នៅព្រឹកថ្ងៃទី៨វិច្ឆិកា ឆ្នាំ២០១៤ ដែលជាថ្ងៃទី២នៃការអញ្ជើញចូលរួម កិច្ចសន្ទនាដើម្បីពង្រឹងភាពជាដៃគូការ តភ្ជាប់ និងកិច្ចប្រជុំកំពូលនាយកប្រតិបត្តិ នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វីក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឲ្យឯកឧត្តម វង់ ចែវរ៉ុយ អនុប្រធានសភាពិគ្រោះនយោបាយ និងជារដ្ឋមន្រ្តីគណៈទាក់ទងអន្តរជាតិ នៃគណៈកម្មាធិការ កណ្តាល បក្សកុំម្មុយនីស្តចិន ចូលជួបសំដែងការគួរសម និងពិភាក្សាការងារ។
ក្នុងជំនួបដ៏មានសារៈសំខាន់នោះ ឯកឧត្តម វង់ ចែវរ៉ុយ មានប្រសាសន៍សំដែងនូវការវាយតំលៃខ្ពស់ ចំពោះទំនាក់ទំនង និងកិច្ចសហប្រតិបត្តិការនៃប្រទេសទាំងពីរកម្ពុជា‑ ចិន ដែលបាននិងឈានទៅកាន់ចំណុចកំពូលថ្មីមួយទៀត។
ជាការឆ្លើយតបសម្តេចតេជោនាយករដ្ឋមន្រ្តី មានប្រសាសន៍ថា នៅក្នុងទំនាក់ទំនងនៃប្រទេសទាំងពីរកម្ពុជា‑ ចិន យើងបានឈានដល់ចំណុចកំពូលនៃការអនុវត្តយុទ្ធសាស្រ្តគ្រប់ជ្រុងជ្រោយ ដែលបាននិងកំពុងធ្វើដំណើរទៅមុខ ប្រកបដោយស្នាមញញឹម និងមោទនភាពខ្ពស់បំផុត។ សម្តេចតេជោនាយករដ្ឋមន្រ្តីក៏បានថ្លែងនូវអំណរគុណយ៉ាងជ្រាលជ្រៅបំផុត ជូនចំពោះរដ្ឋាភិបាល និងប្រជាជនចិន ដែលជានិច្ចកាលតែងតែជួយឧបត្ថភម្ភ គាំទ្រ និងផ្តល់ជំនួយគ្រប់បែបយ៉ាងដល់ការអភិវឌ្ឍរបស់ប្រទេសកម្ពុជា ឲ្យមានការរីកចំរើនយ៉ាងឆាប់រហ័ស បំផុតនោះ។ សម្តេចតេជោមានប្រសាសន៍សង្កត់ធ្ងន់ថា ភាពរីកចំរើនរបស់ប្រទេសកម្ពុជា គឺពិតជាមិនអាចកាត់ផ្តាច់ពីការជួយឧបត្ថម្ភគាំទ្រ ពីសំណាក់រដ្ឋាភិបាល និងប្រជាជនចិននោះទេ។
បន្ទាប់មកនៅព្រឹកថ្ងៃដដែលនោះដែរ សម្តេចតេជោនាយករដ្ឋមន្រ្តី បានអនុញ្ញាតឲ្យលោក ហ្វេង ស៊ីដុង ប្រធានក្រុមប្រឹក្សាភិបាល នៃក្រុមហ៊ុនរដ្ឋសម្រាប់ការវិនិយោគ និងការអភិវឌ្ឍចិន ចូលជួបសំដែង ការគួរសម។ លោកប្រធានក្រុមហ៊ុនមានប្រសាសន៍ជំរាបជូនសម្តេចតេជោនាយករដ្ឋមន្រ្តីថា ក្រុមហ៊ុនរបស់លោក គឺជាក្រុមហ៊ុនរដ្ឋដ៏ធំនៅក្នុងប្រទេសចិន ដែលបានធ្វើការវិនិយោគនៅសហរដ្ឋអាមេរិក អូស្រ្តាលី និង ប្រទេសឥណ្ឌូណេស៊ី។ លោកប្រធានមានប្រសាសន៍បន្តថា ដោយសារតែប្រទេសកម្ពុជាមានសក្តានុពល ក្នុងការទាក់ទាញការវិនិយោគពីក្រៅប្រទេស ក្រុមហ៊ុនរបស់លោកមានគោលបំណងទៅធ្វើការវិនិយោគនៅក្នុងប្រទេសកម្ពុជា ដោយធ្វើការវិនិយោគរួមគ្នាជាមួយនិងអ្នកឧកញ៉ា គិត ម៉េង ប្រធានក្រុមហ៊ុនរ៉ូយ៉ាល់គ្រុប ក្នុងការវិនិយោគលើការសាងសង់ផ្លូវរថភ្លើង រោងចក្រថាមពលអគ្គិសនីប្រើថាមពលសំរាម ការផលិត ជី និងការវិនិយោគលើវិស័យទេសចរណ៍ តាមរយៈការបង្កើតរម្មណីដ្ឋានលើកកោះរ៉ុង។
