ប្រសិនបើសម្តេចតេជោបន្តធ្វើជានាយករដ្ឋមន្ត្រី
ក្នុងអាណត្តិទី៥ រយៈពេល៥ឆ្នាំខាងមុខនេះ ព្រះរាជាណាចក្រកម្ពុជា
យ៉ាងហោចណាស់មានផ្លូវលំនៅជនបទដែលក្រាលកៅស៊ូ ២០០០គីឡូម៉ែត្រ
នេះមិនគិតពីការអភិវឌ្ឍន៍ផ្សេងៗទៀតនោះឡើយ។ ការសន្និដ្ឋាន
និងវាយតម្លៃបែបនេះ គឺផ្អែកទៅតាមប្រសាសន៍របស់សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ដែលបានថ្លែងក្នុងឱកាសសម្ពោធដាក់ឲ្យប្រើប្រាស់ ផ្លូវជាតិ លេខ៨ នៅខេត្តព្រៃវែង
ក្រោមឥណទានប្រាក់កម្ចីរបស់សាធារណរដ្ឋប្រជាមានិតចិន កាលពីព្រឹកថ្ងៃទី២២
ខែវិច្ឆិកា ឆ្នាំ២០១២។
ជាមួយនឹងការថ្លែងអបអរសាទរចំពោះជោគជ័យនៃមហាសន្និបាតលើកទី១៨
នៃបក្សកុម្មុយនីស្តចិន ដែលទើបនឹងបានបញ្ចប់កាលពីពេលថ្មីៗនេះ
ក៏ដូចជាអបអរសាទរថ្នាក់ដឹកនាំថ្មីរបស់ចិន
សម្តេចតេជោនាយករដ្ឋមន្ត្រីបានឲ្យដឹងថា
សម្តេចបានស្វះស្វែងរកឥណទានកម្ចីរបស់ចិនក្នុងមួយឆ្នាំ
ក្នុងរង្វង់ពី៣០០ ទៅ៥០០លានដុល្លារអាមេរិក ដែលក្នុងថវិកានេះ សម្តេចបានដាក់បញ្ចូលក្នុងផែនការសំរាប់ឆ្នាំ២០១៣
នៅគម្រោងក្រាលកៅស៊ូផ្លូវលំមិនតិចជាង ៤០០គីឡូម៉ែត្រក្នុងមួយឆ្នាំ។
ឯកឧត្តម ស៊ី ជិនភីង
ត្រូវបានមហាសន្និបាតបក្សកុម្មុនីស្តចិនលើកទី១៨ ជ្រើសតាំងជាអគ្គលេខាបក្សកុម្មុយនីស្តចិន
ដែលនឹងក្លាយជាប្រធានាធិបតីចិន ក្នុងខែមីនា ឆ្នាំ២០១៣ខាងមុខនេះ។
សម្តេចតេជោនាយករដ្ឋមន្ត្រីបានមានប្រសាសន៍ថា
នយោបាយហេដ្ឋារចនាសម្ព័ន្ធនៅតែបន្ត ហើយជំរុញខ្លាំងបន្ថែមទៀត
និងពន្លឿនទាក់ទងនឹងជនបទ។ យើងត្រូវបន្តការខិតខំ
ហើយនេះជាគោលនយោបាយរបស់រាជរដ្ឋាភិបាល
នៅក្នុងការដាក់ចេញនូវនយោបាយស្តីពីការបែងចែកផ្លែផ្កា នៃកំណើនសេដ្ឋកិច្ច
ប្រកបដោយសមធម៌ និងទូលំទូលាយ។
សម្តេចតេជោបានមានប្រសាសន៍គូសបញ្ជាក់ថា
គ្មានអ្វីប្រសើរជាងការយកប្រាក់ដើម្បីទៅវិនិយោគលើវិស័យហេដ្ឋារចនាសម្ព័ន្ធសាធារណៈ
ដែលជាផ្នែកសំខាន់នៃការអនុវត្តន៍នយោបាយសមធម៌ នៃការបែងចែកផ្លែផ្កា
នៃកំណើនសេដ្ឋកិច្ច ប្រជាពលរដ្ឋគ្រប់រូបនឹងបានប្រើប្រាស់ផ្លូវទាំងនេះ។
