ដោយបានរំលឹកដល់ប្រទេសជប៉ុន ដែលបានចូលរួមចំណែក
ក្នុងការស្វែងរកសន្តិភាពនៅកម្ពុជា និងបានជួយកម្ពុជាលើវិស័យក្នុងការកសាង
និងអភិវឌ្ឍន៍ប្រទេស សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទទួលសវនាការ ជាមួយលោក Akihiko Tanaka ប្រធានអង្គការចាយកា(JICA) នាព្រឹកថ្ងៃទី២៧ ខែកុម្ភៈ ឆ្នាំ២០១៤ បានមានប្រសាសន៍កត់សម្គាល់ថា
ឥឡូវនេះភាគីទាំងពីរ (កម្ពុជា-ជប៉ុន) បានលើកស្ទួយទំនាក់ទំនងឱ្យក្លាយទៅជាដៃគូយុទ្ធសាស្ត្រ។
ឯកឧត្តម អ៊ាង សុផល្លែត ជំនួយការសម្តេចតេជោ
នាយករដ្ឋ មន្ត្រីបានឱ្យដឹងថា នៅក្នុងជំនួបសម្តែងការគួរសម
និងពិភាក្សាការងារ នៅវិមានសន្តិភាពទីស្តីការនាយករដ្ឋមន្ត្រី លោក
Akihiko Tanaka ប្រធានអង្គការចាយកា(JICA) បានគោរពជំរាបជូនសម្តេចតេជោថា លោកមានសេចក្តីរីករាយជាទីបំផុត
ដែលបានធ្វើដំណើរតាមរថយន្តពីទីក្រុងហូជីមិញ មកកាន់ទីក្រុងភ្នំពេញតាមផ្លូវជាតិលេខ១
ហើយលោក បានឈប់ពិនិត្យមើលការសាងសង់ស្ពានអ្នកលឿង ឃើញក្រុមវិស្វករ បាននិងកំពុងធ្វើការសាងសង់
ហើយស្ពាននេះ នឹងត្រូវចប់សព្វគ្រប់ដាក់ឱ្យដំណើរការនៅខែមីនា ឆ្នាំ២០១៥ខាងមុខ។
លោក Akihiko Tanaka
ប្រធានអង្គការចាយកា(JICA)
បានមានប្រសាសន៍ថា ការធ្វើដំណើរនេះ បានឆ្លុះបញ្ចាំងឱ្យឃើញនូវសារៈសំខាន់
នៃការជួយដល់កម្ពុជា ជាពិសេសលើវិស័យហេដ្ឋារចនាសម្ព័ន្ធ ដែលមានផលប្រយោជន៍មិនត្រឹមតែនៅកម្ពុជាទេ
ជាពិសេសការតភ្ជាប់ជាមួយនឹងតំបន់តាមក្របខណ្ឌអាស៊ាន ក៏ដូចជាតំបន់មេគង្គផងដែរ។
សម្រាប់ជំនួយក្នុងការអភិវឌ្ឍន៍ប្រទេសកម្ពុជា
លោក Akihiko Tanaka បានបញ្ជាក់ថា
ការជួយរបស់ជប៉ុនតាមរយៈផ្លូវជាតិលេខ៥ ក៏មានសារៈសំខាន់ដូចគ្នានេះដែរ
ហើយលោក ក៏បានជំរាបជូនសម្តេចដែរថា ជប៉ុនក៏បានយកចិត្តទុកដាក់ និងជួយដល់កម្ពុជា
នៅលើវិស័យសុខុមាលភាពសង្គមផងដែរ។
សម្តេចតេជោ ហ៊ុន សែន
មានប្រសាសន៍វាយតម្លៃអំពីទំនាក់ទំនង
និងកិច្ចសហប្រតិបត្តិការរវាងប្រទេសកម្ពុជា និងជប៉ុនថា ទំនាក់ទំនងរវាងកម្ពុជា
និងជប៉ុន គឺបានលើកស្ទួយដល់ភាពជាដៃគូយុទ្ធសាស្ត្រ ដែលនេះ គឺជាអ្វីដែលបានបានប្រកាសដោយនាយករដ្ឋមន្ត្រីជប៉ុន
និងសម្តេចតេជោផ្ទាល់ នៅពេលដែលសម្តេច បានអញ្ជើញទៅបំពេញទស្សនកិច្ចនៅប្រទេសជប៉ុន
កាលពីខែមេសា ឆ្នាំ២០១៣ កន្លងទៅនេះ។
សម្តេចតេជោបញ្ជាក់ដែរថា
ប្រទេសជប៉ុន ក៏បានចូលរួមចំណែក ក្នុងការស្វែងរកសន្តិភាពនៅកម្ពុជានិងបានជួយកម្ពុជាលើវិស័យ
អភិវឌ្ឍន៍ ហើយឥឡូវនេះ បានលើកស្ទួយទំនាក់ទំនងឱ្យក្លាយទៅជាដៃគូយុទ្ធសាស្ត្រ។
ជប៉ុនបានដើរតួយ៉ាងសំខាន់ ក្នុងការផ្តល់ជំនួយឱ្យកម្ពុជា គ្របដណ្តប់ស្ទើរគ្រប់វិស័យ
ដូចជាការកសាងស្ពានអ្នកលឿង និងស្ពានដទៃទៀត រួមទាំងហេដ្ឋារចនា សម្ព័ន្ធផ្សេងៗ
ដែលមានសារៈសំខាន់ណាស់ ក្នុងការតភ្ជាប់កម្ពុជា
និងក្នុងតំបន់អាស៊ាន ក៏ដូចជាមេគង្គផងដែរ។
សម្តេចតេជោនាយករដ្ឋមន្ត្រីបានសំដែងនូវការអបអរសាទរ
ចំពោះជំនួយរបស់ជប៉ុន រួមទាំងជំនួយការសាងសង់ប្រព័ន្ធធារាសាស្ត្រក្នុងស្រុកកណ្តាលស្ទឹង ការជួយកម្ពុជាលើវិស័យអគ្គិសនី
ទឹកស្អាត បណ្តាញលូនៅទីក្រុងភ្នំពេញ ការជួយដល់មជ្ឈមណ្ឌលដោះមីន និងយុទ្ធភណ្ឌមិនទាន់ផ្ទុះព្រមទាំងការជួយដល់កំពង់ផែក្រុងព្រះសីហនុឱ្យកាន់តែទំនើប
និងទាន់សម័យ ជាមួយនេះ សម្តេចបានស្នើសុំឱ្យការជួយជំរុញឱ្យអ្នកវិនិយោគ
និងទេសចរណ៍ជប៉ុន មកកាន់កម្ពុជាឱ្យកាន់តែច្រើនឡើង។
សម្តេចតេជោបានមានប្រសាសន៍រំលឹកឡើងវិញថា
នៅខែមិថុនាខាងមុខនេះ ផ្សារទំនើបដ៏ធំរបស់ជប៉ុន គឺផ្សារអ៊ីអន
នៅរាជធានីភ្នំពេញនឹងបញ្ចប់ការសាងសង់ និងសម្ពោធដាក់ឱ្យប្រើប្រាស់ជាផ្លូវការ៕