ក្រោយពីបានអញ្ជើញទៅគោរពព្រះវិញ្ញាណក្ខ័ន្ធព្រះបរមសព ព្រះករុណាព្រះបាទ សម្តេចព្រះនរោត្តមសីហនុ នៅព្រះបរមរាជវាំងរួចមក ឯកឧត្តម លី សៀនលុង នាយករដ្ឋមន្ត្រី សឹង្ហបូរីក៏បានមកជួបសន្ទាជាមួយសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានៅវិមានសន្តិភាពផងដែរ។នៅក្នុងជំនួបនាព្រឹកថ្ងៃអាទិត្យទី២១តុលានេះ ឯកឧត្តម លី សៀនលុង បានជំរាបជូនសម្តេចតេជោនាយករដ្ឋមន្ត្រីថា ក្នុងនាមថ្នាក់ដឹកនាំ និងប្រជាជនសឹង្ហបូរីទាំងអស់ សូមគោរព និងសំដែងនូវព្រះមរណទុក្ខយ៉ាងក្រៀមក្រំជាទីបំផុតចំពោះការយាងចូលព្រះទិវង្គត របស់ព្រះករុណាសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ និងសូមគោរព និងចូលរួមរំលែកនូវមរណទុក្ខជាមួយរាជរដ្ឋាភិបាលកម្ពុជា ព្រមទាំងរាជវង្សានុវង្ស និងប្រជាជនកម្ពុជាទូទាំងប្រទេសក្នុងឱកាសដ៏សែនក្រៀមក្រំនេះ។
ឯកឧត្តមបន្តថា ព្រះករុណាសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ មានស្នាព្រះហស្តជាច្រើន និងចងចាំមិនភ្លេចទេនូវអ្វី ដែលអតីតព្រះមហាក្សត្របានធ្វើ និងចងចាំមិនភ្លេច ដែលកម្ពុជាជាប្រទេសទី១ ទទួលស្គាល់ឯករាជ្យភាពរបស់សឹង្ហបូរី។
ជាការឆ្លើយតប សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងអំណរគុណយ៉ាងជ្រាលជ្រៅជូនចំពោះឯកឧត្តម លី សៀនលុងនិងប្រតិភូដែលជាថ្នាក់ដឹកនាំសឹង្ហបូរីដែលបានសំដែងនូវព្រះមរណៈទុក្ខជូនចំពោះព្រះបរមសពរបស់សម្តេចព្រះនរោត្តម សីហនុ ព្រះវររាជបិតាជាតិខ្មែរ និងដឹកនាំប្រតិភូ មកគោរពវិញ្ញានក្ខ័ន្ធព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ។