ក្នុងឱកាសចូលជួបសំដែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាព នាព្រឹកថ្ងៃទី៧ ខែឧសភា ឆ្នាំ២០១៣ ឯកឧត្តម SERGE MOSTURA ឯកអគ្គរដ្ឋទូតថ្មីរបស់សធារណរដ្ឋបារាំងប្រចាំកម្ពុជា បានមានប្រសាសន៍ថា បេសកកម្មការទូតរបស់លោកនៅកម្ពុជាមានគោលដៅចំបង គឺពង្រឹងទំនាក់ទំនងរវាងរាជរដ្ឋាភិបាល និងរដ្ឋាភិបាល ប្រជាជន និងប្រជាជន និងពង្រឹងកិច្ចសហប្រតិបត្តិការជាចំបងលើការអភិវឌ្ឍន៍សេដ្ឋកិច្ចផងដែរ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា ឯកឧត្តម SERGE MOSTURA មានប្រសាសន៍ថា សេដ្ឋកិច្ចការទូតជាកត្តាសំខាន់ ហើយលោកមានទស្សនៈថា នឹងប្រឹងប្រែងធ្វើយ៉ាងណាឲ្យក្រុមហ៊ុនធុនតូច និងមធ្យមរបស់បារាំង ចូលមកវិនិយោគនៅកម្ពុជា និងទទួលបានជោគជ័យ ដើម្បីជាការទាក់ទាញអ្នកវិនិយោគដទៃទៀត។
ឯកឧត្តម SERGE MOSTURA មានប្រសាសន៍ឲ្យដឹងថា កន្លងមកអ្នកវិនិយោគធុនតូច និងមធ្យមរបស់បារាំង បានមកកាន់កម្ពុជាត្រឹមតែមកធ្វើទស្សនកិច្ច និងសិក្សាតែប៉ុណ្ណោះ ប៉ុន្តែមិនទាន់មានការវិនិយោគជាក់លាក់ណាមួយនៅឡើយទេ ដូច្នោះហើយទើបលោកមានទស្សនៈចង់ទាក់ទាញអ្នកវិនិយោគធុនតូច និងមធ្យមបារាំងមករកស៊ីនៅកម្ពុជា។
សម្តេចតេជោនាយករដ្ឋមន្ត្រី បានឯកភាពជាមួយឯកឧត្តម SERGE MOSTURA ឯកអគ្គរដ្ឋទូតបារាំង ពាក់ពន្ធ័នឹងបញ្ហាសេដ្ឋកិច្ចការទូតដែលលោកបានលើកឡើង និងបានសំដែងនូវការអបអរសាទរចំពោះឯកឧត្តម SERGE MOSTURA ដែលត្រូវបានតែងតាំងជាអគ្គរដ្ឋទូតថ្មីរបស់សាធារណរដ្ឋបារាំងប្រចាំនៅកម្ពុជា។
សម្តេចតេជោមានប្រសាសន៍ថា កម្ពុជាតែងតែស្វាគមន៍នូវរាល់អ្នកវិនិយោគទាំងឡាយ ដែលបានមកវិនិយោគនៅកម្ពុជា ដោយគ្មានភាពរើសអើងឡើយ។ ពាក់ពន្ធ័នឹងសេដ្ឋកិច្ចការទូតនេះ សម្តេចតេជោនាយករដ្ឋមន្ត្រីបានផ្តល់ជាអនុសាសន៍ថា គប្បីយកចិត្តទុកដាក់ទៅលើបញ្ហាសេដ្ឋកិច្ច ពាណិជ្ជកម្ម និងបញ្ហាវិនិយោគដែលជាកត្តាជំរុញ និងពង្រីកពង្រឹងទំនាក់ទំនងរវាងប្រទេសទាំងពីរនោះ៕