ពិតណាស់ថា ជោគជ័យរបស់កញ្ញា ស៊ន សៀវម៉ី
ដែលបានទទួលជ័យលាភីមេដាយមាសតេក្វាន់ដូ
នៅក្នុងការប្រកួតកីឡាអាស៊ីលើកទី១៧ នៅប្រទេសកូរ៉េ គឺជាមោទនភាពរបស់ប្រទេសកម្ពុជា លើឆាកអន្តរជាតិ ក្នុងការបង្ហាញឲ្យឃើញ
ពីភាពវិជ្ជមាននៃការខិតខំរបស់រាជរដ្ឋាភិបាល ដើម្បីបង្កើតសាមគ្គីភាព
និងការផ្សារភ្ជាប់ប្រទេសកម្ពុជាជាមួយប្រទេសក្នុងតំបន់ និងបណ្តាប្រទេសក្នុងពិភពលោកផងដែរ។
ក៍ប៉ុន្តែការខិតខំទាំងនេះ ត្រូវបានបង្អាក់ដំណើរដោយក្រុមមនុស្សមួយក្រុមតូចដែលមានបំណងធ្វើឲ្យកម្ពុជាបែកបាក់មិត្តភាព
និងកាន់តែធ្វើឲ្យមានភាពឃ្លាតឆ្ងាយពីប្រទេសជិតខាងក៏ដូចជាប្រទេសមួយចំនួននៅលើពិភពលោកទៅវិញ
។
ជាក់ស្តែង គណបក្សសង្គ្រោះជាតិ
ដែលមាននិន្នាការនយោបាយ រើសអើងពូជសាសន៍ បានធ្វើសកម្មភាពផ្សព្វផ្សាយ
តាមគ្រប់រូបភាព នូវសកម្មភាពហិង្សា ញុះញង់ បង្កជម្លោះជាមួយប្រទេសជិតខាង
គឺមិនបានឆ្លុះបញ្ចាំងពីប្រយោជន៍ជាតិជាធំ និងមិនដែលថ្លឹងថ្លែងពីផលប៉ះពាល់ទៅលើសេដ្ឋកិច្ចរបស់ប្រទេសជាមិត្ត
និងកិច្ចសហប្រតិបត្តិការជាមួយប្រទេសជិតខាងសោះឡើយ ។
ការញុះញង់ រើសអើងពូជសាសន៍នេះ មិនគ្រាន់តែជាកង្វល់របស់ថ្នាក់ដឹកនាំក្នុងប្រទេសតែប៉ុណ្ណោះទេ
ប៉ុន្តែបញ្ហានេះ ក៏ជាកង្វល់របស់សកលលោកផងដែរ ជាពិសេស ទង្វើជ្រុលនិយម នាំឲ្យមានជាហិង្សាបង្កឡើងដោយគណបក្សសង្គ្រោះជាតិ
និងក្រុមសង្ឃអត់វិន័យមួយចំនួន គឺ
បាន និងកំពុងដើរផ្ទុយពីគោលការណ៍អនុសញ្ញាអន្តរជាតិ
ស្តីពីការបំបាត់រាល់ទម្រង់នៃការរើសអើងពូជសាសន៍ឆ្នាំ
១៩៦៩ផងដែរ ។ សកម្មភាពទាំងអស់នេះហើយ គឺជាប្រភពនៃការបែកបាក់ផ្ទៃក្នុងប្រទេស
និងក៏ជាការបង្កឲ្យមានសង្គ្រាមស៊ីវិលកើតមានឡើងជាថ្មីម្តងទៀត ដែលមិនអាចស្មានបាន។
តាមរយៈឯកសារវីដេអូរបស់សារព័ត៌មានអន្តរជាតិ BBC ចេញផ្សាយថ្ងៃទី ៣ ខែតុលា ឆ្នាំ២០១៤ បានលើកឡើងពីការព្រួយបារម្ភយ៉ាងខ្លាំងរបស់ប្រជាជនស្លូតត្រង់រស់នៅក្នុងប្រទេសកម្ពុជាដែលមានសញ្ជាតិខ្មែរស្របច្បាប់ត្រឹមត្រូវ
ក៏ប៉ុន្តែមានសាច់ញ្ញាតិ្តជាជនជាតិវៀតណាម បានបាត់បង់ អាយុជីវិតប្តី និងកូន។ លោក ជិន វ៉ាន់ឈៀង Tran Van Chien ដែលបាត់បង់អាយុជីវិតចោលប្រពន្ធ
ដែលពរពោះកូនស្រី៨ខែ ក្មួយស្រីដែលគួរអោយអាសូរ(មិនស្គាល់ឪពុក) ដែលឪពុកក្មេងស្រីនេះត្រូវបានសំលាប់ដោយគ្មានធម៌មេត្តាពីក្រុមបាតុករ
ដែលទទួលឥទ្ធិពលពីការផ្សព្វផ្សាយរបស់គណបក្ស សង្គ្រោះជាតិ បង្កើតអោយមានការស្អប់ខ្ពើមប្រជាជនខ្មែរវៀតណាម
។
សួរថាតើអ្នកដឹកនាំសកម្មភាពនេះ
គួរតែទទួលខុសត្រូវចំពោះការបាត់បង់នេះដែរឬទេ ?
