ប្រជាពលរដ្ឋចំនួន ៥៦៦ គ្រួសារ មកពីឃុំសោម ស្រុកគីរីវង់ ខេត្តតាកែវ បានទទួលប័ណ្ណកម្មសិទ្ធដីធ្លីពីរាជរដ្ឋាភិបាលនៅព្រឺកថ្ងៃទី២៤ ខែមីនា ឆ្នាំ២០១៣ ដែលផ្តល់ជូនដោយឯកឧត្តមឧបនាយករដ្ឋមន្រ្តី សុខ អានរដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ជាអធិបតី តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ។
ឯកឧត្តម ស្រី បេន អភិបាល នៃគណៈអភិបាលខេត្តតាកែវ បានមានប្រសាសន៏ថា នៅក្នុងខេត្តតាកែវបានអនុវត្តគោលនយោបាយចាស់សកម្មភាពថ្មី ដែលគ្របដណ្តប់លើឃុំចំនួន១៥ ក្នុងស្រុកគីរីវង់ និងស្រុកត្រាំកក់ ដោយមានការចូលរួមពីមន្រ្តីជំនាញបច្ចេកទេស ចំនួន ១១នាក់ និងវីរយុវជនស្ម័គ្រចិត្តសម្តេចតេជោចំនួន ៣៦នាក់។ ជាលទ្ធផល បើគិតមកត្រឹមថ្ងៃនេះ បានបំពេញសាលាកបត្រព័ត៌មានចំនួន ១២ ០២៥ ក្បាលដី និងបានបញ្ចូលសម្រង់បញ្ជីឈ្មោះម្ចាស់ដីបានចំនួន ៩ ៣៧៨ គ្រួសារ។
ឯកឧត្តម បានបន្តថា « កន្លងមក យើងបាន ចែកប័ណ្ណកម្មសិទ្ធិដីធ្លីចំនួន ៤ ៣៥១ ក្បាលដី ជូនប្រជាពលរដ្ឋចំនួន ២ ៥០៧ គ្រួសារក្នុងខេត្តតាកែវយើងនេះ» ហើយ បន្តិចទៀតនេះ ចែកប័ណ្ណកម្មសិទ្ធិដីធ្លីចំនួន ៨១៤ក្បាលដី នឹងត្រូវចែកជូនប្រជាពលរដ្ឋចំនួន ៥៦៦ គ្រួសារ នៅក្នុងឃុំសោម ស្រុកគីរីវង់ ខេត្តតាកែវ។
ឯកឧត្តមឧបនាយករដ្ឋមន្រ្តី សុខ អាន មានប្រសាសន៏ពាំនាំនូវការសួរសុខទុក្ខនិងសេចក្តីនឹករលឹករបស់សម្តេចតេជោ ហ៊ុន សែន នាយករដ្ឋមន្រ្តី និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះបងប្អូនប្រជាពលរដ្ឋនៅខេត្តតាកែវ ព្រមទាំងមន្រ្តីបច្ចេកទេស និងក្មួយៗវីរៈយុវជនស្ម័គ្រចិត្តទាំងអស់ និងបានកោតសរសើរចំពោះកិច្ចខិតខំប្រឹងប្រែង ឆន្ទៈដ៏មោះមុតរបស់វីរៈយុវជនស្ម័គ្រចិត្តសម្តេចតេជោ ដែលបានលះបង់កម្លាំងកាយ កម្លាំងចិត្ត និងពេលវេលាដ៏មានតម្លៃ ដើម្បីចុះវាស់វែងដីធ្លីជូនបងប្អូនប្រជាពលរដ្ឋ ដែលជាបេសកកម្មដ៏ឧត្តុង្គឧត្តម ក្នុងការរួមចំណែកដល់ការអនុវត្ត «គោលនយោបាយចាស់សកម្មភាពថ្មី» របស់រាជរដ្ឋាភិបាលនាពេលបច្ចុប្បន្ននេះ។ឯកឧត្តមឧបនាយករដ្ឋមន្រ្តីបន្តថាការចែកប័ណ្ណកម្មសិទ្ធិដីជូនប្រជាពលរដ្ឋនាពេលនេះ គឺឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុនសែន