ឯកឧត្តម យូជី គូម៉ាម៉ារុ (yuji KUMAMARU) ឯកអគ្គរាជទូតថ្មីរបស់ប្រទេសជប៉ុនប្រចាំនៅកម្ពុជាបានមានប្រសាសន៍នាថ្ងៃទី៧ ខែឧសភា ឆ្នាំ២០១៣ថា ជប៉ុនចាត់ទុកកម្ពុជាជាប្រទេសសំខាន់ ហើយកន្លងមកជប៉ុនតែងតែគាំទ្រកម្ពុជា និងបន្តគាំទ្រកម្ពុជាឆ្ពោះទៅកាន់ការអភិវឌ្ឍតទៅទៀត។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា នៅក្នុងជំនួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅវិមានសន្តិភាព ឯកឧត្តម yuji KUMAMARU មានប្រសាសន៍ថា បន្ទាប់ពីព្រះរាជាណាចក្រកម្ពុជា បានទទួលសុខសន្តិភាពមក កម្ពុជាបានបោះជំហានឈានឆ្ពោះទៅកាន់ការអភិវឌ្ឍនៅកម្រិតថ្មីមួយ ដែលនេះ គឺជាការដឹកនាំដ៏ឈ្លាសវៃរបស់សម្ដេចតេជោនាយករដ្ឋមន្ត្រី ហើយការអភិវឌ្ឍរីកចំរើននេះ គឺបានឆ្លុះបញ្ចាំងលើភាពជាអ្នកដឹកនាំរបស់សម្ដេចតេជោផងដែរ។
ឯកឧត្តម yuji KUMAMARU បានមានប្រសាសន៍ដោយសង្ឃឹមជឿជាក់ថា ទំនាក់ទំនងរវាងកម្ពុជា និងជប៉ុន កាន់តែជិតស្និទ្ធថែមទៀត ដោយកន្លងមកទំនាក់ទំនាងរវាងកម្ពុជា និងជប៉ុន គឺបានអភិវឌ្ឍឡើងតាមរយៈកិច្ចសហប្រតិបត្តិការរវាងរដ្ឋាភិបាល និងរដ្ឋាភិបាល ប៉ុន្តែឥឡូវនេះវិស័យឯកជន គឺមានសារៈសំខាន់ណាស់សម្រាប់ប្រទេសទាំងពីរ។
ឯកឧត្តម yuji KUMAMARU បានថ្លែងអំណរគុណចំពោះសម្ដេចតេជោនាយករដ្ឋមន្ត្រី ដែលកន្លងមកតែងតែទទួលស្វាគមន៍យ៉ាងកក់ក្ដៅចំពោះអ្នកវិនិយោគជប៉ុន មកកាន់ព្រះរាជាណាចក្រកម្ពុជា ហើយបានស្នើឲ្យសម្ដេចតេជោគាំទ្រដល់អ្នកវិនិយោគជប៉ុន ដែលមកកាន់កម្ពុជាបន្តទៀត។
សម្ដេចតេជោនាយករដ្ឋមន្ត្រីបានថ្លែងអំណរគុណចំពោះរាជរដ្ឋាភិបាល និងប្រជាជនជប៉ុន ដែលបានជួយដល់កម្ពុជាដល់ការស្វែងរកសន្តិភាព និងការកសាងកម្ពុជាឡើងវិញ។ សម្តេចតេជោមានប្រសាសន៍ថា អ្វីដែលបានកើតឡើងនៅក្នុងព្រះរាជាណាចក្រកម្ពុជា គឺមិនអាចកាត់ផ្ដាច់ពីជំនួយ និងតួនាទីរបស់ជប៉ុនបានទេ។ សម្ដេចក៏បានយល់ស្របជាមួយឯកឧត្តមឯកអគ្គរាជទូតចំពោះសារសំខាន់នៃតួនាទីរបស់វិស័យឯកជន ដោយសម្ដេចមានប្រសាសន៍ថា សម្តេចតែងតែឆ្លៀតឱកាសជួបអ្នកវិនិយោគជប៉ុន ដែលមកកាន់កម្ពុជា ទោះក្នុងលក្ខណៈជាក្រុមក្ដី ជាឯកជនក្ដី ដែលការនេះជាការស្វាគមន៍អ្នកវិនិយោគជប៉ុនមកកាន់កម្ពុជា។
សម្តេចតេជោក៏បានស្នើឲ្យឯកឧត្តម yuji KUMAMARU ធ្វើយ៉ាងណាជំរុញឲ្យមានការហោះហើរ ផ្ទាល់ពីជប៉ុនមកកាន់កម្ពុជា ក្នុងអាណត្តិដែលលោកបំពេញបេសកកម្មការទូតនៅកម្ពុជា៕