សម្តេចតេជោនាយករដ្ឋមន្រ្តីមានប្រសាសន៍ថា ជានិច្ចកាលកម្ពុជាតែងតែស្វាគមន៍ចំពោះអ្នកវិនិយោគបរទេសទាំងអស់ និងផ្តល់លទ្ធភាពឲ្យអ្នកវិនិយោគទាំងអស់ ធ្វើការសិក្សាពីសក្តានុពលសេដ្ឋកិច្ច នៅកម្ពុជាមុននិងធ្វើការវិនិយោគ។ សម្តេចតេជោនាយករដ្ឋមន្រ្តីមានប្រសាសន៍សង្កត់ធ្ងនើថា ដោយសារ តែប្រទេសយើងទាំងពីរមានទំនាក់ទំនង និងកិច្ចសហប្រតិបត្តិការជាមួយគ្នាល្អ រាជរដ្ឋាភិបាលបានលើកទឹកដល់អ្នកវិនិយោគទុនចិន មកបណ្តាក់ទុនវិនិយោគនៅកម្ពុជា។ សម្តេចតេជោនាយករដ្ឋមន្រ្តីក៏បានស្វាគមន៍យ៉ាងពេញទំហឹង ចំពោះក្រុមហ៊ុនរដ្ឋសម្រាប់ការវិនិយោគ និងអភិវឌ្ឍចិន ដែលបានសហការវិនិយោគ ជាមួយនិងអ្នកឧកញ៉ា គិត ម៉េង និងបានចាត់ទុកថា ក្រុមហ៊ុនទាំងពីរនោះ និងជួយជំរុញកំណើនសេដ្ឋកិច្ច របស់ប្រទេសកម្ពុជានៅក្នុងពេលអនាគតដ៏ខ្លីខាងមុខ។
ជាមួយគ្នានេះនៅព្រឹកថ្ងៃដដែលនោះដែរ សម្តេចតេជោនាយករដ្ឋមន្រ្តីបានអនុញ្ញាតឲ្យលោក ហ៊ូ ហូគុន អគ្គនាយកក្រុមហ៊ុន Huawei Technologies Co., Ltd ចូលជួបសំដែងការគួរសម។ ក្នុងជំនួបសំដែង ការគួរសមនោះ លោក ហ៊ូ ហូគុន មានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះសម្តេចតេជោនាយករដ្ឋមន្រ្តី ដែលបានអនុញ្ញាតឪ្យរូបលោក និងសហការីទាំងអស់ បានចូលជួបសំដែងការ គួរសម បើទោះបីជាសម្តេចមមាញឹក្នុងការអញ្ជើញមកចូលរួមក្នុងកិច្ចប្រជុំកំពូល APEC នៅក្នុងទីក្រុងប៉េ កាំង ប្រទេសចិនក៏ពិតមែន។ ក្នុងជំនួបនោះដែរ លោកប្រធានក្រុមហ៊ុនបានរាយការណ៍ជូនសម្តេចតេជោ នាយករដ្ឋមន្រ្តី ពីដំណើរការវិនិយោគរបស់ក្រុមហ៊ុនលោក នៅក្នុងប្រទេសកម្ពុជា រយៈពេល១៥ឆ្នាំមកហើយ និងនៅពេលនេះក្រុមហ៊ុនបាននិងកំពុងបោះជំហានទៅមុខ ក្នុងការជួយជំរុញដលកំណើនសេដ្ឋកិច្ច និងការវិនិយោគនៅកម្ពុជា។
ជាមួយគ្នានេះលោកប្រធានក៏បានគួសបញ្ជាក់ពីការប្តេជ្ញាចិត្ត ក្នុងការពង្រីកការវិនិយោគនៅកម្ពុជា ឲ្យកាន់តែមានល្បឿនលឿនជាងនេះទៅទៀត។ ជាមួយគ្នានេះលោកប្រធានក៏បានជំរាបជូនសម្តេចតេជោនាយករដ្ឋមន្រ្តីដែរថា ក្រុមហ៊ុនរបស់លោកបានជួយបណ្តុះបណ្តាល ជូនដល់មន្រ្តីកម្ពុជាចំនួនជាង១ពាន់នាក់ និងបានផ្តល់ការងារជូនពលរដ្ឋកម្ពុជាបានជាង២០០នាក់ផងដែរ។ សម្តេចតេជោនាយករដ្ឋមន្រ្តីមានប្រសាសន៍សំដែងនូវការស្វាគមន៍ ចំពោះគំនិតផ្តួចផ្តើមរបស់ក្រុមហ៊ុន Huawei Technologies Co., Ltd ក្នុងការពង្រីកវិសាលភាពនៃការវិនិយោគរបស់ខ្លួន នៅកម្ពុជា។