“យើងយកប្រាក់ដើម្បីធ្វើផ្លូវ យកប្រាក់ដើម្បីធ្វើស្ពាន ធ្វើប្រឡាយទឹក
ធ្វើមន្ទីរពេទ្យ ធ្វើសាលារៀន…អ្នកណាក៏បានប្រើដែរ គឺសមធម៌ជាទីបំផុត”។
ទន្ទឹមនឹងការថ្លែងអំណរគុណដល់រដ្ឋាភិបាលចិន
ដែលបានផ្តល់ឥណទានសំរាប់ការសាងសង់ផ្លូវជាតិលេខ៨
សម្តេចតេជោបានមានប្រសាសន៍ថា យើងសង្ឃឹមថា ការរីកចំរើនរបស់ប្រទេសចិន
មិនគ្រាន់តែជួយប្រទេសចិនខ្លួនឯងប៉ុណ្ណោះទេ ក៏ប៉ុន្តែនឹងជួយដល់ប្រទេសអភិវឌ្ឍន៍ដទៃទៀត
ដែលត្រូវការចិន រាប់ទាំងប្រទេសអភិវឌ្ឍន៍ដែលកំពុងមានវិបត្តិ ដូចជានៅអឺរ៉ុប
ដែលកំពុងត្រូវការទុនរបស់ចិនសង្គ្រោះផងដែរ។
ឯកឧត្តម ត្រាំ អ៊ីវតឹក រដ្ឋមន្ត្រីក្រសួងសាធារណការ
និងដឹកជញ្ជូន បានមានប្រសាសន៍ឲ្យដឹងថា សមិទ្ធផលដែលត្រូវធ្វើពិធីសម្ពោធ
ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
និងវត្តមានឯកឧត្តម ផាន គ័ងស៊ា (PAN GuangXue) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជា
រួមមានៈ ទី១,គម្រោងសាងសង់ផ្លូវជាតិលេខ៨
ពីស្ពានព្រែកតាមាក់ដល់អន្លង់ជ្រៃ ប្រវែង១០៩គីឡូម៉ែត្រ ក្នុងនោះមានស្ពានចំនួន១២៨កន្លែង
លូ២៦១កន្លែង។ ទី២,គម្រោងសាងសង់ផ្លូវខ្នែងផ្លូវជាតិលេខ៨-១ ចាប់ពីក្របៅដល់ម៉ឺនជ័យ និងផ្លូវជាតិលេខ៨-២ ពីអន្លង់ជ្រៃដល់ផ្សារស្ទឹង (ពញ្ញាក្រែក ផ្លូវជាតិលេខ៧
ប្រវែងសរុប ២៤.១៧គីឡូម៉ែត្រ)។
សរុបថវិកាអស់ជាង១០០លានដុល្លារអាមេរិក ក្នុងនោះឥណទានរបស់ប្រទេសចិនចំនួន ៨៣លានដុល្លារអាមេរិក
និងថវិកាបដិភាគរបស់រដ្ឋាភិបាលចំនួន ២៤លានដុល្លារអាមេរិក។ ផ្លូវជាតិលេខ៨
គឺជាផ្លូវជាតិប្រវត្តិសាស្ត្រ ដែលត្រូវបានកសាងឡើង
ក្រោមគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន ។
ឯកឧត្តម ផាន គ័ងស៊ា (PAN GuangXue) បានវាយតម្លៃថា
ផ្លូវជាតិលេខ៨ នឹងនាំមកនូវសំណាងល្អ
និងទ្រព្យសម្បត្តិជូនដល់ប្រជាជនកម្ពុជា
ដែលរស់នៅតាមបណ្តោយផ្លូវជាតិលេខ៨នេះ។
សូមបញ្ជាក់ថា
គម្រោងកសាងផ្លូវលំក្រាលកៅស៊ូនៅជនបទមានទំហំ៦ម៉ែត្រ
គឺធំជាងផ្លូវជាតិកាលពីអតីតកាល ដែលមានត្រឹមតែ៥ ទៅ៦ ម៉ែត្រប៉ុណ្ណោះ។
អត្ថបទ អង្គភាពព័ត៌មាន និងប្រតិកម្មរហ័ស