សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញទៅដល់ចំណតអាកាសយានដ្ឋានអន្តរជាតិទីក្រុងប៉េកាំង សាធារណរដ្ឋប្រជាមានិតចិន ប្រកបដោយសុវត្ថិភាព កាលពីវេលាម៉ោង១៣ និង២០នាទី ម៉ោងនៅទីក្រុងប៉េកាំង ត្រូវនិងម៉ោង១២និង២០នាទី ម៉ោងនៅរាជធានីភ្នំពេញថ្ងៃទី៧ ខែវិច្ឆិកា ឆ្នាំ២០១៤នេះ ដើម្បីចូលរួមកិច្ចសន្ទនាស្តីពីការពង្រឹងភាពជាដៃគូការតភ្ជាប់ និងកិច្ចប្រជុំកំពូលរបស់នាយកប្រតិបត្តិការ នៃកិច្ចសហប្រតិបត្តិការសេដ្ឋកិច្ច អាស៊ីប៉ាស៊ីហ្វីក (APEC CEO) ដែលនឹងប្រព្រឹត្តធ្វើឡើងនៅថ្ងៃទី៨-៩វិច្ឆិកា ឆ្នាំ២០១៤។
នៅចំណតអាកាសយានដ្ឋានអន្តរជាតិ ទីក្រុងប៉េកាំង វត្តមាននៃការអញ្ជើញដល់របស់ សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ត្រូវបានការធ្វើគារវកិច្ចស្វាគមន៍ពីឯកឧត្តម លី ហ្ចីហ្គៀង អនុប្រធានសភាប្រជាជនចិន ព្រមទាំងថ្នាក់ដឹកនាំចិនជាច្រើនរូប។
វត្តមានរបស់សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ទៅកាន់ទីក្រុងប៉េកាំងប្រទេសចិននៅពេលនេះ គឺឆ្លើយតបទៅតាមការអញ្ជើញដ៏ខ្ពង់ខ្ពស់ពីឯកឧត្តម ស៊ី ជីភីង ប្រធានាធិបតីនៃសាធារណរដ្ឋប្រជាមានិតចិន និងឯកឧត្តម ជាំង ស៊ីងវ៉ៃ អនុរដ្ឋមន្រ្តីក្រសួងសេដ្ឋកិច្ច និងជាប្រធានគណៈកម្មាធិការរៀបចំកិច្ចប្រជុំ APEC CEO ឆ្នាំ២០១៤។ តាមកម្មវិធីដែលបានគ្រោងទុក នៅរសៀលថ្ងៃទី៧វិច្ឆិកានេះ សម្តេចតេជោនាយករដ្ឋមន្រ្តី និងជួបពិភាក្សាការងារជាមួយ ឯកឧត្តម ស៊ី ជីភីង ប្រធានាធិបតីនៃសាធារណរដ្ឋប្រជាមានិតចិន និងជួបពិភាក្សាការងារជាមួយឯកឧត្តម លី យ៉ុនចាវ អនុប្រធានាធិបតី នៃសាធារណរដ្ឋប្រជាមានិតចិន។
ដូចគ្នានិងបណ្តា មេដឹកនាំនៃប្រទេស APEC ដទៃទៀតដែរនោះ សម្តេចតេជោនាយករដ្ឋមន្រ្តី និងថ្លែងសុន្ទរកថាគន្លឹៈចំនួនពី ទៅកាន់កិច្ចប្រជុំដ៏មានសារៈសំខាន់នោះ ក្នុងនោះសុន្ទរកថាគន្លឹៈ ទី១ នៅក្នុងកិច្ចសន្ទនាស្តីពីការពង្រឹងភាពជាដៃគូនៃការតភ្ជាប់ ក្នុងកិច្ចប្រជុំកំពូល នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វីក ក្នុងពិធីបើកកិច្ចប្រជុំកំពូលដែលធ្វើឡើងនៅរសៀលថ្ងៃទី៨វិច្ឆិកា និងសុន្ទរកថាគន្លឹៈទី២ ថ្លែងនៅក្នុងកិច្ចប្រជុំកំពូលប្រធានក្រុមហ៊ុន នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វីក នៅព្រឹកថ្ងៃទី៩វិច្ឆិកា។
ជាមួយគ្នានេះសម្តេចតេជោនាយករដ្ឋមន្រ្តី នឹងមានគំរោងជួបពិភាក្សាការងារជាមួយនឹងថ្នាក់ដឹកនាំ និងក្រុមហ៊ុនវិនិយោគចិនជាច្រើនទៀត៕
