ឯកឧត្តម អ៊ាង សុផល្លែត ជំនួនការសម្តេចតេជោនាយករដ្ឋមន្ត្រី
ឲ្យដឹងថា នៅក្នុងឱកាសទទួលជួបសវនាការជាមួយលោក SAID ABU ALI
បេសកជនពិសេសរបស់ប្រធានាធិបតីប៉ាលេស្ទីន នាថ្ងៃទី ១៥ ខែធ្នូ
ឆ្នាំ ២០១១ នៅវិមានសន្តិភាពក្នុងរាជធានីភ្នំពេញ សម្តេចអគ្គមហាសេនាបតីតេជោ ហ៊ុន សែន បានថ្លែងថា ជំហររបស់កម្ពុជាគឺគាំទ្ររដ្ឋប៉ាលេស្ទីនគ្មានការងាករេនោះឡើយ។
សម្តេចតេជោនាយករដ្ឋមន្ត្រី
មានប្រសាសន៍ថា ជារៀងដរាបមកកម្ពុជាតែងតែគាំទ្ររដ្ឋប៉ាលេស្ទីន
ហើយជំហររបស់កម្ពុជាមិនមានការផ្លាស់ប្តូរទេ
ដែលនោះគឺកម្ពុជាគាំទ្ររដ្ឋប៉ាលេស្ទីនឯករាជ្យ និង
អធិបតេយ្យភាពតាមរយៈព្រំប្រទល់ឆ្នាំ ១៩៦៧
ហើយនឹងគាំទ្រប៉ាលេស្ទីនឲ្យទៅជាសមាជិកពេញ
សិទ្ធិរបស់អង្គការសហប្រជាជាតិផងដែរ ។ សម្តេចតេជោក៏
បានថ្លែងអំណរគុណជូន ចំពោះប្រជាជន និង រដ្ឋាភិបាលប៉ាលេស្ទីន
ដែលនៅពេលកន្លងមកតែងតែជួយដល់កម្ពុជា
ជាពិសេសជួយកម្ពុជាក្នុងបុព្វហេតុសន្តិភាព និង បង្រួបបង្រួមជាតិនោះ។
ឯកឧត្តម SAID ABU ALI បានជំរាបជូនសម្តេចតេជោនាយករដ្ឋមន្ត្រីថា
ដំណើរបេសកកម្មរបស់លោកមកកាន់ព្រះរាជាណាចក្រកម្ពុជានាពេលនេះ
គឺដើម្បីពាំនាំនូវការគោរពពីប្រធានាធិបតីប៉ាលេស្ទីនជូនចំពោះសម្តេចអគ្គមហាសេនាបតីតេជោ ហ៊ុន សែន ចំពោះរាជរដ្ឋាភិបាលកម្ពុជា គណបក្សប្រជាជនកម្ពុជា និង ទូលថ្វាយព្រះមហាក្សត្រកម្ពុជាព្រះករុណាព្រះបាទសម្តេច ព្រះបរមនាថ នរោត្តម សីហមុនី
និង ដើម្បីថ្លែងអំណរគុណដល់កម្ពុជា ដែលតែងតែគាំទ្រ
ដល់រដ្ឋប៉ាលេស្ទីនក្នុងរយៈពេលជាច្រើនឆ្នាំកន្លងមកនោះ។ឯកឧត្តម
SAID ABU ALI ក៏បានជំរាបជូន សម្តេចនាយករដ្ឋមន្ត្រីអំពី
ប្រវត្តិ និង បញ្ហាពាក់ព័ន្ធនឹងរដ្ឋប៉ាលេស្ទីន
ហើយក៏បានបញ្ជាក់អំពីបំណង
ចង់ឲ្យកម្ពុជាមានទំនាក់ទំនងកាន់តែខ្លាំងឡើងជាមួយប៉ាលេស្ទីន និង
បានសំដែងនូវការអបអរសាទរជូនចំពោះសម្តេចតេជោ និង រាជរដ្ឋាភិបាលកម្ពុជា ដែលបានទទួលជោគជ័យក្នុងការអភិវឌ្ឍន៍ និង ទទួលបាននូវការគោរពយ៉ាងខ្លាំងពីមជ្ឈដ្ឋានអន្តរជាតិនោះ៕