សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកវត្តមានរបស់ធនាគារ
ANZ នៅកម្ពុជា មានសារៈសំខាន់ណាស់ក្នុងការរួមចំណែកដល់សេដ្ឋកិច្ចកម្ពុជា។
សម្តេចតេជោបានស្នើដល់ធនាគារ ANZ ឲ្យបន្តបណ្តាក់ទុន
និងមានវត្តមាននៅក្នុងប្រទេសកម្ពុជាជាបន្តទៀត។
សម្តេចតេជោនាយករដ្ឋមន្ត្រី បានមានប្រសាសន៍បែបនេះ ក្នុងឱកាសអនុញ្ញាតឲ្យលោក Michael Smith អគ្គនាយកធនាគារ
ANZ ពិភពលោក ចូលជួបសម្តែងការគួរសមនៅសណ្ឋាគារអាំងទែកុងទីណង់តាល់
ក្នុងរាជធានីភ្នំពេញ នាថ្ងៃទី២០ ខែកុម្ភៈ ឆ្នាំ២០១៣។
ឯកឧត្តម
អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា សម្តេចតេជោនាយករដ្ឋមន្ត្រីមានប្រសាសន៍ថា
វត្តមានរបស់ធនាគារ ANZ គឺជាការផ្តល់នូវជំនឿទុកចិត្តដល់អ្នកវិនិយោគទុនមកកាន់ប្រទេសកម្ពុជា កាន់តែច្រើនឡើងថែមទៀត។ សម្តេចតេជោបានគូសបញ្ជាក់ដែរថា កាលពីដើមឡើយប្រទេសកម្ពុជា
ធ្វើការនាំចេញទៅកាន់ទីផ្សារនៃប្រទេសដែលកំពុងតែមានវិបត្តិ ប៉ុន្តែឥឡូវនេះ កម្ពុជាបានដាក់នយោបាយថ្មី
គឺបន្តរក្សាទីផ្សារចាស់ និងបើកទូលាយទៅកាន់ទីផ្សារថ្មីសម្រាប់ការនាំចេញ។
លោក Michael Smith នាយកធនាគារ ANZ ពិភពលោក បានមានប្រសាសន៍ឲ្យដឹងថា
រហូតមកដល់ពេលនេះ ធនាគារ ANZ មានវត្តមាននៅក្នុងប្រទេសចំនួន៣៤ ជាពិសេសនៅក្នុងតំបន់អាស៊ីប៉ាស៊ីហ្វិក
និងមានទុនប្រមាណ ៦ ០០០ លាន ដុល្លារសហរដ្ឋអាមេរិក។ លោក
Michael Smith បានបញ្ជាក់ថា ធនាគារ ANZ នឹងបន្តដាក់ទុនវិនិយោគក្នុងប្រទេសកម្ពុជា
ជាពិសេសទៅលើប្រព័ន្ធបច្ចេកវិទ្យា។
លោក Michael Smith មានប្រសាសន៍ថា ពិភពលោកយើងក្នុងពេលបច្ចុប្បន្នពោរពេញទៅ
ដោយភាពសុទិដ្ឋិនិយម បើប្រៀបធៀបទៅនឹងរយៈពេល ២ឆ្នាំ
កន្លងមក ពិសេសបញ្ហាដែលបានកើតមានឡើងនៅតំបន់អឺរ៉ុប។
លោកអគ្គនាយកបន្តថា មកដល់ពេលនេះតំបន់អឺរ៉ុបមានភាពប្រសើរឡើងវិញហើយ បញ្ហាវត្តមាននៃប្រាក់អឺរ៉ូនឹងមិនមានបញ្ហាកើតឡើងតទៅទៀតដែរ ប៉ុន្តែយើងត្រូវការរយៈពេលវែងទៀត ដើម្បីបន្តដោះស្រាយនូវបញ្ហាដែលបានកើតមានឡើង៕