លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបាន ព្រះករុណា ព្រះមហាក្សត្រ សម្តេចព្រះ នរោត្តម សីហមុនី បានប្រថាប់ព្រះរាជលញ្ឆករ ធ្វើនៅព្រះបរមរាជវាំង លើព្រះរាជក្រឹត្យ ចុះថ្ងៃទី៨ ខែឧសភា ឆ្នាំ២០១៣ ដោយប្រោសព្រះរាជទានគោរមងារ ជាសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន។
គោរមងារនេះត្រូវបានប្រកាសជាសាធារណៈ ដោយសម្តេចជហ្វាវាំង គង់ សំអុល ឧបនាយករដ្ឋមន្ត្រី ជូនដល់លោកជំទាវកិត្តិព្រឹទ្ធបណ្ឌិត ប៊ុន រ៉ានី នាព្រឹកថ្ងៃទី៨ ខែឧសភា ឆ្នាំ២០១៣ នៅទីស្នាក់ការកាកបាទក្រហមកម្ពុជា ក្នុងរាជធានីភ្នំពេញ នាឱកាសប្រារព្ធខួប លើកទី១៥០ ទិវាកាកបាទក្រហម អឌ្ឍចន្ទក្រហម ៨ ឧសភា ដែលក្នុងឱកាសនោះសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ទទួលបានថវិកាឧបត្ថម្ភពីសប្បុរសជនចំនួន ១៤ ៩២៦ ៧១០ ដុល្លារសហរដ្ឋអាមេរិក។
សម្តេចអគ្គមហាសេនាបតី តេជោ ហ៊ុន សែន ដែលអញ្ជើញចូលរួមជាអធិបតីក្នុង ពិធីនោះបានមានប្រសាសន៍ចាត់ទុក វិភាគទានរបស់ សប្បុរសជននៅពេលនេះ គឺបង្ហាញពីការរួមចំណែកដ៏ធំធេងដល់ការបន្ដពូនផ្ដុំកម្លាំងមនុស្សធម៌ និងសាមគ្គីធម៌ ដែលជាចរិតមួយស្ដែងចេញឱ្យឃើញនូវ «វប្បធម៌ចែករំលែក» ក្នុងការជួយគ្នាទៅវិញទៅមកនៅគ្រប់ពេលវេលា និងគ្រប់ទីកន្លែងក្នុងគ្រាមានអាសន្ន។ សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំសូមស្ងើចសរសើរ និងវាយតម្លៃខ្ពស់ចំពោះសប្បុរសជនទាំងអស់ ដែលតែងបានចូលរួមឧបត្ថម្ភក្នុងឱកាសនៃការរម្លឹកដល់ទិវាជាប្រវត្ដិ នៃការកើតមានចលនាកាកបាទក្រហម អឌ្ឍចន្ទក្រហម ៨ ឧសភាដ៏អធិកអធមនេះ ព្រោះកាយវិការប្រកបដោយអត្ថន័យដ៏ជ្រាលជ្រៅនេះ និងកិច្ចគាំទ្រទាំងអស់នេះ នឹងជំរុញឱ្យសមាជិកអ្នកស្ម័គ្រចិត្ដយុវជនកាកបាទក្រហមកម្ពុជាយើងកាន់តែមានកម្លាំងចិត្ដ និងស្មារតីទ្វេឡើងថែមទៀត ក្នុងការបន្ដបំពេញតួនាទី និងភារកិច្ចរបស់ខ្លួនឱ្យកាន់តែសកម្មខ្លាំងក្លា កាន់តែមានវិសាលភាពទូលំទូលាយចំពោះកិច្ចការមនុស្សធម៌ ក្នុងបុព្វហេតុជួយសម្រាលនូវទុក្ខលំបាកជនងាយរងគ្រោះ និងជនរងគ្រោះនៅគ្រប់ទីកន្លែង។ សម្តេចតេជោមានប្រសាសន៍ថា វិភាគទានដ៏ថ្លៃថ្លាទាំងអស់ ជានិច្ចកាលតែងបានផ្ដល់សម្រាប់ការងារជួយសង្គ្រោះ ការគាំទ្រសកម្មភាពមនុស្សធម៌ ដើម្បីផ្ដល់នូវក្ដីសង្ឃឹម និងភាពកក់ក្ដៅដល់គ្រួសារងាយរងគ្រោះទាំងឡាយ ពិសេសជនចាស់ជរា ជនគ្មានទីពឹង ស្ដ្រីមេម៉ាយ កុមារកំព្រា អ្នករស់នៅជាមួយមេរោគអេដស៍-ជំងឺអេដស៍ជាដើម។
សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំជឿជាក់ថាកាកបាទក្រហមកម្ពុជា ដែលជា អង្គការសមាគមជាតិមួយនាំមុខគេក្នុងវិស័យមនុស្សធម៌ ក្រោមការដឹកនាំរបស់សម្ដេចកិត្ដិព្រឹទ្ធបណ្ឌិតប្រធាន ប្រកបដោយការទទួលខុសត្រូវខ្ពស់មានសមត្ថភាពក្នុងការចាត់ចែង គ្រប់គ្រង និងប្រើប្រាស់ធនធានហិរញ្ញវត្ថុប្រកបដោយតម្លាភាពនោះ នឹងបន្ដពង្រឹងតួនាទីរបស់ខ្លួនបន្ថែមទៀត ក្នុងនាមជាជំនួយការដ៏សំខាន់ឱ្យរាជរដ្ឋាភិបាលលើការងារមនុស្សធម៌នេះ ដើម្បីរួមចំណែកជួយសម្រាលទុក្ខលំបាកទាំងឡាយថ្មីៗទៀត សម្រាប់ជាឧត្ដមប្រយោជន៍ជាតិ និង ប្រជាជនរបស់យើង។ ខ្ញុំក៏ជឿជាក់ថា កាកបាទក្រហមកម្ពុជានឹងទទួលបាននូវការគាំទ្របន្ថែមទៀតពីស្ថាប័ន ជាតិ-អន្ដរជាតិ ដៃគូអភិវឌ្ឍន៍ សប្បុរសជនជាតិ-អន្ដរជាតិ ទាំងក្នុង និងក្រៅប្រទេសក៏ដូចជាប្រជាជនកម្ពុជានៅទូទាំងប្រទេសតទៅ ថ្ងៃមុខទៀតផងដែរ។
សម្តេចតេជោនាយករដ្ឋមន្ត្រី បានលើកឡើងនូវអនុសាសន៍មួយចំនួនដល់កាកបាទក្រហមកម្ពុជា ក៏ដូចជាក្រសួងស្ថាប័នពាក់ព័ន្ធទាំងអស់ ដើម្បីបន្ដសហការរួមគ្នាលើកកម្ពស់ការងារមនុស្សធម៌ដែលក្នុងនោះរួមមាន៖
ទី១.កាកបាទក្រហមកម្ពុជា និងគណៈកម្មាធិការជាតិគ្រប់គ្រងគ្រោះមហន្ដរាយ ត្រូវរួមសហ ការគ្នាឱ្យបានល្អជាមួយក្រសួង-ស្ថាប័ន អង្គភាព មន្ទីររដ្ឋបាលពាក់ព័ន្ធថ្នាក់ក្រោមជាតិ និងដៃគូអភិវឌ្ឍន៍នានា ដើម្បីត្រៀមលក្ខណៈក្នុងការឆ្លើយតបជាបន្ទាន់ទៅនឹងសេចក្ដីត្រូវការបន្ទាន់របស់ប្រជាជនយើង នៅពេលដែលគ្រោះមហន្ដរាយធម្មជាតិ និងគ្រោះថ្នាក់ដោយប្រការផ្សេងៗកើតមានឡើងជាយថាហេតុនោះ។
ទី២.ក្រសួងធនធានទឹក និងឧតុនិយម ត្រូវផ្ដល់សេចក្ដីជូនដំណឹងអំពីការប្រែប្រួលអាកាសធាតុ ដែលជាហេតុបង្កឱ្យមានខ្យល់ព្យុះ រន្ទះបាញ់ គ្រោះទឹកជំនន់ គ្រោះរាំងស្ងួតដែលនឹងកើតឡើង ដើម្បីឱ្យកាកបាទក្រហមកម្ពុជា និងគណៈកម្មាធិការជាតិគ្រប់គ្រងគ្រោះមហន្ដរាយ ក៏ដូចជាក្រសួង-ស្ថាប័នពាក់ព័ន្ធដទៃ ទៀតអាចប៉ាន់ស្មានទុកជាមុនក្នុងការត្រៀមលក្ខណៈជួយសង្គ្រោះឱ្យបានទាន់ពេលវេលា។
