សម្តេចអគ្គមហាសេនាបតីតេជោ ហ៊ុន សែន បានធ្វើមាតុភូមិនិវត្តន៍ដោយសុវត្ថិភាពនៅវេលា ម៉ោង ៣ និង ១៥ នាទីរសៀលថ្ងៃទី៣ ខែកញ្ញា ឆ្នាំ២០១៣ បន្ទាប់ពីបានអញ្ជើញទៅចូលរួមនិងថ្លែងសន្ទរកថាចាប់អារម្មណ៍ក្នុងពិធីបើកពិព័រណ៍អាស៊ាន-ចិនលើកទី១០ និងកិច្ចប្រជុំកំពូលធុរកិច្ចវិនិយោគអាស៊ាន-ចិនលើកទី១០ នៅទីក្រុងណាន់នីង តំបន់ស្វយ័តក្វាងស៊ី សាធារណរដ្ឋប្រជាមានិតចិន នាព្រឹកថ្ងៃទី៣ ខែកញ្ញា ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍វាយតម្លៃថា ការធ្វើឲ្យកាន់តែស៊ីជម្រៅនៃកិច្ចសហប្រតិបត្តិការអាស៊ាន-ចិន គឺពិតជាកត្តាមួយដ៏សំខាន់មិនអាចខ្វះបានឡើយ។
សម្តេចតេជោនាយករដ្ឋមន្រ្តីថ្លែងថា ខ្ញុំសូមវាយតម្លៃខ្ពស់ចំពោះវឌ្ឍនភាពនៃការអនុវត្តផែន ការសកម្មភាពថ្មីនៃ «សេចក្តីប្រកាសរួមអំពីភាពជាដៃគូជាយុទ្ធសាស្រ្តអាស៊ាន-ចិន សម្រាប់សន្តិភាព និងវិបុលភាព ឆ្នាំ ២០១១-២០១៥»ដែល ជាថាមពលបំពេញបន្ថែមដ៏សំខាន់សម្រាប់អាស៊ាន នៅក្នុង កិច្ចប្រឹងប្រែងរបស់យើង ដើម្បីសម្រេចបាននូវសហគមន៍សេដ្ឋកិច្ចអាស៊ាននៅឆ្នាំ ២០១៥។ លើសពី នេះទៀត ជាមួយនឹងនិម្មាបនកម្មតំបន់ដែលកំពុងផុសឡើងមកនេះ យើងត្រូវតែធានាថា កិច្ចព្រម ព្រៀងពាណិជ្ជកម្មសេរីអាស៊ាន-ចិន នៅតែមានប្រយោជន៍ មានភាពរស់រវើក និងមានអត្ថន័យពាណិជ្ជកម្មសម្រាប់សកម្មភាពធុរកិច្ចក្នុងតំបន់។ ហេតុនេះ យើងត្រូវខិតខំប្រឹងប្រែងអនុវត្តន៍កិច្ចព្រមព្រៀងនេះ ឲ្យមានប្រសិទ្ធភាពខ្ពស់ ដើម្បីលើកកម្ពស់ និងប្រែក្លាយវាឲ្យទៅជាកិច្ចព្រមព្រៀងពាណិជ្ជកម្មសេរី ដែលទំនើប និងស៊ីជម្រៅជាងមុន។ សម្តេចតេជោសែន មានប្រសាសន៍បញ្ជាក់ថា ដោយសារតួនាទីនៃសេដ្ឋកិច្ចរបស់ចិន តំបន់អាស៊ីរបស់យើង មិនត្រឹមតែបានក្លាយជាមជ្ឈមណ្ឌលនៃកំណើនសេដ្ឋកិច្ចប៉ុណ្ណោះទេ តែថែមទាំងបានក្លាយជាតំបន់នាំមុខនូវការងើបឡើងវិញនៃសេដ្ឋកិច្ច ពិភពលោកទៀតផង។