សម្តេចតេជោនាយករដ្ឋមន្រ្តីមានប្រសាសន៍បន្តថា បច្ចុប្បន្ននេះកម្ពុជាកំពុងតែមានស្ថេរភាព និងមានបរិយាកាសអំណោយផលខ្លាំងណាស់ ក្នុងការទាក់ទាញអ្នកវិនិយោគមកបណ្តាក់ទុន វិនិយោគនៅកម្ពុជា តាមរយៈនេះក្រុមហ៊ុនទាំងអស់គួរតែពង្រីកសក្តានុពលរបស់ខ្លួន ឲ្យកាន់តែមានទំហំទ្វេឡើងថែម សំដៅធ្វើយ៉ាងពង្រីកការវិនិយោគ ឲ្យឈានដល់ចំណុចកំពូល និងប្រកបដោយការប្រកួតប្រជែងបំផុតនោះ។
បន្ទាប់មកនៅព្រឹកថ្ងៃដដែលនោះដែរ សម្តេចតេជោនាយករដ្ឋមន្រ្តីបានអនុញ្ញាតឲ្យលោក លូ សាន អគ្គនាយកនិងជាអនុប្រធានក្រុមហ៊ុន China Road & Bridge Corporation ចូលជួបសំដែងការគួរសម ។ លោក លូ សាន អគ្គនាយកនិងជាអនុប្រធានក្រុមហ៊ុន China Road & Bridge Corporation បានគោរពជូនសម្តេចតេជោនាយករដ្ឋមន្រ្តី ក្នុងជំនួបសំដែងការគួរសមនោះថា បន្ទាប់ពីក្រុមហ៊ុនរបស់លោក បានបញ្ចប់ការសាងសង់ស្ពានជ្រោយចង្វារទី២ ប្រកបដោយលទ្ធផលដ៏ត្រចះត្រចង់រួចមក ក្រុមហ៊ុនរបស់ លោកកំពុងតែធ្វើការសិក្សា លើកគំរោងសាងសង់ផ្លូវល្បឿនលឿន ពីរាជធានីភ្នំពេញទៅកាន់ខេត្តព្រះសីហនុ។ លោក លូ សាន មានប្រសាសន៍បន្តថា ផ្លូវល្បឿនលឿនដែលនិងធ្វើការសិក្សានៅពេលខាងមុខ នោះ មានប្រវែង១៨៦គីឡូម៉ែត្រ មាន៤គន្លងទៅពីគន្លងមកពីរគន្លង និងអាចឲ្យរថយន្តបើកបើរក្នុងល្បឿន ១០០គីឡូម៉ែត្រក្នុង១ម៉ោង។ លោកប្រធានមានប្រសាសន៍បន្តថា ក្រុមហ៊ុនកំពុងតែធ្វើការសិក្សាឲ្យកាន់សុក្រិតថែមទៀត មុននិងដំណើរការសាងសង់នូវប្រព័ន្ធផ្លូវគមនាគមន៍ដ៏មានសារៈសំខាន់នោះ ឲ្យបានចេញ ជារូបរាងនៅពេលដ៏ខ្លីខាងមុខ។ សម្តេចតេជោនាយករដ្ឋមន្រ្តី មានប្រសាសន៍ស្វាគមន៍ចំពោះគំរោងដ៏មាន សារៈសំខាន់នោះ និងបានស្នើឲ្យក្រុមហ៊ុនធ្វើការសិក្សាឲ្យបានគត់មុត ពិសេសពន្លឿននូវការសិក្សារបស់ខ្លួន ដើម្បីឈានទៅចុះហត្ថលេខាលើ កិច្ចសន្យនិងកិច្ចព្រមព្រៀង តាមរយៈការវិនិយោគតាមប្រព័ន្ធសាងសង់ ប្រតិបត្តិការ និងផ្ទេរ (B.O.T)។ សម្តេចតេជោមានប្រសាសន៍សង្កត់ធ្ងន់ថា ផ្លូវល្បឿនលឿននោះគឺជាផ្លូវ យុទ្ធសាស្រ្តខ្លាំងណាស់ ក្នុងការជំរុញកំណើនសេដ្ឋកិច្ច តាមរយៈនេះសម្តេចចង់ឲ្យគំរោងនៃការសាងសង់ផ្លូវ ល្បឿនលឿននោះ កើតមានឲ្យបានឆាប់រហ័សបំផុតនៅកម្ពុជា។ បើតាមការអះអាងពីមន្រ្តីបច្ចេកទេសបានឲ្យដឹងថា ប្រព័ន្ធផ្លូវល្បឿនលឿន ដែលគ្រោងនិងវិនិយោគសាងសង់ដោយក្រុមហ៊ុន China Road & Bridge Corporation គឺជាប្រភេទផ្លូវថ្មីសុទ្ធសាត និងមិនប៉ះពាល់ជាមួយនិងកំណាត់ផ្លូវជាតិលេខ៤នោះទេ ហើយកំណាត់ផ្លូវថ្មីនោះគ្រោងនិងធ្វើការសាសងសង់ នៅក្នុងពេលដ៏ខ្លីខាងមុខ។
