលុបចោលដែរ។ ឥឡូវខ្ញុំធានាធ្វើផ្ទះឡើងវិញ ហើយចែកដីហ្នឹងឲ្យប្រជាជន ហើយរឿងនេះខ្ញុំអត់ឲ្យរបូតទេ។ ដោះស្រាយដីយកដីហ្នឹងឲ្យប្រជាជនរួចហើយធ្វើតាមផ្លូវតុលាការ រឿងអីរឿងនៅក្នុងដៃសាលាឧទ្ធរណ៍ បែរជាឯងទៅអនុវត្ត អ្នកណាឲ្យធ្វើៗ”។
សម្តេចតេជោនាយករដ្ឋមន្ត្រីក៏បានបញ្ចេញប្រតិកម្មផងដែរ លើករណីស្ត្រីអ្នកភូមិបឹងកក់ម្នាក់ ដែលត្រូវបានតុលាការផ្តន្ទាទោសដាក់ពន្ធនាគារ ៣ឆ្នាំ កាលពីខែធ្នូ ឆ្នាំ២០១២ ក្នុងបទចោទប្រកាន់បង្ករបួសស្នាមលើអ្នករត់ម៉ូតូឌុបពីរនាក់។ ករណីនេះសម្តេចតេជោបានចាត់ទុកថា ជាបទល្មើសវាយគេ តែបែរជាស្ត្រីនោះត្រូវគេបង្វែរជារឿងដីធ្លីទៅវិញ។
សម្តេចតេជោនាយករដ្ឋមន្ត្រីបានមានប្រសាសន៍ថា សំណុំរឿងក្តីនៅបឹងកក់នោះ មានភាពអយុត្តិធម៌ដល់រាជរដ្ឋាភិបាល។ ករណីស្ត្រីនៅបឹងកក់នោះ ជារឿងវាយគេសោះ បែរជាត្រូវគេប្រែក្លាយជារឿងជម្លោះដីធ្លីទៅវិញ។
សូមរម្លឹកថា ករណីស្ត្រីបឹងកក់ឈ្មោះ យ៉ោម បុប្ផា ត្រូវបានតុលាការសាលាដំបូងរាជធានីភ្នំពេញសម្រេចផ្តន្ទាទោស កាលពីព្រឹកថ្ងៃទី២៧ ខែធ្នូ ឆ្នាំ២០១២ ដាក់ពន្ធនាគារ ៣ ឆ្នាំ។ អ្នកស្រី យ៉ោម បុប្ផា ជាប់ចោទពីបទប្រើអំពើហិង្សាដោយចេតនា តាមរយៈការចូលរួមព្រួតគ្នាវាយលើបុរសអ្នករត់ម៉ូតូឌុបពីរនាក់ឲ្យ រងរបួស កាលពីដើមខែកញ្ញាឆ្នាំ២០១២។
ក៏ប៉ុន្តែសំណុំរឿងក្តីនោះ ត្រូវបានអង្គការសិទ្ធិមនុស្សជាតិ និងអន្តរជាតិ រួមទាំងស្ត្រីអ្នកភូមិបឹងកក់បានច្រានចោល ហើយថាអាជ្ញាធរបានចោទប្រកាន់ និងចាប់កាត់ទោសលើអ្នកស្រី យ៉ោម បុប្ផា ដោយសារតែអ្នកស្រីជាសកម្មជនតវ៉ាដីធ្លីដ៏សកម្មនៅតំបន់បឹងកក់។
យ៉ាងណាក៏ដោយ ក្នុងសំណុំរឿងអ្នកស្រី យ៉ោម បុប្ផា នៅបឹងកក់ ក៏មានក្រុមអ្នករត់ម៉ូតូឌុបមួយក្រុមបានធ្វើបាតុកម្មប្រឆាំងនឹងការអះអាងរបស់ក្រុមអ្នកភូមិបឹងកក់ ហើយថា ករណីស្ត្រីបឹងកក់អ្នកស្រី យ៉ោម បុប្ផា ជារឿងក្តីបង្ករបួសស្នាមលើអ្នករត់ម៉ូតូឌុប មិនត្រូវគេយកទៅពាក់ព័ន្ធនឹងករណីជម្លោះដីធ្លីនៅបឹងកក់ឡើយ៕
អត្ថបទៈ អង្គភាពព័ត៌មាន និងប្រតិកម្មរហ័ស