សម្តេចតេជោនាយករដ្ឋមន្ត្រីក្នុងនាមជា
ជនពិការ ដើម្បីបុព្វហេតុប្រទេសជាតិមួយរូប បានថ្លែងអំណរគុណ
ចំពោះសប្បុរសជន ដែលបានជួយគាំទ្រដល់សាលាកុមារពិការភ្នែក
និងកុមារគថ្លង់ភ្នំពេញថ្មី សាលាកុមារគថ្លង់ច្បារអំពៅ
និងបុរីកុមារកំព្រា ASPECA
និងសាលារៀនកុមារពិការនានានៅទូទាំងកម្ពុជា
ក៏ដូចជាចំពោះសកម្មភាពរបស់គណៈគ្រប់គ្រង
និងលោកគ្រូអ្នកគ្រូទាំងអស់
ដែលធ្វើឱ្យស្ថានភាពរបស់កុមារពិការភ្នែក និងគថ្លង់
មានភាពកក់ក្តៅដោយសារតែមានការយកចិត្តទុកដាក់ពីថ្នាក់ដឹកនាំគ្រប់
គ្រងទាំងខ្មែរ និងបរទេស។ សម្តេចតេជោសែនមានប្រសាសន៍ថា
ខ្ញុំសប្បាយរីករាយជាមួយនឹងអ្វីដែលអស់លោកអ្នកបានជួយចំពោះចៅៗ
ទាំងឡាយ
ដែលបានធ្វើឲ្យស្ថានភាពរបស់កុមារពិការទាំងឡាយរបស់យើងមានសភាពល្អ
ប្រសើរ ដោយបានធ្វើឲ្យពួកគេមានសុវត្ដិភាពក្នុងការស្នាក់អាស្រ័យ
និងការរៀនសូត្រ។
សម្តេចតេជោក៏បានថ្លែងអំណរគុណដល់
ក្រសួងសង្គមកិច្ចអតីតយុទ្ធជន
និងយុវនីតិសម្បទាដែលបានយកចិត្តទុកដាក់លើការគ្រប់គ្រងស្ថានភាព
កុមារ មិនត្រឹមតែនៅអង្គការគ្រួសារថ្មីនេះទេ
គឺនៅមានអង្គការជាច្រើនទៀតដែលបានចូលរួមក្នុងកិច្ចការនេះដែរ។
ជាមួយនេះសម្តេចតេជោនាយករដ្ឋមន្ត្រី
ក៏បានថ្លែងអំណរគុណដល់អាជ្ញាធរដែនដីគ្រប់ទីកន្លែងទាំងអស់ដែលបាន
យកចិត្តទុកដាក់ចំពោះសុវត្ថិភាពទាំងឡាយ ដូចជាសន្តិសុខ សណ្តាប់ធ្នាប់
ដើម្បីឱ្យកុមារទាំងអស់អាចទទួលបាននូវការថែទាំមួយត្រឹមត្រូវ។
សម្តេចបានអរគុណផងដែរ
ចំពោះមន្ត្រីថ្នាក់ដឹកនាំស្ថាប័នមួយចំនួនរបស់រាជរដ្ឋាភិបាល
រួមមានឯកឧត្តម ឧបនាយករដ្ឋមន្ត្រី ស ខេង ,ឯកឧត្តម ឧបនាយករដ្ឋមន្ត្រី ទៀ
បាញ់ និងលោកជំទាវ, ឯកឧត្តម ខៀវ កញ្ញារីទ្ធ និងលោកជំទាវ,
ដែលបានយកចិត្តទុកដាក់ទទួលជួយឧបត្ថម្ភដល់កុមារនៅមជ្ឈមណ្ឌលរបស់
អង្គការគ្រួសារថ្មីនៅខេត្តបាត់ដំបង សៀមរាប និងខេត្តកំពង់ចាម។
ដោយឡែកនៅរាជធានីភ្នំពេញ សម្តេចតេជោ និងលោកជំទាវ