ទី៣.កាកបាទក្រហមកម្ពុជា ត្រូវបន្ដពង្រឹង និងពង្រីកកម្លាំងយុវជន និងអ្នកស្ម័គ្រចិត្ដឱ្យបាន ច្រើនថែមទៀត និងត្រូវបង្កើនការបណ្ដុះបណ្ដាលផ្នែកចំណេះដឹង និងជំនាញផ្សេងៗដល់ពួកគេក្នុងការត្រៀមធ្វើជាកម្លាំងឈានមុខ និងធ្វើជាធនធានដ៏រឹងមាំប្រកបដោយសមត្ថភាពគ្រប់គ្រាន់ក្នុងការចូលរួមចំណែកបម្រើសកម្មភាពមនុស្សធម៌ ជាមួយកាកបាទក្រហមកម្ពុជា ស្របតាមពាក្យស្លោកលើកថា «យុវជន និងអ្នកស្ម័គ្រចិត្ដ គឺជាឆ្អឹងខ្នងរបស់ចលនាកាកបាទក្រហម អឌ្ឍចន្ទក្រហម»។ ក្នុងការអនុវត្ដនូវស្មារតីនេះ យើងនឹងអាចឆ្លើយតបទៅនឹងការពង្រឹងសហគមន៍ឱ្យធន់ទៅនឹងគ្រោះមហន្ដរាយ លើកកម្ពស់សេវាសុខភាពជូនប្រជាជននៅជនបទ និងកសាងវប្បធម៌អហិង្សា និងសន្ដិភាព ដែលនេះជាលក្ខណៈពិសេសរបស់យុវជន ដែលបានធ្វើឱ្យយុវជននៅគ្រប់សម័យកាលក្លាយជាកម្លាំងដ៏ស្រួចស្រាវ ជាធនធានដ៏មានតម្លៃមិនចេះរីងស្ងួត និងមិនអាចខ្វះបានឡើយក្នុងចលនាមនុស្សធម៌របស់កាកបាទក្រហម អឌ្ឍច័ន្ទក្រហមនោះ។ ចំពោះមុខនេះ ខ្ញុំសូមស្នើដល់កាកបាទក្រហមកម្ពុជា ត្រូវបន្ដពង្រឹង និងយកចិត្ដទុកដាក់ទប់ស្កាត់ការរីករាលដាលមេរោគអេដស៍ទៅតាមយុទ្ធសាស្ដ្រ សូន្យបី គឺ សូន្យ-ការមិនចម្លងពីម្ដាយទៅកូន សូន្យ-ការស្លាប់ដោយមេរោគអេដស៍ សូន្យ-ការ មិនរើសអើង។ ក្នុងនោះ ត្រូវបន្ដកៀរគរវិស័យឯកជន និងសប្បុរសជននានាឱ្យចូលរួមឧបត្ថម្ភគាំទ្រកាន់តែច្រើនឡើងថែមទៀត ដើម្បីបន្ដពង្រីកលទ្ធភាពនៃការអនុវត្ដការងារមនុស្សធម៌របស់ខ្លួន។
ទី៤.ក្រសួងមហាផ្ទៃ ជាពិសេសអង្គភាពរថយន្ដពន្លត់អគ្គិភ័យត្រូវប្រុងប្រៀប និងត្រៀម លក្ខណៈជានិច្ច ក្នុងការជួយសង្គ្រោះដល់ប្រជាជន នៅពេលមានគ្រោះអគ្គិភ័យកើតឡើង។ ទន្ទឹមនេះយើងត្រូវរួមគ្នាអនុវត្ដទិសស្លោក «ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍កើតឡើងជាដាច់ខាត» ផងដែរ។
ទី៥.យុវជន និងអ្នកស្ម័គ្រចិត្ដកាកបាទក្រហមកម្ពុជា តាមរយៈចលនាមិត្ដអប់រំមិត្ដដ៏សកម្មផុលផុសនោះ ត្រូវរួមគ្នាជួយទប់ស្កាត់នូវការផលិត ការចែកចាយ ការប្រើប្រាស់គ្រឿងញៀន ការរំលោភ ការជួញដូរស្ដ្រី និងកុមារ និងអំពើហិង្សានានា ដែលជាបញ្ហាសង្គម និងការធ្វើឱ្យបាត់បង់សេចក្ដីថ្លៃថ្នូររបស់មនុស្សជាតិ។ ទន្ទឹមនេះ អាជ្ញាធរដែនដីត្រូវបន្ដពង្រឹងការអនុវត្ដភូមិ-ឃុំមានសុវត្ថិភាព ធ្វើឱ្យបានសកម្មក្នុងការលុបបំបាត់គ្រឿងញៀន ល្បែងស៊ីសង ក្រុមក្មេងទំនើង ដែលជាទង្វើនាំឱ្យកើតមានអំពើហិង្សាក្នុងគ្រួសារ ដែលនាំមកនូវភាពក្រីក្រ បាត់បង់សេចក្ដីថ្លៃថ្នូររបស់មនុស្ស និងអំពើអសីលធម៌ ហើយកិច្ចការនេះ គឺជាការរួមចំណែកដល់ការងារមនុស្សធម៌ផងដែរ។
សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំសង្ឃឹម និងជឿជាក់យ៉ាងមុតមាំថា ក្រសួង-ស្ថាប័ន អង្គភាព មន្ទីរ និងរដ្ឋបាលថ្នាក់ក្រោមជាតិដែលមានភារកិច្ចពាក់ព័ន្ធទាំងអស់នឹង នាំគ្នាបន្ដពង្រឹង និងពង្រីកនូវតួនាទី និងភារកិច្ចរបស់ខ្លួនបន្ថែមទៀត ដោយឈរលើស្មារតីនៃការយកចិត្ដទុកដាក់ និងការទទួលខុសត្រូវខ្ពស់ ដើម្បីប្រសិទ្ធភាពការងារ និងបុព្វហេតុមនុស្សធម៌។ តាមរយៈនេះ ខ្ញុំក៏ជឿជាក់ថា កាកបាទក្រហមកម្ពុជានឹងបន្ដតួនាទីដ៏សកម្មរបស់ខ្លួន ត្រៀមខ្លួនជាស្រេចសម្រាប់ទប់ទល់រាល់បញ្ហា ប្រឈមនានាសម្រាប់បានជាឧត្ដមប្រយោជន៍ជាតិ និងប្រជាជន ព្រមទាំងការលើកកម្ពស់សេចក្ដីថ្លៃថ្នូរ គុណធម៌ តម្លៃមនុស្សជាតិ និងការចូលរួមចំណែកដល់ការកាត់បន្ថយភាពក្រីក្ររបស់ប្រជាជនយើង។ ខ្ញុំសូមថ្លែងអំណរគុណ និងការកោតសរសើរដោយស្មោះជូនចំពោះថ្នាក់ដឹកនាំ មន្ដ្រី បុគ្គលិក អ្នកស្ម័គ្រចិត្ដ និងយុវជនកាកបាទក្រហមកម្ពុជា ព្រមទាំងក្រសួង-ស្ថាប័ន ពាក់ព័ន្ធទាំងអស់ ដែលជានិច្ចកាលតែងបានខិតខំប្រឹងប្រែងអស់ពីកម្លាំងកាយចិត្ដ ក្នុងការបំពេញតួនាទី និងភារកិច្ចរបស់ខ្លួនឱ្យទទួលបាននូវជោគជ័យ និងសមិទ្ធផលដ៏ធំធេង ដើម្បីឆ្លើយតបបានយ៉ាងស័ក្ដិសម និងទាន់ពេលវេលាទៅនឹងតម្រូវការជាបន្ទាន់នៃការងារជួយសង្គ្រោះជនរងគ្រោះ ដោយសារគ្រោះមហន្ដរាយនានា ដែលកន្លងមកទទួលបានការផ្ដល់ទំនុកចិត្ដពីប្រជាជន និង ជាពិសេសជនរងគ្រោះ។
សម្តេចតេជោថ្លែងថា ខ្ញុំសង្ឃឹម និងជឿជាក់យ៉ាងមុតមាំថា យើងទាំងអស់គ្នានឹងពួតដៃគ្នាបន្ដ អនុវត្ដនូវសកម្មភាពដ៏ល្អថ្លៃថ្លានេះ ទៅតាមតួនាទី និងភារកិច្ចរបស់ខ្លួន និងបន្ដប្រកាន់ខ្ជាប់នូវស្មារតីទទួលខុសត្រូវខ្ពស់ក្នុងការអភិវឌ្ឍស្ថាប័ន និងធនធាន ដើម្បីធានាឱ្យបាននូវភាពគ្រប់គ្រាន់ និងស្ថេរភាពហិរញ្ញវត្ថុរបស់កាកបាទក្រហមកម្ពុជាឈានទៅកសាងបាននូវសង្គមមួយដែលគោរពដល់គោលការណ៍គ្រឹះ និងតម្លៃមនុស្សធម៌មានការរស់នៅប្រកបដោយសុខុមាលភាព សេចក្ដីថ្លៃថ្នូរ និងសេចក្ដី សុខក្សេមក្សាន្ដ ក្នុងនាមជាមនុស្សជាតិនៅលើភពផែនដីនោះ។
សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាថ្លែងថា ថ្ងៃនេះកាក បាទក្រហមកម្ពុជាបានប្រារព្ធមិទ្ទិញលើកទី ១៥០ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ ២០១៣ ក្រោមប្រធានបទ ១៥០ ឆ្នាំនៃសកម្មភាពមនុស្សធម៌។ការយកប្រធានបទ ១៥០ ឆ្នាំនៃសកម្មភាពមនុស្សធម៌នេះ គឺដើម្បីបង្ហាញប្រាប់សកលលោកទាំងមូលឲ្យបានដឹងថា ក្នុងអំឡុងពេល ១៥០ឆ្នាំ កន្លងមកនេះ កម្លាំងអ្នកស្ម័គ្រចិត្តរាប់រយលាននាក់នៅក្នុងចលនាកាកបាទក្រហម អឌ្ឍចន្ទក្រហម បានផ្ដល់នូវសេវាកម្មមនុស្សធម៌យ៉ាងច្រើនឥតគណនា ដើម្បីជួយដល់អ្នករងគ្រោះ និងសហគមន៍រងគ្រោះទាំងឡាយនៅជុំវិញពិភពលោកបានយ៉ាងទាន់ពេលវេលា និងមានប្រសិទ្ធភាព ហើយយើងទាំងអស់គ្នាប្ដេជ្ញាចិត្តនឹងបន្តនូវបេសកកម្មមនុស្សធម៌ដ៏ឧ ត្ដុងឧត្ដមរបស់ខ្លួន ឆ្លើយតបទៅ នឹងសេចក្ដីត្រូវការជាក់ស្ដែងទាំងនៅពេលបច្ចុប្បន្ន និងទៅអនាគត។
សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានមានប្រសាសន៍ឲ្យដឹងថា ក្នុងឆ្នាំ២០១២ កន្លងទៅថ្មីៗនេះ ដោយមានកិច្ចសហប្រតិបត្តិការល្អជាមួយដៃគូ ជាពិសេសជាមួយរាជរដ្ឋាភិបាល និងមានការចូលរួមផ្ទាល់ពីកម្លាំងយុវជន និងអ្នកស្ម័គ្រចិត្ដកាកបាទក្រហមកម្ពុជានៅទូទាំងប្រទេស កាកបាទក្រហមកម្ពុជាបានអនុវត្ដការងារជួយសង្គ្រោះដល់ជនរងគ្រោះ និងក្រុមគ្រួសារពីគ្រោះមហន្ដរាយនានាដូចជាគ្រោះខ្យល់ព្យុះ គ្រោះរាំងស្ងួត គ្រោះទឹកជំនន់ និងគ្រោះមហន្ដរាយដោយប្រការផ្សេងៗបានសរុបចំនួន ២៨ ៤៥៨ គ្រួសារ។ នៅដើមឆ្នាំ ២០១៣ នេះព្រះរាជាណាចក្រកម្ពុជាបានជួបនូវគ្រោះធម្មជាតិអាក្រក់ ដោយបានទទួលរងនូវផលប៉ះពាល់ពីបាតុភូតខ្យល់កន្ដ្រាក់ធ្វើឱ្យផ្ទះចំនួន ២៧១៤ ខ្នង ត្រូវខូចខាត ដែលនៅក្នុងនោះផ្ទះរលំទាំងស្រុងមានចំនួន ៥៦៦ ខ្នង ផ្ទះខូចខាតដោយអន្លើមានចំនួន ២១៤៨ ខ្នង មានមនុស្សស្លាប់ ១២នាក់ និងរបួស ២៦នាក់។ ក្នុងប្រតិបត្ដិការជួយសង្គ្រោះ កាកបាទក្រហមកម្ពុជាបានផ្ដល់អំណោយសង្គ្រោះបន្ទាន់ជូនដល់គ្រួសាររងគ្រោះ ក៏ដូចជាជនរងគ្រោះមានដូចជា សម្ភារៈប្រើប្រាស់ ស្បៀងអាហារ ថ្នាំសង្កូវ និងគ្រឿងឧបភោគបរិភោគ ដែលជំនួយឧបត្ថម្ភទាំងអស់នេះតែងបានបំពេញតាមតម្រូវការជាក់ស្ដែង៕