យោងតាមរដ្ឋធម្មនុញ្ញ មាត្រាទី៣១ ជំពូកទី៣ បានចែងយ៉ាងច្បាស់ថា
ប្រជាពលរដ្ឋខ្មែរមានភាពស្មើគ្នាចំពោះមុខច្បាប់ មានសិទិ្ធសេរីភាព
និងករណីយកិច្ចដូចគ្នាទាំងអស់ ដោយឥតប្រកាន់ពូជសាសន៍ ពណ៍សម្បុរ ភេទ ជំនឿសាសនា
និន្នាការនយោបាយ ដើមកំណើត ជាតិ ឋានៈសង្គម ធនធាន ឬស្ថានភាពឯទៀតឡើយ ។ ម៉្យាងទៀត សេចក្តីប្រកាសជាសកលស្តីពីសិទិ្ធមនុស្សឆ្នាំ
១៩៤៨ និងអនុសញ្ញាស្តីពីការលុបបំបាត់ពីការរើសអើងពូជសាសន៍របស់អង្គការសហប្រជាជាតិ
ក៏បានចែងយ៉ាងច្បាស់អំពីផលវិបាកនៃការអនុវត្តផ្ទុយពីគោលការណ៍ជាលក្ខណៈអន្តរជាតិនេះដែរ។
យ៉ាងណាមិញ បើលោក ថាច់ សេដ្ឋា ជាបុគ្គលស្រលាញ់ប្រទេស ស្រលាញ់ការអភិវឌ្ឍ ស្រលាញ់ និងគោរពសិទ្ធិមនុស្ស គោរពច្បាប់ និងរដ្ឋធម្មនុញ្ញមែននោះ
រូបលោកមិនគួរប្រព្រឹត្តសកម្មភាពអ្វីដែលផ្ទុយពីច្បាប់កំពូលរបស់ប្រទេសឡើយ។
ផ្ទុយទៅវិញ លោក ថាច់ សេដ្ឋា គាត់មិនបានគោរព និងឲ្យតម្លៃសិទ្ធិមនុស្សរបស់អង្គការសហប្រជាជាតិ សោះឡើយ គឺលោកបានដឹកនាំបង្កឲ្យមានការរើសអើងទៅលើដើមកំណើតជាតិសាសន៏របស់បុគ្គល។
ទង្វើនេះ គឺជាបញ្ហាចំបងដែលនឹងជំរុញឲ្យមានអសន្តិសុខ និងអស្ថេរភាពក្នុងប្រទេស
ជាពិសេសទៅលើការវិនិយោគរបស់បរទេស ដែលជាប្រភពសំខាន់ក្នុងសេដ្ឋកិច្ចជាតិ ក៍ដូចការបង្កើតការងារជូនប្រជាជនខ្មែរ។
លោក ថាច់ សេដ្ឋា ប្រធានសមាគមខ្មែរកម្ពុជាក្រោម
ដែលជាមេដឹកនាំធ្វើបាតុកម្មអានាធិបតេយ្យ
បង្កហិង្សាមុខស្ថានទូតវៀតណាមប្រចាំនៅកម្ពុជា គប្បីដឹងថា ប្រសិនបើគ្មានសន្តិសុខ
