ភ្នំពេញ ៖ ពលរដ្ឋខ្មែរចំនួន៥៥នាក់ ត្រូវបានអាជ្ញាធរថៃចាប់ខ្លួននៅផ្សាររុងក្លឿ ច្រកព្រំដែនអន្តរជាតិ ប៉ោយប៉ែត តែក្រោយមកដោះលែងមកវិញ ២៣នាក់ នៅសល់ ៣២នាក់កំពុងជាប់ឃុំ។
លោកឧត្ដមសេនីយ៍មិថុនា អនុប្រធានការិយាល័យទំនាក់ទំនងកម្ពុជា-ថៃ បានប្រាប់កម្ពុជាថ្មីថា កងទ័ពឈុតខ្មៅថៃ ក្នុងអង្គភាព ១២០៦ បានចាប់ប្រជាពលរដ្ឋខ្មែរចំនួន៣០កាលពីល្ងាចម៉ោង៦ ថ្ងៃទី១០ ខែមករា ឆ្នាំ២០១១ នៅក្នុងផ្សាររុងក្លឿ ប៉ុន្តែក្រោយមកបានដោះលែងវិញ ចំនួន២៣នាក់ ទុក៧នាក់បញ្ជូន ទៅឃុំឃាំងនៅខេត្តស្រះកែវ។
លោកឧត្ដមសេនីយ៍បាននិយាយថា លុះមកដល់ថ្ងៃទី១១ ខែមករានេះ ប្រជាពលរដ្ឋខ្មែរ២៥នាក់ ត្រូវបានអាជ្ញាធរថៃចាប់ថែមទៀត ដោយចោទប្រកាន់ថាឆ្លងដែនខុសច្បាប់។ ដូច្នេះការចាប់ខ្លួនពលរដ្ឋសាមញ្ញ ដែលទៅរកស៊ីនៅតាមព្រំដែនបានក្លាយជារឿងចាប់សងសឹកទៅវិញ។
លោកកុយ គួង អ្នកនាំពាក្យក្រសួងការបរទេសកម្ពុជា បានប្រាប់កម្ពុជាថ្មីថា លោកបានទទួលព័ត៌មាន ពីការចាប់ខ្លួនពលរដ្ឋខ្មែរទាំងនោះហើយ ឥឡូវក្រសួងការបរទេសកំពុងឲ្យអង្គកុងស៊ុលកម្ពុជាប្រចាំនៅ ខេត្ត ស្រះកែវ អន្តរាគមន៍សុំឲ្យដោះលែង ប្រជាពលរដ្ឋខ្មែរមកវិញ។
លោកកុយ គួង និយាយថា គេមិនគួរធ្វើបាបពលរដ្ឋសាមញ្ញ ដែលកំពុងរកស៊ីប្រកបរបរតិចតួចនៅ តាមជាយដែននោះទេ ព្រោះពួកគាត់ជាប្រជាពលរដ្ឋធម្មតា មិនពាក់ព័ន្ធនយោបាយអ្វីឡើយ។
លោកឧត្ដមសេនីយ៍ មិថុនា បាននិយាយថា ក្នុងចំណោម ប្រជាពលរដ្ឋ៣០នាក់ ដែលថៃចាប់ខ្លួន នៅ ក្នុងផ្សាររុងក្លឿ កាលពីថ្ងៃទី១០ ខែមករា គេបានដោះលែងមកវិញ២៣នាក់ នៅព្រឹកថ្ងៃទី១១ ខែមករា ចេញតាមច្រកអន្តរជាតិប៉ោយប៉ែត។ ចំណែកប្រជាពលរដ្ឋខ្មែរ ៧នាក់ទៀត ត្រូវបានគេបញ្ជូនទៅឃុំឃាំង នៅខេត្ត ស្រះកែវ ដោយចោទប្រកាន់ថាប្រើប្រាស់លិខិតហួសសុពលភាព ក្នុងការឆ្លងដែន។ តាមធម្មតាលិខិតឆ្លងដែនសម្រាប់អ្នករកស៊ីនៅទីនោះ អាជ្ញាធរថៃ គេកំណត់មួយឆ្នាំម្ដង តែ៣ខែត្រូវទៅពិនិត្យម្ដង។ ដូច្នេះពលរដ្ឋទាំង ៧នាក់ ត្រូវបានគេចោទថាឆ្លងដែនខុសច្បាប់ ដោយអាចប្រឈមមុខនឹងតុលាការនៅខេត្តស្រះកែវទៀត ផង។
ដោយឡែកប្រជាពលរដ្ឋ២៥នាក់ផ្សេងទៀត ដែលអាជ្ញាធរចាប់ខ្លួនកាលពីថ្ងៃទី១១ ខែមករា ដោយ សារតែពួកគាត់បានចូលតាមច្រករបៀងអត់ទិញសំបុត្រចូលតាមច្រក។ ប្រជាជនកម្ពុជាទាំង២៥នាក់(ប្រុស ១៧ ស្រី៨)ត្រូវបានគេចោទថាឆ្លងដែនខុសច្បាប់។
តាមធម្មតានៅច្រកអន្តរជាតិប៉ោយប៉ែត ប្រជាពលរដ្ឋខ្មែរ-ថៃ បានចេញចូលរកស៊ីផ្លាស់ប្ដូរទំនិញគ្នា ទៅវិញទៅមក ដោយគេប្រើប្រាស់សំបុត្រចេញចូលប្រចាំថ្ងៃ សម្រាប់មួយថ្ងៃៗ។ ប៉ុន្តែកន្លងមកប្រជាពលរដ្ឋ ខ្លះមិនបានទិញសំបុត្រ មិនថាឡើយប្រជាពលរដ្ឋខ្មែរឬថៃទេ តែអាជ្ញាធរនៅតាមច្រកបានអនុគ្រោះពួកគាត់ ទៅវិញទៅមក។ ពេលខ្លះគ្រាន់តែពិន័យគាត់ជាប្រាក់មិនដែលចាប់ខ្លួនទេ។ តែក្រោយពីកម្ពុជាចាប់ខ្លួនជនជាតិថៃ៧នាក់ ជាមេដឹកនាំនយោបាយនៅច្រកបង្គោលព្រំដែនលេខ៤៦ ដែលបានចូលព្រំដែនកម្ពុជាខុស ច្បាប់ ស្រាប់តែឥឡូវអាជ្ញាធរថៃ បានចាប់ពលរដ្ឋខ្មែរសាមញ្ញវិញជារឿងសងសឹក៕
ឫទ្ធី