Preah Vihear Memorial: ការចរចា រវាងថ្នាក់ដឹកនាំកំពូលគណបក្សប្រជាជន-សង្គ្រោះជាតិ បានចាប់ផ្តើមចរចានៅព្រឹកនេះ

Tuesday, July 22, 2014

ការចរចា រវាងថ្នាក់ដឹកនាំកំពូលគណបក្សប្រជាជន-សង្គ្រោះជាតិ បានចាប់ផ្តើមចរចានៅព្រឹកនេះ

រូបភាព៖ PV, Mr. Kok Ky

ភ្នំពេញ: កិច្ចប្រជុំរវាងថ្នាក់ដឹកនាំកំពូលនៃគណបក្សប្រជាជនកម្ពុជា និងគណបក្សសង្គ្រោះជាតិ បានចាប់ផ្តើមជួបចរចាគ្នា ដើម្បីទម្លុះទម្លាយភាពជាប់គាំងនយោបាយនៅម៉ោង ៩ ព្រឹក ថ្ងៃទី២២ ខែកក្កដា ឆ្នាំ២០១៤ នៅវិមានព្រឹទ្ធសភា ដោយមានសមាសភាពម្ខាងៗ ៨ រូបក្នុងនោះមានថ្នាក់ដឹកនាំកំពូល ៣ រូប អមដោយក្រុមជំនួយការ ៥ រូប ម្ខាង។

រូបភាព៖ PV, Mr. Kok Ky

លោកព្រុំ សុខា មន្ត្រីជាន់ខ្ពស់គណបក្សប្រជាជនកម្ពុជា បានមានប្រសាសន៍ប្រាប់គេហទំព័រ CEN នៅរសៀលថ្ងៃទី២១ ខែកក្កដា ឲ្យដឹងថា សមាស ភាព ថ្នាក់ដឹកនាំកំពូលគណបក្សប្រជាជនកម្ពុជា ដែលត្រូវចរចា នៅថ្ងៃទី២២ ខែកក្កដា រួមមាន សម្តេចអគ្គមហាសេនាបតីតេជោ ហ៊ុន សែន លោកឧបនាយករដ្ឋមន្ត្រី ស ខេង និងលោកសាយ ឈុំ។ ចំណែកក្រុមជំនួយការ មានចំនួន ៥ រូប គឺ លោកប្រាក់ សុខុន លោក សោម សឿន លោក សក់ សេដ្ឋា លោក កើត រិទ្ធ និងរូបលោក (ព្រុំ សុខា)។

លោក ព្រុំ សុខា បានបញ្ជាក់ថា ការប្រជុំកំពូលថ្នាក់ដឹកនាំគណបក្សទាំងពីរ គឺដើម្បីបញ្ចប់បញ្ហាទាំងឡាយ ក្រោយការបោះឆ្នោត ផ្អែកលើកិច្ចព្រមព្រៀងរវាងសម្តេចតេជោ ហ៊ុន សែន ជាមួយលោកសម រង្ស៊ី កាលពីថ្ងៃទី៩ ខែមេសា ឆ្នាំ២០១៤។

ចំណែកលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់គេហទំព័រ CEN នៅរសៀលថ្ងៃទី២១ ខែកក្កដា ឲ្យដឹងថា ថ្នាក់ដឹកនាំកំពូលគណបបក្សសង្គ្រោះជាតិ ដែលត្រូវចរចាជាមួយថ្នាក់ដឹកនាំកំពូលគណបក្សប្រជាជនកម្ពុជា នៅព្រឹកថ្ងៃទី២២ ខែកក្កដា រួមមាន៖ លោក សម រង្ស៊ី លោក កឹម សុខា និងលោក ប៉ុល ហំម។ ចំណែកក្រុមជំនួយការ មានចំនួន ៥ រូប គឺលោក សុន ឆ័យ លោក គួយ ប៊ុនរឿន លោក យឹម សុវណ្ណ លោក អេង ឆៃអ៊ាង និងរូបលោក ( យ៉ែម បុញ្ញឫទ្ធិ )។

រូបភាព៖ PV, Mr. Kok Ky

លោក យ៉ែម បុញ្ញឫទ្ធិ បានបញ្ជាក់ថា របៀបវារៈដែលត្រូវយកទៅជជែកជាមួយខាងគណបក្សប្រជាជនកម្ពុជា គឺការជជែកពិភាក្សាលំអិត ទៅលើការបញ្ចប់វិបត្តិនយោបាយ ជាកញ្ចប់រួម ហើយរាល់បញ្ហាទាំងអស់ គឺត្រូវយកមកជជែកពិភាក្សា។ គណបក្សសង្គ្រោះជាតិ មានជំនឿថា កិច្ចប្រជុំចរចានេះ នឹងអាចដោះស្រាយជាប់គាំងនយោបាយជិត ១ឆ្នាំ ក្រោយការបោះឆ្នោតជ្រើសតាំងតំណាងរាស្ត្រ។ បើទុកឲ្យក្រុមការងារបច្ចេកទេស ចេះតែបកស្រាយទៅ គឺជជែកអត់ចេះចប់ទេ៕

ដោយ: មុនីរាជ