ក្រុមហ៊ុនធំ ២ របស់ប្រទេសចិន កំពុងពង្រីកទីផ្សាររបស់ខ្លួននៅកម្ពុជា
ក្រុមហ៊ុនផលិតគ្រឿងចក្រសំណង់ និងក្រុមហ៊ុនផលិតត្រាក់ទ័រឈូសដី របស់ប្រទេសចិន ចាប់ដៃគ្នា ឈានទៅរកការចាប់ផ្តើមនៃអាជីវកម្មថ្មីលើវិស័យគ្រឿងចក្របរិក្ខារខ្នាតធំ ក្នុងទីផ្សារប្រទេសកម្ពុជា ។
ការសម្រេចចិត្តចាប់ដៃគ្នាឈានទៅរកការចាប់ផ្តើមនៃអាជីវកម្មថ្មីលើវិស័យគ្រឿងចក្របរិក្ខារខ្នាតធំ ក្នុងទីផ្សារប្រទេសកម្ពុជា ដោយសារក្រុមហ៊ុនសង្កេតឃើញថា ប្រទេសកម្ពុជាមានកន្លែងជាច្រើនដែលអាចអភិវឌ្ឍលើ វិស័យសំណង់។ តាមរយៈទស្សនៈអាជីវកម្មនាំមុខ និងប្រព័ន្ធគ្រប់គ្រងពេញលេញ រួមទាំងបណ្តាញចែកចាយទូលាយ ដែលមានសក្តានុពលពហុចម្រុះផងដែរ ។ នេះជាការបញ្ចាក់ របស់ក្រុមហ៊ុនទាំង២នៅក្នុងពិធីសម្ពោធសហគ្រាសក្រុមហ៊ុនបរិក្ខារគ្រឿងយន្តចំកាត់កម្ពុជា ។
លោក ឈិន ចាវហុង អគ្គនាយកក្រុមហ៊ុនសាន ថួយ (San Tui) មានប្រសាសន៍ថា ក្រុមហ៊ុនបានក្លាយទៅជាក្រុមហ៊ុនឈានមុខគេ ក្នុងចំណោមក្រុមហ៊ុនឆ្នើមចំនួន៥០ទូទាំងសកលលោក និងស្ថិតនៅក្នុងចំណោមក្រុមហ៊ុនឆ្នើម៥០០របស់ប្រទេសចិន ។ក្រុមហ៊ុនចាប់ផ្តើមបង្កើតឡើងនៅឆ្នាំ១៩៨០ ដោយផលិត និងធ្វើអាជីវកម្មលក់ម៉ាស៊ីនមេ និងគ្រឿងបន្លាស់គ្រឿងចក្រសំណង់នានា ព្រមទាំងគ្រឿងបន្លាស់លោហៈធាតុផ្សេងៗ ទៀតចំនួន១០ប្រភេទធំៗ និងផលិតផលស្របតាមក្រិតក្រមចំនួនជាង១៤០ទៀត ។
លោក ឈិន ចាវហុង បន្តថា ក្នុងរយៈពេលកន្លៈឆ្នាំកន្លងមកនេះ ក្រុមហ៊ុនបានទទួលជោគជ័យ ក្នុងទីផ្សារនៅកម្ពុជា ដោយលក់បានគ្រឿងចក្រ១២៨គ្រឿង។ នៅឆ្នាំ២០១១ ក្រុមហ៊ុនសានថួយ សំរេចបានប្រាក់ចំណូលអាជីវកម្មចំនួន១ម៉ឺន៤ពាន់៧រយពីរលាន យ៉េន។
លោក ឧត្តមសេនីយ៍ឯក កែវ វណ្ណថន ប្រធាននាយកដ្ឋាននគរបាលអន្តរជាតិនៃក្រសួងមហាផ្ទៃ មានប្រសាសន៍ថា វត្តមានរបស់ក្រុមហ៊ុនទាំងពីរនៅកម្ពុជា ធ្វើឲ្យប្រជាជនកម្ពុជាមានការងារធ្វើបន្ថែមទៀត និងរួមចំណែកអភិវឌ្ឍន៍ប្រទេសកម្ពុជា និងបានចូលរួមឧបត្ថម្ភរថយន្តពន្លត់អគ្គិសភ័យចំនួន២គ្រឿងដល់ក្រសួងមហាផ្ទៃផងដែរ ។ លោក សង្ឃឹមថា ក្រុមហ៊ុនទាំងពីរ នឹងជួយលើកកម្ពស់ចំណងទាក់ទងពាណិជ្ជកម្ម និងការវិនិយោគ រវាងកម្ពុជា-ចិន ឲ្យកាន់តែរីកចំរើនថែមទៀត ដើម្បីចូលរួមចំណែកអភិវឌ្ឍន៍វិស័យសេដ្ឋកិច្ចនៅកម្ពុជា។
សូមបញ្ជាក់ថា បច្ចុប្បន្នគេសង្កេតឃើញមានក្រុមហ៊ុនជាច្រើន បាននឹងកំពុងធ្វើការពង្រីកអាជីវកម្មរបស់ខ្លួននៅកម្ពុជា បន្ទាប់ពីធនាគារក្នុងស្រុកជាច្រើន ពិសេសធនាគារចិននៅកម្ពុជា បានប្រកាសគម្រោងពង្រីកអាជីវកម្មដោយប្រើប្រាស់ប្រាក់យ៉ាន់រវាងចិន និងកម្ពុជា ។រដ្ឋាភិបាលទាំងពីរ បានសន្យាបង្កើនការធ្វើពាណិជ្ជកម្មទ្វេភាគីពី ២,៥ពាន់លានដុល្លារ គិតត្រឹមខែធ្នូ ឆ្នាំ២០១១ រហូតដល់ ៧ពាន់លានដុល្លារ នៅត្រឹម២០១៥។
តាមទិន្នន័យទទួលបានពីស្ថាន ទូតចិន ពាណិជ្ជកម្មទ្វេភាគីរវាងកម្ពុជា និងចិនកើនឡើង ២,៥ពាន់លានដុល្លារកាលពីឆ្នាំ ដោយកើនឡើង ៧៣,៥លានដុល្លារ បើធៀបនឹងមួយឆ្នាំមុន។ ក្នុងនោះការនាំចេញពីកម្ពុជាទៅចិន មានតម្លៃ ១៨៤លានដុល្លារ កើនឡើង៩៦,៨ភាគរយ ហើយការនាំចេញរបស់ចិន មកកម្ពុជា កើនឡើង ២,៣១ពាន់លានដុល្លារ កើន៧១,៨ភាគរយ។
របាយការណ៍ ពីក្រុមប្រឹក្សាអភិវឌ្ឍន៍កម្ពុជា បានបង្ហាញថា ចាប់ពី១៩៩៤ ដល់ឆ្នាំ២០១១ កម្ពុជាបានទទួលការវិនិយោគពីចិន ក្នុងទឹកប្រាក់ ៨,៩១ពាន់លានដុល្លារ ធ្វើឲ្យចិនក្លាយជាវិនិយោគិនធំជាងគេនៅកម្ពុជា៕