លោកជំទាវ ផេនី រីឆាត (Penny Rechards)
ឯកអគ្គរាជទូតអូស្រ្តាលី
ដែលត្រូវបញ្ចប់អាណត្តិបេសកកម្មការទូតនៅកម្ពុជាបានជម្រាបជូនម្តេច
អគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី៣ ខែមេសា
ឆ្នាំ២០១៣ ថា នៅក្នុងអណត្តិរយៈពេល ២ឆ្នាំ ៦ខែ
នៃបេសកកម្មការទូតនៅកម្ពុជា
លោកជំទាវបានកត់សម្គាល់នៅការរីកចម្រើននៃកិច្ចសហប្រតិបត្តិការរវាង
ប្រទេសទាំងពីរ (អូស្ត្រាលី-កម្ពុជា)។ លោកជំទាវ
ផេនី រីឆាត បានមានប្រសាសន៍យ៉ាងដូច្នេះ
នៅក្នុងឱកាសចូលជួបសម្តែងការគួរសមជម្រាបលាសម្តេចតេជោ
នាយករដ្ឋមន្ត្រី នៅវិមានសន្តិភាព រាជធានីភ្នំពេញ។
ឯកឧត្តម
អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីបានឲ្យដឹងថា
ចំណុចវិជ្ជមានដែលលោកជំទាវ ផេនី រីឆាត កត់សម្គាល់រួមមាន៖ ទី១,
នៅក្នុងអំឡុងនៃបេសកកម្មរបស់លោកជំទាវ
គឺទំនាក់ទំនងកិច្ចពិភាក្សាទ្វេភាគីលើបញ្ហានយោបាយបានប្រព្រឹត្តទៅ
យ៉ាងសកម្ម និងល្អប្រសើរ។ ទី២,
កិច្ចសហប្រតិបត្តិការទ្វេភាគីរវាងប្រទេសទាំងពីរមានការរីកចម្រើន
បើគិតពីជំនួយរបស់អូស្រ្តាលីមកកាន់កម្ពុជា បានកើនឡើងពីប្រមាណ
៦០លានដុល្លារអាមេរិក រហូតដល់
៨០លានដុល្លារអាមេរិកដែលសុទ្ធសឹងតែជាជំនួយឥតសំណង
ដែលផ្តោតការយកចិត្តទុកដាក់ទៅដល់វិស័យកសិកម្ម វិស័យសុខមាលភាព
ជាពិសេសសុខមាលភាពកុមារ ហេដ្ឋារចនាសម័្ពន្ធ និងប្រព័ន្ធយុត្តិធម៌។ ទី៣,
វិស័យវិនិយោគ និងពាណិជ្ជកម្ម ដោយលោកជំទាវឯកអគ្គរាជទូត
បានមានប្រសាសន៍ថា ទោះបីមានការរីកចម្រើនមែន
ក៏ប៉ុន្តែសក្តានុពលក្នុងការពង្រីកទៅលើវិស័យពាណិជ្ជកម្ម
និងវិនិយោគនេះនៅមានច្រើនណាស់ និងទី៤, លោកជំទាវឯកអគ្គរាជទូត
បានសំដែងនូវការរីករាយចំពោះទំនាក់ទំនងរវាងប្រជាជន និងប្រជាជន
ដែលសព្វថ្ងៃនេះ
មានការកើនឡើងនូវចំនួនអ្នកស្ម័គ្រចិត្តអូស្រ្តាលីមកកាន់កម្ពុជា
ដែលមានប្រមាណពី ៨០នាក់ទៅ ១០០នាក់
ហើយក៏មានការគាំទ្រពីរាជរដ្ឋាភិបាលកម្ពុជាទៅដល់ជនស្ម័គ្រ
ចិត្តអូស្រ្តាលីផងដែរ។ ជាមួយគ្នានេះ
អូស្រ្តាលីនឹងផ្តល់អាហារូបករណ៍ថ្នាក់អនុបណ្ឌិត
និងថ្នាក់បណ្ឌិតប្រមាណ ៥០នាក់ទៅ ៥៥នាក់ផងដែរ។
លោក
ជំទាវ ផេនី រីឆាត ឯកអគ្គរាជទូតអូស្ត្រាលី
ក៏បានថ្លែងអំណរគុណយ៉ាងជ្រាលជ្រៅជូនចំពោះមន្រ្តីរាជការទាំងអស់
ដែលបានផ្តល់នូវការគាំទ្រធ្វើឲ្យបេសកកម្មការទូតរបស់លោកជំទាវនៅ
កម្ពុជាបានទទួលជោគជ័យយ៉ាងត្រចះត្រចង់។
“ក្នុងរយៈពេលពីរឆ្នាំកន្លះកន្លងមកនេះ
ទំនាក់ទំនងទ្វេភាគីរវាងប្រទេសទាំងពីរកម្ពុជា-អូស្រ្តាលី
មានការរីកចម្រើន
ហើយកិច្ចសហប្រតិបត្តិការក៏កាន់តែមានភាពជិតស្និទ្ធថែមទៀត”។
សម្តេច
តេជោនាយករដ្ឋមន្រ្តី បានថ្លែងអំណរគុណជូនចំពោះប្រទេសអូស្រ្តាលី
ដែលតែងតែបានផ្តល់ជំនួយដល់កម្ពុជា
ជាពិសេសការផ្តល់ជំនួយសង្រ្គោះនៅពេលកម្ពុជាជួបប្រទះទឹកជំនន់កាល
ពីឆ្នាំ២០១១ កន្លងទៅនេះ។
សម្តេច
តេជោក៏បានឯកភាពជាមួយលោកជំទាវ ផេនី រីឆាត
ពាក់ព័ន្ធនឹងសក្តានុពលលើបញ្ហាវិនិយោគ
និងការធ្វើពាណិជ្ជកម្មនៅកម្ពុជា ដោយសម្តេចមានប្រសាសន៍ថា
ប្រទេសទាំងពីរ (កម្ពុជា-អូស្ត្រាលី)
គប្បីស្វែងរកសក្តានុពលនេះ ឲ្យបានកាន់តែរីកធំធាត់ឡើងថែមទៀត
ជាពិសេសទៅលើបញ្ហាពាណិជ្ជកម្ម និងទេសចរណ៍ជាដើម៕