សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគាំទ្រសំណើរ ៣ចំណុចរបស់លោកបណ្ឌិត តាលីប រីហ្វាយ (Taleb Rifai) អគ្គលេខាធិការអង្គការទេសចរណ៍ពិភពលោក ក្នុងឱកាសទទួលជួបសវនាការនៅវិមានសន្តិភាព ទីស្តីការនាយករដ្ឋមន្ត្រីកាលពីរសៀលថ្ងៃទី៣១ ខែតុលា ឆ្នាំ២០១៣។ តែសម្តេចតេជោបានលើកជាអនុសាសន៍ថា យើងចង់ធ្វើយ៉ាងណាកុំឱ្យទេសចរទន្ទ្រានវប្បធម៌ ផ្ទុយទៅវិញគឺអភិរក្សវប្បធម៌ដើម្បីទាក់ទាញទេសចរណ៍។
ឯកឧត្តម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានឱ្យដឹងថា លោកបណ្ឌិត តាលីប រីហ្វាយ (Taleb Rifai) អគ្គលេខាធិការអង្គការទេសចរណ៍ពិភពលោក បានលើកឡើងនូវសំណើរ ៣ចំនុច សុំការគាំទ្រពីសម្តេចតេជោនាយករដ្ឋមន្ត្រី ទី១ គឺការរៀបចំប្រជុំការងារ ទេសចរណ៍នៅក្នុងព្រះរាជាណាចក្រកម្ពុជា រួមសហការជាមួយអង្គការយូណេស្កូ ដែលមានការចូលរួមពីសំណាក់ថ្នាក់ដឹកនាំកំពូលៗ រួមនឹងវិស័យឯកជនផងដែរ។ ទី២ ការបណ្តុះបណ្តាលធនធានមនុស្សដោយលោកបញ្ជាក់ថា នឹងគាំទ្រយ៉ាងពេញទំហឹង ជាពិសេសបង្កើតនូវមជ្ឈមណ្ឌលមួយដែលមានឈ្មោះថា ឌឹសិនធើ អិកហ្សឺឡិន ដើម្បីបណ្តុះបណ្តាលធនធានមនុស្សលើវិស័យទេសចរណ៍ ធ្វើយ៉ាងណាឱ្យមានកម្រិតស្តង់ដារតែមួយ និងទី៣ គឺការបង្កើតក្រុមប្រឹក្សារកទីផ្សារ ដែលក្នុងនោះមានពាក់ព័ន្ធនឹងច្បាប់សម្រាប់ការបង្កើតនេះផងដែរ។លោកបណ្ឌិត តាលីប រីហ្វាយ បានជំរាបជូនសម្តេចតេជោថា បន្ទាប់ពីដំណើរទស្សនកិច្ចរបស់លោកនៅកម្ពុជាកាលពីឆ្នាំ២០១០ រហូតមកដល់ពេលនេះ លោកបានឃើញប្រទេសកម្ពុជាមានការផ្លាស់ប្តូរយ៉ាងពិតប្រាកដ ហើយកម្ពុជាបានក្លាយទៅជាទិសដៅទេសចរណ៍ដ៏ពិតៗ និងមានប្រជាជនជាច្រើន ដែលបាននិងកំពុងនិយាយពីកម្ពុជាថា មានសេដ្ឋកិច្ចល្អ និងនយោបាយល្អ ព្រមទាំងកំពុងតែកសាងនូវប្រទេសមួយដ៏ស្រស់ស្អាតនៅលើពិភពលោក។
សម្តេចតេជោនាយករដ្ឋមន្ត្រីបានថ្លែងអំណរគុណ និងគាំទ្រនូវចំនុចទាំង៣ ដែលលោកបណ្ឌិត តាលីប រីហ្វាយ (Taleb Rifai) បានលើកឡើងដោយសម្ដេចមានប្រសាសន៍ថា ទោះបីជាមានវិបត្តិហិរញ្ញវត្ថុពិភពលោកក៏ដោយក៏កម្ពុជានៅតែមាន សក្តានុពលនៅឡើយហើយវិស័យ ទេសចរណ៍បានចូលរួមចំណែកយ៉ាងច្រើន ដល់ការជំរុញការកាត់បន្ថយភាពក្រីក្រ។ សម្តេចតេជោនាយករដ្ឋមន្ត្រីបានមានប្រសាសន៍ថា យើងចង់ធ្វើយ៉ាងណាកុំឱ្យទេសចរទន្ទ្រានវប្បធម៌តែផ្ទុយទៅវិញគឺ អភិរក្សវប្បធម៌ដើម្បីទាក់ទាញទេសចរណ៍៕