សម្ដេចអគ្គមហាសេនាបតីតេជោ ហ៊ុន សែន បានប្រកាសឲ្យដឹងថា ក្នុងការដោះស្រាយបញ្ហាដីធ្លី បើមានអ្នកនយោបាយ អង្គការក្រៅរដ្ឋាភិបាល ឬបក្សនយោបាយចូលឡូកឡំហើយសម្តេចនឹងមិនដោះស្រាយជូនទេ សូមបង្កកទុកមួយកន្លែងសិន។ សម្ដេចតេជោបានថ្លែងយ៉ាងដូច្នេះ នាព្រឹក ថ្ងៃទី២៣ ខែវិច្ឆិកា ឆ្នាំ២០១២ ក្នុងឱកាសអញ្ជើញជាអធិបតី ក្នុងពិធីប្រគល់ប័ណ្ណកម្មសិទ្ធិដីធ្លី ជូនប្រជាពលរដ្ឋ៥៧០គ្រួសារ នៅភូមិចម្ការស្រមូវ សង្កាត់ប៉ាលហាល ក្រុងព្រះវិហារ ខេត្ដព្រះវិហារ។
សម្ដេចតេជោមានប្រសាសន៍បញ្ជាក់ថា បើកាលណាមាននយោបាយចូលឡូកឡំហើយ គឺដោះមិនចេញទេ បើចង់ឱ្យខ្ញុំជួយដោះស្រាយ កុំឱ្យអ្នកនយោបាយ អង្គការក្រៅរដ្ឋាភិបាល ប្រឆាំងចូលឡូកឡំឱ្យសោះ ។
សម្ដេចតេជោនាយករដ្ឋមន្ដ្រីគូសបញ្ជាក់ថា ជាចំណុចធំរបស់ខ្ញុំ គឺរឿងដោះស្រាយឱ្យពិតប្រាកដ បើដោះស្រាយ វាមិនពិត ហើយក្រុមនឹងក្រុមមួយទៀតបានប្ដឹងផ្ដល់គ្នា លុះដល់ប្ដឹងមានភាពចាញ់ប្រៀបគេ ក៏ដឹកនាំមនុស្សទៅធ្វើបាតុកម្មនៅទីក្រុងភ្នំពេញបង្កើតជាបញ្ហា។
នេះគ្រាន់តែជូនសារមួយ បើចង់ឱ្យរាជរដ្ឋាភិបាលដោះស្រាយ កុំពាក់ព័ន្ធរឿងនយោបាយ ខ្ញុំបានប្រាប់ដល់ក្មួយៗ យុវជនស្ម័គ្រចិត្ដថា តាំងពីមុនចេញដំណើរហាមសួរ នៅពេលមកដល់ថា ពូ មីង បង តើបោះឆ្នោតឱ្យបក្សណាហាមសួរ។
សម្ដេចតេជោមានប្រសាសន៍បញ្ជាក់ថា អត់មានប្រកាន់បក្សណាៗទេ ចែកដីជូនឱ្យទាំងអស់ ព្រោះសុទ្ធតែប្រជាពលរដ្ឋខ្មែរដូចតែគ្នា។ ឯសិទ្ធិនយោបាយ គឺជារឿងមួយទៀត ដូច្នេះបងប្អូនប្រជាពលរដ្ឋដែលបានអញ្ជើញមកទទួលកម្មសិទ្ធិនៅកន្លែងនេះ មិនពិតប្រាកដថា បោះឆ្នោត ឱ្យគណបក្សប្រជាជនទេ។ ខ្ញុំមិនបានសួរដេញដោលពីរឿងហ្នឹងទេ ហើយខ្ញុំក៏មិនប្រកាន់ថា ទាល់តែគណបក្សប្រជាជន ទាល់តែគណបក្សហ្វ៊ុនស៊ិនប៉ិច ដែលជាដៃគូក្នុងរដ្ឋាភិបាលទើបចែកឱ្យទេ គឺឱ្យទាំងអស់។ ប៉ុន្ដែពេលដោះស្រាយសូមកុំឱ្យពួកនយោបាយចូលឡូកឡំនៅក្នុង នោះ រាប់ទាំងអ្នកនយោបាយគណបក្សប្រជាជនហាមលូកលាន់។ បើសិនមានគណបក្សប្រជាជនចូលលូកលាន់ ខ្ញុំស្រួលណាស់ដកហូត ព្រោះនៅក្នុងគណបក្សប្រជាជនច្បាស់ជាមានតំណែង ហើយបើសមត្ថកិច្ចរាជរដ្ឋាភិបាលខ្ញុំ ដាក់ភ្លាមអនុក្រឹត្យចេញមិនដល់មួយម៉ោងផង។ ខ្ញុំមិនប្រកាន់បក្សណា បក្សណាទេ ប៉ុន្ដែបក្សដទៃខ្ញុំមិនហ៊ានលូកលាន់ជាមួយគេទេ ប៉ុន្ដែបើមនុស្សរបស់គណបក្សប្រជាជន គឺអត់មានអត់ឱនឱ្យបានទេ។ ដូច្នេះហើយបើចង់ឱ្យខ្ញុំ ដោះស្រាយទៅតាមច្បាប់តាមគោលការណ៍ដែលមានស្រាប់ ហើយកុំបំភ័ន្ដ បើបំភ័ន្ដគឺដោះស្រាយ វាមិនចេញ។
សម្ដេចអគ្គមហាសេនាបតីតេជោ ហ៊ុន សែន បញ្ជាក់ថា ខ្ញុំប្រាប់ឱ្យហើយណា៎ កម្ពុជាអត់មានអ្នកទោសនយោបាយទេ មានតែអ្នកនយោបាយជាប់ទោសព្រហ្មទណ្ឌតែប៉ុណ្ណោះ។ នៅពេល ចង់ឱ្យខ្ញុំអន្ដរាគមន៍ ដោយសំអាងថា ខ្ញុំត្រួតត្រាតុលាការ។ បើសិនជាខ្ញុំអន្ដរាគមន៍ដោះលែងអ្នកទោសនោះ មិនដូចជាអ្នកឯងថាទៅហើយៗចេះតែចោទខ្ញុំថា ត្រួតត្រាតែតុលាការគឺជា ប្រព័ន្ធឯករាជ្យរបស់គេ រួចស្នើឱ្យខ្ញុំទៅ ធ្វើខុសច្បាប់ឱ្យដោះលែងអ្នកទោស។ ខ្ញុំមិនអាចធ្វើទៅបានទេ ព្រោះតុលាការគេឯករាជ្យរបស់គេ ទោះបីជាយើងធ្វើខុសក៏ត្រូវតុលាការគេត្រូវកាត់ទោសដែរ គ្មានអ្នកណាមួយអាចនៅលើច្បាប់បានទេ។
ទាក់ទងនឹងបញ្ហអ្នកទោសនយោបាយដែលត្រូវបានអង្គការសិទ្ធិមនុស្ស និងគណបក្សនយោបាយមួយចំនួនលើកឡើង សម្ដេចតេជោបានមានប្រសាសន៍ថា ដូចខ្ញុំបានបញ្ជាក់ស្រេចហើយថា ខ្មែរគ្មានអ្នក ទោសនយោបាយទេ មានតែអ្នកនយោបាយធ្វើខុសច្បាប់ជាប់ទោសព្រហ្មទណ្ឌ ហើយអត់មានចេញមកបង្ហាញការបញ្ចេញមតិទេ នរណាក៏ដោយឱ្យតែប្រព្រឹត្ដខុស ជាប់គុកព្រហ្មទណ្ឌដូចតែគ្នា ដូចជាកន្លងទៅមានមន្ដ្រីរបស់រាជរដ្ឋាភិបាលមួយចំនួនបានជាប់រួចទៅហើយ ដូចជាមេទាហាន មេនគរបាល មួយចំនួនទៅហើយ អស់លោកពាក់ ផ្កាយ អស់មួយចំនួន ។
សម្ដេចតេជោបញ្ជាក់ថា អស់លោកពាក់ផ្កាយទាំងនោះ អនុវត្ដខុសច្បាប់ពាក់ព័ន្ធនឹងការជួញដូរគ្រឿងញៀន ពាក់ព័ន្ធទៅនឹងការរំលោភបំពានផ្សេងៗ អស់ផ្កាយច្រើន ព្រោះតុលាការគេយក ទៅកាត់ទោស ។
ជាមួយនឹងប្រសាសន៍ដូច្នេះ សម្តេចតេជោនាយករដ្ឋមន្ត្រី ហ៊ុន សែន ក៏បានគូសបញ្ជាក់ថា "ហើយចង់ឲ្យខ្ញុំធ្វើអន្តរាគមន៍ ហើយចោទថា ខ្ញុំកំពុងត្រួតត្រាតុលាការ។ អីចឹងទេ ឲ្យខ្ញុំទៅអន្តរាគមន៍ដោះលែងអ្នកទោស ខ្ញុំមិនដូចអ្នកឯងថា ( ខ្ញុំកំពុងត្រួតត្រាតុលាការ )។ មិនអីចឹង?។ មកចោទប្រកាន់ខ្ញុំ ថាខ្ញុំកំពុងត្រួតត្រាលើតុលាការ ដែលជាប្រព័ន្ធឯករាជ្យមួយរបស់គេ។ រួចមកស្នើឲ្យខ្ញុំ ទៅធ្វើខុសច្បាប់។ ឲ្យដោះលែងអ្នកទោស ស្អីអីចេះអីចុះ ហើយបើខ្ញុំទៅដោះលែងអ្នកទោស តើខ្ញុំទៅធ្វើម៉េចជាមួយតុលាការ ព្រោះតុលាការគេឯករាជ្យរបស់គេ។ យើងធ្វើខុស ក៏ត្រូវតុលាការ គេកាត់ទោសដែរ។ គ្មាននរណាមួយ អាចនៅលើច្បាប់បានទេ"។
សម្ដេចតេជោក៏បានមានប្រសាសន៍រំលឹកដល់ក្រុមអង្គការអេដស៍ ហើយមួយក្រុមទៀត ដឹកនាំដោយអង្គការក្រៅរដ្ឋាភិបាលដឹកនាំធ្វើបាតុកម្ម ហើយនាំគ្នាផ្ដិតមេដៃជាតំណាងយកស្នាមមេដៃទៅស្គេន រួចចេះតែដាក់ឈ្មោះនេះ ឈ្មោះនោះ ឱ្យតែបានច្រើនទៅ។ ប៉ុន្ដែក្នុងករណីទាំងនេះ ដល់ពេលសមត្ថកិច្ចយក ទៅធ្វើកោសល្យវិច័យ ទើបធ្លាក់ចូលទៅក្នុងបទល្មើសក្លែងឯកសារសាធារណៈ លុះដល់ជាប់ទោស ចាប់តាំងផ្ដើមរកអន្ដរាគមន៍ ។
ទាក់ទងនឹងការប្រើអង្គការដើម្បីសុំដីធ្លីពីរដ្ឋ សម្ដេចតេជោបានមានប្រសាសន៍បញ្ជាក់ថា ពេលថ្ងៃក្រោយ កុំឱ្យមានអង្គការមកសុំដីធ្លីសុំចុះសុំឡើង យូរទៅអង្គការក្លាយទៅជាមានកម្មសិទ្ធិដីធ្លី ឱ្យតែឈ្មោះអង្គការ គឺអត់មានកម្មសិទ្ធិដីធ្លីទេ។ សុំកុំឱ្យមានបន្ដទៀត ចំពោះអង្គការសុំដី។ ដោយឡែកចំពោះអង្គការណាមួយសុំដីសាងសង់មន្ទីរពេទ្យ សាលារៀន មជ្ឈមណ្ឌល កុមារកំព្រា មានទាស់អ្វី យើងធ្វើបាន ប៉ុន្ដែសុំដីសម្រាប់កម្មសិទ្ធិគឺអត់ទេ ដូចជាអង្គការមួយសុំធ្វើហាយវ៉េចំនួន៧០គម ខ្ញុំអត់ហ៊ាននិយាយទេណា៎ ។
សម្ដេចតេជោនាយករដ្ឋមន្ត្រីបានរំលឹកថា កាលពីជំនាន់មានគ្រោះមហន្ដរាយមានក្រុមមួយចំនួនជិះរថយន្ដតាក់ស៊ីមកបាតុកម្មសុំឲ្យកាកបាទក្រហមជួយ។ ខ្ញុំបានប្រាប់គ្រួសារ (ជំទាវកិតិព្រឹទ្ធបណ្ឌិត ប៊ុន រ៉ានី) ថា សូម្បីតែមួយគ្រាប់គួរកុំឱ្យ។ ព្រោះជនរងគ្រោះពិតប្រាកដគ្មានឱកាសជិះឡានតាក់ស៊ីមកសុំជំនួយទេ គេត្រូវការមើលគោ ក្របី ទីកន្លែង ស្រែ ចម្ការ ។ ដូច្នេះ មនុស្សដែលមកធ្វើបាតុកម្ម ដែលដឹកនាំដោយបក្សប្រឆាំងនេះ គឺអត់មានរស់នៅឆ្ងាយពីទីក្រុងភ្នំពេញទេ។
សម្ដេចតេជោបញ្ជាក់ថា ដែលហៅថា ជំនួយមនុស្សធម៌គឺមានគោលដៅច្បាស់លាស់ ដែលត្រូវដោះ នេះគឺការលើកឡើងនេះបញ្ជាក់ឱ្យឃើញថា ការដោះស្រាយ គឺត្រូវមានគោលការណ៍ត្រឹមត្រូវច្បាស់លាស់ ។
