តាកែវ ថ្ងៃទី២៦ ខែមិថុនា ឆ្នាំ២០១៤
- ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិ
- បងប្អូន គ្រូបង្វឹក កីឡាករជាតិ និងអន្តរជាតិ ទូរទស្សនិកជនទាំងអស់ជាទីមេត្រី！
ថ្ងៃនេះ ខ្ញុំមានសេចក្តីសោមនស្សរីករាយចូលរួមជាមួយ ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិ គ្រូបង្វឹកនិងកីឡាករប្រដាល់ ទូរទស្សនិកជន ទាំងអស់ ក្នុងពិធីប្រកួតកីឡាប្រដាល់ក្បាច់គុនបុរាណខ្មែរជាលក្ខណៈមិត្តភាព-អន្តរជាតិ និងដណ្តើមខែ្សក្រវ៉ាត់ CBF ដែលអាចចាត់ទុកថាជាប្រព្រឹត្តិការណ៍ជាប្រវត្តិសាស្រ្តនៃការប្រកួតប្រដាល់លក្ខណៈអន្តរជាតិដែលពុំធ្លាប់មាននៅលើទឹកដីខេត្តតាកែវយើង នាពេលនេះ។
ឆ្លៀតក្នុងឱកាសនេះ ខ្ញុំសូមកោតសរសើរ និងវាយតម្លៃខ្ពស់ចំពោះការផ្តួចផ្តើមគំនិត និងកិច្ចខិតខំប្រឹងប្រែងរបស់គណៈកម្មាធិការប្រតិបត្តិនៃគណៈកម្មាធិការកីឡាកម្ពុជា សហព័ន្ធកីឡាប្រដាល់កម្ពុជា ឯកឧត្តម យុទ្ធ ភូថង ប្រធានកិត្តិយសសហព័ន្ធកីឡាប្រដាល់កម្ពុជា ដែលបានរៀបចំការប្រកួតកីឡាក្បាច់គុនបុរាណខ្មែរជាលក្ខណៈមិត្តភាព-អន្តរជាតិនិងដណ្តើមខែ្សក្រវ៉ាត់ CBF នេះ ឱ្យមានភាពអធិកអធម និងមានតម្លៃជាប្រវត្តិសាស្រ្តនៃទំនាក់ទំនង និងកិច្ចសហប្រតិបត្តិការអន្តរជាតិ ក្នុងវិស័យកីឡាប្រដាល់ក្បាច់គុនបុរាណ ដោយភាគីកីឡាករកម្ពុជាចំនួន ៥រូប ប្រកួតទល់នឹងកីឡាករបរទេសចំនួន ៥រូប ដែលមកពីប្រទេសឡាវ ជប៉ុន ថៃ និងចិន។ ទន្ទឹមនឹងនេះ ខ្ញុំសូមថ្លែងអំណរគុណចំពោះគ្រូបង្វឹក កីឡាករ ភ្ញៀវកិត្តិយសជាតិ និងអន្តរជាតិទាំងអស់ ដែលបានចំណាយពេលវេលាដ៏មានតម្លៃធ្វើដំណើរមកកាន់ព្រះរាជាណាចក្រកម្ពុជា ដើម្បីចូលរួម រៀបចំ ឧបត្ថម្ភ និងគាំទ្រ ធ្វើឱ្យការប្រកួតថ្ងៃនេះប្រព្រឹត្តទៅដោយរលូន ដូចបានគ្រោងទុក។ ជាងនេះទៅទៀត ខ្ញុំសូមថ្លែងអំណរគុណដល់ឯកឧត្តមអភិបាល ថ្នាក់ដឹកនាំ និងមន្រ្តីរាជការនៃខេត្តតាកែវទាំងអស់ ដែលបានគាំទ្រ និងសម្របសម្រួលផ្តល់ទីលានបាល់ទាត់សាលាគរុកោសល្យខេត្តតាកែវសម្រាប់ការប្រកួត ហើយខ្ញុំក៏សូមអរគុណផងដែរដល់បណ្តាញទូរទស្សន៍អប្សរា ដែលកំពុងផ្សាយបន្តផ្ទាល់ជូនបងប្អូនទូរទស្សនិកជនទាំងក្នុងនិងក្រៅប្រទេសបានតាមដានទស្សនានូវការប្រកួតដ៏អស្ចារ្យនាពេលនេះ។
ព្រឹត្តិការណ៍ថ្ងៃនេះឆ្លុះបញ្ចាំងឱ្យឃើញអំពីកិច្ចសហប្រតិបត្តិការអន្តរជាតិលើវិស័យកីឡា ដែលជាឱកាសផ្តល់នូវការផ្លាស់ប្តូរទាំងបច្ចេកទេស និងបទពិសោធក្នុងការប្រកួតក្បាច់គុនបុរាណ ដែលជាមរតកនៃសិល្បៈការពារខ្លួនរបស់ប្រជាជាតិខ្មែរយើង។ ការប្រកួតជាលក្ខណៈអន្តរជាតិនេះ ក៏ជាការបំផុសស្មារតីមហាជនឱ្យកាន់តែស្រលាញ់ និងគាំទ្រកីឡាប្រដាល់ក្បាច់គុនបុរាណខ្មែរ ហើយក៏ជាការលើកកម្ពស់កិត្តិសព្ទកីឡាប្រដាល់ក្បាច់គុនបុរាណខ្មែរ ឱ្យកាន់តែល្បីល្បាញថែមទៀតនៅលើឆាកអន្តរជាតិ។
ឯកឧត្តម លោកជំទាវ អស់លោក លោកស្រី និងទូរទស្សនិជនទាំងអស់!