សង្គមទេនោះ នឹងអាចបណ្តាលឲ្យគ្មានការទុកចិត្តពីសំណាក់អ្នកវិនិយោគបរទេសឡើយ និងថែមទាំងបានបង្កឲ្យមានភាពរាំងស្ទះដក្នុងការស្វែងរកការងារធ្វើរបស់ប្រជាពលរដ្ឋ
និងបង្កឲ្យជនបរទេសភ័យខ្លាចក្នុងការមកបណ្តាក់ទុនវិនិយោគទៀតផង។
បើទោះជាខ្មែរកណ្តាល ខ្មែរក្រោម
ខ្មែរកាត់ចិន ឬខ្មែរអាមេរិច គឺសុទ្ធតែជាខ្មែរដូចគ្នាទាំងអស់ គឺទាំងអស់គ្នាចូលរួមក្នុងសង្គមដូចគ្នា
ចូលរួមក្នុងចង្វាក់សេដ្ឋកិច្ចប្រទេសស្មើៗគ្នា ដូច្នេះហើយបានជារាជរដ្ឋាភិបាលមានតួនាទីដ៍សំខាន់ក្នុងការប្រតិបត្តិរដ្ឋធម្មនុញ
និងការពារសុវត្ថិភាព រក្សាស្ថេរភាពសង្គមជូនប្រជាជនខ្មែរគ្រប់រូប
ដោយមិនប្រកាន់ពូជសាសន៏ និងកំណើតដើមឡើយ ។ឧទាហរណ៍ដូចជាប្រទេសអូស្ត្រាលីដែលបើកចំហរទ្វារ
ស្វាគមន៏ប្រជាជនលើពិភពលោកដែលមានជំនាញឲ្យចូលធ្វើការ និងពលរដ្ឋទូទៅដែលចង់មករស់នៅប្រទេសអូស្ត្រាលី។
នេះគឺឆ្លុះបញ្ចាំងឲ្យឃើញថា កិច្ចសហប្រតិបត្តិការល្អរវាងប្រជាជន និងប្រជាជន
ក៏ដូចជាជាមួយរាជរដ្ឋាភិបាល នៅក្នុងប្រទេសអូស្ត្រាលី
ធ្វើឲ្យសេដ្ឋកិច្ចរបស់ប្រទេសអូស្ត្រាលីទាំងមូលរីកចំរើនគួរឲ្យកត់សម្គាល់។
បើពិនិត្យមើលពីបរិបទក្នុងសង្គមកម្ពុជាវិញ សួរថាតើ លោក ថាច់ សេដ្ឋា ដែលជាសកម្មជនរបស់គណបក្សសង្គ្រោះជាតិ
ជាទីប្រឹក្សាផ្ទាល់របស់លោក កឹម សុខា
អនុប្រធានទី១រដ្ឋសភាដែលជាគណបក្សមួយត្រូវផ្តល់តម្លៃឲ្យធ្វើជាតំណាងប្រជាជនក្នុងសភានោះ
គប្បីគិតពីប្រយោជន៏សេដ្ឋកិច្ចជាតិ គិតពីការគោរពសិទ្ធិមនុស្ស
និងគោរពរដ្ឋធមនុញ ដែឬទេ ?
