ភ្នំពេញ ៖ នៅព្រឹកព្រលឹមថ្ងៃទី១២ ខែមករា ឆ្នាំ២០១១ អនុរក្សពន្ធនាគារព្រៃស បាននាំខ្លួនទណ្ឌិតជនជាតិថៃចំនួន២នាក់មកសាកសួរបន្ថែម ពាក់ព័ន្ធទៅនឹងករណីដែលមានការចោទប្រកាន់ពីបទប្រមូលផ្ដុំព័ត៌មានដែលធ្វើឲ្យអន្តរាយការការពារជាតិតាមមាត្រា៤៤៦ នៃក្រមព្រហ្មទណ្ឌ និងមាត្រា២៩ នៃច្បាប់ស្ដីពីអន្តោប្រវេសន៍របស់កម្ពុជា។
បុរសស្រ្តីជនជាតិថៃជាទណ្ឌិតជន ដែលកំពុងត្រូវបានឃុំខ្លួនជាបណ្ដោះអាសន្ននៅពន្ធនាគារ ហើយ ក៏បាននាំមកកាន់តុលាការសួរចម្លើយបន្ថែមនេះ ទី១ឈ្មោះ VEERA Somkwamkid មានមុខងារជាអគ្គលេខាធិការបណ្ដាញប្រជាជន ប្រឆាំងអំពើពុករលួយ ទី២ឈ្មោះ RATREE Paiputanapaiboon ភេទស្រី ជាអ្នកសារ ព័ត៌មាន។
ស៊ុមខ្វាមឃីត និងរ៉ាទ្រី ត្រូវបានព្រះរាជអាជ្ញាអមតុលាការរាជធានីភ្នំពេញ សម្រេចចោទប្រកាន់បន្ថែម តាមមាត្រា៤៤៦ នៃក្រមព្រហ្មទណ្ឌ ពីបទប្រមូលផ្ដុំព័ត៌មានជាអាទិ៍ដែលអាចធ្វើឲ្យអន្តរាយការការពារជាតិ។ អំពើទទួលឬប្រមូលផ្ដុំព័ត៌មាន ដើម្បីផ្ដល់ឲ្យពលរដ្ឋបរទេស ឬភ្នាក់ងារបរទេសនូវព័ត៌មាន វិធី វត្ថុតាង ឯកសារ ទិដ្ឋន័យព័ត៌មានវិទ្យា ឬសលាកបត្រ ដែលអាចធ្វើឲ្យអន្តរាយការការពារជាតិ ត្រូវផ្ដន្ទាទោសដាក់ពន្ធ នាគារពី៥ឆ្នាំទៅ១០ឆ្នាំ។
ហេតុផលដែលតុលាការកម្ពុជាសម្រេចចោទប្រកាន់បន្ថែមទៅលើទណ្ឌិតជនឈ្មោះវីរៈ ស៊ុមខ្វាមឃីត និងឈ្មោះរ៉ាទ្រី ប៉ៃពូតាណាប៉ៃប៊ូន ដោយសារតែពួកគេបាននាំយកនូវសម្ភារៈបច្ចេកវិទ្យាទំនើបពាក់ព័ន្ធនឹង ការប្រមូលផ្ដុំចងក្រងព័ត៌មានបែបចារកម្ម នូវខណៈពេលដែលពួកគេបានឆ្លងចូលមកក្នុងទឹកដីកម្ពុជា ជំរៅ ជាង៣០០ម៉ែត្រតាមបង្គោលព្រំដែនលេខ៤៦ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយ មានជ័យ កាលពីថ្ងៃទី២៩ ខែធ្នូ ឆ្នាំ២០១០ កន្លងទៅ។ ឧបករណ៍អេឡិចត្រូនិកបច្ចេកវិទ្យាជាន់ខ្ពស់ ដែលពួកគេបាននាំយកមកប្រើ ដើម្បីប្រមូល ព័ត៌មាននៅលើទឹកដីកម្ពុជារួមមាន ម៉ាស៊ីនថតរូបភាពវីដេអូឌីជីថល និង ម៉ាស៊ីនថតសម្លេងខ្នាតតូចតែអាចផ្ទុកព័ត៌មានបានច្រើនបំផុត។
ជាមួយគ្នានេះទណ្ឌិតជនទាំង២នាក់ ក៏ត្រូវបានចោទប្រកាន់ពីបទចូលមកក្នុងព្រះរាជាណាចក្រកម្ពុជា ដោយគ្មានការអនុញ្ញាតតាមមាត្រាទី២៩ នៃច្បាប់ស្ដីពីអន្តោប្រវេសន៍ផងដែរ។ តាមស្មារតីនិងខ្លឹមសារនៃមាត្រា២៩ច្បាប់អន្តោប្រវេសន៍មាត្រានេះ ត្រូវបានផ្ដន្ទាទោសជនត្រូវចោទដាក់ពន្ធនាគារពី៣ខែទៅ៦ខែ ប៉ុន្តែក្នុងកត្តាខណ្ឌទី១ នៃមាត្រា២៩ ករណីដែលជនត្រូវចោទបានជួយសម្រួលក្នុងការបញ្ចូលជនបរទេសដោយ គ្មានការអនុញ្ញាតឬសមគំនិត ត្រូវផ្ដន្ទាទោសដាក់ពន្ធនាគារពី៦ខែទៅ១ឆ្នាំ ហើយគ្រប់មធ្យោបាយសម្ភារៈប្រើប្រាស់សម្រាប់ប្រព្រឹត្តបទល្មើសត្រូវរឹបអូស។
គួរកត់សម្គាល់ថា នៅខណៈពេលដែលមានការបញ្ជូនខ្លួនទណ្ឌិតជនឈ្មោះវីរៈ ស៊ុមខ្វាមឃីត និងស្រ្តី ឈ្មោះរ៉ាទ្រី ប៉ៃពូតាណាប៉ៃប៊ូន គេឃើញបណ្ដាញផ្សព្វផ្សាយព័ត៌មានរបស់ថៃ យ៉ាងច្រើនកុះករបានមកប្រយិតប្រតោង របងតុលាការរាជធានីភ្នំពេញ ថតរូបភាពនិងសាកសួរព័ត៌មានជនត្រូវចោទទាំង២នាក់ នៅ ពេលដែលពួកគេត្រូវបានអនុរក្សពន្ធនាគារបណ្ដើរយកទៅប្រគល់ខ្លួនឲ្យចៅក្រមស៊ើបសួរ។ នៅពេលមាន ការសាកសួរ ពីអ្នកកាសែតជនជាតិថៃ លោកស៊ុមខ្វាមឃីត បានងាកទៅឆ្លើយតបនឹងសំណួររបស់អ្នកកាសែត ក្នុងអាការៈខ្សឹកខ្សួលហើយពួកគេត្រូវបានដាក់បញ្ចូលទៅក្នុងបន្ទប់សវការទី៣ដើម្បីបន្តនីតិវិធីស៊ើប អង្កេតសាកសួរ នូវបទល្មើសដែលមានចរិកប្រមូលផ្ដុំនូវព័ត៌មានចារកម្ម៕
អមតៈ