ដូចដែលយើងទាំងអស់គ្នាបានដឹងហើយថា កីឡាប្រដាល់ក្បាច់គុនបុរាណខ្មែរ គឺជាប្រភេទកីឡាដ៏មានប្រជាប្រិយភាព ដែលទទួលបានការគាំទ្រ ទាំងក្នុងក្របខណ្ឌជាតិ និងអន្តរជាតិ។ កីឡាប្រដាល់ក្បាច់គុនបុរាណខ្មែរ មិនត្រឹមតែជាកីឡាប្រដាល់សម្រាប់ប្រកួតតាមលក្ខណៈបច្ចេកទេស និងច្បាប់ ដើម្បីឈ្នះចាញ់ប៉ុណ្ណោះទេ ប៉ុន្តែថែមទាំងជាសិល្បៈនៃការបញេ្ចញនូវកាយវិការដ៏រហ័សរហួន យ៉ាងស្វាហាប់ និងមានឫសគល់យ៉ាងជ្រៅក្នុងទំនៀមទំលាប់ ប្រពៃណីរបស់ជាតិយើង ហើយកីឡានេះ ក៏ជានិមិត្តរូបនៃអារ្យធម៌ខ្មែរផងដែរ។ តាមការសិក្សាស្រាវជ្រាវរបស់ប្រវត្តិវិទូ បានឱ្យដឹងថា នាសម័យអាណាចក្រខ្មែរ ក្បាច់គុនខ្មែរមានច្រើនប្រភេទណាស់ ហើយត្រូវបានប្រើប្រាស់យ៉ាងទូលំទូលាយ ក្នុងវិស័យការពារជាតិ និងសង្គមវប្បធម៌ ជាសិល្បៈការពារខ្លួន ជាល្បែងប្រដាល់កំសាន្ត និងជាយុទ្ធគុនសម្រាប់ពលទាហាន។ ជារួមក្នុងសម័យនោះ ទាំងព្រះរាជា មន្រ្តីគ្រប់ជាន់ថ្នាក់ ពលទាហាន និងរាស្រ្តសាមញ្ញភាគច្រើន សុទ្ធតែទទួលបានការហ្វឹកហាត់និងរៀនក្បាច់គុនខ្មែរមានជាអាទិ៍ គុនប្រដាល់ គុនដាវ គុនដំបង បាញ់ព្រួញធ្នូ និងគុនល្បុក្កតោ។ជាក់ស្តែង យើងអាចរកឃើញភស្តុតាងជាច្រើន លើផ្ទាំងចម្លាក់នៅតាមប្រាសាទបុរាណនានា តួយ៉ាង នៅបា្រសាទសម្បូរណ៍ព្រៃគុហ៍ ប្រាសាទអង្គរបូរី ប្រាសាទកោះកេរ ប្រាសាទបន្ទាយស្រី ប្រាសាទបាពួន ប្រាសាទបាយ័ន ដែលអាចបញ្ជាក់បានយ៉ាងច្បាស់អំពីប្រភពមរតកវប្បធម៌នៃក្បាច់គុនបុរាណខ្មែរ។
ដោយមើលឃើញពីតម្លៃមិនអាចកាត់ថ្លៃបាននៃក្បាច់គុនបុរាណខ្មែរ ដែលជាសម្បតិ្តវប្បធម៌ជាតិ និងដើម្បីលើកកម្ពស់អត្តសញ្ញាណជាតិ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់យ៉ាងខ្លាំង ក្នុងការអភិរក្ស និងអភិវឌ្ឍក្បាច់គុនបុរាណខែ្មរ តាមរយៈការជំរុញលើកទឹកចិត្តឱ្យមានការសិក្សាស្រាវជ្រាវ ប្រមូលចងក្រង និងរៀបចំឯកសារនានាពាក់ព័ន្ធនឹងប្រវត្តិសិល្បៈក្បាច់គុនខ្មែរ ក៏ដូចជា ស្ថានភាពក្បាច់គុនខ្មែរក្នុងសម័យទំនើប ព្រមទាំងធ្វើការផ្សព្វផ្សាយឱ្យបានកាន់តែទូលំទូលាយថែមទៀតដល់គ្រប់មជ្ឈដ្ឋានជាតិ និងអន្តរជាតិ ដោយជំរុញ និងលើកទឹកចិត្តឱ្យមានការបង្កើតជាក្លឹបហ្វឹកហាត់ក្បាច់គុនបុរាណខ្មែរ និងរៀបចំឱ្យមានការប្រកួតកីឡាប្រដាល់ប្រភេទនេះកាន់តែច្រើនឡើងថែមទៀតក្នុងក្របខ័ណ្ឌជាតិនិងតំបន់។ ជាក់ស្តែង ក្លឹបប្រដាល់ក្បាច់គុនបុរាណខ្មែរជាច្រើនត្រូវបានបង្កើតឡើងជាបន្តបន្ទាប់ ដោយមានការចូលរួមហ្វឹកហាត់គុនប្រដាល់ពីយុវជន យុវនារីជាមួយគ្រូបង្វឹក ដែលមានបច្ចេកទេសនិងបទពិសោធយូរឆ្នាំ ដើម្បីក្លាយខ្លួនជាកីឡាករ កីឡាការិនីអាជីពប្រកួតនៅលើសង្វៀន និងក្លាយជាអ្នកបន្តវេនក្នុងការថែរក្សា អភិរក្សមរតកវប្បធម៌ ឬដើម្បីចេះគុន សិល្បៈការពារខ្លួន និង ដើម្បីសុខភាព។ ក្រៅពីនេះ ការប្រកួតកីឡាប្រដាល់ក្បាច់គុនបុរាណខ្មែរត្រូវបានរៀបចំឡើងយ៉ាងច្រើន និងទទួលបានការយកចិត្តទុកដាក់តាមដានទស្សនាទាំងនៅនឹងកន្លែងប្រកួតផ្ទាល់ និងតាមកញ្ចក់ទូរទស្សន៍។
ឯកឧត្តម លោកជំទាវ អស់លោក លោកស្រី និងទូរទស្សនិជនទាំងអស់!
ជាថ្មីម្តងទៀត ខ្ញុំសូមថ្លែងអំណរគុណចំពោះគណៈកម្មាធិការកីឡាកម្ពុជា សហព័ន្ធកីឡាប្រដាល់កម្ពុជា ទូរទស្សន៍អប្សរា និងសប្បុរសជននានា ព្រមទាំងគណៈកម្មការរៀបចំការប្រកួត គ្រូបង្វឹក និងកីឡាករទាំងអស់ ដែលបានចូលរួមសហការធ្វើឱ្យព្រឹត្តិការណ៍ជាប្រវត្តិសាស្រ្តសម្រាប់ខេត្តតាកែវយើង ឱ្យមានដំណើរការប្រកបដោយរលូន។ ទន្ទឹមនឹងនេះ ខ្ញុំសូមអំពាវនាវដល់ក្រសួង ស្ថាប័ន អង្គភាពពាក់ព័ន្ធ សហព័ន្ធកីឡាប្រដាល់ជាតិនិងអន្តរជាតិ និងសប្បុរសជនទាំងអស់ សូមបន្តចូលរួម ឧបត្ថម្ភ និងគាំទ្រទាំងស្មារតី សម្ភារៈ ថវិកា និងបច្ចេកទេស ដើម្បីជំរុញឱ្យកីឡាប្រដាល់ក្បាច់គុនបុរាណខ្មែរកាន់តែមានការអភិវឌ្ឍ និងមានភាពល្បីល្បាញថែមទៀត ហើយខ្ញុំមានជំនឿយ៉ាងមុតមាំថា ការប្រកួតកីឡាប្រដាល់ក្បាច់គុនបុរាណជាលក្ខណៈអន្តរជាតិបែបនេះ នឹងទទួលបានការគាំទ្រឱ្យរៀបចំជាបន្តបន្ទាប់នាពេលអនាគត។
ជាទីបញ្ចប់នេះ ខ្ញុំសូមជូនពរ ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិ គ្រូបង្វឹក កីឡាករ និងទូរទស្សនិកជនទាំងអស់ សូមមានសុខភាពល្អ ជោគជ័យក្នុងការងារ និងសុភមង្គលក្នុងគ្រួសារ។
សូមអរគុណ!