សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា មានប្រសាសន៍ជំរាបជូន គណៈប្រតិភូសមាគមមិត្តភាពវៀតណាម-កម្ពុជា កាលពីថ្ងៃទី ២៦ ខែមិថុនា ឆ្នាំ ២០១៤ ដោយចាត់ទុក ការកាត់ទោសអតីតមេដឹកនាំខ្មែរក្រហម គឺជាសក្ខីភាព ដែលឆ្លុះបញ្ចាំងពីសច្ចធម៌ប្រវត្តិសាស្រ្ត ដែលវៀតណាមបាន ជួយរំដោះប្រទេស និងប្រជាជនកម្ពុជានោះ។ សម្តេចតេជោនាយករដ្ឋមន្រ្តីបានថ្លែង នូវអំណរគុណចំពោះកិច្ចការទាំងឡាយ ដែលសមាគមអតីតយុទ្ធជនវៀតណាមបានរួមចំណែកជួយដល់ប្រទេស និងប្រជាជនកម្ពុជា ចាប់តាំងពីពេលរំដោះប្រទេស និងអាយុជីវិតប្រជាជនកម្ពុជាចេញពីរបបប្រល័យពូជសាសន៍ ប៉ុល ពត រហូតដល់ដំណាក់កាល នៃការកសាងប្រទេសកម្ពុជាឡើងវិញនេះ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីបានឲ្យដឹងថា ក្នុងជំនួបជាមួយគណៈប្រតិភូសមាគមមិត្តភាពវៀតណាម-កម្ពុជា នៅវិមានសន្តិភាព សម្តេចតេជោមាន ប្រសាសន៍ថា បើគ្មានថ្ងៃរំដោះ ៧ មករា ឆ្នាំ ១៩៧៩ ទេ គ្មានការជួយរបស់កងទ័ព និងប្រជាជនវៀតណាមនោះទេ គឺពិតជាមិនមានថ្ងៃនេះនោះទេ ហើយរាជរដ្ឋាភិបាល និងប្រជាជនកម្ពុជាសូមថ្លែងនូវអំណរគុណ ជូនដល់រដ្ឋាភិបាល និងប្រជាជនវៀតណាម ដែលបានធ្វើពលីកម្មដើម្បីបុព្វហេតុនៅកម្ពុជា។ សម្តេចតេជោនាយករដ្ឋមន្រ្តីបានចាត់ទុកការរៀបចំឲ្យមានឡើងនូវជំនួបរវាងសម្តេចនិង គណៈប្រតិភូសមាគមមិត្តភាពវៀតណាម-កម្ពុជា គឺជាជំនួបមួយដែលពោពេញទៅដោយឥស្សរជនដ៏មានកិត្តិយស ដែលមានប្រវត្តិផ្សារភ្ជាប់ទំនាក់ទំនងកិច្ចសហប្រតិបត្តិការជាមួយប្រទេស និងប្រជាជនកម្ពុជា។
សម្តេចតេជោមានប្រសាសន៍ថា ជំនួបបែបនេះគប្បីរៀបចំជួបគ្នាឲ្យបានញឹកញាប់ ដើម្បីជា ការរំលឹកដល់ប្រវត្តិសាស្រ្ត និងការចែករំលែកនូវការយល់ដឹងការវិវត្តនៃប្រទេសទាំងពីរ និងការវិវត្តជុំវិញតំបន់ទាំងមូលផង។
សម្តេចតេជោនាយករដ្ឋមន្រ្តីបានស្នើឲ្យមាននូវការធ្វើទស្សនកិច្ចពីសំណាក់ កូន ចៅ បងប្អូនរបស់អតីតយុទ្ធជន និងអ្នកជំនាញការវៀតណាម ដែលធ្លាប់មកបំពេញបេសកកម្មនៅកម្ពុជា មកធ្វើទស្សនកិច្ចនៅកម្ពុជា ដើម្បីផ្សារភ្ជាប់នូវទំនាក់ទំនង និងការយល់ដឹងពីគ្នាទៅវិញទៅមក បន្ថែមទៀត។
ឯកឧត្តម វូ ម៉ៅ ប្រធានសមាគមមិត្តភាពវៀតណាម-កម្ពុជា មានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុតជូនចំពោះសម្តេចតេជោនាយករដ្ឋមន្រ្តី និងប្រសាសន៍ដ៏មានខ្លឹមសារអត្ថន័យដ៏ ជ្រាលជ្រៅបំផុត និងសូមចងចាំជានិច្ចនូវប្រសាសន៍ដ៏មានតម្លៃរបស់នេះថា ជាមេរៀន និងជាបទពិសោធន៍របស់ថ្នាក់ដឹកនាំ និងប្រជាជនវៀតណាមជំនាន់ក្រោយ៕