ពិតណាស់ថា លោក ថាច់ សេដ្ឋា ដែលជាសមាជិកសកម្មរបស់គណបក្សសង្គ្រោះជាតិ
និងក៍ ជាអ្នកដឹកនាំបាតុកម្មជាច្រើនលើកច្រើនសារក្នុងបំណងបង្ករហឹង្សាដោយបង្ហាញអោយឃើញ
ពីភាពគ្មានសុជីវធម៌ក្នុងការដឹកនាំ ដោយបានដុតបំផ្លាញទង់ជាតិរបស់ប្រទេសវៀតណាម
ដែលជាតំណាង អោយប្រទេសជាតិគេ និងប្រជាជនវៀតណាមទាំងមូល ។ ទង្វើនេះវាហាក់បីដូចជាការដុតបំផ្លាញកិត្តិយសប្រទេស
ហើយក៏ជាការស្តែងអោយឃើញថា អ្នកដឹកនាំឲ្យមានការដុតនោះជាបុគ្គលបែបណា? ការយកហិង្សា
និងមិនយកឧត្តមគតិមកដោះស្រាយបញ្ហា គឺជាការបន្ទាបកិត្តិយសប្រទេសកម្ពុជាទាំងមូល
ដោយហេតុថា ប្រទេសយើងមានសភា មានច្បាប់ត្រឹមត្រូវ ចុះហេតុអ្វីបានជាយក
ទងើ្វដែលអាណាធិបតេយ្យមកដោះស្រាយបញ្ហាទៅវិញ? ។ ម៉្យាងវិញទៀត ប្រជាជនខ្មែរដែលធ្លាប់មានវប្បធម៌ថ្កុំថ្កើង
ស្លូតបូត សុភាពរាបសារ ក៏គួរពិចារណាឡើងវិញម្តងទៀតថា ការដែលវៀតណាម
ផ្លាស់ប្តូរអ្នកនាំពាក្យស្ថានទូតថ្មី
គឺអាចមានតម្លៃគ្រប់គ្រាន់ក្នុងការបញ្ជាក់ថា ការនិយាយពីបញ្ហាទឹកដីខ្មែរកម្ពុជាក្រោមកន្លងមកនោះ
ដែលក្រុមបាតុករចោទថា ជាការបំភ្លៃប្រវត្តិសាស្ត្រ អាចថា
គេពិតជាបានទទួលកំហុសហើយ។ ដូច្នេះ
សូមខ្មែរពន្លត់ទៅនូវការទាមទារយុត្តិធម៌នៅពីក្រោយការសូមអភ័យទោសរបស់អ្នកដទៃ
ដែលគេដឹងថា បានធ្វើខុស។
ការអាធ្យាស្រ័យក៏ជាការទុកមុខមាត់កិត្តិយសដល់ប្រទេសជិតខាងផងដែរ។
អំពើហិង្សាមិនមែនជាជម្រើសល្អនាំឲ្យសង្គមមានសន្តិភាព
និងស្ថិរភាពនយោបាយឡើយ ។ ផ្ទុយទៅវិញ ហិង្សា នឹងនាំឲ្យសង្គមខ្មែរបែកបាក់
បង្កឲ្យមានអរីភាពជាមួយប្រទេសជិតខាង និងនាំឲ្យអន្តរជាតិវាយតម្លៃតាមរយៈសកម្មភាពរបស់សកម្មជនគណបក្សសង្គ្រោះជាតិ
ថា ប្រទេសខ្មែរ ជាប្រទេសអត់ច្បាប់ អត់ទំលាប់ និងប្រជាជន មានចរិតឃោរឃៅ អសុជីវធម៌ទៅវិញនោះទេ។
ទោះជាយ៉ាងណា
រាជរដ្ឋាភិបាលដែលប្រកាន់ខ្ជាប់នូវការគោរពច្បាប់ គឺបាន និងកំពុងខិតខំលើកតម្កើងការអនុវត្តច្បាប់
ដើម្បីពង្រឹងនូវនីតិរដ្ឋនៅកម្ពុជា និងទទួលបាននូវការវាយតម្លៃ ពីសំណាក់អន្តរជាតិអំពីមុខមាត់ កិត្តិយសរបស់កម្ពុជា
ដែលពុំគួរគប្បីត្រូវបានក្រុមអគិតិមួយចំនួនតូច ព្យាយាមធ្វើឲ្យប្រទេសរបស់ខ្លួនអាប់មុខទៅវិញនោះឡើយ
។
ដូច្នេះ គណបក្សសង្គ្រោះជាតិ និងសកម្មជន លោក ថាច់
សេដ្ឋា រួមជាមួយក្រុមសង្ឃជ្រុលនិយមមួយចំនួន
គួរបញ្ឈប់ការញុះញង់ អុជអាល បង្កហិង្សា ក្នុងន័យកេងចំណេញយកផលប្រយោជន៏បក្ស
និងបុគ្គល ធំជាងកិត្តិយសប្រទេសជាតិទៀតទៅ។ ដូចគ្នានេះដែរ
ព្រះសង្ឃគួរគប្បីប្រកាន់យកនូវធម៌ខន្តី
ទើបសាកសមជាបុព្វជិតដែលប្រជាពលរដ្ឋគោរព និងនាំឲ្យព្រះពុទ្ធសាសនារុងរឿង៕
អត្ថបទដោយ៖ សុខ ពេជ្រ