ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានមានប្រសាសន៍ចាត់ទុក ពិធីប្រកួតកីឡាប្រដាល់ក្បាច់គុនបុរាណខ្មែរជាលក្ខណៈ មិត្តភាព-អន្តរជាតិ និងដណ្តើមខែ្សក្រវ៉ាត់ CBF ដែលប្រារព្ធធ្វើនៅលើទីលានបាលទាត់សាលាគរុកោសល្យភូមិភាគខេត្តតាកែវថា ជាប្រព្រឹត្តិការណ៍ជាប្រវត្តិសាស្រ្តនៃការប្រកួតប្រដាល់លក្ខណៈអន្តរជាតិដែលពុំធ្លាប់មាននាពេលកន្លងមកលើទឹកដីខេត្តតាកែវនេះ។
ប្រសាសន៍របស់ឯកឧត្តមបណ្ឌិតសភាចារ្យ សុខ អាន បានធ្វើឡើងក្នុងឱកាសអញ្ជើញជាអធិបតីក្នុងពិធីប្រកួតកីឡាប្រដាល់ក្បាច់គុនបុរាណខ្មែរជាលក្ខណៈមិត្តភាព-អន្តរជាតិ និងដណ្តើមខែ្សក្រវ៉ាត់ CBF ដែលរៀបចំឡើងដោយសហព័ន្ធកីឡាប្រដាល់កម្ពុជា សហការជាមួយស្ថានីយទូរទស្សន៍អប្សរា នារាត្រីថ្ងៃទី២៦ ខែមិថុនា ឆ្នាំ២០១៤។ ពិធីប្រកួតប្រដាល់ដែលផ្សាយបន្តផ្ទាល់ដោយស្ថានីយ៍ទូរទស្សន៍អប្សរា មានកីឡាករកម្ពុជាចំនួន ៥រូប ល្បីឈ្មោះ មានជាអាទិ៍ កីឡាករ សែន រ៉ាឌី ដែលមានខ្សែក្រវ៉ាត់ CBF ប្រកួតទល់នឹងកីឡាករបរទេសចំនួន ៥រូប ដែលមកពីប្រទេសឡាវ ជប៉ុន ថៃ និងចិន។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា ព្រឹត្តិការណ៍នៃការប្រកួតកីឡាប្រដាល់ជាលក្ខណៈមិត្តភាព-អន្តរជាតិ និងដណ្តើមខែ្សក្រវ៉ាត់ CBF ថ្ងៃនេះឆ្លុះបញ្ចាំងឱ្យឃើញអំពីកិច្ចសហប្រតិបត្តិការអន្តរជាតិលើវិស័យកីឡា ដែលជាឱកាសផ្តល់នូវការផ្លាស់ប្តូរទាំងបច្ចេកទេស និងបទពិសោធក្នុងការប្រកួតក្បាច់គុនបុរាណ ដែលជាមរតកនៃសិល្បៈការពារខ្លួនរបស់ប្រជាជាតិខ្មែរយើង។ ការប្រកួតជាលក្ខណៈអន្តរជាតិនេះ ក៏ជាការបំផុសស្មារតីមហាជនឱ្យកាន់តែស្រលាញ់ និងគាំទ្រកីឡាប្រដាល់ក្បាច់គុនបុរាណខ្មែរ ហើយក៏ជាការលើកកម្ពស់កិត្តិសព្ទកីឡាប្រដាល់ក្បាច់គុនបុរាណខ្មែរ ដែលមានរូបចម្លាក់នៅតាមប្រាង្គប្រាសាទខ្មែរជាភ័ស្តុតាង ឱ្យកាន់តែល្បីល្បាញថែមទៀតនៅលើឆាកអន្តរជាតិ។
ជាមួយនឹងការថ្លែងអំណរគុណ ឯកឧត្តមអភិបាលថ្នាក់ដឹកនាំ និងមន្រ្តីរាជការនៃខេត្តតាកែវ ដែលបានគាំទ្រ និងសម្របសម្រួលផ្តល់ទីលានបាល់ទាត់សាលាគរុកោសល្យខេត្តតាកែវ សម្រាប់ការប្រកួត ក៏ដូចជាបណ្តាញទូរទស្សន៍អប្សរា ឯកឧត្តមបណ្ឌិតសភាចារ្យ សុខ អាន បានអំពាវនាវដល់សប្បុរសជនដែលស្រឡាញ់វិស័យកីឡាជួយគាំទ្រឧបត្ថម្ភផងដែរ៕