សន្និសីទអង្គការទេសចរណ៍ពិភពលោកថ្នាក់តំបន់ ស្តីពីការអភិវឌ្ឍន៍ទេសចរណ៍រមណីដ្ឋាន បេតិកភ័ណ្ឌ វប្បធម៌ និងធម្មជាតិ ត្រូវបានប្រព្រឹត្តធ្វើឡើងរយៈពេល២ថ្ងៃគឺគិតចាប់តាំងពីថ្ងៃទី ០១ ដល់ថ្ងៃទី២ ខែវិច្ឆិកា ឆ្នាំ ២០១៣ នៅសណ្ឋាគារសុខាល័យអង្គរខេត្តសៀមរាប ក្រោមអធិបតីភាពឯកឧត្តម បណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ដោយមានតំណាងមន្រី្តមកពីប្រទេសជិត ៣០ដែលមានតំបន់វប្បធម៌ទេសចរណ៍ ធម្មជាតិ នោះបានមកចូលរួមបើកសន្និសីទថ្នាក់តំបន់នេះ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានលើកឡើងក្នុងសន្និសីទនេះថា៖ ទេសចរណ៍មានតួនាទីយ៉ាងសំខាន់បំផុតបានផ្តល់នូវវប្បធម៌បេតិកភ័ណ្ឌធម្មជាតិនិងជីវៈចំរុះ។ វប្បធម៌ ក្នុងន័យនេះគឺមានសារៈសំខាន់បំផុតដល់ការអភិវឌ្ឍន៍សេដ្ឋកិច្ចលើសកលលោកនៅក្នុងសកម្មភាពជាតិផងដែរ។ ក្នុងនោះកម្ពុជាក៏មានការកើនឡើងនៃភ្ញៀវទេសចរណ៍ដែលបានបង្ហាញពីការអភិវឌ្ឍន៍លើវិស័យនេះ។
ឯកឧត្តមរដ្ឋមន្ត្រីបញ្ជាក់ថា ការអភិវឌ្ឍន៍ទេសចរណ៍វប្បធម៌ និងបេតិកភ័ណ្ឌធម្មជាតិគឺជាបញ្ហាមួយដែលត្រូវលើកឡើងនៅក្នុងប្រទេសជាសមាជិកនៃអង្គការទេសចរណ៍ពិភពលោកដើម្បីអភិរក្ស និងអភិវឌ្ឍន៍ដោយចេរភាព។ សន្និសីទនេះនឹងត្រូវសិក្សាជាច្រើនទៀតជាមួយបញ្ហាប្រទេសច្រើនដែលចូលរួមក្នុងពេលនេះ។
លោកស្រី អាន ឡឺម៉ែត្រ (Anne Lemaistre) តំណាងអង្គការយូនីស្កូប្រចាំកម្ពុជាបានលើកឡើងថាយើងជួបជុំគ្នាថ្ងៃនេះដើម្បីចែករំលែកបទពិសោធន៍ទាំងអស់គ្នាទៅដោយភាពជោគជ័យមួយប្រកបដោយចេរភាពហើយជាយុទ្ធសាស្ត្រមួយប្រកបដោយការគ្រប់គ្រងបេតិកភ័ណ្ឌ និងវប្បធម៌ធម្មជាតិនិងទេសចរណ៍គឺផ្សាជាប់គ្នា។
លោកបណ្ឌិត តាឡឹប វីហ្វាល់ (Tableb Rifai )អគ្គលេខាធិការអង្គការទេសចរណ៍ពិភពលោកបានអោយដឹងថា ដូចយើងដឹងស្រាប់ហើយកម្ពុជាជាប្រទេសដ៏រុងរឿងមួយដែលមានប្រាសាទអង្គរវត្ត និងបេតិកភ័ណ្ឌជាច្រើនដ៏សំខាន់។ កិច្ចសហការរវាង WTO និងកម្ពុជាមានជាយូរមកហើយ។ ការធ្វើដំណើរ និងទេសចរណ៍គឺជាចរន្តមួយនៅលើពិភពលោកយើងនេះដែលមានមនុស្ស១០០លាននាក់នៅឆ្នាំ២០១២។ ទេសចរបានតាំងចិត្តធ្វើដំណើរឆ្លងកាត់ពីតំបន់មួយទៅតំបន់ មួយបើទោះណាមានជួបគ្រោះធម្មជាតិយ៉ាងណាក៏ដោយ។
ថ្លែងទៅកាន់សន្និសីទនេះឯកឧត្តមបណ្ឌិតសភាចារ្យ សុខ អាន មានប្រសាសន៍គាំទ្រនិងលើកសរសើរដល់អង្គការយូនីស្កូ និងអង្គការ WTO ដែលបានជ្រើសរើសយកខេត្តសៀមរាបតំបន់អង្គរធ្វើជាទីកន្លែងប្រជុំដ៏មាន សារៈសំខាន់នេះ។ យើងត្រូវពិនិត្យឡើងវិញនូវផលប៉ះពាល់បរិស្ថានទៅលើបេតិកភ័ណ្ឌ។ ទេសចរបៃតងគឺជាការជំរុញផងដែរទៅលើចីរភាពក្នុងតំបន់ដូចជាការនាំគ្នាដំាដើមឈើជាដើម «ទេសចរម្នាក់ ដាំដើមឈឺមួយដើម»។
ឯកឧត្តមក៏បានមានប្រសាសន៍ផងដែរថា កម្ពុជាមានគោលនយោបាយបើកចំហរជើងមេឃ ដែលជាការផ្តួចផ្តើមគំគិតដោយសម្តេចអគ្គមហាសេនាបតីតេជោ ហ៊ុន សែន សំរាប់ទាក់ទាញភ្ញៀវទេសចរមកទស្សនាកម្ពុជា ដែលធ្វើឲ្យមានការកើនឡើងគួរឲ្យកត់សំគាល់នូវចំនួនទេសចរដែលឡើងរហួតគួរឲ្យកត់សំគាល់។
សន្និសីទនឹងបន្តពិភាក្សាការងាររយៈពេល២ថ្ងៃចាប់ពីថ្ងៃទី១នេះដល់ថ្ងៃទី២ ខែវិច្ឆិកា ឆ្នាំ២០១៣ជាបន្តទៀតដោយឡែកក្នុងនាមជាម្ចាស់ផ្ទះក្រុមគណៈប្រតិភូទាំងអស់ត្រូវបានអញ្ជើញទៅទស្សនាប្រាង្គប្រាសាទអង្គរវត្តដែលជាសម្បត្តិបេតិកភណ្ឌពិភពលោកផងដែរ៕