នាយករដ្ឋមន្រ្តី ក្នុងការធានាកម្មសិទ្ធិដីធ្លីស្របច្បាប់របស់ប្រជាពលរដ្ឋ សំដៅលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងយុត្តិធម៌និងស្ថិរភាពសង្គម។ ឯកឧត្តមឧបនាយករដ្ឋមន្ត្រី បានមានប្រសាសន៍ថា « ដូចដែលយើងបានដឹងហើយថា រាជរដ្ឋាភិបាលបាននិងកំពុងអនុវត្តគោលនយោបាយ និង យុទ្ធសាស្រ្តដ៏សមស្របនានា ដើម្បីអភិវឌ្ឍសមត្ថភាពរបស់ប្រជាកសិករ និងអភិវឌ្ឍវិស័យកសិកម្ម ដោយផ្តោតការយកចិត្តទុកដាក់ខ្ពស់ចំពោះការកសាងប្រព័ន្ធធារាសាស្រ្ត និងការផ្តល់សេវាគាំទ្រនានា ព្រមទាំងគោលនយោបាយអភិវឌ្ឍជនបទ សំដៅបង្កើតឱកាសឱ្យកាន់តែប្រសើរជូនប្រជាពលរដ្ឋក្នុងការបង្កើនចំណូល ប្រចាំគ្រួសារ។ឯកឧត្តមឧបនាយករដ្ឋមន្រ្តីបានរំលឺកពី របបប្រល័យពូជសាសន៍ ប៉ុល ពត ដែលបានលុបបំបាត់ទាំងស្រុងរាល់កម្មសិទ្ធិឯកជនទាំងអស់រួមទាំងកម្មសិទ្ធិដីធ្លីផងដែរ» ។ ទន្ទឹមនឹងការខិតខំទប់ស្កាត់ការវិលត្រឡប់មកវិញនៃរបបប្រល័យពូជសាសន៍ និងការកសាងប្រទេសជាតិពីបាតដៃទទេ រដ្ឋាភិបាលបានអនុវត្តនូវគោលនយោបាយផ្តល់របបដីជូនប្រជាពលរដ្ឋគ្រប់គ្រួសារសម្រាប់ប្រើប្រាស់ជាលំនៅដ្ឋាន និងការបង្កបង្កើនផល។ជាក់ស្តែង ចាប់តាំងពីពាក់កណ្តាលឆ្នាំ២០១២មក រាជរដ្ឋាភិបាលបានបើកយុទ្ធនាការចុះវាស់វែងដីធ្លីប្រមាណ ១លាន៨សែនហិកតា បើគិតជាក្បាលដីគឺប្រមាណ ៧០ ម៉ឺនក្បាលដី សម្រាប់ចែកជូនប្រជាពលរដ្ឋប្រមាណ៤៧ម៉ឺនគ្រួសារ ដោយមានការចូលរួមពីមន្រ្តីជំនាញបច្ចេកទេសវាស់វែងនិងក្រុមក្មួយៗ វីរៈ យុវជនស្ម័គ្រចិត្ត សរុបជាង ៣ ពាន់នាក់ផងដែរ។
ឆ្លៀតក្នុងឱកាសនេះ ឯកឧត្តមឧបនាយករដ្ឋមន្រ្តីបានអំពាវនាវដល់អាជ្ញាធរថ្នាក់ក្រោមជាតិ និងសមត្ថកិច្ចពាក់ព័ន្ធគ្រប់លំដាប់ថ្នាក់ រួមទាំងកងកម្លាំងប្រដាប់អាវុធ ត្រូវបន្តអនុវត្តតួនាទីនិងភារកិច្ចរបស់ខ្លួន ស្របតាមបញ្ញត្តិនៃច្បាប់ និងលិខិតបទដ្ឋានគតិយុត្តជាធរមាន ដើម្បីធានាការគ្រប់គ្រងដីធ្លីឱ្យកាន់តែមានប្រសិទ្ធភាពខ្ពស់ថែមទៀត។ឯកឧត្តមឧបនាយករដ្ឋមន្រ្តីបានបញ្ជាក់ថា ការចូលទន្រ្ទានចាប់យកដីរដ្ឋ និងការបោះបង្គោលលើដីរដ្ឋ គឺជាសកម្មភាពខុសច្បាប់ និងត្រូវហាមឃាត់ជាដាច់ខាត ហើយរាល់ជនល្មើសនឹងត្រូវផ្តន្ទាទោសតាមច្បាប់ជាធរមាន៕
អត្ថបទ៖ លោក នាង សូរីដា