សម្ដេចតេជោនាយករដ្ឋមន្ដ្រីមាន ប្រសាសន៍ថា ឥឡូវនេះ ដូចជាមិនទាន់បានឃើញគេផ្សាយថា អនុក្រឹត្យបានចេញកាត់ដីឱ្យទៅប្រជាពលរដ្ឋបានប៉ុណ្ណេះ ស.ជ.ណ. កាត់ដីឱ្យប្រជាពលរដ្ឋប៉ុណ្ណេះ ដូចជាមិនបានឃើញមានកាសែតណាផ្សាយ ដូចជាឆ្ងល់។
ប៉ុន្ដែបើគ្រាន់តែបញ្ចេញតាមនីតិវិធីក្នុងបទបញ្ជាលេខ០១ បានបញ្ជាក់ថា ចំពោះដីសម្បទានសេដ្ឋកិច្ចណាដែលបានទទួលការអនុញ្ញាត នៅមុនថ្ងៃចេញបទបញ្ជានេះ ត្រូវបន្ដនីតិវិធីជាធរមាន ក្នុងនីតិវិធីជាធរមាននោះគឺមានក្រឹត្យ ស្ដីពីការវិនិយោគ។ កាសែតចុះម្ដង ហើយម្ដងទៀតទាល់តែខុទ្ទកាល័យរបស់ខ្ញុំចេញប្រតិកម្ម។ គេថា លោក ហ៊ុន សែន បានផ្ដល់ដីសម្បទានទៀតហើយ ខុសអ្វីពីបទបញ្ជា។ នេះពិតជាវិធីមួលបង្កាច់មួយដ៏ថោកទាប។ តែឥឡូវនេះ ខ្ញុំកំពុងរង់ចាំមើលកាសែតដដែល តើគេបានចុះផ្សាយអំពីអនុក្រឹត្យ និងសេចក្ដីសម្រេចរាប់សិបរួចមកហើយឬនៅ? ខ្ញុំចង់ដាស់តឿនគេ។ ព្រោះបើនិយាយពីអនុក្រឹត្យ និងសេចក្ដីសម្រេចសុទ្ធតែបញ្ចូលក្នុងវេបសាយរហូត តែគេអត់យកទៅផ្សាយឯណា។ គេបែរជាផ្សាយថា អំពីលោក ហ៊ុន សែន ផ្ដល់ដីសម្បទានទៀតហើយ បំពានលើបទបញ្ជាខ្លួនឯង នៅពេលដែលបទបញ្ជាលេខ០១ ថាត្រូវបំពេញលើនីតិវិធីជាធរមាន ។
សម្ដេចតេជោមានប្រសាសន៍ថា ក្នុងនីតិវិធីជាធរមាននោះ មានអនុបយោគ ហើយអនុបយោគនេះ ក៏មានទាក់ទងទៅនឹងបទបញ្ជា០១នេះទៀត អនុបយោគ ហើយក៏ត្រូវកាត់យកមកវិញនូវអ្វីពាក់ព័ន្ធជាមួយប្រជាពលរដ្ឋ និងដី គេអត់បានផ្សាយទេ ត្រង់ហ្នឹងអ្វីដែលរាជរដ្ឋាភិបាលធ្វើគេអត់បានផ្សាយទេ។ សម្តេចតេជោមានប្រសាសន៍ថា មានបរទេសគេបាននិយាយថា កម្ពុជាធ្វើបានច្រើន ប៉ុន្ដែនិយាយបានតិចនៅខាងក្រៅ ផ្នែកសារព័ត៌មាន គឺនិយាយបានតិច ឯខ្ញុំមកឃើញ គឺផ្សេង។
ទាក់ទងនឹងបញ្ហានេះ សម្ដេចតេជោបញ្ជាក់ថា ត្រឹមត្រូវហើយ កម្ពុជាមានពីរ កម្ពុជាមួយតាម សារព័ត៌មាន ឯកម្ពុជាមួយ គឺកម្ពុជាពិតដែលគេបានមកឃើញ។ ឯកម្ពុជា តាមសារព័ត៌មាន គឺជាកម្ពុជាឋាននរក ឯកម្ពុជាពិត គឺបានឃើញហើយ ទៅទីកន្លែងណា និយាយក៏បាន អត់មានការរារាំងសិទ្ធិ៕