នៅក្នុងសុន្ទរកថា សម្តេចតេជោនាយករដ្ឋមន្រ្តីបានកត់ សម្គាល់ថា ទំនាក់ទំនងជាយុទ្ធសាស្រ្តរវាងអាស៊ាន និងចិនបានវិវត្តន៍ឈានឡើងទៅមុខយ៉ាងលឿនលើគ្រប់វិស័យ ហើយថែមទាំងបានដើរតួនាទីយ៉ាងសំខាន់ជាកម្លាំងចលករសម្រាប់ស្ថិរភាពតំបន់។ សម្តេចតេជោថ្លែងថា ពិព័រណ៍អាស៊ាន-ចិន និងកិច្ចប្រជុំកំពូលធុរកិច្ច និងវិនិយោគអាស៊ាន-ចិន ដែលយើងបានបង្កើតឡើង១០ឆ្នាំកន្លងទៅនេះបានក្លាយទៅជាវេទិកាដ៏រឹងមាំ និងប្រកបដោយជោគជ័យ សម្រាប់ការផ្លាស់ប្តូរសេដ្ឋកិច្ច និងពាណិជ្ជកម្ម និងសម្រាប់ជំរុញតំបន់ពាណិជ្ជកម្មសេរីអាស៊ាន-ចិន លើសពីនេះទៀត វេទិកានេះក៏បានផ្តល់ផងដែរនូវកាលានុវត្តភាពនៃកិច្ច សហប្រតិបត្តិការ និងការអភិវឌ្ឍសម្រាប់ភាគីទាំងពីរនៅក្នុងបរិការណ៍នៃនិម្មាបនកម្មថ្មី សកលលោក។
សម្តេចតេជោនាយករដ្ឋមន្រ្តីថ្លែងថា ប្រសិនបើពិនិត្យឡើងវិញលើការអភិវឌ្ឍសេដ្ឋកិច្ចយ៉ាងលឿនរបស់ចិន នៅក្នុងរយៈពេល២ ទសវត្សរ៍ចុងក្រោយនេះ យើងអាចមើលឃើញថា កិច្ចអភិវឌ្ឍនេះបាននាំមកនូវផលប្រយោជន៍យ៉ាងច្រើនដល់អាស៊ាន ហើយប្រទេសចិនបានក្លាយជាដៃគូពាណិជ្ជកម្មធំជាងគេទី៣ របស់អាស៊ាន។ បើយោងតាមស្ថិតិរបស់ចិននៅដំណាច់ឆ្នាំ ២០១២ កន្លងទៅពាណិជ្ជកម្មទ្វេភាគីអាស៊ាន-ចិនសម្រេចបានប្រមាណ ៤០០ ពាន់លានដុល្លារ។ បើនិន្នាការនេះនៅបន្តនោះ ពាណិជ្ជកម្មទ្វេភាគីអាស៊ាន-ចិនពិតជាអាចសម្រេចបានដល់ប្រមាណ ៥០០ ពាន់លានដុល្លារ នៅឆ្នាំ២០១៥ ស្របតាមគោលដៅដែលថ្នាក់ដឹកនាំអាស៊ាន-ចិនបានកំណត់។
សម្តេចតេជោមានប្រសាសន៍ថា ចាប់តាំងពីការបង្កើតពិព័រណ៍អាស៊ាន-ចិននៅឆ្នាំ ២០០៤ មក កិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគីរវាងកម្ពុជា-ចិន ក៏សម្រេចបាននូវការរីកចម្រើនយ៉ាងខ្លាំងក្លា។ កម្ពុជាទទួលបាននូវការវិនិយោគយ៉ាងច្រើនពីវិស័យឯកជនរបស់ចិន ពិសេសនៅក្នុងវិស័យហេដ្ឋារចនាសម័្ពន្ធ ថាមពល បច្ចេកវិទ្យាព័ត៌មាន និងទូរគមនាគមន៍ កសិកម្ម និងទេសចរណ៍។ ពាណិជ្ជកម្មទ្វេភាគីរបស់យើងក៏មានការកើនឡើងគួរឲ្យកត់សម្គាល់ ដែលតាមសិ្ថតិរបស់មិត្តចិនគឺមានទំហំប្រមាណ ២,៩ ពាន់លានដុល្លារអាមេរិក នៅឆ្នាំ ២០១២ កន្លងទៅនេះ។ប្រការនេះបានផ្តល់នូវជំនឿដោយសុទិដ្ឋិនិយមថា គោលដៅនៃទំហំពាណិជ្ជកម្មទ្វេភាគីកម្ពុជា-ចិនចំនួន ៥ ពាន់លានដុល្លារសម្រាប់ ឆ្នាំ ២០១៧ គឺទំនងជានឹងសម្រេចបានជាមិនខាន៕