បានទទួលឧបត្ថម្ភសាលាចំនួន២ ទី១, គឺសាលាកុមារពិការភ្នែក
និងកុមារគថ្លង់ភ្នំពេញថ្មី និងសាលាកុមារគថ្លង់ច្បារអំពៅ។
ភាពសប្បាយរីករាយ
និងស្និទ្ធស្នាលរាក់ទាក់ប្រៀបបាននឹងឪពុកម្តាយធ្វើចំពោះកូន
បានកើតឡើងនៅពេលទទួលទានអាហារ ដោយសម្តេចតេជោ
និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន
ព្រមទាំងថ្នាក់ដឹកនាំជាន់ខ្ពស់ និងលោកជំទាវ
ដែលអមដំណើរបានចាប់ម្ហូបអាហារឆ្ងាញ់ៗដាក់ចាន និងបញ្ចុកពួកគេ។
វត្តមានរបស់សម្តេចតេជោ និងលោកជំទាវ
ក្រៅពីបានបង្ហាញពីសេចក្តីអាណិតស្រលាញ់ និងភាពស្និទ្ធស្នាល
និងសេចក្ដីនឹករលឹកដល់បងប្អូនជនពិការទាំងអស់
គឺជាសកម្មភាពលើកទឹកចិត្តចំពោះការតស៊ូ
និងការប្ដេជ្ញាចិត្ដរបស់ក្មួយៗកុមារ
ក៏ដូចជាបងប្អូនជនពិការទូទាំងប្រទេសក្នុងការរស់នៅរៀនសូត្រ
និងចូលរួមចំណែកដល់ការអភិវឌ្ឍវិស័យសេដ្ឋកិច្ច សង្គមកិច្ច នយោបាយ
និងវប្បធម៌ បើទោះជាខ្លួនជាជនពិការក៏ដោយ។
មានកុមារពិការភ្នែក និងកុមារគថ្លង់
ចំនួន ១.២១៥នាក់ រួមទាំងបុគ្គលិកគ្រប់គ្រង លោកគ្រូ-អ្នកគ្រូ ចំនួន
៣១១នាក់ មកពីសាលាកុមារពិការភ្នែក និងកុមារគថ្លង់ភ្នំពេញថ្មី
សាលាកុមារគថ្លង់ ច្បារអំពៅ និងបុរីកុមារកំព្រា ASPECA
បានមកចូលរួមក្នុងពិធីអាហារថ្ងៃត្រង់នេះ
ដែលរៀងចំឡើងដើម្បីចូលរួមអបអរសាទទិវាបុណ្យចូលឆ្នាំថ្មីប្រពៃណីជាតិ
ឆ្នាំម្សាញ់ បញ្ចស័ក ពុទ្ធ សករាជ ២៥៥៧
ដែលនឹងឈានចូលមកដល់នៅពេលដ៏ខ្លីខាងមុខនេះ។
សម្តេចតេជោនាយករដ្ឋមន្ត្រី
និងលោកជំទាវ នាឱកាសនោះបានផ្តល់អំណោយសំរាប់កុមារពិការភ្នែក
និងកុមារគថ្លង់ ដែលចូលរួមផងដែរ ដោយក្នុងម្នាក់ៗទទួលបានថវិកា
៥ម៉ឺនរៀល។ លោកគ្រូអ្នកគ្រូ និងបុគ្គលិកក្នុងម្នាក់ៗទទួលបានថវិកា
១០ម៉ឺនរៀល។ ជូនសាលាកុមារគថ្លង់ ច្បារអំពៅថវិកា ៣លានរៀល។
ជូនបុរីកុមារកំព្រាអេសប៉េកាថវិកាចំនួន ៣លានរៀល។
ជូនសាលាកុមារពិការភ្នែក និងកុមារគថ្លង់ភ្នំពេញថ្មីថវិកាចំនួន
៥លានរៀលផងដែរ៕