សម្តេចអគ្គមហាសេនាបតីតេជោ ហ៊ុន សែន នៅថ្ងៃទី២ ខែកញ្ញា ឆ្នាំ២០១៣ បានជួបពិភាក្សាជាមួយ ឯកឧត្តម ង្វៀន តាំងយ៉ុង នាយករដ្ឋមន្ត្រីនៃសាធារណរដ្ឋសង្គមនិយមវៀតណាម។ ក្នុងជំនួបពិភាក្សាដែលប្រព្រឹត្តទៅនៅទីក្រុងណាន់នីង សាធារណដ្ឋានប្រជាមានិតចិន នោះ ប្រមុខរដ្ឋាភិបាលនៃប្រទេសទាំងពីរ បានវាយតំលៃខ្ពស់ និងកោតសរសើរចំពោះទំនាក់ទំនងកិច្ចសហប្រតិបត្តិការនៃប្រទេសទាំងពីរ (កម្ពុជា-វៀតណាម) ពិសេសគឺការសន្យាធ្វើឲ្យមានការផ្លាស់ប្ដូរនូវកិច្ចសហប្រតិបត្តិការទ្វេភាគី ពហុភាគីក៏ដូចជា ក្នុងក្របខណ្ឌអាស៊ាន ដែលភាគីទាំងពីរនឹងជួបប្រជុំគ្នាបន្ថែមទៀត នៅក្នុងឱកាសនៃកិច្ចប្រជុំកំពូលអាស៊ាន នៅចុងខែតុលា ឆ្នាំ២០១៣ នៅប្រទេសព្រុយណេ។
ការផ្សាយរបស់ទូរទស្សន៍ជាតិកម្ពុជាឲ្យដឹងថា នៅក្នុងជំនួបពិភាក្សាគ្នាក្នុងឱកាសដែលប្រមុខរដ្ឋាភិបាលប្រទេសទាំងពីរអញ្ជើញទៅចូលរួមនៅក្នុងពិធីបើកពិព័រណ៍អាស៊ាន-ចិនលើកទី ១០ និងកិច្ចប្រជុំកំពូលធុរកិច្ច និងវិនិយោគអាស៊ាន-ចិន លើកទី១០ នៅទីក្រុងណាន់នីង សាធារណរដ្ឋប្រជាមានិតចិន ឯកឧត្តម ង្វៀន តាំងយ៉ុង នាយករដ្ឋមន្ត្រីវៀតណាម បានសំដែងនូវការគាំទ្រ និងចូលរួមអបអរសាទរចំពោះជ័យជម្នះរបស់គណបក្សប្រជាជនកម្ពុជា ក្នុងការបោះឆ្នោតសកលកាលពីពេលថ្មីៗកន្លងទៅនេះ។ ឯកឧត្តមនាយករដ្ឋមន្ត្រីវៀតណាម មានសេចក្តីសង្ឃឹមយ៉ាងមុតមាំថា រាជរដ្ឋាភិបាលកម្ពុជាអាណត្តិទី៥ ដែលដឹកនាំដោយសម្តេចតេជោនាយករដ្ឋមន្ត្រី នឹងធ្វើឲ្យប្រទេសកម្ពុជាកាន់តែទទួលបាននូវការអភិវឌ្ឍន៍រីកចម្រើនទ្វេឡើងថែមទៀតជាមិនខានឡើយ ហើយការរីកចម្រើនរបស់កម្ពុជា ក៏ដូចជាការរីកចម្រើនរបស់បណ្តាប្រទេសក្នុងតំបន់ទាំងមូលផងដែរ។
សម្តេចតេជោនាយករដ្ឋមន្ត្រីបានសំដែងនូវការអបអរសាទរជូនចំពោះថ្នាក់ដឹកនាំ និងប្រជាជនវៀតណាម ដែលតែងតែគាំទ្រជានិច្ចចំពោះកម្ពុជា ពិសេសការជំរុញនូវអ្នកវិនិយោគទុនជាច្រើនមកបណ្តាក់ទុននៅកម្ពុជានោះ៕